1. ¿Serviqninkuna imayna kananchiktam Diosqa munan?

 CASARASQAKUNAQA anchatam kusikunku warmachanku naceruptinqa. Anchata kuyaspankupas manamá tukuy tiempo wawachalla kanantachu munanku. Mana wiñaruptinqa llumpaytach preocupakunmanku. Jehova Diospas anchatam kusikun payta serviyta qallaykuptinchik. Ichaqa manamá ‘wawakuna hinalla’ kananchiktachu munan (1 Cor. 3:1). Payqa munan ‘yuyayniyuq runakuna hina’ kananchiktam (1 Cor. 14:20).

2. ¿Ima tapukuykunamantam kay yachachikuypi yachasun?

² ¿Imaynataq Diosta serviyninchikpi yuyayniyuq kayqa? ¿Imakunatam ruwananchik Diosta serviyninchikpi yuyayniyuq kanapaq? ¿Imanasqam ancha allin Jehova Diosmanta hinaspa imayna piensasqanmanta astawanraq yachayninchik? ¿Imanasqataq yachasqallanchikwanqa mana contentakunachu? Chay tapukuykunamantam kay yachachikuypi yachasun.

¿IMAYNAM DIOSTA SERVIYNINCHIKPI YUYAYNIYUQ KAYQA?

3. ¿Imaynataq Diosta serviyninchikpi yuyayniyuq kayqa?

³ Bibliapiqa manam ninchu achka watayuq runakunalla Diosta serviyninkupi yuyayniyuq kanankumantaqa. Griego rimaypi “yuyayniyuq” nispanqa rimachkantaqmi “Diospi anchata hapipakuq”, “mana pantaq” hinaspa “cabal runa” kaymantapas (1 Cor. 2:​6, qaway willakuyninta). Chaynaqa, Diosta serviyninchikpi yuyayniyuq runakuna hina kayqa wawakuna hina manaña piensaymi hinaspa wawakuna hina manaña ruwaymi. Ichapas pipas piensanman Diosta serviyninpi yuyayniyuqña kasqanta.  Ichaqa manam chayllapichu qiparunan, aswanqa Diosta serviyninpim hinalla ñawparinan (1 Tim. 4:15). Ichaqa, ¿imaynatam yachachwan musu-sipas utaq yuyaqña kaq iñiqmasinchikpas Diosta serviyninpi yuyayniyuqña kasqanta?

4. ¿Imakunatam ruwanku Diosta serviyninkupi yuyayniyuq kaqkunaqa?

⁴ Diosta serviyninkupi yuyayniyuq kaqkunaqa Diospa lliw kamachikuyninkunatam kasukunku, manam gustonkupaq kaqkunallatachu. Paykunaqa pantaq kaspankupas Jehova Diospa munasqanman hina piensanankupaqmi hinaspa kawsanankupaqmi tukuyta ruwanku. Diospa piensasqanta sapa punchaw yachasqankuraykum musuq pachawan pachakuchkaq hina Diospa imayna kasqanta qatipakunku (Efes. 4:​22-24). Chaymantapas, Diospa kamachikuyninkunapi hinaspa bibliapa yachachisqankunapi yuyaymanaspankum imatapas allinta tantianku, chayraykum mana necesitankuchu imatapas imaynata ruwanankupaq ninankutaqa. Imatapas ruwanankupaq tantiakuspankuqa ruwankupunim (1 Cor. 9:​26, 27).

5. ¿Imaynataq kanku Diosta serviyninkupi wawallaraq hina kaqkuna? (Rimarimuytaq Efesios 4:​14, 15 nisqanmantapas).

⁵ Diosta serviyninkupi wawallaraq hina kaqkunam ichaqa chaylla engañachikunku ‘sumaqllataña rimaspanku hukkunata pantachiq’ runakunawan. Chaymi testigokunapa contranpi kaqkunapa hinaspa Diosta qipanchaqkunapa imapas nisqanta creerunku (leey Efesios 4:​14, 15). a Chaymantapas, paykunaqa hinallaraqmi envidiakuq, liryanakuq, chaylla piñakuq utaq tentacionkunaman chaylla wichiykuq kanku (1 Cor. 3:3).

6. ¿Ima rikchanachiywanmi entiendechwan Diosta serviyninchikpi yuyayniyuq kaymanta? (Qawaytaq fotokunatapas).

