1, 2. ¿Ima sasachakuykunapim tarikuchwan Jehova Diosta serviqkunapas?

 QUNQAYMANTAM ima sasachakuypas pasawachwan, hinaptinmi vidanchikqa qalaypaq cambiarunman. Chaynam pasarqa Diosman sunqu iñiqmasinchik Luista. a Doctormi niykurqa cancer unquyniyuq kasqanrayku iskay-kimsa killallaña kawsananta. Iñiqmasinchik Monicañataqmi yacharurqa punta apaq qusan unayña hukwan pierdekusqanta. Chaykamaqa Diostam kusisqa servichkarqa. Soltera panichanchik Oliviapas huk punchawmi wasinmanta ayqikurqa manchakuypaq wayra llaqtanman asuykamusqanrayku. Wayra pasaytam wasinman kutirqa, hinaspam wasintaqa qalaypaq tuñisqataña tarirurqa. Chay iñiqmasinchikkunaqa qunqaymantam hatun llakipi tarikurqaku. ¿Chaynachu qamtapas haykaqllapas pasasurqanki?

² Jehova Diosta serviqkunapas sasachakuypiqa tarikunchikmi, imawanpas unqunchikmi. Chaymantapas Jehova Diosta servisqanchikraykum wakin runakuna chiqniwanchik. Arí, Diosqa manamá sasachakuykunamantaqa harkawanchikchu, ichaqa niwanchikmi sasachakuykunapi tarikuptinchikqa yanapawananchikmanta (Is. 41:10). Yanapawasqanchikraykum imaña-haykaña kaptinpas hinalla kusisqa kachwan, imapipas allinta tantiakuchwan hinaspa payman sunqu hinalla kachwan. Kay yachachikuypim yachasun sasachakuy pasawaptinchik imakunata ruwaspa Diosninchik yanapawasqanchikmanta. Yachasuntaqmi yanapakuyninta chaskikunapaqqa imakunata ñuqanchikpas ruwanamanta.

DIOSMI IMA MANA ALLINKUNAMANTAPAS HARKAWASUN

3. ¿Imakuna ruwaytataq mana atinchikchu llumpay hukmanyasqa tarikuspaqa?

³ Sasachakuypi utaq hatun llakipi tarikuspaqa llumpay hukmanyasqa tarikusqanchikraykum mana allin piensaytapas nitaq allin tantiakuytapas atinchikchu. Chaynam tarikurqaku punta parrafopi rimamusqanchik iskay paninchikkuna. Oliviam willakun:  “Manchakuypaq wayrawan wasiy tuñikuruptinmi muspaypi hina tarikuspay mana ima ruwaytapas atirqanichu”, nispa. Qusan hukwan pierdekusqanmanta yacharuspan imayna sientekusqanmantam paninchik Monica nin: “Manam imapas kaynataqa llakichiwarqachu. Yawar mayu waqasqallaypiñam karqani. Wañuruytañam munarqani. Wasiypi imachaykunata ruwanaypaqpas manam ganasniy karqachu. Manam piensarqanichu ñuqata haykapipas kay pasawanantaqa”, nispa. Paykuna hina hatun llakipi tarikuptinchikqa, ¿imaynata yanapawananchikmantam Jehova Dios niwanchik?

4. ¿Imatam Jehova Diosqa Filipenses 4:​6, 7 nisqanpi niwanchik?

⁴ ¿Imaynatam Jehova Diosqa yanapawanchik? Bibliapim niwanchik Diosninchikqa ‘hawkayaykachiwananchikmanta’ (leey Filipenses 4:​6, 7). Arí, sunqunchikpi hinaspa yuyayninchikpim hawka tarikunchik Jehova Dios amistadninpaq hapiwasqanchikmanta yachaspa. Bibliapim nin ‘chay hawkayayqa runapa mana entiendey atinan’ kasqanta. ¿Haykapipas llumpay llakisqa tarikurqankichu? Chayna tarikuspaykiqa Diosmanchá llakikikunata willakurqanki hinaspaqa hawkañachá tarikurqanki, chaywanqa admirakurqankichá. Chaynaqa tarikurqanki ‘Jehova Dios hawkayachisusqaykiraykum’.

