1, 2. (1) ¿Imatam biblia niwanchik mana pinqakuspa hatun huchata ruwaqkunata Dios imayna qawasqanmanta? (2) Hatun huchata ruwaruspaqa, ¿ima ruwananchiktam Diosqa munan?

 JEHOVA DIOSQA manam saqinchu hatun huchata ruwaqkuna hinalla serviqnin kanankutaqa (Sal. 5:​4-6). Payqa munan kamachikuyninkunata kasukunanchiktam. Ichaqa yachanmi pantaq kasqanchikrayku wakinpi imapipas pantananchikta (Sal. 130:​3, 4). Chaywanpas manam saqinqachu hatun huchata ruwaqkuna llaqtanpi kanankutaqa. Chayna runakunaqa “ancha kuyakuq kasqanta yachaspankum mana pinqakuspa mana allinkunata ruwanku” (Jud. 4). Chaymi bibliapipas niwanchik “mana allin runakuna” Diospa piñakuynin punchawpi utaq Armagedonpi wañuchisqa kanankumanta (2 Ped. 3:7; Apoc. 16:16).

² Chaywanpas Jehova Diosqa manam munanchu pipas wañunantaqa. Chaymi pasaq yachachikuypi yachamusqanchikman hina bibliapi niwanchik ‘huchanchikmanta llapallanchik wanakunanchikta’ munasqanmanta (2 Ped. 3:9). Diosta qatipakuspankum punta apaqkunaqa hatun hucha ruwaqkunata pacienciawan yanapanku wanakuspa Dioswan kaqmanta amistad kanankupaq. Chaywanpas wakinkuqa manam wanakuyta munankuchu (Is. 6:9). Wanakunanpaq achka kutita punta apaqkuna yanapaptinpas hinallam mana allinta ruwanku. Chayna kaptinqa, ¿imatam punta apaqkuna ruwananku?

 “MANA ALLIN RUNATAYÁ [ . . . ] QARQUYCHIK”

 3. (1) Bibliapa nisqanman hinaqa, ¿imatam punta apaqkuna ruwananku mana wanakuyta munaqwan? (2) ¿Imaynanpim nichwan qarqusqa kananpaq pipas kikin akllakusqanta?

³ Pipas mana wanakuptinqa 1 Corintios 5:13 nisqanman hinam punta apaqkunaqa ruwananku. Chaypim nin: “Chay mana allin runatayá qamkuna ukumanta qarquychik”, nispa. Huchallikuqqa yachanmi mana wanakuspanqa qarqusqa kananta. Chaymi nichwan qarqusqa kananpaq kikin akllakusqanta. Arí, payqa imapas tarpusqantamá cosechachkan (Gal. 6:7). ¿Imanasqam chaynata ninchik? Payqa achka kutipi punta apaqkunapa yanapasqantam mana kasukurqachu (2 Rey. 17:​12-15). Mana allinkuna ruwasqanwanmá sutilla kachkan Diosta kasukuyta mana munasqan (Deut. 30:​19, 20).

 4. ¿Imanasqam pipas qarqusqa kaptinqa lliw iñiqkunaman punta apaqkuna huñunakuypi willananku?

⁴ Pipas mana wanakusqanrayku qarqusqa kaptinqa punta apaqkunam huñunakuypi willananku chay runa manaña Jehova Diospa testigon kasqanmanta. Willanqakuqa manam qarqusqa kaqta pinqayman churanankupaqchu, aswanqa bibliapa nisqanta iñiqkuna kasukuspanku paywan ‘mana hukllawakunankupaqmi’ hinaspa ‘mana mikuyllapas-mikunankupaqmi’ (1 Cor. 5:​9-11). Chay kamachikuyta kasukuy imanasqa ancha allin kasqanmanta rimaspanmi Pablo nirqa: “Aslla levadurapas tanta ruwanapaq llapallan masatam puquchin”, nispa (1 Cor. 5:6). Chay huchallikuq mana qarqusqa kaptinqa wakin iñiqkunam piensanmanku Diospa kamachikuyninkunata kasukuy yanqapaq kasqanta (Prov. 13:20; 1 Cor. 15:33).

 5. ¿Imatam yuyarinanchik pipas manaña testigo kaptin? ¿Imanasqa?