⁶ Imaynam wawakunapas wiñasqankuman hina yuyayniyuq kanku, chaynam ñuqanchikpas Diosta serviyninchikpi yuyayniyuq runakuna hina kachwan. Warmachakunaqa manamá imamantapas cuidakuytaqa yachankuraqchu, chaymi pipas yuyayniyuq yanapanan hinaspa cuidanan. Achka carrokunapa purinanta warmacha chimpananpaqqa mamanmi aysanan. Wiñasqanman hinam ichaqa sapallanña chimpanqa. Chaywanpas mamanqa hinallam yuyarichinqa allinta qawarikuspan cuidadowan chimpananpaq. Yuyayniyuqña kaspanmi ichaqa  kikinña imamantapas cuidakunqa. Chaynam Diosta serviyninpi wawallaraq kaqkunatapas yuyayniyuq iñiqmasinchikkuna yanapananku ima huchamanpas mana wichiykunankupaq hinaspa imatapas allinta tantianankupaq. Yuyayniyuq runakuna hina kaqkunam ichaqa kikinkumanta imatapas allinta tantiakunku. Chaypaqqa Jehova Diospa ima piensasqanta yachanankupaqmi bibliapa nisqankunapi yuyaymananku.

7. Diosta serviyninkupi yuyayniyuq kaqkunaqa, ¿manañachu necesitanku pipas yanapaykunanta?

⁷ Diosta serviyninkupi yuyayniyuq kaqkunaqa, ¿manañachu necesitanku pipas yanapaykunanta? Wakinpiqa paykunapas hukkuna yanapaykunantam necesitanku. Ichaqa manam imatapas ruwanankupaq pipas niykunankutaraqchu suyanku, aswanqa yuyayniyuq iñiqkunapa consejasqanta allinta uyarispankum kikinku tantiakunku. Paykunaqa allintam yachanku ‘sapakama imapas ruwayninchikkunata ruwanamanta’ bibliapa nisqanta (Gal. 6:5).

8. ¿Imanasqataq nichwan Diosta serviyninkupi yuyayniyuq iñiqkunaqa mana chaynalla kasqankuta?

⁸ Imaynam yuyayniyuq runakunapas mana igualchu kanku, chaynam Diosta serviyninkupi yuyayniyuq kaqkunapas mana chaynallachu kanku. Wakinkum kanku hukkunamanta aswan yachayniyuq hinaspa aswan qukuykuq. Wakinkuñataqmi kanku imatapas mana manchakuq chaynataq imayna tarikusqanchikta allinta entiendeq. Chaymantapas Diosta serviyninkupi allin yuyayniyuq iskay iñiqmasinchikkunapa concienciankuqa manam chaynallachu, chaymi imamantapas mana chaynallatachu tantianku, chaywanpas iskayninkupa tantiasqankum allin kanman. Chayraykum sapakama ima tantiasqankumantaqa imatapas mana ninakunqakuchu, aswanqa huk sunqulla kanankupaqmi kallpanchakunqaku (Rom. 14:10; 1 Cor. 1:10).

¿IMATAM RUWANANCHIK DIOSTA SERVIYNINCHIKPI YUYAYNIYUQ KANAPAQ?

9. ¿Imanasqam nichwan Diosta serviyninchikpi yuyayniyuq kanapaq tukuyta ruwanamanta?

⁹ Warmachakunaqa watapa pasasqanman hinallam mana musyayllata wiñarunku, Diosta serviyninchikpi yuyayniyuq kanapaqmi ichaqa tukuyta ruwananchik. Rimarisun Corinto llaqtayuq iñiqkunamanta. Paykunaqa sumaq willakuyta uyarispankum bautizakurqaku, chuya espiritutam chaskirqaku, hinaspapas apostol Pablomantam tukuyta yacharqaku (Hech. 18:​8-11). Ichaqa achka wata pasaytapas hinallaraqmi Diosta serviyninkupiqa wawakuna hina karqaku (1 Cor. 3:2). ¿Imatam ruwachwan paykuna hina mana kanapaq?

10. ¿Imatam ruwananchik Diosta serviyninchikpi yuyayniyuq kanapaq? (Rimarimuytaq Judas 20 nisqanmantapas).

¹⁰ Dios serviyninchikpi yuyayniyuq kanapaqqa chayna kaytam sunqumanta munananchik. Mana yuyayniyuq warmakuna hina kayta munaqkunaqa manam haykapipas Diosta serviyninkupiqa yuyayniyuqchu kanqaku (Prov. 1:22). Wakin runakunaqa hatunña kaspankupas manam imam ruwanankutaqa ruwayta munankuchu, hinaspapas tayta-mamanku imapaqpas tantiapunankutaraqmi suyanku. Manamá paykuna hina kaytaqa munanchikchu, chaymi kallpanchakunanchik Dios serviyninchikpi ñawparinapaq (leey Judas 20). Sichu Diosta serviynikipi manaraq yuyayniyuq kaspaykiqa Jehova Diostayá mañakuy ‘paypa munasqan ruwayta munanaykipaq hinaspa ruwanaykipaqpas atiyta qusunaykipaq’ (Filip. 2:13).

