1. ¿Imaynataq Diosta yupaychachkanchik? ¿Imatam mana munanchikchu?

 ENTERON pachapi millonnintin runakunam hawka, kusisqa hinaspa huk sunqulla Diosta yupaychachkanchik. Jehova Dioswanpas chaynataq ñuqanchikpurapas allin amistadmi kanchik. Chaymi Diospa llaqtanmanta karunchakuytaqa mana haykapipas munanchikchu. Diosta chayna kusisqa servisqanchikraykum hukkunapas Diospa llaqtanman yaykukamunankuta munanchik.

2. ¿Imawantaq anchata admirakunchik?

² Dios yanapawaptinchikmi sasachakuykunapa utaq mana allinkunapa chawpinpi kaspanchikpas kusisqa, hawka hinaspa huk sunqulla Diosta yupaychachkanchik, chaywanmi anchata admirakunchik (1 Juan 5:19; Apoc. 12:12). Diosqa yachanmi satanaspa munaychakusqan runakunawan kawsasqanchikrayku peligropi kasqanchikta. Chaymi kuyawasqanchikrayku llaqtanpi kananchikta munan, chaynapi kusisqa servinanchikpaq. Diosta huk sunqulla servisqanchiktam biblia tupachin ‘rupaypi utaq parapi llantukunapaq’ sitiowan hinaspa ‘parqupayasqa huertawan’ (Is. 4:6; 58:11). Sasallaña tiempopi kawsaspapas Jehova Dios bendeciwaptinchikmi payta yupaychaqkunaqa hawka hinaspa kusisqa kawsakuchkanchik (Is. 54:14; 2 Tim. 3:1).

3. ¿Haykapim puntata cumplikurqa Isaiaswan Jehova Diospa qillqachisqan?

³ Jehova Diosmi Isaias 65 capitulopi qillqachirqa serviqninkuna imayna kawsakunankumanta. Chay qillqachisqanmi puntata cumplikurqa 537 watapi. Chay watapim huchankumanta wanakuq judiokuna Babiloniaman apasqa kasqankumanta llaqtankuman kutirqaku. Paykunam Dios yanapaptin tuñisqallaña Jerusalen llaqtata kaqmanta sumaqyarachirqaku. Chaymantapas, Israel nacionpi Diosta yupaychanankupaqmi templota kaqmanta allicharqaku (Is. 51:11; Zac. 8:3).

4. ¿Imaynatam Isaias 65 capitulopa nisqan kunan tiempopi cumplikuchkan?

 ⁴ Isaiaspa qillqasqanqa kunan tiempopipas cumplikuchkanmi. 1919 watapim Jehova Diosta serviqkunaqa hatun Babiloniamanta utaq pantay religionmanta lluqsikuyta qallaykurqaku. Chaymantapacham enteron pachapi mirachkanchik. Diosmanta willakuqkunaqa kusikuyllawanñam achka congregacionta rikurirachirqaku. Achka runamasinchikkunam mana allin kawsakusqankuta saqispanku Diosta serviyta qallaykurqaku. Hinaspapas musuq pachawan pachakuchkaq hinam ‘Diospa munasqanman hinaña’ kawsakuyta qallaykurqaku (Efes. 4:24). Isaiaspa qillqasqankuna kunan tiempopi cumplikuptinpas hamuq tiempopi cumplikuptinmi astawanraqqa qawasunchik. Kunanñataqyá yachaykusun Diosta servisqanchikrayku ima bendicionkuna chaskisqanchikmanta hinaspa Diospa llaqtanta imanasqa mana haykapipas saqinanchikmanta.

