1. ¿Pikunam Jesuspa wañukusqan qipata imatapas tantiaqku hinaspa iñiqkunata yachachiqku?

 JEHOVA DIOSQA imatapas kamachiwaspanchikqa munan ordenninpi ruwananchiktam (1 Cor. 14:33). Diosqa munachkan sumaq willakuykuna enteron allpa pachapi willakusqa kanantam (Mat. 24:14). Chaymi Jesusta churarun chay willakuypi umalliq kananpaq. Jesusmá segurakurqa imapas ordenninpi kananpaq. Jesuspa wañukusqan qipatam apostolkuna hinaspa Jerusalenpi punta apaqkuna huñunakuspa imatapas tantiaqku, hinaspam iñiqkunaman willachiqku chayman hina ruwanankupaq (Hech. 15:2; 16:4). Chaymantapas, sapa congregacionpim punta apaqkuna akllasqa karqa. Paykunam iñiqkunata yachachiqku hinaspa Diospa llaqtanpi punta apaqkunapa tantiasqanta willaqku (Hech. 14:23). Lliw iñiqkuna kasukusqankuraykum “iñiyninkupi aswan-aswan allin karqaku hinaspa sapa punchaw astawan achkayarqaku” (Hech. 16:5).

2. ¿Imaynatam Jehova Diosqa 1919 watamanta serviqninkunata yanapachkan?

² Kay tiempopipas Jehova Diosqa hinallam serviqninkunataqa yanapachkan imapas ordenninpi ruwasqa kananpaq. Jesusmi 1919 watapi hanaq pachapaq kaqkunamanta wakinta akllarqa enteron pachapi Diosmanta willakuypi cuentallikunankupaq hinaspa qatiqninkunata yachachinankupaq (Luc. 12:42). a Arí, llapallanchikmá qawachkanchik chay punta apaqkunapa ruwayninkuta Dios bendecisqantaqa (Is. 60:22; 65:​13, 14).

3, 4. (1) Willarimuy Diospa llaqtanpi punta apaqkunapa yachachiwasqanchik imanasqa ancha allin kasqanmanta. (2) ¿Imamantam kay yachachikuypi yachasun?

 ³ Diospa llaqtanpi punta apaqkuna mana yanapawaptinchikqa manamá atichwanchu Diosmanta willakunapaq Jesuspa kamachiwasqanchikta cumpliytaqa (Mat. 28:​19, 20). Sapa congregacion maymanta maykama willakunanpaq mana kamachisqa kaptinqa sapakamachá munasqanchikman hina willakuchwan. Chayna kaptinqa huk hawaqllapichá kuti-kutirispa willakuchwan, wakin sitiokunamanñataqchá mana haykapipas chayachwanchu. ¿Imakunataraqtaq mana ruwayta atichwanchu punta apaqkuna mana yachachiwaptinchikqa?

⁴ Jesusmi kay pachapi kachkaspan qatiqninkunata yachachirqa imatapas imaynata ruwanankupaq. Chaynatam kunan tiempopipas yachachiwachkanchik. Kay yachachikuypim yachasun Diospa llaqtanpi punta apaqkuna Jesus hina imatapas ruwasqankumanta. Yachasuntaqmi Diospa llaqtanpi punta apaqkunamanta mana iskayrayanapaq imata ruwanamantapas.

DIOSPA LLAQTANPI PUNTA APAQKUNAQA JESUS HINAM IMATAPAS RUWANKU

5. ¿Imaynatam Diospa llaqtanpi punta apaqkuna Jesusta qatipakunku? (Rimarimuytaq Juan 8:28 nisqanmantapas).

⁵ Jesusqa taytanmantam yacharqa imam ruwanantaqa hinaspa imam rimanantaqa. Diospa llaqtanpi punta apaqkunapas imayna kawsakunapaqmi imam allin utaq imam mana allin kasqanta Diospa palabranwan yachachiwanchik (leey Juan 8:28; 2 Tim. 3:​16, 17). Chaymantapas, niwanchikmi sapa punchaw biblianchikta leenapaq hinaspa yachasqanchikman hina kawsakunapaq. ¿Imanasqam chay niwasqanchikta kasukuyqa allinninchikpaq?

