1, 2. Iñiqmasinchik Angel hina, ¿imatam sapakama ruwananchik?

¿JEHOVA DIOSTA yupaychaqchu tayta-mamayki? Chayna kaptinqa, manam tayta-mamayki Jehova Diosta yupaychasqanraykuchu paywan kuyachikusqaykipaqña hapikunayki. Tayta-mamanchik Diosta yupaychaptin utaq mana yupaychaptinpas, sapakamam kallpanchakunanchik Jehova Dioswan kuyachikunapaqqa.

² Rimarisun iñiqmasinchik Angelmanta, paypa ayllunqa taksacha kasqanmantas Jehova Diosta yupaychasqaku. Payñataqsi Jehova Diostaqa yupaychaq ayllunkuna hina kayta munasqanraykulla. Ichaqa bibliata ñawinchasqan, ñawinchasqanpi yuyaymanasqan hinaspa Jehova Diosta mañakusqansi yanapasqa Jehova Diosta astawan kuyananpaq. Kay iñiqmasinchikta pasasqanman hinaqa, ¿chaynallachu Dios kasqanta yachaywan paymanta sumaqta yachayqa? Hinaspa, ¿imaynatam Jehova Diosmanta sumaqta yachachwan?

3. ¿Chaynallachu Dios kasqanta yachaywan paymanta sumaqta yachayqa?

³ Diospa sutinta utaq nisqanta hinaspa ruwasqankunata yachasqanchikrayku ichapas Jehova Diosmanta sumaq yachasqanchiktaña nichwan. Ichaqa paymanta yachayqa manam chayllachu. Tiempochakunam paymanta allinta hinaspa  imayna kasqanmanta yachanapaqqa. Chayta sumaqta yachaspaqa yachasunmi imaynanpi imapas nisqanta hinaspa ruwasqanta. Chayqa yanapawasunmi tantiasqanchiktawan ruwasqanchikta imayna qawasqanmanta yachanapaq. Chaynapi Jehova Diospa imam munasqanta yachaspa ruwananchikpaqpuni.

4. ¿Imapaqmi yanapawasun bibliapi nisqankunamanta yachayqa?

⁴ Wakin runakunaqa asikuwasunpaschá Jehova Diosmanta yachasqanchikrayku, chaytaqa aswanraqpaschá ruwanqaku huñunakuykunaman riyta qallaykuptinchik. Chayna kaptinpas hinallam Jehova Diospi hapipakunanchik, payqa manam saqiwasunchu. Chayqa yanapawasunmi Jehova Dioswan kuyachikunapaq. ¿Atichwanchu Jehova Dioswan kuyachikuyta? Awriki. Moiseswan Davidpas, Jehova Dioswanmi kuyachikurqaku. Qatiqninpim yachasun imaynata Jehova Dioswan kuyachikusqankumanta, hinaspa ñuqanchikpas imaynata paykunata qatipakunamanta.

5. ¿Imapaqmi Moises tantiakurqa?

⁵ Moisesqa Jehova Diospa nisqanman hinam ruwarqa. Payqa 40 watanpi kachkaspanmi Jehova Diospa llaqtanman sayananpaq tantiakurqa, manam munarqachu Egipto nacionta kamachiqpa willkan kaytaqa nitaq Egipto nacionpi riqsisqa kaytapas (Heb. 11:24). Israel runakunamanmi sayarqa Egipto nacionta kamachiq piñakunan kachkaptinpas, chay kamachiqqa dios hina kasqanpaqmi hapikurqa, makillanpitaqmi tukuy imapas karqa. Chaywanpas Moisesqa Jehova Diospim hapipakurqa. Chayna kayqa allinmi Jehova Dioswan kuyachikunapaq (Prov. 3:5).

6. ¿Imatam yachachwan Moisesmanta?

⁶ ¿Imatam yachachwan Moisesmanta? Ñuqanchikpas Moises hinam tantiakunanchik Diosta yupaychanapaq utaq manapas. Jehova Diosta yupaychaspaqa sasachakusunpaschá utaq chiqnisqapaschá kasun. Ichaqa, Jehova Diosllapi hapipakuptinchikqa, paymi yanapawasun.

7, 8. ¿Imamantam Moisesqa hinalla yacharqa?

⁷ Moisesqa hinallam Jehova Dios imayna kasqanmanta yacharqa hinaspa munayninta ruwarqa. Jehova Dios Israel runakunata Egipto nacionmanta hurqunanpaq niptinmi Moisesqa mana chaypaq hina kasqanta nirqa, chaynatam nirqa achka kutikama. Jehova Diosmi ichaqa llakipayasqanrayku yanaparqa (Ex. 4:10-16). Yanapasqanraykum Moisesqa Egipto nacionpi kamachiqta mana manchakuspan imam kaqta willarqa. Qawarqataqmi Jehova Dios atiyninwan Egipto nacionpi tukuy ima ruwasqantapas chaynataq Egipto nacionta kamachiq hinaspa runankuna lamar quchapi chinkasqantapas (Ex. 14:26-31; Sal. 136:15).

