Ñuqaqa 1955 watapim nacerqani. Iskaymi mayorniykuna. Finlandia nacionpa sur lawninpim wiñarqani, chay llaqtapa kunan sutinmi Vantaa.

Manaraq nacechkaptiymi mamayqa testigoña kasqa. Papaymi ichaqa bibliamanta yachaytaqa mana munarqachu. Mamaytapas ama yachachiwanankupaq chaynataq huñunakuykunamanpas ama pusawanankupaqmi niq. Chaymi mamayqa papay lluqsiruptillan Jehova Diosmanta yachachiwaqku.

Warmacha kasqaymantam Diosta kasukuyta munarqani. Qanchis watachayuq kachkaptiymi profesoray piñakuspa hikutawarqa verilättyjä sutiyuq tortillata mikunaypaq. Ichaqa manam mikuyta munarqanichu yawarwan ruwasqa kasqanrayku. Profesorayñataqmi mana munakuchkaptiypas simiyta kichaykuwaspanraq tenedorwan mikuchiwayta munarqa. Ñuqañataqmi makinta laqyarurqani, hinaptinmi tenedorqa pampaman wichiykurqa.

12 wataypi kachkaptiymi papay wañukurqa. Wañukusqan qipamanqa huñunakuykunaman riytam atirqaniña. Iñiqmasinchikkunam kuyakuywan tukuypi yanapawaq. Chaymi Diospa llaqtanpi imapipas yanapakuyta munaq kani. Sapa punchawmi bibliata leeyta qallaykurqani, qillqanchikkunatapas allinta estudiaytam qallaykurqani. Chayna kallpanchakusqayraykum 14 wataypi bautizakururqani, chayqa karqa 1969 watapi agosto killapa 8 punchawninpim.

 Colegiota tukurusqay qipallatam tantiakururqani precursor regular kanaypaq. Chaymanta semanakuna pasayllatam Diosmanta willakuypi yanapakunaypaq astakurqani Pielavesi llaqtachaman.

Chay llaqtachapi kachkaspaymi Sirkkata riqsirurqani. Paywanmi tiempopa risqanman hina casarakurqani. Payqa humildem karqa hinaspapas Diostam tukuy sunqunwan kuyaq. Manataqmi hukkunamanta aswan riqsisqa kaytachu nitaq tukuy imayuq kaytachu munaq. Iskayniykum Diosta astawan serviyta munarqaniku, chaymi imapiña yanapakunaykupaq niwaptinkupas listo karqaniku. Casarakurqanikuñataqmi 1974 watapi marzo killapa 23 punchawninpi. Casarakuruspa paseakuq rinaykumantaqa Karttula llaqtachamanmi rirqaniku Diosmanta willakuqkuna mana ancha kasqanrayku.

Casarakurusqaykumantapacham cuentata qukurqaniku Diospa munayninta puntapi churaptiykuqa imapas necesitasqaykuta quwanankumanta (Mat. 6:33). Karttula llaqtachapi kaptiykuqa manam carroyku kapuwarqakuchu. Chaymi bicicletallawan maymanpas riq kaniku. Ichaqa sasam karqa para tiempopi utaq riti tiempopi bicicletawan puriyqa. Karu-karukunata rinaykupaqqa carrotam necesitarqaniku, ichaqa manam qullqiyku karqachu rantinaykupaq.

Mayorniymi qunqaymanta chayaramuwarqaku, hinaspam niwarqaku carronwan qipakunaykupaq. Lliw papelninkuna kasqanraykum manaña imapipas gastarqanikuchu. Gasolinallantañam hillpuchinayku karqa. ¡Necesitasqaykutaraqmá Diosqa quykuwarqaku!

Tukuy chaykunawanmá Jehova Diosqa yachachiwarqaku imapas necesitasqaykuta quwanankumanta mana iskayrayanaykupaq. Chaypaqqa paypa munaynintam puntata ruwanayku karqa.