DIOSTA SERVISPA IMA BENDICIONKUNA CHASKISQANCHIKMANTA

5. Isaias 65:13 nisqanman hinaqa, ¿imaynatam yupaychaqninkunata Dios yanapawanchik?

⁵ Allinlla kawsakunapaqmi tukuy imayuq kanchik. Isaiasmi qillqarqa Diosta yupaychaqkuna hinaspa Diosta mana yupaychaqkuna imayna kawsakusqankumanta (leey Isaias 65:13). Jehova Diosqa atiyninwan, palabranwan hinaspa tukuy ima yachachikuykunawanmi tiempollanpi yanapawanchik, tukuy chaykunaqa miski mikuy hinam (tupachiy Apocalipsis 22:17 nisqanwan). Diosta mana yupaychaqkunam ichaqa chay yachachikuykunata mana chaskisqankurayku ‘yakumanta’, ‘mikuymanta’ hinaspa ‘pinqaypi’ hina tarikunku (Amos 8:11).

6. ¿Imakunata serviqninkunaman Jehova Dios qunanmantam nin Joel 2:​21-24? ¿Imatam chaywanqa nichkan?

⁶ Diosmanta willakuq Joelpas qillqarqataqmi Jehova Diosqa serviqninkunaman trigota, vinota hinaspa aceiteta achkanpi qunanmanta (Joel 2:​21-24). Chaywanmi nichkarqa Jehova Diosqa yupaychaqninkunata cuidananmanta hinaspa yachachinanmanta. ¿Imaynatam chay nisqanqa kunan cumplikuchkan? Jehova Diosmi quwanchik palabran bibliata, qillqanchikkunata, jw.org nisqanpi yachachikuykunata hinaspa huñunakuykunapiwan asambleakunapi yachachikuykunata. Tukuy chaykunawanmi sapa punchaw allinlla hinaspa kusisqa kawsakuyta atinchik.

7. ¿Imanasqataq ‘sunqunchikpi kusisqa kanchik’? (Rimarimuytaq Isaias 65:14 nisqanmantapas).

⁷ Kusisqa hinaspa saksasqa hinam tarikunchik. Ñuqanchikqa Jehova Diosta tukuy sunqumanta agradecekusqanchikraykum kusikuymanta qaparinchik (leey Isaias 65:14). ¿Imanasqam ‘sunqunchikpi kusisqa kanchik’? Diospa palabranpi sumaq yachachikuykunam hinaspa prometewasqanchikkunam anchata kallpanchawanchik. Chaymantapas, Jesuspa wañukusqanwan hamuq tiempopi aswan kusisqaraq kawsakunanchikmantam mana iskayrayanchikchu. ¡Mayna kusisqamá tarikunchik iñiqmasinchikkunawan chaykunamanta parlaspaqa! (Sal. 34:8; 133:​1-3).

8. ¿Imaynatam Diospa llaqtanpi kaqkuna payta yupaychanchik?

⁸ Diospa llaqtanpi kaqkunaqa huk sunqullam Diosta yupaychanchik, hinaspapas anchatam kuyanakunchik. ‘Tukuy imapi huklla kanapaq’ chayna kuyanakusqanchikraykum yachanchik musuq allpa pachapiqa aswan sumaqraq kawsakunanchikta. Chay tiempopiqa astawanraq kuyanakuspanchikmi huk sunqulla Diosta yupaychasun (Col. 3:14). Huk iñiqmasinchikmi testigokunata chayllaraq riqsirusqanmanta nin: “Ñuqaqa manam yacharqanichu imayna kusisqa kawsakuytaqa. Manam familiaypipas kusisqaqa kawsakurqanichu. Testigokuna kuyakuq kasqankuta qawaykuspayñam kuyakuq kayta  yacharqani”, nispa. Pipas kusisqa hinaspa saksasqa hina kananpaqqa testigokunawan kuskam Diosta yupaychanan. Ñuqanchikmanta runakuna imataña niptinkupas Diospa hinaspa angelkunapa allin qawasqanmi kanchik (Is. 65:15).

9. ¿Imam pasanqa kunan tiempopi sasachawaqninchik kaqkunawan? (Rimarimuytaq Isaias 65:​16, 17 nisqanmantapas).

