1. ¿Imakunapaqmi kallpanchakunchik Diospaq astawan ruwayta munaspa?

KAY tukupay tiempopiqa astawanraqmi ruwayniyuq kachkanchik (Mat. 24:14; Luc. 10:2; 1 Ped. 5:2). Llapallanchikmi Jehova Diosninchikta astawan serviyta munanchik. Chaymi wakiqninchikqa munachkanchik precursor kayta, betel wasipi yanapakuyta utaq huñunakuna wasikunata ruwaypi yanapakuyta. Wakiqninchikñataqmi kallpanchakuchkanchik punta apaq kanapaq utaq punta apaqkunapa yanapaqnin kanapaq (1 Tim. 3:1, 8). Jehova Diosninchikqa maynatachá kusikun tukuy sunqunchikwan ima ruwaypipas yanapakuy munasqanchikwanqa (Sal. 110:3; Is. 6:8).

2. ¿Imaynataq tarikuchwan munasqanchikman hina manaña yanapakuyta atispaqa?

² Imapi yanapakuyta munaspanchikpas wakinpiqa manaraqpaschá atinchikchu, chaywanqa llakisqapaschá tarikunchik. Wakiqninchikñataqmi yuyaqña kasqanchikrayku utaq imawanpas sasachakusqanchikrayku imapipas yanapakuyta manaña atinchikchu (Prov. 13:12). Iñiqmasinchik Melissam * betel wasipi yanapakuyta utaq Diospa munaychakuyninmanta willakuqkunapaq escuelaman riyta munan. Ichaqa manam atinñachu, paymi nin: “Yuyaqña kasqayraykum chaykunaman riyta mana atiniñachu. Chaywanmi wakinpiqa hukmanyasqa tarikuni”, nispa.

3. ¿Imapitaq musu-sipaskunaqa astawan kallpanchakunanku?

³ Musu-sipasllaraq kaq iñiqmasinchikkunaqa kallpankupiraq kasqankuraykum ima ruwaypipas yanapakuyta atinmanku. Chayna kaspankupas kallpanchakunankuraqmi sumaq sunquyuq, pacienciakuq hinaspa respetakuq kanankupaq chaynataq imapi yanapakunankupaq kamachisqankutapas  allinta ruwanankupaq. Chayna kallpanchakuspankuqa atinqakum imapi yanapakuy munasqankutapas haypayta. Nickmi 20 watanpi kachkaspan suyarqa punta apaqkunapa yanapaqnin kananpaq ninankuta. Ichaqa chaypaq mana nisqankuwanmi hukmanyasqa tarikurqa. Chaywanpas, hinallam kallpanchakurqa iñiqmasinchikkunata yanapananpaq chaynataq Diosmanta astawan willakunanpaq. Kunanqa betel wasipi punta apaqkunapa hukninmi.

4. ¿Imamantam kay yachachikuypi yachasun?

⁴ ¿Ima ruwaypipas yanapakuy munasqanchikta manaraq haypaspachu hukmanyasqa kachkanchik? Chayna tarikuspaqa Jehova Diosmanyá willakusun imayna tarikusqanchikta (Sal. 37:5-7). Allin yuyayniyuq iñiqmasinchikwanyá rimasun. Pay imapi kallpanchakunapaq niwaptinchikqa chayman hinayá kallpanchakusun. Chaynata ruwaspaqa atisunmi imapi yanapakuy munasqanchik haypaytaqa. Ichaqa, iñiqmasinchik Melissa hina imapi yanapakuy munasqanchikta manaña haypayta atiptinchik, ¿imataq yanapawachwan Jehova Diosta hinalla kusisqa yupaychanapaq? Kay yachachikuypim yachasun imakunawan kusikunanchikmanta, kusisqa kanapaq imakunapi kallpanchakunamanta hinaspa Diospa llaqtanpi yanapakuspa astawan kusisqa kanapaq imakunapaq tantiakunamanta.

5. ¿Imapitaq piensananchik kusisqa kayta munaspaqa? (Rimarimuytaq Eclesiastes 6:9 nisqanmantapas).