11. ¿Imakunawanmi Jehova Diosqa yanapawanchik yuyayniyuq kanapaq? (Rimarimuytaq Efesios 4:​11-13 nisqanmantapas).

¹¹ Jehova Diosqa payta serviyninchikpi yuyayniyuq kanapaqmi yanapawanchik congregacionpi punta apaqkunawan. Paykunam yanapawanchik iñiyninchikpi “allin yuyayniyuq runaña  kananchikpaq. Arí, imayna kasqanchikpi Cristo hina cabal runa kananchikpaq” (leey Efesios 4:​11-13). Diosqa yanapawanchiktaqmi atiyninwanpas, chaynapi ‘Cristopa piensasqanman hina piensanapaq’ (1 Cor. 2:​14-16). Chaymantapas Diosqa Mateo, Marcos, Lucas hinaspa Juan librokunatam qillqachirqa Jesuspa tukuy ima ruwasqanta yachananchikpaq. Jesus hina piensaspaqa, rimaspaqa hinaspa ruwaspaqa Diosta serviyninchikpim yuyayniyuq kasun.

¿IMANASQAM ANCHA ALLIN DIOSPA IMAYNA PIENSASQANMANTA ASTAWANRAQ YACHAYNINCHIK?

12. ¿Imakunataq ‘Cristomanta punta yachasqanchikkuna’?

¹² Diosta serviyninchikpi yuyayniyuq kanapaqqa manam ‘Cristomanta punta yachasqanchikkunallawanchu’ contentakunanchik. Chay yachasqanchikkunam huchanchikmanta wanakusqanchik, iñiyniyuq kasqanchik, bautizakusqanchik hinaspa wañuqkuna kawsarimunankumanta yachasqanchik (Heb. 6:​1, 2). Chaytaqa lliw testigokunam yachananchik. Chaymi apostol Pedropas achka runakunaman yachachispan chaykunamanta rimarqa (Hech. 2:​32-35, 38). Jesuspa qatiqnin kanapaqqa llapanchikpas chaykunataqa yachananchikpunim, chayraykuchá apostol Pablopas nirqa wañuqkuna kawsarimunanpi mana creeptinchikqa Diospi hapipakusqanchikpas yanqapaq kasqanmanta (1 Cor. 15:​12-14). Chaywanpas punta yachasqanchikkunallawanqa manam contentakunanchikchu.

13. ¿Imatam ruwananchik Hebreos 5:14 nisqanman hina imapaqpas allinta tantianapaq? (Qawaytaq fotokunatapas).

¹³ Cristomanta punta yachasqanchikkunata yachaspapas, ¿imakunataraqtaq yachananchik? Yachananchikmi Diospa kamachikuyninkunata hinaspa yachachikuyninkunata, chaynapi paypa imayna piensasqanta entiendenapaq. Chaypaqqa bibliatam estudiananchik, estudiasqanchikpim yuyaymanananchik, hinaspapas yachasqanchikman hinam kawsakunanchik. Chaykunata ruwaspanchikqa Jehova Diospa munasqanman hinam imapaqpas tantiasun (leey Hebreos 5:14). b

14. ¿Imaynatam Pablo Corinto llaqtayuq iñiqkunata yanaparqa Diosta serviyninkupi yuyayniyuq kanankupaq?

¹⁴ Diosta serviyninkupi wawakuna hina  kaqkunapaqqa sasam imatapas tantiayninkuqa bibliapi “kaynatam ruwana” utaq “waknatam ruwana” nispa imamantapas mana niptinqa. Chayrayku ichapas piensanmanku munasqankuman hina ruwanankuta. Wakinninkuqa ichapas munanmanku imatapas tantianapaq bibliapi kamachikuykuna kanantaraq. Chaynam karqa apostol Pablopa tiemponpipas. Corinto llaqtayuq iñiqkunam munarqaku taytachakunaman qusqa mikuyta mikunankupaq utaq mana mikunankupaq Pablo qillqananta. Pabloqa “mikunaykichikmi” utaq “manam mikunaykichikchu” nispa ninanmantaqa sapakama concienciankuman hina tantiakunankupaqmi nirqa. Hinaspapas bibliapa nisqankunawanmi yuyaymanachirqa imapas tantiasqankuwan kikinku hawka tarikunankupaq hinaspa hukkunata mana pantachinankupaq (1 Cor. 8:​4, 7-9). Chaynatamá Pabloqa yachachichkarqa kikinku imapaqpas allinta tantiakuspanku Diosta serviyninkupi yuyayniyuq kanankupaq.

15. ¿Imaynatam Hebreo kasta iñiqkunata Pablo yanaparqa iñiyninkupi ñawparinankupaq?