5. ¿Imaynam tarikunchik sunqunchiktawan yuyayninchikta mana allinkunamanta ‘Diospa hawkayaynin’ harkaptinqa?

⁵ Filipenses 4:7 nisqanpim niwanchik: ‘Diospa hawkayayninmi sunquykichiktawan yuyaynikichikta mana allinkunamanta harkanqa’, nispa. Griego rimaypiqa “harkanqa” nispaqa rimachkan llaqtata cuidaq soldadokunamantam. Chay soldadokunaqa llaqtatam qawaqku enemigonkuna mana yaykunankupaq. Hinaptinmi llaqtapi runakunaqa hawka puñukuqku soldadokunapa waqaychasqan kasqankuta yachaspa. Chaynam ñuqanchikpas ‘Diospa hawkayaynin’ sunqunchiktawan yuyayninchikta mana allinkunamanta harkaptinqa hawka tarikunchik (Sal. 4:8). Sasachakuyninchik mana chinkaptinpas Ana hinam Diosta mañakuspaqa yapamanta hawka kachwan (1 Sam. 1:​16-18). Hawkaña kaspaqa allintachá piensasun chaynataq tantiasunpas.

6. ¿Imatam ruwananchik hawka tarikuyta munaspaqa? (Qawaytaq fototapas).

⁶ ¿Imatam ñuqanchikpas ruwananchik? Soldadokunata enemigonkumanta cuidananpaq mañakuq runakuna hinam ñuqanchikpas Diosta mañakunanchik waqaychawananchikpaq. Chaypaqqa hawka tarikunakamam Diosta hinalla mañakuna (Luc. 11:9; 1 Tes. 5:17). Chaytam ruwarqaku wawqinchik Luiswan warmin Ana, iskay-kimsa killakunallaña Luis kawsakunanmanta doctor willaykuptin. Luismi nin: “Manaña unayta kawsanaymanta doctor niykuwaptinmi muspaypi hina tarikuspay imapaqpas manaña allintachu tantiayta atirqani. Ichaqa Diosta sapa kuti mañakusqaykuraykum hawkalla tarikurqaniku”, nispa. Wawqinchik Luisqa warminpiwanmi Diosninchikta sapa kuti ruegakuspa  mañakuqku, mañakuqkum sunqunkutawan yuyayninkuta mana allin pensamientokunamanta harkananpaq. Mañakuqkutaqmi allinta tantianankupaq yachayninta Dios qunanpaqpas. Cuentatam qukurqaku Diosqa mañakusqankuman hina yanapaykusqanta. Qampas sasachakuypi tarikuspaykiqa Diosninchiktayá sapa kuti mañakuy, hinaptinqa yanapaykusunkim sunquykipipas, yuyaynikipipas hawka tarikunaykipaq (Rom. 12:12).

JEHOVA DIOSQA ALLINTA TAKYANAPAQMI YANAPAWASUN

7. ¿Imaynam tarikuchwan hatun llaki qatiruwaptinchikqa?

⁷ Hatun llaki qatiruwaptinchikqa wakinninchikqa manachá allin piensaytapas nitaq allin ruwaytapas atinchikchu. Imaynam lamar quchapipas olakuna llumpayta hatarispanqa yaqaña barcotapas tikran, chaynam hatun llaki pasaruwaptinchikpas mana allin pensamiento umanchikman chayamuptin manaña allinchu tarikunchik. Chaynam tarikullarqa panichanchik Ana qusan Luis wañukullaptin. Paninchikmi willakun: “Sapallayña kaspaymi wakinpiqa qusayta yuyarispay llumpayta llakikuq kani, mana piyniyuq hinam tarikurqani. Wakinpiñataqmi wañukuq qusaypaq piñasqa tarikurqani sapallayta saqiruwasqanmanta, wakinpiñataqmi kikillaypaq piñakuq kani qusay hina mana imatapas ruwayta nitaq tantiayta atisqayrayku”, nispa. Iñiqmasinchik hina tarikuptinchikqa ¿imaynatam Diosninchikqa yanapawanchik?

