1. ¿Imanasqataq wakin iñiqmasinchikkunaqa mana kusisqachu Diosmanta willakunku? (Qawaytaq fototapas).

 ¿IMANASQAM Diosmanta willakunchik? Diosta kuyasqanchikraykum hinaspa paymanta runamasinchikkuna yachanankuta munasqanchikraykum. Achka iñiqmasinchikkunam Diosmantaqa kusisqa willakunku, wakin iñiqmasinchikkunam ichaqa mana. ¿Imanasqa? Manchapakuqllañam kanku, hinaspapas piensankum rimaspanku pantarunankuta. Wakinñataqmi mana riqsisqankuwan parlaytaqa manchakunku. Wakinkuñataqmi imatapas nirunankuta piensaspanku manchakunku. Hukkunañataqmi piwanpas atipanakurunanta piensaspanku manchakunku. Paykunaqa llapallankum Jehova Diosta anchata kuyanku, ichaqa sasachakunkum mana riqsisqanku runakunawan Diosmanta rimayta. Manchapakuspankupas Diosmanta willakuyninchik ancha allin kasqanta yachasqankuraykum sapa kuti willakunankupaq kallpanchakunku. ¡Chaywanqa maynatachá Diosninchikqa kusikun!

2. ¿Imanasqam mana hukmanyanaykichu Diosmanta willakuyta manchakuspaykiqa?

² ¿Qamqa manchakunkichu Diosmanta willakuyta? Wakinpi chayna tarikuspaykiqa amayá hukmanyaychu. Ichapas humilde kasqaykirayku rimaspa pantarunaykita piensanki. Ichapas mana munankichu hukkuna qawarayasunaykita utaq piwanpas imamantapas atipanakuyta. Chaymantapas, manamá munanchikchu pitapas yanapayta munachkaptinchik qaqcharuwananchiktaqa.  Diosqa allintapunim yachan paymanta willakuspayki imayna tarikusqaykita hinaspam yanapaykuyta munasunki (Is. 41:13). Kay yachachikuypim yachasun Diosmanta aswan kusisqa willakunapaq imakuna yanapawananchikmanta.

BIBLIATAYÁ ESTUDIASUN KALLPANCHASQA KANAPAQ

3. ¿Imam Jeremiasta yanaparqa mana manchakuspan Diosmanta willakunanpaq?

³ Ñawpaqmantaraqmi Diospa nisqankunaqa serviqninkunata kallpancharqa sasa kaptinpas Diospa nisqanta cumplinankupaq. Jehova Diosmi Jeremiasta kamachirqa willakunanpaq. Paymi ichaqa manchakuspan nirqa: “Ñuqaqa manam rimayta yachallanichu. Ñuqaqa warmallaraqmi kallani”, nispa (Jer. 1:6). ¿Imam yanaparqa manaña manchakuspan willakunanpaq? Diospa nisqankunam. Chaymi Jeremias nirqa: ‘Niwasqankunam sunquypi nina hina rawrarqa, tulluypa ukunpim nina hina rawrarqa, manañam upallalla kaytaqa atirqaniñachu’, nispa (Jer. 20:​8, 9). Jeremiaspa tiemponpi runakunaqa mana uyariyta munaqkunam karqaku. Chaywanpas Jeremiastaqa Diospa nisqankunapi yuyaymanayninmi kallpancharqa hinalla willakunanpaq.

4. ¿Imaynatam yanapawanchik bibliata leeyninchik hinaspa leesqanchikpi yuyaymanayninchik? (Rimarimuytaq Colosenses 1:​9, 10 nisqanmantapas).

⁴ Ñuqanchiktapas bibliapa nisqankunaqa anchatam yanapawanchik. Colosas llaqtapi iñiqkunaman qillqaspanmi apostol Pablo nirqa Diosmanta imam kaqta yachasqankuqa ‘Diospa munasqanman hina kawsakuspa ruruchkaq hina tukuy allinkunata ruwanankupaq’ yanapananmanta (leey Colosenses 1:​9, 10). Arí, Diospa gobiernonmanta willakuypas allin ruwaymi. Chaynaqa, Diospa palabranta leespanchik hinaspa leesqanchikpi yuyaymanaspanchikmi Jehova Diospi hapipakusun, hinaspapas Diosmanta willakuyninchik ancha allin kasqantam aswan allintaraq entiendesun.