⁹ Imaña kaptinpas hawkam tarikunchik. Isaias 65:14 nisqanpim willawanchik Jehova Diosta mana yupaychaqkunaqa ‘sunqunkupi llakisqa kasqankurayku qaparkachanankumanta’ hinaspa ‘ancha llakisqa kasqankurayku waqanankumanta’. ¿Imatam nichwan Diosta yupaychaqkunamantaqa? ¿Imaynañam kanqaku sasachakuykunapi kunan kaspankupas? Diosmi nin: “Ñawpaq sasachakuykunaqa qunqasqañam kanqa, manañam kanqañachu”, nispa (leey Isaias 65:​16, 17). Arí, kunan tiempopi tukuy ima llakichiwaqninchik kaqkunata Jehova Dios chinkarachiptinmi manaña haykapipas yuyarisunñachu.

10. ¿Imanasqam niwaq iñiqmasinchikkunawan kayqa kusikunapaq kasqanta? (Qawaytaq fototapas).

¹⁰ Kunan tiempopipas huñunakuyninchikkunapi kaspam hawkalla tarikunchik, manamá imatapas manchakunchikchu. Arí, chaypi kaspanchikqa tukuy ima llakichiwaqninchik kaqkunatam qunqaykunchikraq. ¿Imaynatam ñuqanchikpas yanapakuchwan huñunakuyninchikkunapi llapallanchik hawkalla kananchikpaq? Kuyakuq, kusisqa, hawka hinaspa llampu sunqu kaspam chaynataq kuyakuywan imatapas ruwaspam. Chayna kanapaqmi atiyninwan Dios yanapawanchik (Gal. 5:​22, 23). ¡Mayna kusikunapaqmá Diospa llaqtanpi kayqa! Diospa llaqtanmanta mana karunchakuspanchikqa paypa lliw prometewasqanchikpa cumplikusqantam qawasun. Paymi nin: “Musuq cielotawan musuq allpa pachatam unanchasaq”, nispa.

11. ¿Imaynataq tarikunchik Diospa llaqtanpi kaspanchik? (Rimarimuytaq Isaias 65:​18, 19 nisqanmantapas).

¹¹ Tukuy ima chaskisqanchikmantam agradecesqa tarikunchik. Qatiqnin versiculokunapim Isaias niwanchik Diosta yupaychaqkunaqa imanasqa kusisqa tarikusqanchikmanta. Kikin Jehova Diosmi chayna kananchikpaq yanapawanchik (leey Isaias 65:​18, 19). Paytaqmi niwanchik llaqtanman yaykunankupaq runamasinchikkunata yanapanapaqpas. Diosta mana yupaychaqkunaqa mana imapa kanan chunniqpi hinam tarikunku, Diospa llaqtanpi kaspankum ichaqa achka yakupa kasqanpi hina kanqaku. ¡Anchatamá kusikunchik imam kaqta yachachiq religionpi kaspanchikqa! Chayraykum tukuy ima yachasqanchikkunataqa chaynataq kusisqa kawsakusqanchiktaqa hukkunamanpas willayta munanchik (Jer. 31:12).

12. ¿Imaynataq tarikunki Isaias 65:​20-24 nisqanta yachaspayki? ¿Imanasqa?

 ¹² Iñiqmasinchikkunawan kuska huk sunqulla Diosta servisqanchikmantam anchata agradecekunchik. Kusisqataqmi suyachkanchik Diospa prometewasqanchikkuna cumplikunantapas. ¡Imakunataraqya rikusun hinaspa ruwasun musuq allpa pachapiqa! Bibliapim nin: “Wawakunapas manam iskay kimsa punchawllachu kawsanqa, yuyaqkunapas qalaypaq machuyaspankuñam wañunqa”, nispa. Nintaqmi: “Wasikunatam ruwanqaku, hinaspam chaypi yachanqaku. Uvas chakrayuqmi kanqaku, hinaspam rurunta mikunqaku”, nispa. Chaymantapas ‘Jehova Dios bendecisqanraykum imatapas mana yanqapaqchu ruwanqaku’. Diosmi prometewanchik hawka hinaspa kusisqa kawsakunapaq. ‘Manaraq qayakuchkaptinchikmi’ Diosqa yachanqaña imapas necesitasqanchikta, hinaspam chayman hina quwasun (Is. 65:​20-24; Sal. 145:16).