⁵ ¿Imatam yuyarinanchik pipas manaña testigo kaptin? Paywan manaña hukllawakuspanchikpas yuyarinanchikmi chinkasqa oveja hinalla kasqanrayku Jehova Diospa llaqtanman haykapipas kutimunanta. Yuyarinanchiktaqmi Diosllapaqña kawsakunanpaq ñawpaqta tantiakusqantapas. Qarqurachikuspanmi ichaqa manaña tantiakusqanman hinañachu Diosta kusichichkan. Chayna kasqanraykum vidanqa peligropi tarikun (Ezeq. 18:31). Chaywanpas Diosqa llakipayakuq kasqanraykum tiempotaraq quchkan huchanmanta wanakuspan payman kutirikunanpaq. Chaytam ñuqanchikpas munanchik. Chaynaqa, ¿imaynatam punta apaqkuna yanapanmanku qarqusqa kaqkunata?

¿IMAYNATAM PUNTA APAQKUNA YANAPANMANKU QARQUSQA KAQKUNATA?

 6. ¿Imakunatam punta apaqkuna ruwanqaku pipas qarqusqa kaptin hinalla yanapanankupaq?

⁶ Pipas congregacionmanta qarqusqa kaptinqa, ¿manañachu punta apaqkunaqa Diosman kutirikunanpaq yanapanqaku? Manam, hinallam yanapanqaku. Qarqusqa kananmanta willaspankum sumaqllata entiendechinku Diospa llaqtanman kutirikamunanpaq imakunata ruwananmanta. Manam chayllachu. Ninkutaqmi qarqusqa kasqanmanta killakuna pasayta paywan parlayta munasqankutapas, chaynapi cambiasqanta utaq mana cambiasqanta yachanankupaq. Kaqmanta parlanankupaq “allinmi” niptinqa watukuspankum punta apaqkuna kuyakuywan ninqaku wanakunanpaq. Chay huñunakusqankupipas mana wanakuyta munaptinqa tiempochakunqakum killakuna pasayta kaqmanta paywan parlanankupaq.

 7. ¿Imaynatam punta apaqkunaqa Diospa llakipayakuq kasqanta qatipakunku qarqusqa kaqta yanapaspanku? (Rimarimuytaq Jeremias 3:12 nisqanmantapas).

⁷ Punta apaqkunaqa Jehova Diospa llakipayakuq kasqanta qatipakuspamá tukuyta  ruwanku qarqusqa kaq yapamanta Diosta servinanpaq. Diosqa manam Israel runakuna kikinkumanta kutirikunankutaraqchu suyarqa, aswanqa hinalla huchallikuchkaptinkupas kikinmantam wanakunankupaq yanapayta munarqa. Payqa 32 yachachikuypi yachamusqanchikman hinam llakipayakuq kasqanta entiendechinanrayku profetan Oseasta nirqa hukwan pierdekuq warminwan allinyanakunanpaq (Os. 3:1; Mal. 3:7). Dios hinam punta apaqkunapas munanku qarqusqa kaq wanakuspan kutimunanta, manataqmi kutimunantaqa harkankuchu (leey Jeremias 3:12).

 8. Wasimanta ripukuq churiwan rikchanachispan Jesus rimaspanqa, ¿imaynatam yachachirqa taytan llakipayakuq kasqanta? (Rimarimuytaq Lucas 15:7 nisqanmantapas).

⁸ 32 yachachikuypiqa rimamurqanchiktaqmi wasimanta ripukuq churiwan Jesuspa rikchanachisqanmantapas. Kutimusqanta rikuruspanmi taytanqa “kallpaspan kusikuyllawanña abrazaykurqa hinaspa kuyakuywan muchaykurqa” (Luc. 15:20). Payqa manamá pampachaykunanpaq churin ninantaraqchu suyarqa, aswanqa kuyasqanraykum paywan tupaykuq kallparqa. Chay tayta hina Jehova Diospa kuyapayakuq kasqanta qatipakusqankuraykum punta apaqkunapas tukuyta ruwanku qarqusqa kaq kutiykamunanpaq. Paykunaqa munanku llapallan qarqusqa kaqkuna Diosman ‘kutirikunankutam’ (Luc. 15:​22-24, 32). Hatun huchata ruwaq kutimuptinqa Diospas, Jesuspas, angelkunapas chaynataq lliw iñiqkunapas anchatam kusikunchik (leey Lucas 15:7).

 9. ¿Imatam Jehova Dios nin hatun hucha ruwaqkunata?

