Manachusmi, satanasqa manam nirqa Eva wañuruptin animan hinalla kawsananmantachu. Aswanqa mana haykaqpas wañunanmantam. Chaywanqa nichkarqa kay pachapi munasqanta ruwaspan wiñaypaq kawsananmantam (Gen. 2:17; 3:3-5).

Chaynaqa, pipas wañukuptin animan hinalla kawsasqanmanta rimayqa, ¿haykapitaq rikuriramurqa? Manam sumaqtachu yachanchik. Ichaqa yachanchikmi pantayta yachachiq runakunaqa Noeypa tiemponpi chinkachisqa kasqankumanta. Chaypi qipaqkunaqa karqa Noeywan ayllullanñam.

Pipas wañukuptin animan hinalla kawsasqanmanta rimayqa yaqachusmi rikuriramurqa sinchi para karusqan qipamanña, Babel llaqtayuq runakunapa rimayninta Dios pantarachiptinña. Chay runakunawanchusmi rikurirurqa pipas wañukuptin animan hinalla kawsasqanmanta rimayqa. Chay umayuqñachusmi tukuy hinastinman chiqirurqaku (Gen. 11:8, 9). Chay rimay haykapi rikuriramusqanmantaqa manam sumaqtachu yachanchik, ichaqa yachanchikmi llapallan “llullakunapa” taytan satanas chayta rikurirachimusqanmantaqa (Juan 8:44).