⁵ Kusisqa kanapaqqa imapas ruway atisqanchikkunapim piensananchik. Manam piensananchikchu mana ruwayta atisqanchikkunapiqa, manachayqa hukmanyaruchwanmi. Bibliam nin: ‘Runapa rikusqanmi aswan allinqa paypa imapas munapayasqanmantaqa’, nispa (Ecl. 6:9).

6. ¿Ima rikchanachiymantam yachasun? ¿Imatawanraqmi yachasunchik?

⁶ Llapallanchikmi ima ruwaypipas yanapakuyta munanchik. Manaña atispaqa, ¿atichwanchu kusisqa kayta? Atichwanraqmi imakuna ruway atisqanchikpi piensaspanchikqa. Chaymi kay yachachikuypi yachasun talento nisqa qullqita chaskiq runakunawan Jesuspa rikchanachisqanmanta (Mat. 25:14-30). Yachasuntaqmi kusisqa kananchikpaq imakunapi kallpanchakunamantapas.

7. Pisi rimayllapi rimariy Jesuspa rikchanachisqan willakuymanta.

⁷ Jesusmi willakurqa huk runa manaraq illachkaspan sirvientenkunaman negocio ruwanankupaq talento qullqita saqisqanmanta. * Hukninmanmi qurqa pichqa talentota, hukninmanñataq iskayta, hukninmanñataqmi hukllata. Sapakamamanmi qurqa ruway atisqankuman hinalla. Iskay sirvientekunaqa patronninpa qullqintam allinta mirarachirqaku. Hukllata chaskiq sirvienteñataqmi mana mirachiyta munaspan chay qullqita pamparurqa. Chaymi patronnin kutiramuspan llumpayta piñakuspa chay sirvienteta qarqururqa.

8. ¿Imanasqataq kusisqa tarikunman karqa pichqa talentota chaskiq sirvienteqa?

⁸ Pichqa talentota chaskiq sirvienteqa mayna kusisqachá tarikurqa patronnin confianza runapaq hapisqanrayku. ¿Imaynataq tarikurqa iskay talentollata chaskiq sirvienteqa? ¿Pichqa talentota chaskiqwan  tupachikuspanchu patronnin mana confianzapaq hapisqanta piensarqa?

9. ¿Imatam mana nirqachu iskay talentota chaskiq sirvienteqa? (Rimarimuytaq Mateo 25:22, 23 nisqanmantapas).

⁹ (Qaway Mateo 25:22, 23). Jesusqa manam nirqachu iskay talentollata chaskiq sirviente piñakurusqanmantaqa. Manataqmi chay sirvienteqa kaynatachu nirqa: “Ñuqapas pichqa talentota chaskiq hinam allin llamkaq kani, ¡imaynamá iskayllataqa patronniyqa quykuwan! ¿Manachu ñuqatapas confianza runapaq hapiwan? ¿Imapaqtaq qullqinta mirachisaq? Pamparuspayá kikiypaq imatapas ruwakusaq”, nispa.

10. ¿Imatam ruwarqa iskay talentollata chaskiq sirvienteqa?

¹⁰ Pichqa talentota chaskiq sirviente hinam iskay talentota chaskiq sirvientepas patronninpa qullqinta mirachinanpaq tukuyta ruwarqa. Chaymi mirarachirqa iskay talentotawanraq, hinaptinmi patronninqa anchata kusikuspan nirqa astawanraq imamantapas cuentallikunanpaq.

11. ¿Imatam ruwachwan aswan kusisqa kanapaq?

¹¹ Ñuqanchikpas aswan kusisqam tarikusun ima ruwaypipas yanapakunapaq niwasqanchikta tukuy sunqunchikwan ruwaspaqa. Diosmanta willakunapaqwan iñiqmasinchikkunawan kuska Diosta yupaychanapaqyá anchata kallpanchakusun (Hech. 18:5; Heb. 10:24, 25). Iñiqmasinchikkunata kallpanchanapaqyá huñunakuykunapipas rimarisun. Allin yachachiq kanapaq niq huñunakuypi ñawpaqman lluqsinapaq utaq  ima ruwaypipas yanapakunapaq niwaptinchikqa allinta ruwanapaqyá kallpanchakusun. Amayá nisunchu yanapakunapaq wakin niwasqanchikkuna tiemponchikta usuchinapaq kasqantaqa (Prov. 22:29). Diospaq ima ruwaypipas tukuy sunqunchikwan yanapakuspaqa paywan kuyachikusqanchikraykum aswan kusisqa kasun (Gal. 6:4). Chaykunapi kallpanchakuspaqa manam hukmanyasunchu imapi yanapakuy munasqanchikta haypayta mana atispapas utaq huk kaqnin iñiqmasinchikta chaypi yanapakunanpaq niptinkupas (Rom. 12:15; Gal. 5:26).