⁹ Yachamusqanchikman hinam Diosqa hatun hucha ruwaqkuna hinalla serviqnin kanankutaqa mana saqinchu. Chaywanpas manam qalaypaqtachu qunqarun, aswanqa payman kutirikunankutam munachkan. Chaymi Oseas 14:4 nisqanpi kaynata nin: “Ñuqaqa qipanchawasqaykichikmantam pampachasqaykichik. Kikiymantam ñuqaqa kuyasqaykichik, qamkunataqa manañam piñakusqaykichikchu”, nispa. Chayta yachasqankuraykum punta apaqkunaqa qawan-qawanlla kanku imallapipas huchallikuq cambiaptinqa yanapanankupaq. Diospa chayna nisqanwantaqmi qarqusqa kaqkunapas yachananku Dios hinalla kuyasqanta hinaspa payman kutirikunankuta munasqanta.

10, 11. ¿Imaynatam punta apaqkuna yanapanmanku unay wataña qarqusqa kaqkunata?

¹⁰ ¿Imaynatam yanapasqa kanmanku unay wataña qarqusqa kaqkunaqa? Ichapas hucha ruwaytaqa saqirunkuña. Wakinkuqa manañapaschá yuyankuchu ima huchata ruwasqankurayku qarqusqa kasqankutapas. Hayka unayña qarqusqa kaptinpas punta apaqkunaqa tukuytam ruwananku tarimuspanku paywan parlanankupaq. Watukuspankum Diosta kuska mañakunqaku hinaspankum kuyakuywan ninqaku Diospa llaqtanman kutimunanpaq. Pipas unay wataña qarqusqa kaspanqa Jehova Diosmanta hinaspa bibliapa yachachikuyninmantam kaqmanta yachayta necesitanqa. Chayraykum “kutimuytam munani” niptinqa punta apaqkuna huk iñiqmasinchikta ninqaku bibliamanta estudiachinanpaq. Arí, punta apaqkunallam tantianmankuqa chay runaman pipas bibliamanta yachachinanpaqqa.

¹¹ Diospa llakipayakuq kasqanta qatipakuspankum punta apaqkunaqa qarqusqa kaqkunata maskamunqaku, hinaspam ninqaku kutimunanpaq yanapay munasqankuta. Pi huchallikuqpas mana allin ruwasqanta saqiruptinqa punta apaqkunaqa chayllam tantianmanku kaqmanta testigo kananpaq (2 Cor. 2:​6-8).

12. (1) ¿Imakuna kaptintaq punta apaqkunaqa aswan cuidadowan tantiananku pipas kaqmanta testigo kananpaq? (2) ¿Imanasqam mana piensanachu hatun huchata ruwasqanrayku pitapas Dios mana pampachanantaqa? (Qawaytaq willakuytapas)

 ¹² Wakinpim punta apaqkunaqa aswan cuidadowan tantiananku pipas kaqmanta testigo kananpaq. Warmachata abusasqanrayku, Diospa llaqtanta qipanchasqanrayku utaq manaña casarasqa kayta munaspan ima huchatapas ruwarusqanrayku qarqusqa kaptinqa allintam yachananku sunqumanta wanakusqanta utaq mana wanakusqanta (Mal. 2:14; 2 Tim. 3:6). Punta apaqkunaqariki llapanchikta cuidawananchikpaqmi kamachisqa kachkanku. Chayraykum aswan cuidadowan tantiananku hukkunata ñakarichiq utaq runamasinta traicionaq kaqmanta testigo kananpaqqa. Ichaqa manam piensanankuchu  imapas hatun huchata ruwasqanrayku manapuni Dios pampachanantaqa (1 Ped. 2:10). a

¿IMATAM LLAPALLANCHIK RUWACHWAN?

13. ¿Imatam ruwachwan mayqin iñiqmasinchikpas punta apaqkunapa corregisqan kaptin? ¿Imatam mana ruwananchikchu pipas qarqusqa kaptin?