8. ¿Imatam Jehova Diosqa Isaias 33:6 nisqanpi niwanchik?

⁸ ¿Imaynatam Jehova Diosqa yanapawanchik? Niwanchikmi allinta kawsakunapaq sumaqta takyachiwananchikmanta (leey Isaias 33:6). Kaypi piensarisun. Barcoqa hatun olakuna chuqamuptinqa yaqañam tikrakunpas. Achka barcokunapam ichaqa ukunpi kan kinrayninpaman tablakuna hina. Chayqa yanapanmi olakuna chuqamuptinpas barco mana waqtakurunanpaq, chaymi pasajerokunapas hawkalla rinku. Barco sayaruptinmi ichaqa ukunpi tablakuna hina kaqkunapas mana yanapanmanñachu. Chaymi barcoqa hinalla rinan olakuna mana imanarunanpaq. Chaynam ñuqanchikpas hatun llaki pasaruwaptinchikqa Dios serviytaqa mana saqinachu, aswanqa hinallam tukuy sunqunchikwan servinanchik. Hinaptinqa Diosninchikqa sumaqta takyachiwaspanchikmi hawkallata kawsachikuwasun.

9. ¿Imaynam tarikunchik qillqanchikkunata leespaqa hinaspa videonchikkunata qawaspaqa? (Qawaytaq fototapas).

⁹ ¿Imatam ñuqanchikpas ruwananchik? Llakipa intusqanña tarikuspapas hinallam kallpanchakunanchik Diospaq ruwayninchikkunata ruwanapaq. Manapaschá ñawpaqta hinañachu ruwasun, ichaqa yuyarinanchikmi Diosqa atisqanchikta ruwasqanchikwan kusikusqanta (tupachiy Lucas 21:​1-4 nisqanwan). Amayá qunqaychu biblianchikta, qillqanchikkunata sapa kuti sapaykipi estudiaytaqa chaynataq yuyaymanaytaqa.  Diosqa qillqanchikkunata hinaspa videonchikkunatam ruwarachimun ima sasachakuypiña tarikuspapas chaykunata leespa utaq qawaspa hawka tarikunapaq. Chay yachachikuykunatam tariwaq JW Library^® nisqapi, Índice de las publicaciones Watch Tower nisqapi hinaspa Jehova Diospa testigonkunapa qillqankunapi maskanapaq niq yanapakuypi. Ñaqa rimamusqanchik panichanchik Monicam nin: “Wakinpiqa qunqayllamantam llaki pasawasqan umayman chayaramuq, hinaptinqa chayllam qillqanchikkunapi maskarqani kay palabrakunamanta rimaq yachachikuyta: Piñakuy, hukwan pierdekuy utaq Diosman sunqu kay. Chaykunata leeruspayqa hawkañam tarikuq kani. Llakisqa kaspaymi apurawllaña chay yachachikuykunata maskayta qallaykuq kani. Leeyta tukuruspayqa hawkañam tarikurqani, Jehova Diospas abrazawachkanman hinam tarikurqani. Leesqayman hinam cuentata qukurqani Diosqa imayna sientekusqayta sumaqta entiendewasqanta hinaspa yanapallawasqanta”, nispa. Qamtapas Diosqa yanapasunkim sasachakuypi tarikuptikiqa allinta takyanaykipaq, sasachakuykunaqariki manam wiñaypaqchu (Sal. 119:​143, 144).

JEHOVA DIOSQA KALLPATAM QUWASUN

10. ¿Imaynam tarikuchwan hatun llaki qatiruwaptinchikqa?

¹⁰ Hatun llaki qatiruwaptinchikqa manam kallpanchikpas kanchu imata ruwanapaqpas, nitaqmi allin piensaytapas atinchikchu. Chayna kasqanchiktam tupachichwan llallinakuypi allinta kallpaq runa chakinta pakikuruspan imayna tarikusqanwan. Sasachakusunchá ñawpaqta chaylla ruwasqanchik kaqkunata ruwanapaqpas, manapaschá ganasninchik kanqachu imapas munasqanchikta ruwananpaqpas. Elias hinapaschá puñuyllataña munasun (1 Rey. 19:​5-7). Mana ganasniyuq tarikuptinchikqa, ¿imayna yanapawananchikmantam Jehova Dios niwanchik?