5. ¿Imatam ruwananchik bibliapa nisqankuna allinta yanapawananchikpaq?

⁵ Bibliapa nisqankuna allinta yanapawananchikpaqqa manam apurawllamanñachu leenanchik, estudiananchik nitaq yuyaymanananchik. Chaynaqa, ¿imatam ruwananchik bibliapi ima versiculotapas mana allinta entiendespanchikqa? Pasaylla-pasarunamantaqa astawan entiendenapaqmi maskananchik Índice de las publicaciones Watch Tower hinaspa Guía de estudio para los testigos de Jehová nisqankunapi. Bibliapa nisqankunata entiendenanchikpaq  tiempochakuspaqa Diospa palabranpa nisqankunamantam manapuni iskayrayasunchu (1 Tes. 5:21). Chaykunamanta seguro kaspaqa imapas yachasqanchikkunamantam hukkunaman kusisqa willakusun.

DIOSMANTA WILLAKUQ RINAYKIPAQYÁ ALLINTA PREPARAKUY

6. ¿Imanasqataq willakunapaq allinta preparakunanchik?

⁶ Allinta preparakuspaykiqa manam manchakunkichu runakunawan rimaytaqa. Jesuspas willakunankupaq qatiqninkunata manaraq kamachichkaspanmi yachachirqa (Luc. 10:​1-11). Jesuspa yachachisqanman hina willakusqankuraykum kusisqallaña kutiramurqaku (Luc. 10:17).

7. ¿Imakunapim piensananchik manaraq willakuq lluqsichkaspa? (Qawaytaq fototapas).

⁷ Manaraq willakuq lluqsichkaspam piensananchik chaylla entiendenapaq hina imaynata willananchikpi. Piensananchiktaqmi willakusqanchik lawpi runamasinchikkuna ima nispanku mana uyariyta munasqankupipas, chaynapi ima niyta yachananchikpaq. Chaymi yanapawasun runamasinchikwan hawkalla, kusisqa hinaspa kuyakuywan parlanapaq.

8. ¿Imanasqam Diosmanta willakuqkunaqa mitumanta ruwasqa manka utaq puyñu hina kanchik?

⁸ Apostol Pablom Diosmanta willakuymanta rimaspan nirqa: “Kay sumaq llamkayqa mitumanta ruwasqa mankapi churasqa quri-qullqi hinam ñuqaykupi kachkan”, nispa (2 Cor. 4:7). ¿Imatam tupachirqa quri-qullqiwan? Diospa gobiernonmanta willakuyninchiktam, chaywanmi runakunata yanapanchik salvakunankupaq (2 Cor. 4:1). ¿Pikunamantam rimachkarqa mitumanta ruwasqa mankamanta rimaspanqa? Diospa gobiernonmanta willakuq Diospa serviqninkunamantam. ¿Imaynanpi? Pablopa tiemponpi negociantekunam mitumanta ruwasqa mankapi utaq puyñupi apaqku achka qullqipa chanin mikuykunata, vinota utaq qullqita. Chaynam Diospas ancha valorniyuq sumaq willakuymanta willakunapaq akllaykuwanchik. Pay yanapawaptinchikqa atisunmi willakunapaq kamachiwasqanchikta cumpliytaqa.

DIOSTAYÁ MAÑAKUY MANA MANCHAKUQ KANAYKIPAQ

9. ¿Imatam ruwananchik runamasinchikkuna imatapas niruwananchikta manchakuspaqa? (Qawaytaq fototapas).

⁹ Wakinpiqa runakuna imatapas niruwananchikta piensaspam willakuyta manchakuchwan.  Manchakuspaqa yuyarinanchikmi manaña willakunankupaq apostolkunata harkakuptinku ima ruwasqankuta. Manchakusqankurayku willakuyta saqirunankumantaqa Jehova Diostam mañakurqaku mana manchakuspa ‘palabranmanta hinalla rimanankupaq’. Jehova Diosqa mañakusqankuman hinamá chaylla yanapaykurqa (Hech. 4:​18, 29, 31). Chaynam ñuqanchikpas willakuyta manchakuspaqa Diosta mañakunanchik yanapaykuwananchikpaq. Mañakuchwanmi runamasinchikkunata astawan kuyanapaq. Paykunata kuyaspaqa manam manchakusunchu Diosmanta willaytaqa.