⁸ Egipto nacionmanta lluqsirusqanku qipallatam Israel runakunaqa yanqapas-yanqa rimapakuyta qallaykurqaku. Chayna kachkaptinkupas Jehova Dios mana chaylla piñakurusqantam Moisesqa qawarqa (Sal. 78:40-43). Qawarqataqmi mana hatun tukuq kasqantapas. Jehova Diosqa munasqanman hina ruwanan kachkaptinpas Moisestam uyariykurqa (Ex. 32:9-14).

9. ¿Imatam niwanchik Hebreos 11:27 Moiseswan Jehova Dios imayna kasqankumanta?

 ⁹ Egiptomanta lluqsisqanku qipamanmi Moisesqa astawanraq Jehova Diosta kuyarqa, yaqa taytanwanpas kachkanman hinam karqa (qaway Hebreos 11:27). Bibliapipas ninmi Moisesqa runamasinwan rimachkaq hina Jehova Dioswan rimasqanta (Ex. 33:11).

10. ¿Imaynatam Jehova Diosmanta sumaqta yachachwan?

¹⁰ Ñuqanchikpas Moises hinam Jehova Diospa imayna kasqanta yachanapaqqa munayninta ruwananchik. ¿Imataq paypa munayninqa? “Tukuy rikchaq runakuna” wiñay kawsayta haypanankupaq hinaspa “chiqap kaq yachachikuyta” yachanankupaq yanapaymi (1 Tim. 2:3, 4).

11. ¿Imaynanpitaq runakunaman yachachispa Jehova Dios imayna kasqanmanta astawan yachanchik?

¹¹ Chaynaqa, runakunaman yachachispam astawanraq Jehova Dios imayna kasqanmantaqa yachanchik. Llakipayakuq kasqanqa sutillam qawakun allin sunquyuq runakunaman yachachinapaq yanapawasqanchikpi (Juan 6:44; Hech. 13:48). Sutillataqmi qawakun yachachisqanchik runakuna mana allin ruwaykunata saqinankupaq atiyninwan yanapasqanpipas (Col. 3:9, 10). Chaymantapas mana chaylla piñakuq kasqanmi sutilla qawakun achka runakunaraq paymanta yachaspa wiñay kawsanankuta munasqanpi (Rom. 10:13-15).

12. Exodo 33:13 nisqanman hinaqa, ¿imamantam Moisesqa yachaykuyta munarqa, hinaspa imanasqa?

¹² Moisesqa Jehova Dioswanmi kuyachikurqa. Jehova Dios yanapaptin tukuy imata ruwachkaspanpas, imayna kasqanmantam astawanraq yachaykuyta munarqa (qaway Exodo 33:13). Chaypaqqa 80 watanpiñam karqa, chaywanpas musyakurqam Jehova Diospa imayna kasqanmanta achkaraq yachananpaq kasqanta.

13. ¿Imaynatam Jehova Dioswan kuyachikuchwan?

¹³ Ñuqanchikpas Moises hinam Jehova Dioswan kuyachikunapaqqa sapa kutilla mañakunanchik, unayña utaq chayllaraq Jehova Diosta yupaychaspapas.

14. ¿Imanasqataq sapa kuti Jehova Diosta mañakunanchik?

¹⁴ Sumaqtaqa riqsinakunchik sapa kutilla rimanakuspam. Chaynaqa Jehova Dioswan astawan kuyachikunapaqqa mana manchakuspam sapa kutilla imayna tarikusqanchikmanta willakunanchik (Efes. 6:18). Turquia nacionmanta iñiqmasinchik Kristapas ninmi: “Imayna tarikusqaymanta Jehova Diosman willakuptiy yanapawasqanta musyakuspaymi payta astawan kuyani hinaspa paypi hapipakuni. Chayraykum taytayta hinaña qawani”, nispa.

15. ¿Imatam Jehova Diosqa nirqa Davidmanta?

¹⁵ Kamachiq Davidqa manam ayllunkunaraykullachu nitaq llaqtamasinkunaraykullachu Diostaqa yupaycharqa. Aswanqa kikinmi kallpanchakurqa Dioswan kuyachikunanpaqqa. Chaymi Jehova Diospas nirqa: “Davidqa sunquypaq hinam”, nispa (Hech. 13:22). Yachasunyá Diosman sunqu kananpaq Davidta ima yanapasqanmanta.

16. ¿Imatam Davidqa Jehova Diosmanta yacharurqa unanchasqankunapi yuyaymanaspan?

¹⁶ Davidqa Diospa unanchasqankunapim yuyaymanarqa. Ovejakunata michispanchusmi Diospa unanchasqankunapiqa  yuyaymanarqa. Lucerokunata qawaspanchá yacharqa Jehova Dios imayna kasqanmantaqa. Chaychá Jehova Diosmanta kaynata nirqa: “Diospa atiyninmantam cielokuna willawanchik, makinwan ruwasqanmantam cielokuna qawachiwanchik”, nispa (Sal. 19:1, 2). Imayna unanchasqa kasqanchikpi yuyaymanasqanraykutaqchá yacharurqa Jehova Diosqa ancha yachayniyuq kasqanta (Sal. 139:14). Tukuy ima unanchasqanta qawaspanchá astawan Jehova Diosta hatuncharqa (Sal. 139:6).