13. Isaias 65:25 nisqanman hinaqa, ¿imaynatam Diosta yupaychaqkunaqa genionkuta cambiarqaku?

¹³ Hawkam hinaspa segurom kawsakunchik. Jehova Dios atiyninwan yanapaptinmi achka runamasinchikkuna purun animal hina genioyuq kasqankuta cambiarqaku (leey Isaias 65:25). Arí, mansoyachisqa animal hinañam hawka kawsakunku (Rom. 12:2; Efes. 4:​22-24). Chaywanqa nichkanchik manam Diosta serviqkuna manaña pantaq kananchikmantachu, hinallam imapipas pantasun. Chaywanpas Jehova Diosqa milagrota ruwaspanmi ‘tukuy rikchaq runakunata’ yanapachkan huk sunqulla hinaspa kuyanakuspa payta yupaychanankupaq (Tito 2:11). ¡Tukuy atiyniyuq Jehova Dios yanapawaptillanchikmá chaynaqa kawsakunchik!

14. ¿Imaynatam Isaias 65:25 nisqan cumplikurqa iñiqmasinchikpa vidanpi?

¹⁴ ¿Ciertotachu pipas genionta cambiayta atinman? Arí, chaypaqyá rimaykusun mana allin ruwaq, maqakuq hinaspa aychanpa munasqanman hina kawsakuq 20 watayuq jovenmanta. Payqa carrokunata suwakusqanraykum hinaspa tukuy mana allinkunata ruwasqanraykum achka kutita carcelpi karqa. Chaymantapas payqa peleayllapim purikuq. Payqa bibliamanta imam kaqta yachayta qallaykuspanmi hinaspa testigokunapa huñunakuyninman riyta qallaykuspanmi chayraq yacharurqa Diosta yupaychanapaq unanchasqa kasqanchikta. Bautizakuruspanmi sapa kuti piensaq Isaias 65:25 nisqan paypi imayna cumplikusqanpi. Payqa manchakuypaq leon hina kasqanmantam kunanqa ovejacha hinaña hawka kawsakuchkan.

15. ¿Imakunaraykum munanchik runamasinchikkuna ñuqanchikwan kuska Diosta yupaychanankuta? ¿Imatam chaypaq ruwanchik?

¹⁵ Isaias 65:13 nisqanmi qallarin: ‘Llapallan kamachiq Jehova Diosmi nin’, nispa. 25 versiculoñataqmi tukun: “Jehova Diosmi chaynata nin”, nispa. Diospa nisqankunaqa haykapipas cumplikunmi (Is. 55:​10, 11). Diospa prometesqanman hinam enteron pachapi serviqninkunaqa kusisqa, hawka hinaspa huk sunqulla payta yupaychachkanchik. Dios yanapawaptinchikmá mana allin runakunapa chawpinpi kawsaspapas iñiqmasinchikkunawan kaspa hawka hinaspa seguro kanchik (Sal. 72:7). Tukuy chaykunaraykum munanchik runamasinchikkuna yanapayta, chaynapi ñuqanchikwan kuska Diosta yupaychanankupaq. Chaypaqmi imamantapas astawan tiempochakunchik paykunata yachachiptinchik Jesuspa qatiqnin kanankupaq (Mat. 28:​19, 20).

HUKKUNATAYÁ YANAPASUN ÑUQANCHIKWAN KUSKA DIOSTA YUPAYCHANANKUPAQ

16. ¿Imanasqam runamasinchikkuna kikinkumanta Diosta serviyta munanku?