6. ¿Imanasqam bibliata estudiayninchikqa anchata yanapawanchik?

⁶ Qillqanchikkunawan yanapachikuspa bibliata estudiayqa anchatam yanapawanchik. Yanapawanchikqa Diospa llaqtanpi punta apaqkunapa nisqanta bibliapa nisqanwan tupachinapaqmi. Imapas niwasqanchikkuna bibliapa nisqanman hina kasqanta kikinchik yachaykuspanchikmi paykunamantaqa manapuni iskayrayanchikchu (Rom. 12:2).

7. ¿Imamantam Jesus willakurqa? ¿Imaynatam llapallanchik payta qatipakunchik?

⁷ Jesusmi ‘Diospa gobiernonmanta sumaq willakuyta willakurqa’ (Luc. 4:​43, 44). Chayta ruwanankupaqmi qatiqninkunatapas kamachirqa (Luc. 9:​1, 2; 10:​8, 9). Chaymi kunan tiempopipas Diospa llaqtanpi ima ruwayniyuqña kaspanchikpas utaq maypiña yachaspanchikpas llapanchik Diospa gobiernonmanta sumaq willakuyta willakunchik.

8. ¿Imapaq akllasqa kasqanchikmantam anchata kusikunchik?

⁸ Diospa gobiernonmanta willakunapaq akllasqa kasqanchikmantam anchata kusikunchik. Manamá lliw runakunachu chaytaqa ruwanmanku. Chaymi Jesuspas kay pachapi kachkaspan mana munarqachu demoniokuna paymanta rimanankuta (Luc. 4:41). Chaymi Jehova Diospa testigonkunawan pipas willakuyta munaspanqa Diospa munasqanman hina kawsakunan. Chaynaqa, ¿valoranchikchu Diosmanta willakunapaq akllaykuwasqanchikta? Chayna kaptinqa maypiña kaspapas willakunanchikmi. Jesus hinam ñuqanchikpas tarpuchkaq hina hinaspa parquchkaq hina runakunaman sumaq willakuykunata yachachinanchik (Mat. 13:​3, 23; 1 Cor. 3:6).

9. ¿Imatam Diospa llaqtanpi punta apaqkuna ruwarqaku Diospa sutinta lliw runakuna yachanankupaq?

⁹ Jesusqa taytanpa sutintam runakunaman yachachirqa. Huk kutipim taytanta nirqa: “Ñuqaqa sutikitam yachachirqani”, nispa (Juan 17:26). Kunanpas Diospa llaqtanpi kaqkunaqa Jesusta qatipakuspam tukuyta  ruwanchik Diospa sutinta runakuna yachanankupaq. Chaypaqmi Diospa llaqtanpi punta apaqkunaqa ruwarachinku Musuq allpa pachapi kawsaqkunapaq bibliata, chayqa kachkan 270 masnin idiomapim. Chay bibliapim Diospa sutin rikurichkan chayllaraq bibliata qillqaptinku maymi rikurisqanpi. Chaymantam astawan rimachkan biblianchikpi A4 hinaspa A5 nisqan yachachikuykunapi. Chaypitaqmi tarichwan Mateomanta Apocalipsis librokama Diospa sutin 237 kutita imanasqa rikurinanmantapas.

10. ¿Imatam yachachwan Myanmar nacionniyuq warmipa nisqanmanta?

¹⁰ Jesus hinam ñuqanchikpas munanchik llapallan runakuna Diospa sutinta yachanankuta. Myanmar nacionniyuq iñiqmasinchikmi 67 watayuq warmiman Diospa sutin Jehova kasqanta willaykurqa. Chayta yacharuspanmi chay warmiqa kusikuymanta waqaytaraq qallaykurqa. Paymi nirqa: “Qanmi chayllaraq Diospa sutintaqa yachachiwachkanki. Ima yachasqaymantapas aswan sumaqmi Diospa sutinta yachasqayqa”, nispa. Chaywanmi yachanchik Diospa sutinta yachasqankumantapacha allin sunquyuq runakunapa vidanku cambiasqanta.

DIOSPA LLAQTANPI PUNTA APAQKUNAPIYÁ HINALLA HAPIPAKUSUN

11. ¿Imatam sapa congregacionpi punta apaqkuna ruwananku Diospa llaqtanpi punta apaqkunamanta mana iskayrayaspankuqa? (Qawaytaq fotokunatapas).

