1. ¿Ima kaptintaq Dios serviyta astawan sasachakunchik?

¿IMA kaptintaq Dios serviyta astawan sasachakunchik? ¿Sasachakuykuna kaptinchu icha hawkayay kaptinchu? Sasachakuypi tarikuspaqa chayllam Jehova Diosta yuyarinchik. Hawka kawsakuspam ichaqa Jehova Dios serviytaqa manaña anchatachu kallpanchakuchwan. Jehova Diosmi Israel runakunata nirqa chayna hawkayaypi tarikuspanku payta mana qunqarunankupaq (Deut. 6:10-12).

2. ¿Imanasqataq kamachiq Asaqa qatipakunapaq?

² Kamachiq Asam tukuy sunqunwan Jehova Diospi hapipakurqa. Payqa sasachakuy tiempopipas chaynataq hawkayay tiempopipas Diostam hinalla servirqa. Asaqa musu kasqanmanta wañukunankamam Diosman sunqu karqa (1 Rey. 15:14). Chayraykum Juda nacionpi kaq huk law nacionniyuq runakunapa Diosninkupa altarninkunata, muqukunapi kaq capillakunata, rumimanta ruwasqa taytacha-mamachakunata hinaspa Asera sutiyuq mamachata ñutuparurqa (2 Cron. 14:3, 5). Asaqa abuelan Maacatapas kamachiq kasqanmantam qarqururqa taytacha-mamachakunata ruwachisqanrayku (1 Rey. 15:11-13).

3. ¿Imamantam kay yachachikuypi yachasunchik?

³ Asaqa manam taytacha-mamacha yupaychayllatachu tukuchirqa, llaqtamasinkunatapas yanaparqam kaqmanta Jehova Diosta yupaychanankupaq. Chayraykum Jehova Diosqa Asatapas chaynataq Juda nacionniyuq runakunatapas yanaparqa hawka kawsakunankupaq. Juda nacionta Asa kamachiptinmi chunka wata hawkayay karqa (2 Cron.  14:1, 4, 6). Kay yachachikuypim yachasunchik chay hawkayay tiempopi Asa imata ruwasqanmanta. Yachasuntaqmi apostolkunapa tiemponpi Diosta serviqkuna hawkayay tiempo kaptin imata ruwasqankumantapas. Chaymantapas, yachasunmi yachasqanchik lawpi autoridadkuna Diosmanta yachanapaq huñunakuyninchikta hinaspa paymanta willakuyninchikta manaraq harkakuchkaptinku ima ruwananchikmanta.

4. 2 Cronicas 14:2, 6, 7 nisqanman hinaqa, ¿imatam Asaqa hawkayay tiempopi ruwarqa?

⁴ (Qaway 2 Cronicas 14:2, 6, 7). Asam llaqtamasinkunata nirqa muyuriqninkupi nacionkunawan hawkayayta Dios qusqanmanta. Chay tiempopiqa manam Asaqa mana imatapas ruwaspanchu karqa. Aswanmi ruwachirqa murallasqa llaqtakunata, torrekunata hinaspa punkukunata. Chaymi llaqtamasinkunatapas kallpancharqa hawkayay tiempo kachkaptillanraq tukuyta ruwanankupaq.

5. ¿Imanasqataq kamachiq Asaqa achkallay-achka soldadokunata huñurachirqa?

⁵ Kamachiq Asaqa chay hawkayay tiempopitaqmi achkallay-achka soldadokunatapas huñurachirqa (2 Cron. 14:8). ¿Huñurachirqaqa Jehova Diospi mana hapipakuspanchu? Manam. Kamachiq kasqanraykum chaytaqa ruwanan karqa, chaynapi llaqtamasinkuna sasachakuypi mana tarikunanpaq. Chaymantapas, Asaqa yacharqam Juda nacionpi hawkayay tiempoqa tukunanta, chaynamá karqa.

6. ¿Imatam apostolkunapa tiemponpi iñiqkuna ruwarqaku hawkayay tiempopi?

⁶ Apostolkunapa tiemponpi iñiqkunaqa chiqnisqa kaspankupas wakinpiqa hawka tiempopim kawsakurqaku. ¿Imatam chay  hawkayay tiempopi ruwarqaku? Jehova Diosmantam tukuy sunqunkuwan willakurqaku. Hechos qillqapa nisqanman hinamá Diosmanta willakusqankurayku hinalla achkayarqaku. Chayna hawkayay tiempopi anchata kallpanchakusqankuraykum Jehova Diosqa paykunata yanaparqa (Hech. 9:26-31).

7, 8. ¿Imatam apostol Pablowan wakin iñiqkuna ruwarqaku?

⁷ Apostol Pablopas Diosmanta willakusqanta Efeso llaqtapi yachaqkuna uyarisqanraykum chay llaqtapi qipakurqa, chaynapi astawan yachachinanpaq (1 Cor. 16:8, 9).