1978 watapim precursorkunapaq escuelaman rirqaniku. Chaypi yachachiwaqniyku Raimo Kuokkanenmi a kallpanchawarqaku galaad escuelaman rinaykupaq solicitudta apachinaykupaq. Chay escuelapiqa inglesllapim yachachinku, chaymi inglesta yachayta qallaykurqaniku. 1980 watapim ichaqa Finlandia betelpi yanapakunaykupaq niykuwarqaku, chaymi solicitudtaqa mana apachirqanikuchu. Chay tiempopiqa betelpi kaqkunaqa manam galaad escuelaman rinankupaqqa  solicitudtaqa apachiqkuchu. Ñuqaykuqa munarqaniku maymanpas rinaykupaq Jehova Dios niwanankutam. Chaymi betelman rinaykupaq niwaptinkupas rirqaniku. Ichaqa chaymanta qipata galaad escuelaman rinaykupaq niwanankuta piensaspaykum hinalla inglestaqa yacharqaniku.

Watakuna pasaytam Diospa llaqtanpi punta apaqkuna tantiarurqaku betelpi kaqkunapas galaad escuelaman rinankupaq. Chayraykum chaylla apachirqaniku solicitudniykuta. Betelpi kaspaykuqa kusisqam karqaniku, ichaqa hinallam munarqaniku Diosmanta mana ancha willakuqkunapa kasqanpi astawan yanapakuyta. Chaymanta qipatam galaad escuelaman rinaykupaq invitaruwarqaku, claseykuqa tukurqa 1985 watapa septiembre killanpim. Chaymantam Colombia nacionman rinaykupaq niykuwarqaku.

Colombiaman chayaruptiykum niwarqaku betelpi yanapakunaykupaq. Niwasqankuta allinta ruwanaypaqmi kallpanchakurqani. Ichaqa wata pasayllatam piensarqani hukpi yanapakuy necesitasqaykuta. Chay kutillapim nirqani huklawpi yanapakunaykupaqqa, hinaptinmi Neiva llaqtapi misionero kanaykupaq niwarqaku.

Diosmanta willakuymi anchata gustawan. Finlandia nacionpi solterollaraq precursor kachkaspaymi tempranomanta tutaykuqkama willakuq kani. Chayllaraq casarakuruspaypas señoraypiwan kuskam tukuy punchaw willakuq kaniku. Karu llaqtachakunata willakuq rispaykuqa tutaykaramuptinmi wakinpiqa carrollaykupiña puñuq kaniku. Chaynapi paqarintin tempranomanta willakunaykupaq.

Ñawpaqta willakusqaykuman hina sapa punchaw lluqsispaykum ancha kusisqa tarikurqaniku. Kusisqataqmi tarikurqaniku huñunakuykunaman achka hamuptinkupas. Chaypi iñiqmasinchikkunaqa kuyakuqllañam karqaku. Hinaspapas tukuy ima ruwasqaykumantam anchata agradecekuwaqku.

Neiva llaqtapa hichpan llaqtakunapiqa manam chullapas testigoqa karqachu. Chay llaqtakunapim gobiernopa contranpi soldadokuna kaq, chayraykum mana riqsisqa runakunaqa chay llaqtakunamanqa mana yaykuqkuchu. Chay llaqtapi runakuna Diosmanta imaynata yachanankupim sapa kuti piensaq kani. Chaymi Jehova Diosta mañakurqani pipas chay llaqtakunamanta kaq Neiva llaqtapi testigo kananpaq. Mañakurqanitaqmi bautizakuruspan Diosta astawan serviyta munananpaqpas chaynataq llaqtanman kutispan Diosmanta willakunanpaqpas. Ñuqaqa piensarqani chayna pasakuptillan chay llaqtayuq runakuna Diosmanta yachanankutam. Jehova Diospa tantiasqanmi ichaqa aswan allinqa karqa.

Chaymanta qipallatam bibliamanta yachachiyta qallaykurqani Fernando Gonzalez sutiyuq jovenman. Payqa yacharqa mana testigokunapa kasqan Algeciras llaqtachapim, ichaqa Neiva llaqtapi llamkasqanraykum huk hora masninta viajaq. Fernandoqa estudiasqayku qillqatam sapanpiraq allinta preparakuq, hinaspapas estudiayta qallaykusqanmantapacham huñunakuyninchikkunaman riq. Chaymantapas estudiayta qallaykusqayku semanam llaqtamasinkunata huñuruspan yachasqankunata willaq.