¹¹ ¿Imatam sapa congregacionpi punta apaqkuna ruwanqaku Diospa llaqtanpi punta apaqkunamanta mana iskayrayaspankuqa? Kamachikuykuna apachimusqankutam chaskinqaku, hinaspam tukuyta ruwanqaku kasukunankupaq. Paykunam sapa huñunakuypi imaynata yachachinankupaq hinaspa imaynata mañakunankupaq yachachikuykunata chaskinku. Chaskinkutaqmi iñiqkunata imayna cuidanankupaqpas. Sapa congregacionpi punta apaqkuna tukuy chay yachachikuykunata kasukuptinkuqa iñiqkunam yachanku Jehova Dios kuyasqanta hinaspa cuidasqanta.

12. (1) ¿Imanasqataq punta apaqkunapa imapas niwasqanchikta kasukunanchik? (Rimarimuytaq Hebreos 13:​7, 17 nisqanmantapas). (2) ¿Imanasqataq punta apaqkunapa pantasqallankutaqa mana qawananchikchu?

¹² Punta apaqkuna kamachiwaptinchikqa kusisqam kasukunanchik. Kasukuptinchikqa manam sasachu kanqa cuidawayninchikqa. Bibliapim niwanchik paykunata kasukunapaq hinaspa makinkupi churakunapaq (leey Hebreos 13:​7, 17). Wakinpim ichaqa kasukuyninchik sasa kanman pantaq kasqankurayku. Sichum pantasqallankuta qawaspanchikqa enemigonchikkunapa munasqantam ruwachkachwan. ¿Imanasqam chaynata ninchik? Enemigonchikkunaqa munachkan llaqtanta Dios yanapasqanmanta iskayrayananchiktam. Chaymi congregacionninchikpi punta apaqkunamanta iskayrayaspanchikqa Diospa llaqtanpi punta apaqkunamantapas iskayrayayta qallaykuchwan. Chaynaqa, ¿imakunatam ruwachwan enemigonchikkuna mana pantachiwananchikpaq?

AMAYÁ PIPAS PUNTA APAQKUNAMANTAQA ISKAYRAYACHIWASUNCHU

13. ¿Diospa llaqtanmanta ima piensananchiktam enemigonchikkuna munanku?

¹³ Diospa llaqtanpi punta apaqkunaqa bibliapa nisqanman hinam imatapas kamachiwanchik. Enemigonchikkunam ichaqa munanku chaykuna mana allin kasqanta piensananchikta. Bibliapim niwanchik cuerponchikpipas, piensayninchikpipas chaynataq Diosta serviyninchikpipas limpio kananchikpaq. Niwanchiktaqmi pi iñiqpas hatun huchata ruwaruspan mana wanakuspanqa congregacionmanta qarqusqa kananmantapas (1 Cor. 5:​11-13; 6:​9, 10). Bibliapa chayna nisqanta kasukusqanchikraykum enemigonchikkunaqa ninku mana llakipayakuq, mana kuyakuq chaynataq hukkunamanta  aswan allinpaq hapikuq kasqanchikta.

14. ¿Pim runakunata kallpanchan Diospa llaqtanmanta llullakunata rimanankupaq?

¹⁴ Yuyarisun pim Diosmanta karunchayta munawasqanchikta. Bibliapim nin satanas llullakunapa taytan kasqanta. Paymi runakunata kallpanchan Diospa llaqtanmanta llullakunata rimanankupaq (Juan 8:44; Gen. 3:​1-5). Chaywanqa manamá admirakunchikchu, chaytaqa apostolkunapa tiemponpipas ruwarqañam.

15. ¿Imakunatam ruwarqaku Jesuspa hinaspa qatiqninkunapa enemigonku?

