1, 2. (1) Proverbios 16:31 nisqanman hinaqa, ¿imaynataq kanku yuyaq iñiqmasinchikkuna? (2) ¿Imakunamantam kay yachachikuypi yachasun?

ALAQAKUNATA ruwananku rumikunaqa wakin rumikuna hinallam, chaymi mana riqsiqqa tarispanpas kaqpaqpas hapinchu.

² Diosman sunqu yuyaq iñiqmasinchikkunapas chay kuyayllapaq alaqa rumi hinam kanku. Bibliapipas ninmi paykunapaqa suqunkupas ‘corona hina’ kasqanta (qaway Proverbios 16:31; 20:29). Chayna kaptinkupas wakinpiqa manam parlarinapaqpas tiempochakuykunchikchu. Achka musu-sipaskunam willakunku yuyaq iñiqmasinchikkunawan parlarispanku kallpanchasqa tarikusqankuta. Chaymi kay yachachikuypi yachasun kaykunamanta: ¿Imanasqataq Jehova Diosqa yuyaqkunata anchata kuyan? ¿Imanasqataq ñuqanchikpas paykunataqa mana qunqarunanchikchu? ¿Imaynataq ñuqanchikpas paykunapa kallpanchasqan kachwan?

3. Salmos 92:12-15 nisqanman hinaqa, ¿imanasqataq Jehova Diosqa yuyaq iñiqmasinchikkunata anchata kuyan?

³ Jehova Diosqa yachanmi yuyaqkunaqa sumaq sunqu hinaspa kuyakuq kasqankuta. Paykunapas kusisqam tarikunku Diosman hapipakunankupaq musu-sipaskunata yanapaykuspanku (Job 12:12; Prov. 1:1-4). Chaymantapas, yuyaqkunaqa imaña kaptinpas hinallam Diosman sunqu kanku (Mal. 3:16). Paykunaqa sasachakuypi tarikuspankupas manam  Jehova Diostaqa saqirunkuchu, aswanqa paypim hapipakunku. Manapunim iskayrayankuchu hamuq tiempopi Diosninchik tukuy imata allichananmantaqa. Yuyaqña kaspankupas hinallam Jehova Diosmanta willakuchkanku (qaway Salmos 92:12-15).

4. ¿Imataq yuyaq iñiqmasinchikkunata kallpanchanman?

⁴ Ichaya qampas yuyaqyachkankiña, chayna kaptinqa ama qunqaychu: Jehova Diosqa imapas paypaq ruwasqaykitaqa manam qunqanchu (Heb. 6:10). Diosqa manam qunqanchu paymanta willakusqaykitaqa, ima sasachakuykunapi tarikuspaykipas payman sunqu kasqaykitaqa, llaqtanpi imapipas yanapakusqaykitaqa chaynataq musuq kamachikuykuna kaptinpas kasukusqaykitaqa. Manataqmi qunqanchu iñiqmasinchikkunata yanapasqaykitapas. Chaykunaraykum Jehova Diosqa anchata kuyasunki, payqa manam saqisunkichu (Sal. 37:28). Chaymi bibliapi nisunki: “Suqu umaña kaptikipas ñuqaqa hinallam yanapasqayki”, nispa (Is. 46:4, TNM). Chaynaqa ama niychu: “Imapaqñataq ñuqaqa valeyman”, nispaqa.

5. ¿Imaynam kanku yuyaq iñiqmasinchikkunaqa unay wataña servisqankurayku?

⁵ Yuyaq iñiqmasinchikkunaqa manaña kallpayuq kaspankupas unay wataña Jehova Diosta servisqankuraykum sumaqta imamantapas yachanku. Chaymi Jehova Diosqa hinalla imapipas yanapakunankupaq churaykunman. Chaymanta yachaykusun.

6, 7. ¿Pikunatataq Jehova Diosqa mana qunqarurqachu payman sunqu kasqankurayku?

⁶ Bibliapim willawanchik Diosman sunqu achka runakuna yuyaqña kaspankupas hinalla Diosta servisqankumanta. Hukninmi karqa Moises, paytam 80 watanpi kachkaptin Jehova Dios akllaykurqa willakuqnin kananpaq hinaspa llaqtanta pusananpaq. Hukninñataqmi karqa Daniel, paymi 90 watanpiña kachkaspanpas hinalla Diosmanta willakurqa. Apostol Juantapas 90 wata masninpiña kachkaptinmi Jehova Dios niykurqa Apocalipsis librota qillqananpaq.

⁷ Bibliapiqa willawanchikraqmi mana ancha riqsisqa Diosman sunqu runakunamantapas, paykunataqa manam qunqarurqachu.  Hukninmi karqa Simeon. Jesusta riqsiykuyta munaptinmi Jehova Dios riqsiykachirqa. Chaymantapas Simeonwanmi Mariaman willaykachirqa qipakunaman imayna tarikunankumanta (Luc. 2:22, 25-35). Hukninñataqmi karqa Ana, payqa 84 watanpi kachkaspanpas Diospa wasinman riytaqa manam saqiqchu. Paypas Diosman sunqu kasqanraykum Jesus wawachallaraq kachkaptin rikuykurqa. Jehova Diosqa anchatamá kuyarqa Simeontawan Anataqa (Luc. 2:36-38).