Fernandoqa suqta killallamantam bautizakururqa, chayqa karqa 1990 watapa enero killanpim. Hinaspanmi precursor kayta qallaykurqa. Algeciras llaqtachapi Jehova Diospa testigon kaptinñam  betel wasimanta precursor especialkunata nirqaku chay llaqtachaman rinankupaq. Chaymi 1992 watapa febrero killanpiqa karqaña congregacion.

Fernandoqa manam Algeciras llaqtapichu qipakurqa, casarakuruspanmi señoranwan rirqaku mana testigokunapa kasqan San Vicente del Caguan llaqtachaman. Chay llaqtachapipas congregaciontam rikurirachirqaku. 2002 watapiñataqmi llaqtan-llaqtan watukuq kanankupaq niykurqaku. Kunankamam hinalla iñiqmasinchikkunata watukuchkanku.

Chay pasasqanwanmi yachani imapipuni yanapawananchikpaq Jehova Diosta mañakuyninchikqa ancha allin kasqanta. Payllamá imapas mana ruway atisqanchiktaqa ruwanman. Arí, Diosmá yanapawanchik cosechachkaq hina paymanta yachay munaq runakunata yanapanapaq (Mat. 9:38).

1990 watapim llaqtan-llaqtan watukuq kanaykupaq niwarqaku, hinaptinmi Bogota llaqtapi qallaykurqaniku. Señoraywan ñuqaqa manam wakin iñiqmasinchikkunamanta aswan yachayniyuqchu kaniku. Chaymi qallariypiqa manchakurqaniku hatun llaqtapi yachaq iñiqmasinchikkunata watukuytaqa. Manataqmi hatun llaqtapiqa haykapipas yacharqanikuchu. Jehova Diosmi ichaqa Filipenses 2:13 nisqanman hina yanapawarqaku. Chaypim nin: “Diosmi qamkunataqa munayninman hina kallpanchasuchkankichik, chaymi qamkunaqa paypa munasqan ruwayta munankichik, ruwanaykichikpaqpas atiytam qusunkichik”, nispa.

Chaymantam qallariypi nisqay Medellin llaqtapi kaq iñiqmasinchikkunataña watukuq kanaykupaq niwarqaku. Chaypi yachaqkunaqa callepi tukuy ima pasakusqankunatapas manañam manchakuqkuchu. Huk kutipim runamasinchikta wasinpi bibliamanta yachachichkaspay uyarirurqani callepi balallaña patatatakuchkaqta, ñuqaqa pampamanñam laqakuchkarqani. Yachachisqay runamasinchikmi ichaqa mana imapas pasachkanman hina parrafota tukunankama hinalla leerqa. Leeyta tukuruspanmi niwarqa “ratulla lluqsiykusaq” nispan. Payqa iskay taksa warmachankunata pusaramuspanmi hawkalla niwarqa: “Pampachaykullaway warmachaykunamanmi rinay karqa”, nispan.

Manam chayllapichu mancharikurqanikuqa, huk kutipipas wasin-wasin willakuchkaptiykum manchakuyllawanña señoray kallpamuchkasqa. Paymi niwarqa huk runa baleapastin qatimusqanta. Chaymantam ichaqa cuentata qukururqaniku mana payta qatimusqanta, aswanqa waqtanta pasaq señortam baleapamusqaku.

Tiempopa risqanman hinaqa manañam llumpaytaqa manchakurqanikuchu. Anchatam kallpanchawarqaku chayna sasachakuypi tarikuspankupas iñiqmasinchikkunapa aguantasqanta qawasqayku. Chaywanmi mana iskayrayarqanikuchu ñuqaykutapas paykunata hina Jehova Dios yanapawanankumanta. Ñuqaykuqa congregacionkunapi punta apaqkunapa niwasqankutam kasukurqaniku. Chaymi cuidadowan purirqaniku Dios yanapawanankumanta mana iskayrayaspayku.