⁸ Pablowan wakin iñiqkunam 49 watapi Diosmanta astawanraq willakurqaku, chay watapim apostolkunawan iñiqkunapi punta apaqkuna tantiarurqaku iñiqkuna manaña señalachikunankupaq (Hech. 15:23-29). Chay tantiasqankumanta iñiqkunaman willarachiptinkum paykunaqa astawan kallpanchakurqaku Jehova Diosmanta willakunankupaq (Hech. 15:30-35). ‘Chayraykum iñiqkunaqa iñiyninkupi aswan-aswan allin karqaku, hinaspapas sapa punchawmi yapakurqaku’ (Hech. 16:4, 5).

9. ¿Imatam manaraq harkakunkuraqchu wakin nacionpi autoridadkunaqa? ¿Imatam tapukunanchik?

⁹ Wakin nacionpi autoridadkunaqa manaraqmi Diosmanta willakuyninchiktaqa harkakunkuraqchu. Nacionninchikpi chayna manaraq harkakuptinkuqa kaytam tapukunanchik: “¿Tukuytachu ruwachkani Diosmanta astawan willakunaypaq?”, nispa. Diospa llaqtanpi punta apaqkunaqa tukuytam ruwachkanku llapallan nacionpi runakuna Diosmanta yachanankupaq (Mar. 13:10). Chaypi yanapakunapaqyá ñuqanchikpas kallpanchakusun.

10. 2 Timoteo 4:2 nisqanqa, ¿imapaqmi kallpanchawanchik?

¹⁰ Hawkayay tiempopi kaspanchikqa, ¿imatam ruwananchik? (Qaway 2 Timoteo 4:2). Diosmanta astawan willakunapaqmi kallpanchakunanchik. ¿Yaqachu ayllunchikmanta mayqanninchikpas 70 hora Diosmanta willakunapaq kallpanchakuchwan? Manam tiemponchiktaqa usuchinanchikchu qullqitawan tukuy imata maskaypiqa. Tukuy chaykunaqa Diospa piñakuynin punchawpim chinkanqa (Prov. 11:4; Mat. 6:31-33; 1 Juan 2:15-17).

11. ¿Imapaqmi achka iñiqmasinchikkuna tantiakurunku?

¹¹ Achka iñiqmasinchikkunam huk rimaykunata yachanankupaq tantiakurunku, chaynapi huk rimayniyuq runakunaman Diosmanta yachachinankupaq. Chayraykum Diospa llaqtanpi punta apaqkunaqa tantiarunku aswan achka rimaykunapi qillqanchikkuna kananpaq. 2010 watapaqqa 500 rimaykunapim qillqanchikkunaqa karqa, kunanmi ichaqa 1.000 masnin rimaykunapiña kachkan.

12. ¿Imaynataq runamasinchikkuna tarikunku kikinkupa rimayninkupi Jehova Diosmanta uyarispanku? Rimarimuy huk iñiqmasinchikmanta.

¹² ¿Imaynataq runamasinchikkuna tarikunku kikinkupa rimayninkupi Jehova Diosmanta uyarispanku? Warmi iñiqmasinchik imayna tarikusqanmanta rimarisun. Paymi kikinpa rimayninpi hatun huñunakuyman rirqa, chay huñunakuy tukuruptinmi kaynata nirqa: “Chunka qanchisniyuq watañam kay Estados Unidos nacionpi kachkani. Chaywanpas kay huñunakuypim yachachikuykunataqa sumaqta entienderuni rimayniypi kasqanrayku”, nispa. Kikinchikpa rimayninchikpi yachachikuykunata uyarisqanchikqa sunqunchikmanmi chayan. Chaynaqa, ¿manachu ñuqanchikpas kallpanchakuchwan huk rimaykunata  yachaspanchik kikinkupa rimayninkupi runamasinchikkunaman Diosmanta yachachinapaq? Kikinkupa rimayninkupi willaptinchikqa sumaqtam uyariykuwanchik.

13. ¿Imatam Rusia nacionpi iñiqmasinchikkunaqa ruwarqaku autoridadkuna Diosmanta willakuyninchikta mana harkakusqanku watakunapi?

¹³ Wakin nacionkunapi autoridadkunaqa manam saqinkuchu Diosmanta willakunanchiktaqa. Chaynapim Rusia nacionpi iñiqmasinchikkuna tarikurqaku. 1991 watamantam ichaqa chay nacionpi autoridadkunaqa manaña harkakurqakuchu Diosmanta willakunankutaqa. Chay watapaqqa 16.000 iñiqmasinchikkunam karqaku chay nacionpiqa. Iskay chunka wata qipatañataqmi 160.000 masnin iñiqmasinchikkunaña karqaku. Chay mana harkakusqanku watakunapiqa anchatamá kallpanchakurqaku Diosmanta willakunankupaq. Kunanqa kaqmantam chay nacionpi autoridadkunaqa mana saqinkuchu Diosmanta willakunankuta. Chaywanpas iñiqmasinchikkunaqa anchatam kallpanchakuchkanku Diosmanta hinalla willakunankupaq.

14, 15. ¿Imaynatam Jehova Diosqa kamachiq Asata yanapaykurqa?