¹⁵ Jesus mana pantaq kachkaptinpas chaynataq admirakuypaq milagrokunata ruwachkaptinpas satanasmi runakunata umacharqa paymanta llullakunata rimanankupaq. Religionkunapi umalliqkunam runakunata niqku Jesusqa ‘demoniokunapa kamachiqnin yanapaptin’ demoniokunata qarqusqanmanta (Mar. 3:22). Jesusta juzgaptinkupas religionkunapi umalliqkunaqa nirqakum Diospa contranpi Jesus rimasqanta, hinaspapas runakunatam umacharqaku Jesus wañuchisqa kananpaq mañakunankupaq (Mat. 27:20). Jesuspa qatiqninkuna willakuyta qallaykuptinkupas enemigonkuqa ‘runakunatam umacharqaku hinaspa hikutarqaku’ contrankupi kaspa chiqninankupaq (Hech. 14:​2, 19). 1998 watapi 1 diciembrepaq La Atalaya revistanchikmi Hechos 14:2 nisqanmanta rimarqa. Chaypi nisqanman hinaqa Jesuspa qatiqninkunata chiqniq judiokunam Diosmanta willakusqankuta mana uyarirqakuchu. Ichaqa manam chayllawanchu contentakurqaku, aswanqa llullakunatam chiqichiyta qallaykurqaku huklaw nacionniyuqkunapas Jesuspa qatiqninkunapa contranpi kanankupaq.

16. ¿Imatam yuyarinanchik iñiqmasinchikkunamanta llulla willakuykunata uyarispaqa?

 ¹⁶ Kunanpas satanasqa hinallam llullakunata rikurichichkan, ‘paymá kay pachapi llapallan runakunata pantachichkan’ (Apoc. 12:9). Chaymi Jehova Diospa testigonkunamanta utaq Diospa llaqtanpi punta apaqkunamanta llulla willakuykunata uyarispanchikqa yuyarinanchik ñawpaq tiempopipas Diospa enemigonkunaqa Jesusta hinaspa qatiqninkunata ima ruwasqankuta. Bibliapa nisqanman hinamá runakunaqa testigokunata hinalla chiqnichkanku hinaspa paykunamanta llullakunata rimachkanku (Mat. 5:​11, 12). Enemigonchikkuna mana pantachiwananchikpaqqa yachananchikmi chay llullakunata creenanchikta satanas munasqanta. ¿Imataraqmi ruwananchik mana pantachiwananchikpaq?

17. ¿Imatam ruwananchik llulla willaykunata uyarispanchikqa? (Rimarimuytaq 2 Timoteo 1:13 nisqanmantapas, qawaytaq “ ¿Imatam ruwanayki llulla willakuykunawan?” niqtapas).

¹⁷ Amayá uyarisunchu llulla willakuykunataqa. Chaypaqmi apostol Pablo consejawanchik. Paymi 1 Timoteo 1:​3, 4 nisqanpi kaynata nirqa: ‘Yanqa cuentokunataqa amayá uyariychikchu’, nispa. Timoteotapas kaynatam nirqa: “Amayá uyariychu [ . . . ] yanqa cuentokunataqa”, nispa (1 Tim. 4:7). Kaypi piensarisun, uña warmachakunaqa imatapas pampapi tariruspankuqa siminmanpunim hinanku. Yuyayniyuqkunam ichaqa mana chaytaqa ruwachwanchu unqurachiwananchikta yachasqanchikrayku. Chaynam llulla willakuykunatapas mana uyarinchikchu mana allinninchikpaq kasqanrayku. Uyarinchikqa ‘chiqap kaq yachachikuykunallatam’ (leey 2 Timoteo 1:13).

18. ¿Imatam ruwasun Diospa llaqtanpi punta apaqkunamanta mana iskayrayaspaqa?

¹⁸ Kaypim yacharamunchik Diospa llaqtanpi punta apaqkuna imakunapi Jesusta qatipakusqankumanta. Ichaqa manam chayllapichu qatipakunku. Bibliata estudiaspaykim astawanraq yachanki imakunapiraq qatipakusqankumanta. Iñiqmasinchikkunatayá yanapay Diospa llaqtanpi punta apaqkunamanta manapuni iskayrayanankupaq. Amayá imaraykupas munayninta cumplinanpaq servichikusqan llaqtanmantaqa karunchakuychu (Sal. 37:28). ¿Manachu ancha-ancha kusikunapaq kuyakuq hinaspa Diosman sunqu iñiqmasinchikkunawan Diosninchikta serviyqa? Chaynaqa, testigon kanapaq akllaykuwasqanchiktaqa wiña-wiñaypaqyá valorasun.