Deuteronomio 22:25-27 nisqapi kamachikuyqa, manam qari huchayuq utaq mana huchayuq kasqanmanta yachanapaqchu qillqasqa karqa, aswanqa sipas mana huchayuq kasqanmanta yachanapaqmi. ¿Imanasqataq chaynata ninchik? Chaymantayá yachaykusun.

Puntata qawaykusun Deuteronomio 22:23, 24 nisqanta, ninmi: ‘Casarakunanpaq rimapayasqaña sipasta, huk qari llaqtapi tariruspan sipaswan puñuruptinqa, iskaynintam llaqtapi [autoridadkunaman] pusankichik, hinaspam rumiwan chamqapaspa wañuchinkichik. Sipasqa wañunqa llaqtapi kachkaspan mana qaparisqanraykum. Qariñataqmi wañunqa runamasinpa casaranan warmita pinqayman churasqanrayku’, nispa. Ñawpaqtaqa casarakunanpaq rimapayasqa sipaskunaqa casarasqa hinañam karqaku, chaymi pipas chay warmiwan puñuruspaqa huchapakururqaña. Warmipas llaqtapi kachkaspan mana qaparisqanraykum huchapakuyman wichiykurqa. Chayraykum iskayninta wañuchinanku karqa.

Chunniqpi abusasqa warmim ichaqa mana huchayuqchu karqa. Chaytam Deuteronomio 22:25-27 nisqanpipas willawanchik. Chaypim nin: ‘Casarakunanpaq rimapayasqa sipasta, pipas chunniqpi tariruspan abusaruptinqa, qarillam chay ruwasqanmanta wañunqa, sipastaqa amam imanankichikchu, payqa manam huchayuqchu. Chayqa pipas runamasinta qunqaymanta wañurachiq runamanmi rikchakun. Chay runaqa sipasta chunniqpi sapallanta tariruspanmi abusarurqa. Sipas qayaykachakuptinpas manam pipas yanapaqnin karqachu’, nispa.

Kaypi nisqanman hinaqa, sipaspaqa manam huchanchu karqa chunniqpi pipas abusaruptinqa, qayaykachakuptinpas mana pipas yanapaykunanpaq kasqanrayku. Mana rikuqnin kachkaptinpas autoridadkunaqa manam iskayrayanankuchu karqa sipaspa willakusqanmantaqa. Qarim ichaqa wañunan karqa sipasta abusarusqanrayku hinaspa huchallikurusqanrayku.

Deuteronomio 22:25-27 nisqanman hinaqa mana huchayuqmi sipasqa karqa, qariñataqmi huchayuq karqa. Chayna kaptinpas autoridadkunaqa sumaqtaraqmi yachaykunanku karqa imayna pasakusqanmanta, chaytaqa Jehova Diosmi kamachirqa (Ex. 20:14; Deut. 13:14; 17:4).