17. Jehova Diospa unanchasqankunapi yuyaymanaspaqa, ¿imatam Jehova Diosmanta yachachwan?

¹⁷ Ima ruwayniyuqña kaspapas David hinayá Jehova Diospa unanchasqankunapi yuyaymanasun. Yuyaymanasunyá uywachanchikkuna hinaspa waytachakuna chaynataq kikinchikpas imayna unanchasqa kasqanchikpi. Chayna yuyaymanaspaqa yachasunmi Jehova Dios imayna kasqanmanta hinaspam astawan kuyasun (Rom. 1:20).

18. Salmo 18 capitulopa nisqanman hinaqa, ¿imatam Davidqa riqsikurqa?

¹⁸ Jehova Dios tukuy imapi yanapasqantam Davidqa riqsikurqa. Riqsikurqam Jehova Dios atiyninwan yanapasqanrayku leontawan ukumarita wañurachisqanta. Riqsikurqataqmi hatunkaray Goliatta wañuchinanpaq yanapasqantapas (1 Sam. 17:37). Riqsikurqam Jehova Dios yanapaptillan kamachiq Saulmanta ayqikusqantapas (Sal. 18, qaway qallariyllanpi kaqta). Hatun tukuspanqa kikin chaykunata ruwasqanpaqchá hapikunman karqa. Ichaqa mana hatun tukuq kasqanraykum Diospa yanapakuyninta tukuy imapi qawarqa (Sal. 138:6).

19. David hina, ¿imatam ruwananchik?

¹⁹ David hina Jehova Diosta mañakuspapas kallpanchakunanchikmi Jehova Dios imayna yanapawasqanchikta qawanapaq. Mana hatun tukuq kaspaqa musyakusunmi Jehova Dios tukuy imapi yanapawasqanchikta. Sapa kuti yanapawasqanchikta musyakuspaqa astawanmi Jehova Diosta kuyasun. Fiyi nacionmanta iñiqmasinchik Isaacpas willakunmi: “Bibliamanta yachayta qallaykusqaymantapacham musyakurqani Jehova Dios imayna yanapawasqanta. Chayqa anchatam kallpanchawan payta astawan kuyanaypaq”, nispa

20. Jehova Diospa imayna kasqanmanta yachasqanqa, ¿imaynatam Davidta yanaparqa, imatam chaymanta yachachwan?

²⁰ Davidqa Jehova Diospa imayna kasqantam qatipakurqa. Ñuqanchikpas atichwanmi Jehova Diosta qatipakuytaqa (Gen. 1:26). Jehova Diospa imayna kasqanta yachaspaqa qatipakuyta munasun. Davidpas Jehova Diospa llakipayakuq kasqanta yachasqanraykum runamasinkunata llakipayarqa. Betsabey warmiwan huchapakuruptinpas chaynataq chay warmipa qusanta wañuchinankupaq nichkaptinpas, Jehova Diosqa llakipayariykuspanmi pampachaykurqa (2 Sam. 11:1-4, 15). ¿Imaynanpim pampachaykurqa? Hukkunawan llakipayakuq kasqanraykum. Kamachiq Davidqa Diosman sunqu kasqanraykum Jehova Diospa kuyasqan karqa. David chayna kasqanraykum Jehova Diosqa wakin kamachiqkunatapas nirqa David hina kanankupaq (1 Rey. 15:11; 2 Rey. 14:1-3).

21. Efesios 4:24 hinaspa 5:1 nisqanman hinaqa, ¿imanasqataq Diosta qatipakunanchik?

²¹ Ñuqanchikpas David hinam Diospa  imayna kasqanta qatipakunanchik. Chayqa yanapawasunmi imayna kasqanta sumaqta yachanapaq. Diosta qatipakunapaq kallpanchakuspaqa churinkuna hinam kasun (qaway Efesios 4:24; 5:1).

22, 23. ¿Imapaqmi yanapawasun yachasqanchikman hina kawsakusqanchikqa?

²² Qawamusqanchikman hinam, Diosmantaqa yachanchik tukuy ima unanchasqankunapi yuyaymanaspa chaynataq bibliata ñawinchaspa. Bibliapiqa rimanmi qatipakunapaq hina runakunamanta. Paykunamanta huk kaqninmi kanku Moiseswan David. Diosqa paymanta yachanapaqmi bibliapi tukuyta qillqachirqa, chaymi kallpanchakunanchik bibliata ñawinchanapaq.

²³ Taytanchik Jehova Diosmantaqa wiña-wiñaykamam hinalla yachasun (Ecl. 3:11). Ichaqa, manam yachayllachu-yachananchik, aswanqa yachasqanchikman hinam kawsakunanchik. Chayna kawsakuspaqa Jehova Diosmanmi astawan asuykusun (Sant. 4:8). Bibliapi nisqanman hinam, payman sunqu kaqkunataqa mana saqiwasunchu.