¿Allintachu leerqanki kay watapaq Willakuq qillqanchikkunata? ¿Imatam kay tapukuykunamanta nichwan?

¿Imatataq ruwananchik yuyayninchikta musuqyachinapaq? (Rom. 12:2).

Chaypaqqa manam runakuna qawanallanpaqchu allin runaqa kananchik, aswanqa sunqunchikpi imayna kasqanchiktam qawarikunanchik. Hinaspam Jehova Diospa munasqanman hinaña kawsakunanchikpaq anchata kallpanchakunanchik (w23.01, pag. 8, 9).

¿Imaynam kananchik tukuy ima pasakusqanta qawaspa?

Yachaykuytam munanchik tukuy ima pasakusqankuna bibliapa nisqanwan imayna tupasqanmanta. Ichaqa, manam kikinchikpa piensasqanchikman hinaqa rimanachu, manachayqa iñiqmasinchikkunatam rakinarachichwan. Aswanqa Diospa llaqtanpi punta apaqkunapa ima nisqankuman hinallam rimananchik (1 Cor. 1:10) (w23.02, pag. 16).

¿Imakunapitaq Jesuspa bautizakusqanwan qatiqninkunapa bautizakusqanqa mana chaynallachu?

Jesusqa Diosta servinanpaqqa manam tantiakunanraqchu karqa, payqariki Diosta servinankupaq prometekuq Israel nacion ukupim nacerqa. Chaymantapas, mana ima huchayuq kasqanraykum mana wanakunanraqchu karqa (w23.03, pag. 5).

¿Imatam ruwachwan wakin iñiqmasinchikkunapas huñunakuypi rimarinankupaq?

Pisillapim rimarinanchik, chaynapi wakin iñiqmasinchikkunapas rimarinankupaq. Hinaspapas, manam parrafopi lliw ima nisqantachu rimarinanchik, chaynapi hukkunapas rimarinankupaq (w23.04, pag. 23).

Isaias 35:8 nisqanman hinaqa, ¿imataq ‘sapaqchasqa ñanqa’?

Judiokunapaqqa ‘sapaqchasqa ñanqa’ karqa Babiloniamanta Jerusalenman kutimusqanku ñanmi. Kay tiemponchikpiñataqmi ‘sapaqchasqa ñantaqa’ Diosqa allichachiyta qallaykurqa 1919 watapa pachaknintin watakuna ñawpaqtaraq. Chaypaqmi qillqakunata ruwanapaq maquinawan achka rimaykunapi bibliakunata ruwarqakuña. Chay ‘sapaqchasqa ñanpim’ Diosninchikta huk sunqulla munasqanman hina yupaychachkanchik, hamuq tiempopiñataqmi achka bendicionkunata chaskisunchik (w23.05, pag. 15-19).

¿Pikunamantam riman Proverbios qillqapa 9 capitulonpi?

Proverbios libron riman ‘mana yuyayniyuq warmimanta’, chay warmipa qayasqanta kasuqkunaqa ‘wañuypim’ tukunku. Yachayta quwananchikpaq Diospa qayawasqanchikta uyarispam ichaqa ‘allin yuyaywan kawsakusunchik’ (Prov. 9:​1, 6, 13, 18) (w23.06, pag. 22-24).

Lotmanta leespaqa, ¿imaynatam yachanchik Diosqa humilde kasqanta hinaspa mana hikutakuqllaña kasqanta?

Diosmi Lotta nirqa Sodoma llaqtamanta urqukunapa kasqanman ayqikunanpaq. Lotmi ichaqa Diosta mañakurqa familianpiwan Zoar llaqtachaman ayqikunanpaq, hinaptinmi Diosqa “allinmi” niykurqa (w23.07, pag. 21).

¿Imatam casada warmiqa ruwanman qalalla kaqkunata qusan qawaptinqa?

Yuyarinanmi mana pay huchayuq kasqanta. Aswanmi kallpanchakunan Dioswan allin amistad kananpaq. Yuyaymananantaqmi llakipi tarikuq warmikunata Dios imayna yanapasqanpipas. Kallpanchakunmantaqmi qusanta yanapananpaqpas, chaynapi yapamanta qalalla kaqkunata ama qawananpaq (w23.08, pag. 14-17).

¿Imaynatam llampu simi kayqa yanapawanchik imapi creesqanchikmanta pipas tapuwaptinchik sumaqllata contestanapaq?

Imapas creesqanchikmanta tapuwasqanchikqa allinmi imayna piensasqankuta yachanapaq utaq imapas llakichisqankuta yachanapaq. Chaynata piensaspaqa llampu simillawanmi contestasun (w23.09, pag. 17).

¿Pikunataq Mariataqa kallpancharqa? ¿Imatam Mariamanta yachachwan?

Jesusta wachakunanmanta yacharuspanmi Mariaqa hukkunata kikinmanta nirqa yanapaykunanpaq. Angel Gabrielwan ayllun Elisabetmi Mariataqa Diospa palabranwan kallpanchaykurqa. Chaynam ñuqanchiktapas iñiqmasinchikkuna kallpanchaykuwanchikman (w23.10, pag. 15).

¿Imaynatam Diosqa mañakusqanchikta uyarispanqa yanapawanchik?

Diosqa niwanchikmi mañakusqanchikta uyarinamanta, ichaqa imayna yanapawananchikpaqqa yuyarinmi ñuqanchikpaq ima munasqanta (Jer. 29:12). Chaymi chaynallata mañakuptinchikpas mana chaynallatachu llapanchikta yanapawasun, ichaqa niwanchikmi imaynatapas yanapawananchikmantapuni (w23.11, pag. 21, 22).

Romanos 5:2 nisqanpim willawanchik ima suyasqanchikmanta, chaynaqa ¿imanasqataq 4 versiculopi kaqmanta riman ima suyasqanchikmanta?

Diosmanta chayllaraq pipas uyarispanqa munanchá kay allpa pachapi wiñaypaq kawsakuyta. Ichaqa, tiempopa risqanman hinam chaymanta astawan mana iskayrayanchu. ¿Imanasqa? Sasachakuykunata aguantananpaq Dios yanapasqanraykum hinaspa chaskisqanta cuentata qukusqanraykum (w23.12, pag. 12, 13).