Chaywanpas wakinpiqa manam piensasqaykuman hinachu llumpay manchakunapaq karqa. Huk kutipim visitakusqaypi uyarirurqani callepi iskay warmikunapa liryasqankuta hina. Ñuqaqa  manamá munarqanichu chay liryasqanku qawaytaqa utaq uyariytaqa. Ichaqa wasiyuqmi niwarqa patioman lluqsispa qawanaypaq. Qawaykuptiyqa iskay lorokunam vecinokunata yachapyaspan liryachkasqaku.

1997 watapim solterokunapaq bibliamanta escuelapi yachachiq kanaypaq niwarqaku. b Chayna escuelakunaman riyqa anchatam gustawan, ichaqa manam haykapipas piensarqanichu chay escuelapi yachachiq kaytaqa.

Chaymantam niwarqa llaqtan-llaqtan watukuq iñiqmasinchikkunata watukuq kanaypaq. Ichaqa chay suti chinkaruptinmi kaqmanta llaqtan-llaqtan watukuq karqani. 30 wata masninñam escuelapi yachachiqqa hinaspa llaqtan-llaqtan watukuqqa kachkani. Tukuy chaykunapi yanapakuspaymi achka bendicionkunata chaskirqani. Ichaqa manamá lliwpichu facil karqa. Willasqaykichikyá imakunawan sasachakusqaymanta.

Wakinpiqa sunquyta rumiyachichkaq hinam ima sasachakuykuna kaptinpas mana hukmanyaqchu kani. Wakinpim ichaqa chayna kasqay mana yanapawasqanrayku iñiqmasiykunata corregispa sientirachiq kani. Iñiqmasiykunatam qaqchachkaq hina niq kani kuyakuq hinaspa wakinkunawan yanapanakuq kanankupaq. Ichaqa kikiymi kuyakuq hinaspa hukkunata yanapaq kanaypaqqa kallpanchakunay karqa (Rom. 7:​21-23).

Wakinpiqa chayna kasqayraykum hukman tarikuq kani (Rom. 7:24). Huk kutipim mana allin tarikuspay Jehova Diosta nirqani misionero kasqayta saqiruspa Finlandia nacionman kutikuyniy allin kananmanta. Ichaqa chay punchawmi huñunakuypi sumaq yachachikuyta uyarirurqani. Chaymi kallpanchawarqa Jehova Diospa churawasqanpi hinalla yanapakunaypaq hinaspa imayna runa kasqaypi hinalla kallpanchakunaypaq. Diosqa mañakusqayman hinamá yanapaykuwarqa. Chaytaqa manamá haykapipas qunqasaqchu. Diostaqa anchatataqmi agradecekuni imayna runa kasqaypi cambianaypaq kuyakuywan yanapawasqanmantapas.

Jehova Diostam anchata agradecekuniku musu-sipas kasqaykumantaraq tukuy tiempoykuwan servisqaykumanta. Agradecekunitaqmi sumaq warmita quykuwasqanmanta, paymi kuyakuywan kunankama yanapawachkan.

70 wataymanñam chayaykuchkani, chaymi manaña atisaqchu escuelakunapi yachachiq kaytaqa chaynataq llaqtan-llaqtan watukuq kaytaqa. Ichaqa manam llumpaytachu llakikuni. Diosta hatunchananchikpaqqa manam tukuy ima ruwayniyuqraqchu llaqtanpiqa kananchik. Payqa anchataqa kusikun mana hatuntukuspa hinaspa tukuy sunquwan serviptinchikmi (Miq. 6:8; Mar. 12:​32-34).

Musu kasqaymantaraqmi Jehova Diospa llaqtanpi tukuy imapi yanapakuspay kusisqa karqani. Chaykunapiqa yanapakurqani manamá wakinkunamanta aswan allin kasqayraykuchu utaq imatapas yachasqayraykuchu. Aswanqa kuyakuywan Dios yanapawasqanraykum. Pantaq kaptiypas paymi yanapawarqa, manachayqa manam atiymanchu karqa ima ruwaypipas yanapakuytaqa. Arí, pantaptiypas Jehova Diosninchikmá atiyninwan yanapawarqa (2 Cor. 12:9).