8, 9. ¿Imata ruwanankupaqmi qusanku wañukuptinpas iñiqmasinchikkunaqa kallpanchakunku?

⁸ Kunan tiempopi yuyaq iñiqmasinchikkunapas qatipakunapaqmi kanku. Lois Didur sutiyuq iñiqmasinchikmi 21 watanpi kachkaspallanraq tukuy tiemponwan Diosmanta willakuyta qallaykurqa. Payqa iñiqmasinchik Yonwan casarakuspanmi iñiqmasinchikkunata llaqtan-llaqtan watukurqaku. Chaymantam Canada nacionpi betel wasipi yanapakunankupaq niykurqaku, chaypim 20 wata yanapakurqaku. Chaymantañataqmi nirqaku Ucrania nacionmanña rinankupaq. Chay tiempopaqqa 58 watanpiñam iñiqmasinchik Loisqa kachkarqa. Yuyaqña kachkaspankupas kasukurqakum, chaypim Yonqa betel wasipi cuentallikuq karqa. Qanchis wataña chaypi kachkaptinkum Yon wañukurqa, chaywanpas Loisqa hinallam betel wasipi yanapakurqa. Kunanqa 81 watanpiñam kachkan, ichaqa hinallam betel wasipi yanapakuchkan. Paytaqa llapallankum kuyanku.

⁹ Achka iñiqmasinchikkunam qusanku wañukuptinqa manaña ñawpaqta imapas ruwasqankutaqa ruwankuñachu. Chayna kaptinpas Jehova Diosqa hinallam paykunataqa anchata kuyan. Payqa manam qunqarunchu unay wata qusankuta yanapasqankutaqa (1 Tim. 5:3). Chaymantapas, yuyaq iñiqmasinchikkunaqa musu-sipaskunatam kallpanchanku hinalla Diosman sunqu kanankupaq.

10. ¿Imatam yachanchik Tony sutiyuq iñiqmasinchikmanta?

¹⁰ Achka iñiqmasinchikkunam yuyaqkunapa yachanan wasikunapi yachachkanku. Paykunapas anchatam yanapawachwan hinalla Jehova Diosta servinanchikpaq. Yuyaqkunapa yachanan wasipim Tony sutiyuq iñiqmasinchikpas yachan. Paymi bautizakurqa 1942 watapi 20 watanpi kachkaspa. Bautizakusqan qipallamanmi mana soldado kayta munasqanrayku carcelman aparurqaku, yaqa kimsa watam carcelpi karqa. Chaymantam casarakuruspan warmichanpiwan kuska iskay churinkunata uywarqaku. Achka watam Tonyqa punta apaqmasinkunata yanapaq karqa, hatun huñunakuykuna ruwakunanpaqpas paypa makinpim karqa. Chaymantapas achka runakunata carcelpi yachachinanpaqmi riq, chaypiqa huñunakuykunatapas  ruwaqmi. Kunanqa 98 watanpiña kachkaspanpas hinallam kallpanchakuchkan Diosta servinanpaq hinaspa huñunakusqanpi yanapakunanpaq.

11. ¿Imatam ruwachwan wasillankupi kaq utaq yuyaqkunapa kanan wasipi yachaq iñiqmasinchikkuna mana qunqasqa hina tarikunankupaq?

¹¹ Wakin yuyaq iñiqmasinchikkunaqa wasillankupiñam kanku, wakinkuñataqmi yuyaqkunapa kanan wasipi yachanku. ¿Imatataq ruwachwan mana qunqasqa hina tarikunankupaq? Iñiqkunapi punta apaqkunam yanapaykunmanku hinalla huñunakunankupaq hinaspa Diosmanta willakunankupaq. Ñuqanchikpas paykunataqa qayaykuchwanmi utaqmi watuykuchwan kallpanchaykunapaq. Yuyaqkunataqa manam qunqarunanchikchu. Wakinpiqa ichaya iñiqmasinchikkunaqa watuykuptinchikpas imayna kasqankumantaqa mana willawasunchu. Chaymi Diosta servispan imakunawan kusikusqankumanta tapuykunanchik, hinaspam willawasqanchikta sumaqta uyariykunanchik.

12. ¿Imatam ñuqanchikwan huñunakuq iñiqmasinchikkunamanta yachachwan?