10. ¿Imaynatam Jehova Dios yanapawanchik paypa testigonkuna kaspa willakunapaq? (Rimarimuytaq Isaias 43:​10-12 nisqanmantapas).

¹⁰ Jehova Diosmi akllaykuwarqanchik testigonkuna kananchikpaq (leey Isaias 43:​10-12). Kikinmi niwanchik mana manchakuq kanapaq yanapawananchikpaq. Yuyarisunyá imaynata yanapawasqanchikta. Diospa gobiernonmanta willakuptinchikqa Jesusmi ñuqanchikwan kachkan (Mat. 28:​18-20). Angelkunatapas Jehova Diosmi nin yanapawananchikpaq (Apoc. 14:6). Payqa chuya espiritunwanpas yanapawanchikmi paymanta imapas yachasqanchikkunata yuyarinapaq (Juan 14:​25, 26). Diosqa yanapawanchiktaqmi iñiqmasinchikkunawanpas, paykunam Diosmanta willakunapaq riysiwanchik. Jehova Diospa hinaspa iñiqmasinchikkunapa yanapakuyninwanqa atisunmi mana manchakuspa willakuytaqa.

MAYPIPAS KUSIKUYWANYÁ WILLAKUSUN

11. ¿Imatam ruwawaq achka runakunaman Diosmanta willanaykipaq? (Qawaytaq fototapas).

¹¹ ¿Wasin-wasin rispayki runakunata mana tarisqaykiwanchu hukmanyanki? Chayna kaptinqa piensariy: “¿Maypitaq kunallan kachkanku? ¿Llamkachkankuchu icha rantipakuqchu pasanku?” (Hech. 16:13). Chaynaqa, allinmi kanman callekunapi willakunaykipaq tantiakuyniki. Iñiqmasinchik Josueymi willakun: “Runakunam allinta uyarinku mercadokunapi hinaspa parquekunapi willakuptiy”, nispa. Iñiqmasinchik Josueyqa señoranpiwanmi runamasinchikkunata wasinkupi tarinku tarden law rispanku hinaspa domingonkunapi doce pasayta rispanku (Efes. 5:​15, 16).

12. ¿Imaynatam yachachwan runakuna imapi creesqankuta hinaspa imamanta yachay munasqankuta?

 ¹² Willakusqanchikta runakuna mana uyariwaptinchikqa, ¿imaynatam yachachwan imapi creesqankuta hinaspa imakunamanta yachay munasqankuta? Chaypaqyá qawaykusun iñiqmasinchik Josuey hinaspa señoran ima ruwasqankumanta. Paykunaqa tratadonchikkunapa qallariyninpi tapukuyman hinam tapunku. Chaymi ¿Ima niwaqtaq bibliamanta? sutiyuq tratadowan willakunankupaq ninku: “Wakin runamasinchikkunam ninku bibliaqa Diospa palabran kasqanta, wakinkuñataqmi mana. ¿Ima niwaqtaq qamqa?”, nispanku. Chaynata qallarispankum achka runamasinchikkunawan allinta rimanku.

13. ¿Imanasqam mana pi uyariwaptinchikpas Diosmanta willakuspaqa kusisqa tarikunchik? (Rimarimuytaq Proverbios 27:11 nisqanmantapas).

¹³ Diosmanta willakuspa kusisqa kayninchikqa manam hayka runakuna uyariwasqanchikmantachu. ¿Imanasqa? Kusisqaqa kanchik willakunapaq Jehova Diospa hinaspa Jesuspa kamachiwasqanchikta kasukuspam (Hech. 10:42). Chaymi mana llakikunanchikchu wasinkupi pitapas mana tarispanchikqa utaq pipas mana uyariwaptinchikqa. Kusisqaqa tarikunchik willakunapaq kasukuptinchik Dios kusisqa tarikusqanwanmi (leey Proverbios 27:11).