12. ¿Imatam Melissawan Nickqa ruwarqaku aswan kusisqa kanankupaq?

¹² Kaqmanta rimarisunchik Melissamanta chaynataq Nickmanta. Melissaqa betel wasipi yanapakuytam utaq Diospa munaychakuyninmanta willakuqkunapaq escuelamanmi riyta munarqa. Chaykunaman riyta manaña atispanpas paymi nin: “Anchatam kallpanchakuni precursora kaspay Diosmanta wasin-wasin, carretachakunawan chaynataq maypipas willakunaypaq. Chaykunapaq kallpanchakusqaymi anchata kusichiwan”, nispa. Iñiqmasinchik Nickpas munarqam punta apaqkunapa yanapaqnin kananpaq niykunankuta, ichaqa manaraqmi nirqakuchu. Chaywanqa manam hukmanyarurqachu. Paymi nin: “Astawanmi kallpanchakurqani Diosmanta willakunaypaq, hinaspa huñunakuykunapi iñiqmasinchikkunata kallpanchanaypaq hina rimarinaypaq. Chaymantapas, betel wasipi yanapakunaypaqmi papelpi qillqarqani, hinaptinmi chaymanta wata pasayllata niwarqaku betel wasipi yanapakunaypaq”, nispa.

13. ¿Imaynataq tarikusun ima ruwayninchiktapas tukuy sunquwan ruwaspaqa? (Rimarimuytaq Eclesiastes 2:24 nisqanmantapas).

¹³ Chaynaqa, ¿imatapas allinta ruwanapaq kallpanchakuspachu imapi yanapakuy munasqanchikta haypasun? Ichapas Nick hina hayparuchwan, wakiqninchikqa manapaschá Melissa hina haypasunchu. Ichaqa atisqanchikman hina tukuy sunqunchikwan ima ruwayninchiktapas ruwaspaqa ancha kusisqam tarikusun (qaway Eclesiastes 2:24). Kallpanchakusqanchikwanqa Jesuspas anchatam kusikunqa.

14. ¿Imakunapaqmi hinalla kallpanchakunanchik?

¹⁴ Ichapas kallpanchakuchkanchikña Jehova Diospa munayninta tukuy sunqunchikwan ruwanapaq, ¿chaywanchu nichwan ima ruwaypipas yanapakunapaq manaña kallpanchakunata? Manam. Hinalla kallpanchakuspanchikqa Diosmanta allin yachachiqmi kasun, hinaspapas iñiqmasinchikkunatam allinta yanapasun. Chaykunata haypayta munaspaqa mana hatun tukuq chaynataq allin yuyayniyuqmi kananchik, hinaspapas kikillanchikpi piensananchikmantaqa kallpanchakunanchikmi hukkunata yanapananchikpaq (Prov. 11:2; Hech. 20:35).

15. ¿Imakunapaq tantiakusqanchiktaq astawan kusichiwasun?

¹⁵ ¿Imakunapi yanapakunapaqtaq tantiakuchwan? Chaypaqyá Jehova Diosta mañakusun ruway atisqanchikman hina tantiakunapaq (Prov. 16:3; Sant. 1:5). Ichapas tantiakuchwan precursor auxiliar utaq regular kanapaq, betel wasipi yanapakunapaq, huñunakuna wasi ruwaypi yanapakunapaq utaq huk rimayta yachaspa Diosmanta willakunapaq. Imakunapi yanapakunanchikmanta astawan yachayta munaspaqa Organizados para hacer la voluntad de Jehová niq qillqapim 10 yachachikuyninta  ñawinchachwan, chayqa yanapawasunmi allinta tantiakunanchikpaq. Rimachwantaqmi iñiqkunapi punta apaqkunawanpas. * Imapaq tantiakusqanchikman hina kallpanchakuspanchikqa aswan kusisqam kasun, iñiqmasinchikkunapas kusikunqakum.