¹⁶ Llapallanchikmi imatapas ruwachwan runamasinchikkuna ñuqanchikwan kuska Diosta yupaychayta munanankupaq, chaypaqqa Jehova Diostam qatipakuchwan. Payqa manamá  pitapas hikutanchu, aswanqa kuyakuyllawanmi pitapas pusamun serviqnin kananpaq (Jer. 31:3; Juan 6:44). Allin sunqu runakunaqa Jehova Diosninchik imayna kasqanmanta yachayta qallaykuspankum kikinkumanta serviyta munanku. ¿Ñuqanchikpas imayna runam kananchik runamasinchikkuna qawawaspanchik Diosta serviyta munanankupaq?

17. ¿Imatam ruwananchik runamasinchikkuna Diosta yupaychayta munanankupaq?

¹⁷ Runamasinchikkuna Diosta yupaychayta munanankupaqqa iñiqmasinchikkunatam kuyananchik hinaspa yanapananchik. Chayna kuyanakuptinchikqa huñunakuykunaman chayllaraq hamuq runamasinchikkunam ninqaku: “Chiqaptapunim Diosqa qamkunawan kachkan”, nispanku. Chaynatam ñawpaq Corinto llaqtapi Diospi mana iñiq runakunapas nirqaku, yaqachusmi paykunapas huñunakuykunaman rirqaku (1 Cor. 14:​24, 25; Zac. 8:23). Chaymi kasukunanchik “qamkunapurapas hawkallayá kawsakuychik” nispa bibliapa nisqanta (1 Tes. 5:13).

18. ¿Imayna kasqanchikta qawaspankum runamasinchikkuna Diosta yupaychayta munanqaku?

¹⁸ Jehova Dios hinataqmi ñuqanchikpas iñiqmasinchikkunapa pantasqankuta qawanamantaqa allin kaqkuna ruwasqankuta qawananchik. Yuyarinanchikmi hamuq tiempopiqa llapanchik manaña pantaq kananchikta. Kuyakuq kaptinchikqa manam sasachu kanqa pi sientirachiwaptinchikpas bibliapa nisqanta kasukuyqa. Bibliapim nin: “Sumaq sunquyá kaychik, sunqumanta llakipayakuq, hinaspayá tukuy sunqumanta pampachanakuychik”, nispa (Efes. 4:32). Llapallankuwanmi chayna kayta munanchik, chaymi runamasinchikkunapas chayta qawaspanku Diosta yupaychayta munanqaku. a

 AMAYÁ HAYKAPIPAS DIOSPA LLAQTANMANTAQA KARUNCHAKUSUNCHU

19. (1) ¿Imatam nirqaku Diospa llaqtanman kutimuq iñiqmasinchikkuna? (Qaway “ Lluqsiruspankupas kutiramurqakum” niqta). (2) ¿Imapaqmi yanapakunanchik? (Qawaytaq dibujotapas).

¹⁹ ¡Mayna kusikunapaqmá iñiqmasinchikkunawan kuska, hawkalla hinaspa huk sunqulla Diosta yupaychayqa! Manamá haykapipas achka-achkaqa karqanchikchu. Diostamá ancha-anchata agradecekunchik chayna yupaychananchikpaq yanapawasqanchikmanta. Pipas allinlla, kusisqa, hawkalla hinaspa seguro kawsakuyta munaspanqa Diospa llaqtanpi kaqkunawan kuskam Diosta yupaychanan, manataqmi haykapipas karunchakunanchu. Ichaqa satanasmi tukuyta ruwachkan Diospa sumaq llaqtanmanta karuncharuwananchikpaq, chaymi anchata cuidakunanchik (1 Ped. 5:8; Apoc. 12:9). Amayá satanas pantarachiwananchiktaqa saqisunchu, aswanqa Diospa llaqtan suma-sumaq kananpaqyá iñiqmasinchikkunawan huk sunqulla kaspa yanapakusun.