11. ¿Imataraq quwananchikmantam Diosqa niwanchik? (Rimarimuytaq Salmos 94:18 nisqanmantapas).

¹¹ ¿Imaynatam Jehova Diosqa yanapawanchik? Payqa niwanchikmi allinta takyanapaq kallpanta quwananchikmanta (leey Salmos 94:18). Imaynam chakinta pakikuruq kallpaqpas purinanpaq necesitan hukkuna yanapaykunanta, chaynam ñuqanchikpas Jehova Diosta hinalla servinapaqqa necesitachwan hukkuna yanapaykuwananchikta. Diosninchikmi niwanchik: “Ñuqa Jehova Diosnikim alliq makikimanta hapichkayki, ñuqam niki: ‘Amayá manchakuychu. Ñuqam yanapasqayki’, nispa” (Is. 41:13). Kamachiq Davidmi cuentata qukurqa sasachakuykunapi kaptinpas, enemigonkuna maskaptinpas Diosqa mana saqisqanta. Chaymi nirqa: “Alliq makikiwanmi hapillawanki”, nispa (Sal. 18:35). Ichaqa, ¿imaynatam Diosqa alliq  makinchikmanta hapiwachkachwanpas hina kallpata quwanchik?

12. Llumpay llakipi tarikuptinchikqa, ¿pikunawantaq Jehova Diosqa kallpanchaykuwachwan?

¹² Wakinpim Diosqa runamasinchikkunata kallpanchanman yanapaykuyta munawananchikpaq. Huk kutipim David llumpay hukmanyasqa kachkarqa, hinaptinmi amistadnin Jonatan watukuspa anchata kallpanchaykurqa (1 Sam. 23:​16, 17). Eliaspas llakisqa tarikuptinmi Eliseowan Diosqa yanapaykachirqa. Eliseoqa Eliastam puriysispa tukuy imapi yanaparqa (1 Rey. 19:​16, 21; 2 Rey. 2:2). Kunan tiempopipas Jehova Diosqa ayllunchikwan, amistadninchikkunawan utaq punta apaqkunawanmi kallpanchaykuwachwan. Wakinpim ichaqa llumpay llakisqa tarikusqanchikrayku sapallanchik kayta munachwan. Chaynaqa, ¿imatam ruwananchik Dios yanapawananchikta munaspaqa?

13. Pinqakuspanchikpas, ¿imatam ruwananchik Jehova Dios yanapaykuwananchikpaq? (Qawaytaq fototapas).

¹³ ¿Imatam ñuqanchikpas ruwananchik? Sapallanchik kayta munaspapas kallpanchakusunyá mana chayna kananchikpaq. Sapallanchik kaspaqariki llakillanchikpiña umayuqmi kasun. Kikillanchikpi piensaspaqa manam allintachu imapaqpas tantiachwan (Prov. 18:1). Llumpay llakipi tarikuspaqa llapallanchikmi munanchik ratullapas sapallanchik kayta. Chayqa allinninchikpaqmi kanman. Ichaqa, lliwmanta karunchakuruptinchikqa Jehova Diosqa manam yanapayta atiwasunchu. Payqariki sasachakuykunapi kaptinchikqa yanapawanchik familianchikwanmi, amistadninchikkunawanmi chaynataq punta apaqkunawanmi. Chaymi pinqakuspanchikpas yanapayta munawaptinchikqa yanapaykachikuna (Prov. 17:17; Is. 32:​1, 2).

DIOSMI SUNQUNCHIKTA TIYAYKACHINQA

14. ¿Imakunaraykum mancharisqa hina tarikuchwan?