14. ¿Imaynam tarikunchik mayqin iñiqmasinchikpas Diosmanta yachay munaqta tariruptinqa? ¿Imanasqa?

¹⁴ Ancha kusisqataqmi tarikunchik mayqin iñiqmasinchikpas Diosmanta yachay munaqta tariruptinqa. Willakuq qillqanchikmi Diosmanta willakuyninchikta tupachirqa warmacha chinkaruptin achka maskasqankuwan. Tukuy hinastinpi achka maskaptinkupas chullallam warmachataqa tarin. Chaywanpas tarirusqanmantaqa llapallankum kusikunku. Chaynam Diosmanta yachay munaq runata tarinapaqpas llapallanchik wasin-wasin rispa maskanchik. Llapallanchiktaqmi kusikunchik pipas huñunakuyman hamuyta qallaykuptinqa.

YUYARISUN JEHOVA DIOSTAWAN RUNAMASINCHIKKUNATA KUYASQANCHIKTA

15. ¿Pikunata kuyaspataq aswan kusisqaraq willakusun? (Rimarimuytaq Mateo 22:​37-39 nisqanmantapas, qawaytaq qaranpi fototapas).

¹⁵ Jehova Diostawan runamasinchikkunata kuyaspanchikqa aswan kusisqaraqmi willakusun (leey Mateo 22:​37-39). ¡Maynatachá Jehova Diosninchikqa kusikun paymanta willakunapaq lluqsiptinchikqa! ¡Maynatataqchá runamasinchikkunapas  kusikunqa bibliamanta estudiayta qallaykuspankuqa! Yuyarinanchikmi pipas uyariwaqninchikqa wiñaypaq kawsakunanta (Juan 6:40; 1 Tim. 4:16).

16. ¿Imatam ruwachwan wasin-wasin Diosmanta willakuq riyta mana atispapas kusisqa kanapaq? Rimarimuy Samuelmantawan Daniamanta.

¹⁶ ¿Imatam ruwawaq wasin-wasin Diosmanta willakuq riyta mana atispaykiqa? Piensarinaykim Jehova Diostawan runamasinchikkunata kuyasqaykirayku imaynataña willakunaykipi. Rimarisun Samuelmantawan Daniamanta. Paykunaqa coronavirus unquy kasqanraykum wasinkumanta mana lluqsiyta atirqakuchu. Chay tiempopim paykunaqa telefonowan, cartakunawan hinaspa Zoomnillanta runamasinchikkunaman yachachirqaku. Samuelqa willakuqtaqmi cancerwan unqusqanrayku hospitalta risqanpipas. Paymi nin: “Sasachakuykunapi tarikuspaqa hukmanyasqa hinaspa pisipasqam kanchik. Manataqmi kallpanchikpas kanchu Diosta servinapaqpas. Chaymi kusisqa kananchikpaqqa Diosmanta willakunanchik”, nispa. Chay tiempopitaqmi Daniapas wichiykuspan kimsa killa camapi karqa. Chaymantañataqmi suqta killa silla ruedallapi karqa. Daniam nin: “Wasiyta hamuq enfermeraman chaynataq imatapas rantispa apamuwaqniy runakunaman Diosmanta willanaypaqmi tukuyta ruwaq kani. Chaymantapas hospitalpi llamkaq warmiwanmi sapa kuti telefonowan Diosmanta rimaq kani”, nispa. Samuelwan Daniaqa wasin-wasin willakuq riyta mana atispankupas atisqankuman hinalla willakuspankum ancha kusisqa tarikurqaku.

17. ¿Imatam ruwananchik Diosmanta willakuspa kusisqa kananchikpaq?

¹⁷ Kay yachachikuypi yachamusqanchikman hina willakuspanchikqa kusisqam kasun. Imaynam tukuy imachayuqkunata yanukuruspaqa kusisqa mikurunchik, chaynam kay yachachikuypi consejokunaman hina willakuspanchikqa kusisqa kasunchik. Mana manchakuspataqmi lliw runamasinchikkunamanpas willakusun.