¿Ñawincharqankichu Willakuq qillqakunata? Imakunatam ñawinchasqaykimanta niwaq.

¿Jehova Diosqa ima niytataq munachkarqa “contraykipi armakuna ruwasqankupas manam imanasunkichu” nisqanwanqa? (Is. 54:17).

Imaynam pirqapas harkawanchik llumpa-llumpayta wayramuptin, chaynam Jehova Diospas ‘mana llakipayakuq runakunamanta’ harkawanchik (Isaias 25:4, 5). Chiqniwaqninchikkunaqa manam wiñaypaqchu ñakarichiwasun (w19.01, 6 hinaspa 7 kaqpi).

¿Imaynam Jehova Dios karqa Canaan llaqtayuqkunawan chaynataq mana kasukuq Israel runakunawan?

Millakuypaq kaqkuna ruwaqta hinaspa warmikunata chaynataq warmakuna ñakarichiqtaqa Jehova Diosmi chinkachirqa. Payman sunqu kaqkunata chaynataq allin kaqta ruwaqkunatañataqmi tukuypi yanaparqa (w19.02, 22 hinaspa 23 kaqpi).

¿Imatam ruwananchik pipas mana iñiqmasinchik kachkaspan lliwpaq mañakuptinqa?

Chayna kaptinqa mana “amen” nispallam upallalla qipakunanchik. ¿Imanasqa? “Amen” nispanchikqa paykuna hinam pantaypi kachkachwan. Mañakuyta munaspaqa mañakuchwanmi sunqullanchikpi (w19.03, 31 kaqpi).

¿Llumpa-llumpay huchachu wawakunata abusayqa?

Pipas abusaqqa wawakunatam ñakarichin hinaspapas Diospa llaqtantam pinqayman churan. Chaymantapas abusaqkunaqa autoridadkunapa kamachikuykuna qusqankutam qipanchanku hinaspapas Jehova Diospa qayllanpim huchallikunku. Pipas warmacha abusarusqanmanta punta apaqkuna yacharuspanqa, autoridadkunamanmi willanmanku. Chaytaqa ruwanmanku yachasqanku lawpi chayta ruwanankupaq autoridadkuna niptillankum (w19.05, 9 hinaspa 10 kaqpi).

¿Imaynatam yuyayninchikta musuqyachichwan?

Yuyayninchikta musuqyachinapaqqa utaq musuq runaña kanapaqqa Jehova Diostam mañakunanchik hinaspapas ñawinchasqanchikpim yuyaymanananchik, chaymantapas Jehova Diosta yupaychaq runakunawanmi hukllawakunanchik (w19.06, 11 hinaspa 12 kaqpi).

¿Imam yanapawasun llumpa-llumpay ñakariy punchawkunapi Diosman sunqu kanapaq?

Jehova Diosta kuyaymi hinaspa kuyawasqanchikmantawan waqaychawananchikmanta mana iskayrayaymi. Chaymantapas biblianchikta sapa punchaw ñawinchaymi hinaspa tuta-punchaw mañakuymi. Chaynataq hamuq tiempopi nisqankunata Dios ruwakunanmanta mana iskayrayaymi hinaspa huñunakuykunaman riymi. Chaymantapas bibliapa nisqankunata chaynataq Diospaq takikunata umallanchikmanta yachaymi (w19.07, 2-4 kaqkama).

¿Imatam ruwachwan ayllunchikta yanapanapaq?

Kuyapayakuq hinaspa allin runa kasqanchikqa ayllunchikkunatam yanapanqa Diosman asuykunankupaq (w19.08, 15-17 kaqkama).

Mateo 11:28 nisqanman hinaqa ¿Imaynanpitaq hawkayayta tarinchik Diospaq kaqkunata ruwaspaqa?

Jehova Dios, Jesus hinaspa punta apaqkuna kuyakuqllaña kasqankuraykum, maymantaña kaspapas llapallan iñiqmasinchikkuna kuyakuqllaña hinaspa mana hatun tukuq kasqankuraykum hinaspa ima ruwaymantapas Diosmanta willakuy aswan allin kasqanraykum (w19.09, 23 kaqpi).

¿Imaynatam Jehova Diosqa yanapawanchik imatapas ruwanapaq? (Filip. 2:13).

Jehova Diosqa munayninta ruwanapaqmi bibliawan yanapawanchik. Atiyninwanpas yanapawanchiktaqmi imapas ruwasqanchik allin qispinanpaq (w19.10, 21 kaqpi).

¿Imaynatam allinta tantiakuchwan?

Yachayta quwananchikpapmi Jehova Diosta mañakunanchik, imamantapas sumaqtaraq yachaykunanchik, imarayku imatapas ruwasqanchikta qawarikunanchik hinaspa imatapas nisqanchikman hina ruwananchik (w19.11, 27-29 kaqkama).

¿Eva wañuruptin animan hinalla kawsananmantachu satanas nichkarqa?

Manachusmi, satanasqa manam nirqa Eva wañuruptin animan hinalla kawsananmantachu. Aswanqa mana haykaqpas wañunanmantam. Chay llulla rimaykunaqa yaqachusmi rikuriramurqa sinchi para karusqan qipamanña, Babel llaqtayuq runakunapa rimayninta Dios pantarachiptinña (w19.12, 15 kaqpi).