¹⁵ Pabloqa Hebreo kasta iñiqkunatapas nirqataqmi iñiyninkupi ñawparinankupaqqa. Paykunaqa manam Diosta serviyninkupiqa yuyayniyuq hinaraqchu karqaku. Chaymi Pablo nirqa: ‘Qamkunaqa kaqllamantam wawa hina lechellamantaraq kachkankichik’, nispa (Heb. 5:12). Paykunaqa manamá Diospa yachachisqanman hinachu yupaychachkarqaku (Prov. 4:18). Chaymi wakinkuqa Jesuspa wañukusqanmanta 30 wata pasaruptinpas hinallaraq munarqaku Moisespa leyninta kasukunankuta. Jesusqa wañukusqanwanmá chay kamachikuykunataqa tukurachirqaña (Rom. 10:4; Tito 1:10). Chaymi paykunaqa manaña Moisespa leyninmanqa hapipakunankuchu karqa. Chayraykum Pabloqa carta apachisqanpi qillqasqankunata entiendenankuta munarqa. Chay carta apachisqanqa ancha allinmi karqa Jesuspa yachachisqanman hinaña Jehova Diosta yupaychanankupaq. Yanaparqataqmi mana manchakuspanku hinalla willakunankupaqpas (Heb. 10:​19-23).

¿YACHASQALLANCHIKWANCHU CONTENTAKUNA?

16. ¿Imatam ruwananchik Diosta serviyninchikpi yuyayniyuqña kaspapas?

¹⁶ Diosta serviyninchikpi yuyayniyuqña kaspapas, cuidakunanchikmi mana wichiykunapaq. Chaymi imapas yachasqallanchikwanqa mana contentakunanchikchu (1 Cor. 10:12).  Chayraykum sapa kuti qawakunanchik iñiyninchikpi imayna kasqanchikta, hinaspam tapukunanchik: “¿Sutillachu qawakun Diosta astawan serviy munasqay?”, nispa (2 Cor. 13:5).

17. ¿Imapaqmi Pabloqa Colosas llaqtapi iñiqkunaman qillqarqa?

¹⁷ Colosas llaqtapi iñiqkunaman cartata apachispanpas Pabloqa nirqataqmi Diosta serviyninkupi yuyayniyuqña kaspankupas hinalla cuidakunankupaq. Paykunaqa yuyayniyuq runakuna hinañam karqaku, chaywanpas hinallam cuidakunanku karqa pipas pantarachinanmanta (Col. 2:​6-10). Epafrasmi paykunata allinta riqsirqa, chaymi Diosta mañakuq hinalla “allin yuyayniyuq” kanankupaq (Col. 4:12). ¿Imatam paykunamanta yachachwan? Dios serviyninchikpi hinalla yuyayniyuq kanapaqqa Diosmi yanapawananchik hinaspapas kikinchikmi kallpanchakunanchik. Chaytam allinta yacharqaku Pablowan Epafraspas. Paykunaqa munarqakum ima sasachakuyña kaptinpas Diosta serviyninkupi hinalla yuyayniyuq kanankuta.

18. ¿Imam Diosta serviyninpi allin yuyayniyuqta pasarunman mana cuidakuptinqa? (Qawaytaq fototapas).

¹⁸ Pabloqa Hebreo kasta iñiqkunataqa nirqataqmi pipas iñiyninpi yuyayniyuqña kaspanpas mana cuidakuspanqa Diospa mana chaskisqanña karunanmanta. Sunqun rumiyarunanta saqiruptinqa Jehova Diosmantam karunchakurunman karqa, chaymi mana wanakuspanqa manaña Diospa pampachasqanchu kanman karqa. Ichaqa Hebreo kasta iñiqkunaqa manam Jehova Diosmantaqa karunchakurqakuchu (Heb. 6:​4-9). Kunan tiempopipas wakinkuqa iñiyninkupim chiriyarunku utaqmi congregacionmanta qarqusqa kanku, ichaqa humilde kaspanku huchankumanta wanakuspankuqa Diospa llaqtanmanmi kutimunku. Kutimusqankuwanmi qawachinku Pablopa rimasqan runakuna hina mana kasqankuta. Chaywanpas kutiramuspankuqa yanapanatam necesitanku (Ezeq. 34:​15, 16). Chayraykum punta apaqkuna allin iñiyniyuq kaqta ninmanku yanapananpaq, chaynapi Dioswan kaqmanta kuyachikunanpaq.

19. ¿Diosta serviyninchikpi imayna kanapaqmi kallpanchakunanchik?

¹⁹ Diosta serviynikipi allin yuyayniyuq runa hina kanaykipaq kallpanchakuspaykiqa hinallayá chayman hina kawsakuy. Hinallayá bibliata estudiay hinaspa leesqaykipi yuyaymanay. Chayqa yanapasunkim Diospa piensasqanman hina piensanaykipaq. Yuyayniyuq runa hinaña kaspaykipas hinallayá chayna kanaykipaq kallpanchakuy.