¹⁴ Kaqmanta rimarisun kamachiq Asapa tiemponmanta. Juda nacionpi hawkayayqa tukururqamá. Paykunapa contranpim rirqaku Etiopia nacionmanta nana-nanaq soldadokuna. Paykunapa kamachiqnin Zeraqa manam iskayrayarqachu Juda nacionniyuqkunata wañurachinankumantaqa. Chaywanpas Asaqa Jehova Diospim hapipakurqa, chaymi kaynata mañakurqa: ‘Taytallayku [Jehova], yanapaykullawayku, qanmanmi hapipakamuykiku, qampa sutikipim hamuniku kay nana-nanaq soldadokunapa contranpi peleanaykupaq’, nispa (2 Cron. 14:11).

 ¹⁵ Asapa soldadonkunamantaqa huk chaynaraqmi karqa Etiopia soldadokunaqa. Chaywanpas, Asaqa manam iskayrayarqachu Jehova Dios yanapananmantaqa. Dios yanapaptinmá kamachiq Asapa soldadonkunaqa Etiopia soldadokunata llapallanta wañurachirqaku (2 Cron. 14:8-13).

16. ¿Imanasqataq ninchik Diosmanta hawka willakuyninchik tukunanta?

¹⁶ Ñuqanchikpas yachanchikmi Diosmanta hawka willakuyninchik tukunanta. ¿Imanasqam chaynata ninchik? Jesusmi nirqa tukupay punchawkunapiqa qatiqninkunata llapallan runakuna chiqniwananchikmanta (Mat. 24:9). Apostol Pablopas kaynatam nirqa: “Pipas Cristo Jesusta qatispan tukuy sunqunwan Diosta serviy munaqqa qatikachasqataqmi kanqa”, nispa (2 Tim. 3:12). Chaymantapas, satanasqa piñasqallañam kachkan, chaymi tukuyta ruwanqa Diospa munayninta mana ruwananchikpaq (Apoc. 12:12).

17. ¿Haykapitaq Diosman sunqu kasqanchikta qawachinanchik kanqa hinaspa imanasqa?

¹⁷ Ñam hichpaykamuchkanña llumpa-llumpay ñakariy punchawkuna. Chaypim llapallanchik Diosman sunqu kasqanchikta qawachinanchik kanqa. Chay punchawmantam biblia kaynata nin: “Manam chaynaqa karqachu runakunapa qallariyninmantapacha kunankamapas, manataqmi huktawanqa kanqañachu”, nispa (Mat. 24:21). Yaqapaschá chay punchawkunaqa ayllunchikpas contranchikpi kanqaku. Manapaschá autoridadkunapas saqiwasunñachu Diosmanta willakunanchiktaqa (Mat. 10:35, 36). Chaymi nikunanchik: “¿Asa hinachu Jehova Dios yanapaykuwananmanta mana iskayrayasaq?”, nispa.

18. Hebreos 10:38, 39 nisqanman hinaqa, ¿imataq yanapawasun llumpa-llumpay ñakariy punchawkunapi Diosman sunqu kanapaq?

¹⁸ Jehova Diosqa munanmi llumpa-llumpay ñakariy punchawkuna chayamuptin payman sunqu kananchikta, chaymi payqa llaqtanpi punta apaqkunawan yachachikuykunata quwachkanchik imam tiempopi (Mat. 24:45). Chaynaqa, ¿imatam ruwananchik? Jehova Diospi tukuy sunqunchikwan hapipakunapaqmi kunanmanta kallpanchakunanchik (qaway Hebreos 10:38, 39).

19, 20. ¿Imakunatam tapukunanchik hinaspa imanasqa?

 ¹⁹ Kamachiq Asa hinam Jehova Diosta maskananchik (2 Cron. 14:4; 15:1, 2). Jehova Diostaqa maskarqanchik payta riqsispam hinaspa bautizakuspam. Kunanpas hinallam kallpanchakunanchik payta astawan kuyanapaq. Chayraykum tapukunanchik: “¿Sapa huñunakuymanchu rini?”, nispa. Chay huñunakuykunam yanapawanchik hinalla Jehova Diosta servinapaq, hinaspapas iñiqmasinchikkunawanmi kallpanchanakunchik (Mat. 11:28). Tapukunanchiktaqmi: “¿Sapa punchawchu bibliata ñawinchani? Aylluywan yachaspayqa, ¿kallpanchakunichu sapa semana paykunawan kuska Diosmanta yachanaypaq? Utaq sapallay kaspayqa, ¿tiempochakunichu Diosmanta astawan yachanaypaq? ¿Kallpanchakunichu runamasiykunaman Diosmanta yachachinaypaq?”, nispa.

²⁰ ¿Imanasqataq chaykunata tapukunanchik? Bibliam niwanchik Jehova Diosqa yuyayninchiktawan sunqunchikta qawasqanta, chaytamá ñuqanchikpas ruwananchik (qaway 1 Cronicas 28:9). Imapipas kallpanchakunanchikta musyakuspaqa Jehova Diostayá mañakusun yanapaykuwananchikpaq. Chaynaqa, tiempo kachkaptinraqmi kallpanchakunanchik Diospi hapipakunapaq, chaynapi sasachakuykuna kaptin hinalla Diosman sunqu kanapaq.