¹² Maymi huñunakusqanchikpipas kachkanchá yuyaq iñiqmasinchikkunaqa. Rimaykusun Harriette sutiyuq iñiqmasinchikmanta. Paymi unay wata Jehova Diosta tukuy sunqunwan servirqa. Yuyaqyaruptinmi ichaqa wawan pusarurqa paywan yachananpaq, chaymi payqa huklawpiña huñunakurqa. Chaypi iñiqmasinchikkunaqa sumaqta riqsinankupaqmi tiempochakurqaku. Paykunamanmi willakurqa sipas kaspa Diosmanta imayna willakusqankuta. Paymi nirqa: “Qunqayllamanta carcelman aparuwananta yachasqayraykum Diosmanta willakuq rispayqa kiruyta qatqakunaypaqpas apakuqña kani”, nispa. Willakurqataqmi 1933 watapi iskay kutikama carcelman aparusqankutapas chaynataq lluqsimunankama qusan mana testigo kachkaspanpas kimsa warmachankunata uywasqanmantapas. Harriette hina yuyaqkunataqa anchatamá kuyanchik.

13. ¿Imanasqam yuyaq iñiqmasinchikkunaqa Diospi hapipakunapaq yanapaykuwachwan?

¹³ Yuyaq iñiqmasinchikkunaqa qawarqakum Jehova Diosqa llaqtanta chaynataq kikinkuta imayna yanapasqantapas. Chaymantapas, pantasqankumanta yachasqankuraykum allin yuyayniyuq kanku. Chaymi paykunaqa yanapawachwan allin yuyayniyuq kanapaq (Prov. 18:4). Paykunawan rimasqanchikmi yanapawasun Diospi astawan hapipakunapaq, hinaspapas mana yachasqanchikkunamantam yachasun. Arí, yuyaqkunaqa llapallanchiktam yanapawachwan.

14. ¿Imapaqmi Deuteronomio 32:7 nisqanqa musu-sipaskunata kallpanchan?

¹⁴ Yuyaq iñiqmasinchikkunawan rimarinapaq tiempochakusun (qaway Deuteronomio 32:7). Paykunaqa ichapas manaña allintachu qawakunku, yaqapaschá allillamantaña purikunkupas. Chaymantapas, ichaya rimasqankupas manaña allintañachu uyarikun. Chayna kaptinpas paykunapa sunqunkuqa musu-sipaskunapa hinaraqmi kachkan. Unay wataña servisqankuraykum Jehova Diosqa paykunataqa anchata kuyan. Ñuqanchikpas yuyarisunchik Diospaq tukuy ima ruwasqankuta, chaynapim paykunata astawan kuyasunchik (Ecl. 7:1). Chaymantapas, Eliseo hinayá yuyaqkunataqa ama saqisunchu. Payqa kimsa kutikama saqinanpaq Elias niptinpas manam saqiyta munarqachu (2 Rey. 2:2, 4, 6).

15. ¿Imakunamantataq parlapayachwan yuyaq iñiqmasinchikkunata?

 ¹⁵ Yuyaq iñiqmasinchikkunamanta yachanapaqqa paykunawanmi parlarinanchik (Prov. 1:5; 20:5). Parlapayaspam tapuchwan Jehova Diosta imayna riqsisqankumanta hinaspa payta servispa imakuna ruwasqankumanta. Tapuchwantaqmi hinalla Jehova Diospi hapipakunankupaq imakuna yanapasqanmantapas (1 Tim. 6:6-8). Chaykunamanta willawaptinchikmi allinta uyariykunanchik.

16. ¿Musu-sipaskuna yuyaqkunawan rimaspanqa imaynanpim iskayninku kallpanchasqa tarikunqaku?

¹⁶ Yuyaq iñiqmasinchikkunawan parlariq musu-sipaskunaqa kallpanchasqam tarikunqaku. Paykunata uyarispankuqa manam iskayrayanqakuchu kasukuqninkunata Jehova Dios yanapananmantaqa (Rom. 1:12). Yuyaqkunapas kusisqam tarikunqaku ñawpaqpi imapas ruwasqankupi Jehova Dios imayna yanapasqanmanta willakuspanku.

17. ¿Imanasqataq yuyaqkunataqa astawanraq kuyananchik?

¹⁷ Watakuna pasasqanman hinam yuyaqña iñiqmasinchikkunaqa hinalla Jehova Diospi hapipakuspanku paypa munasqanman hina kawsakuchkanku, chaymi Diosqa paykunataqa anchata kuyan (1 Tes. 1:2, 3). Paykunata allinta riqsispaqa hinaspa qatipakuspaqa ñuqanchikpas astawanraqmi Dios serviyta munasun, hinaspapas astawanmi paykunataqa kuyasun hinaspa respetasun.

18. ¿Imamantataq qatiqnin yachachikuypi yachasun?

¹⁸ Yuyaq iñiqmasinchikkunata kuyaspanchikqa llapallanchikmi huk sunqulla Diosta yupaychasun. Ichaqa yuyaq iñiqmasinchikkunaqa musu-sipaskunataqa manataqmi mana yachayniyuqpaqqa hapinankuchu, chaymantam qatiqnin yachachikuypi yachasun.