¹⁴ Wakinpiqa mancharisqachá tarikusun. Bibliapim willawanchik Diospa wakin serviqninkunapas enemigonku maskasqankurayku utaq llumpay sasachakuypi tarikusqankurayku manchakuymanta katkatatasqankuta (Sal. 18:4; 55:​1, 5). ¿Ñuqanchikpas mancharisqa hinachu tarikunchik estudiaqmasinchikkuna, llamkaqmasinchikkuna, familianchik utaq autoridadkunapas contranchikpi kasqankurayku? ¿Mancharisqachu tarikunchik unquyninchikpaq hampi mana kasqanrayku wañunanchikta yachaspa? Chaynakunapi tarikuspaqa uña warmacha hinachá mancharisqallaña tarikunchik. Ichaqa ¿imatam Diosninchikqa ruwan yanapaykuwananchikpaq?

15. ¿Imatam Salmos 94:19 nisqanpi Diosmanta niwanchik?

¹⁵ ¿Imaynatam Jehova Diosqa yanapawanchik? Sunqunchikta tiyaykachispam hawkayaykachiwanchik (leey Salmos 94:19). Kaypi  yuyaymanasun. Huk warmacham rayokuna llumpayta tunrururumusqanrayku manchakuymanta mana puñuyta atinchu, hinaptinmi papanqa asuykuspa abrazaykun hinaspam hawkayaykachin. Hinaptinmi warmachaqa hawkaña puñurun. Rayokuna tunrururumuptinpas warmachaqa hawkam puñuchakun papanpa uqllayninpi kasqanrayku. Yaqa chaynam, imapas kaptin manchakuymanta katkatataptinchikqa taytanchik Jehova Diosqa uqllakuykuspa hawkayaykachiwasun. Ichaqa, ¿imatam ruwananchik uqllakuykuwaspanchik taytanchik sunqunchikta tiyaykachinanpaq?

16. ¿Imatam ruwananchik Jehova Dios sunqunchikta tiyaykachinanpaq? (Qawaytaq fototapas).

¹⁶ ¿Imatam ñuqanchikpas ruwananchik? Sapa kutim tiempochakunanchik Jehova Dioswan rimanapaq hinaspa palabranta leenapaq (Sal. 77:​1, 12-14). Chaykunata ruwaspanchikqa imaña manchachiwaptinchikpas chayllam taytanchikta qayakusun yanapawananchikpaq. Ima llakichiwasqanchikmanta hinaspa imata manchakusqanchikmantayá Jehova Diosman willakusun. Chayta ruwaruspañataq biblianchikta leesun. Chaynintakamam Diosqariki kallpanchawanchik hinaspa sunqunchikta tiyaykachin (Sal. 119:28). Llakipi tarikuspaqa kallpanchasqa tarikunapaqmi bibliapa kay libronkunata leechwan: Jobta, Salmosta, Proverbiosta hinaspa Mateo libropa 6 capitulonta. Sichu Jehova Diosta tukuy sunquykiwan mañakunki, palabrantapas leenki hinaspaqa cuentatam qukunki imaynata Jehova Dios sunquykita tiyaykachisqanta.

17. ¿Imatam mana qunqananchikchu?

¹⁷ Kayta ama haykapipas qunqasunchu: Manchakuypaq sasachakuypiña kaptinchikpas Diosninchikqa waqtallanchikpim kanqa yanapaykuwananchikpaq, manam haykapipas saqiwasunchu (Sal. 23:4; 94:14). Diosninchikqa niwarqanchikmi mana allinkunamanta harkawananchikpaq, allinta takyachiwananchikpaq, kallpata quwananchikpaq chaynataq sunqunchikta tiyaykachinanpaq. Chaymi Isaiaspas Diosta mañakuspam nirqa: “Qamllapi hapipakuqkunataqa waqaychankim, hawkayaypim kawsachinki, qampim paykunaqa hapipakunku”, nispa (Is. 26:3). Chaynaqa, Jehova Diosllapiyá hapipakusun hinaspayá yanapawananchikpaq tukuy ima ruwasqanta chaskikusun. Hinaspaqa mayna hatun sasachakuytapas aguantasunmi, manam hukmanyasunchu.