¹³ Pasaq yachachikuypi yachamusqanchikman hinam pi iñiqmasinchikpas corregisqa kasqanmanta punta apaq willawaptinchikqa hinalla hukllawakuchwan. Chaywanmi yachanchik huchanmanta wanakusqanta hinaspa mana allin ruwasqankunata saqirusqanta (1 Tim. 5:20). Payqariki corregisqa kaspanpas iñiqmasinchikraqmi, chaymi allin kaqkunata ruwananpaq kallpanchaykunanchikta necesitan (Heb. 10:​24, 25). Mayqin iñiqmasinchikpas congregacionmanta qarqusqa kaptinmi ichaqa manaña ‘hukllawakunanchikchu’, nitaqmi kuskaqa ‘mikuyllapas-mikunanchikchu’ (1 Cor. 5:11).

14. Bibliamanta yachasqanchikkunapi yuyaymanaspaqa, ¿qarqusqa kaqkunawan imayna kanapaqmi sapakama tantiakuchwan? (Qaway fotokunatapas).

¹⁴ ¿Nichwanchu pipas qarqusqa kaptinqa paywan qalaypaq mana rimanamanta? Manam. Bibliamanta yachasqanchikkunapi yuyaymanaspam sapakama tantiakuchwan familianchik utaq amistadninchik qarqusqa kaptinqa huñunakuyman invitanapaq. Ichaqa manam hukllawakunanchikchu nitaqmi amistadtaqa armananchikchu. ¿Imatam ruwachwan huñunakuyman hamuptinqa? Ñawpaqtaqa manam qalaypaq rimapayaqchu kanchik. Kunanmi ichaqa bibliamanta yachasqanchikkunapi yuyaymanaspa imata ruwanapaq sapakamaña tantiachwan. Wakin iñiqmasinchikkunapaqqa yaqapaschá mana hukmanchu kanqa huñunakuyman hamuruptin saludaykuyninkuqa utaq rimapayaykuyninkuqa. Ichaqa manam unaytaqa rimanachu utaq imatapas ruwanapaqqa hukllawakunachu.

15. ¿Pikunamantam rimachkan 2 Juan 9-11 nisqanpi? (Qaway “ ¿Hina chay huchallamantachu Juanwan Pablo qillqarqaku?” niqta).

¹⁵ Bibliapim niwanchik ‘pipas hatun hucha ruwaqta rimaykuqqa chay runapa mana allinkuna  ruwaqmasin rikurirunanmanta’ (leey 2 Juan 9-11). Juanpa qillqasqanta lliwta leespam yachanchik chay versiculopiqa Diospa llaqtanta qipanchaqkunamanta utaq apostatakunamanta chaynataq Diospa chiqnisqan kaqkunata hukkunapas ruwananpaq umachaqkunamanta rimasqanta (Apoc. 2:20). Pipas qarqusqa kachkaspan Diospa llaqtanpa contranpi yachachikuykunata chiqichiptinqa utaq huchallikunanpaq hukkunata umachaptinqa punta apaqkunaqa manam watukunqakuchu. Ñuqanchikpas chay runa wanakunankamam mana rimaykunachu nitaq huñunakuyman hamunanpaqpas invitanachu.

DIOSPA LLAKIPAYAKUQ KASQANTAYÁ QATIPAKUSUN

16, 17. (1) Hatun hucha ruwaqkuna, ¿ima ruwanankutam Diosqa munan? (Rimarimuytaq Ezequiel 18:32 nisqanmantapas). (2) ¿Imatam punta apaqkunaqa ruwanku Diospa llamkaqmasin kasqankurayku?

¹⁶ Pasaq tawa semanakunamanta kunankamam yacharamunchik Diosqa pipas wañunanta mana munasqanmanta (leey Ezequiel 18:32). Payqa munan hatun hucha ruwaqkuna paywan allinyanakunankutam (2 Cor. 5:20). Chayraykum ñawpaqmantaraq mana kasukuq serviqninkunata ruegarqa wanakuspa payman kutirikunankupaq. Kunanpas punta apaqkunam Diospa llamkaqmasin kasqankurayku tukuyta ruwanku hatun hucha ruwaqta yanapanankupaq, chaynapi wanakunanpaq (Rom. 2:4; 1 Cor. 3:9).

¹⁷ Jesuswan angelkunaqa maynatach kusikunku pipas wanakuruptinqa. Taytanchik Jehova Diospas anchatam kusikun pipas qarqusqa kasqanmanta llaqtanman kutiramuptinqa. Payqariki chinkasqa ovejachanmi karqa. Jehova Diospa ancha kuyapayakuq hinaspa ancha llakipayakuq kasqanpi sapa kuti yuyaymanaspaqa astawanmi payta kuyasun (Luc. 1:78).