16. Imapi yanapakuy munasqanchikta manaraq haypaspanchikqa, ¿imapitaq kallpanchakuchwan?

¹⁶ Rimamusqanchik kaqkunapi yanapakuyta mana atispaqa, kallpanchakusunyá ruway atisqanchik kaqkunapi. Chaymantayá qatiqninpi yachaykusun.

17. 1 Timoteo 4:13, 15 nisqanman hinaqa, ¿imakunapim qarikuna kallpanchakunmanku?

¹⁷ (Qaway 1 Timoteo 4:13, 15). Bautizasqa qari kaspaykiqa kallpanchakuwaqmi huñunakuykunapi allin yachachiq hinaspa allin ñawinchaq kanaykipaq, chaynapim uyarisuqnikikunata yanapanki. Chaypaqqa ñawinchawaqmi Allin ñawinchaq hinaspa allin yachachiq kanapaq qillqata, hinaspam kallpanchakuwaq chayman hina allinta yachachinaykipaq. Niwaqtaqmi yachachiqkunata rimapayaspan yanapaq punta apaqta * utaq allinta yachachinanpaq kallpanchakuq punta apaqtapas imakunapi kallpanchakunaykimanta niykusunaykipaq (1 Tim. 5:17). Chay qillqapi nisqanman hina yachachispaykipas kallpanchakuy uyarisuqnikikunata yuyaymanachinaykipaq. Chaynata yachachispaykiqa iñiyninkupi takyanankupaqmi kallpanchanki, chayqa anchatam  kusichisunki, uyarisuqnikikunapas kusisqam kanqaku.

18. ¿Imataq yanapawachwan allinta willakunapaq chaynataq yachachinapaq?

¹⁸ Llapallanchikmi kamachisqa kanchik runamasinchikkunaman Diosmanta willakuspa yachachinapaq (Mat. 28:19, 20; Rom. 10:14). ¿Munachwanchu allin yachachiq kayta? Chaypaqqa Allin ñawinchaq hinaspa allin yachachiq kanapaq qillqatam ñawinchananchik. Allintaqmi kanman Diospa munayninta ruwananchikpaq huñunakuypi yanapawaqninchik qillqanchikpa nisqanman hina chaynataq imayna willakunapaq videonchikkunapi nisqanman hina kallpanchakuyninchikqa. Chaypi nisqanman hina kallpanchakuspaqa allin yachachiqmi kasun, hinaspapas ancha kusisqam tarikusun (2 Tim. 4:5).

19. ¿Imataq yanapawachwan Diospa munasqanman hina sumaq sunquyuq kanapaq?

¹⁹ Imapaq kallpanchakuymantapas aswan allinqa Diospa munasqanman hina sumaq sunqu kaymi (Gal. 5:22, 23; Col. 3:12; 2 Ped. 1:5-8). Ichapas munachwan astawan iñiyniyuq kayta. Chaypaqqa qillqanchikkunapi chaymanta rimaq yachachikuykunatam ñawinchachwan. JW Broadcasting^® nisqanpipas qawachwanmi ima sasachakuypi kaspankupas iñiqmasinchikkuna Diospi hapipakusqankumanta willakusqankuta, hinaspam yuyaymanachwan imaynata qatipakunapaq.

20. ¿Imataq yanapawachwan kusisqa kananchikpaq?

²⁰ Llapallanchikmi munanchik Diospa munaynin ruwasqa kananpaq ima ruwaypipas astawan yanapakuyta. Hamuq tiempopiqa tukuy tiemponchikwan chaynataq tukuy kallpanchikwanmi paypa munayninta ruwasunchik. Chay punchawkuna chayamunankamayá kunanqa ruway atisqanchikkunata tukuy sunqunchikwan ruwasunchik. Chayta ruwaspaqa manam hukmanyasunchu, aswanqa kusisqam tarikusunchik. Taytanchik Jehova Diosta hatunchaspanchikmi paytapas kusichisunchik (1 Tim. 1:11). Chaynaqa, kusikusunyá tukuy sunqunchikwan Jehova Diospaq imatapas ruwasqanchikwan.