‘CARRETA’ niq palabraqa Musuq allpa pachapi kawsaqkunapaq bibliapiqa tukuy richkaq carretakunamantam rimachkan (Hech. 8:​28, 29, 38). Etiopia nacionniyuq runapa viajasqan carretaqa manachusmi guerrapi peleananku carretachu karqa nitaq kallpananku carretachu. Chaykunaqa taksallam karqa. Chay runapa viajasqan carretaqa yaqachusmi hatun karqa. ¿Imanasqam chaynata ninchik?

Etiopia nacionniyuq runaqa nacionninpim autoridad karqa, hinaspapas achka punchawkunañam viajachkarqa. Payqa karqa ‘Etiopia nacionpi Candacewan sutichasqanku kamachiq warmipa qullqinta waqaychaqmi’ (Hech. 8:27). Chay tiempopiqa Etiopia nacionqa kunanmantaqa aswan hatunmi karqa. Ñawpaqtaqa Sudan nacionkamam chayaq hinaspa Egipto nacionpa sur lawninkama. Chay kamachiq runaqa manachusmi hina chay carretallapichu viajarqa. Chaymantapas, achka punchawkuna viajasqanraykum qipinpas achka karqa. Apostolkunapa tiemponpiqa wakin carretakunaqa karqa tawa ruedayuqmi hinaspa qatayuqmi. Chay tiempomanta rimaq libropim nin: “Tawa ruedayuq carretapiqa achka qipikunatam apaqku, hawkallam viajaqku, karu-karutataqmi viajaqkupas”, nispa (Acts—An Exegetical Commentary).

Isaias librota leechkaptinmi Felipe asuykurqa. Bibliapim nin: ‘Chaymi Felipe kallpaspan asuykurqa, hinaspam Isaiaspa qillqasqan librota kallpawan leesqanta uyarirqa’, nispa (Hech. 8:30). Chay hatun carreta allimanta risqanraykum chay runaqa leeyta atirqa. Chaymi Felipepas kallpaspan chaylla hayparurqa.

Chay runaqa ‘Felipetam ruegakurqa carretaman qispispan paywan tiyananpaq’ (Hech. 8:31). Llallinakuypi kallpaq iskay ruedayuq carretapiqa manejaqkunaqa sayanpallam riqku. Tawa ruedayuq hatun carretapim ichaqa runakunaqa tiyaspa viajaqku. Chaymi Felipepas Etiopia nacionniyuq runapa waqtanpi tiyanpa riysirqa.

Chaymi kunanqa Hechos 8 capitulopi nisqanman hina hinaspa ñawpaq tiempopi carretakuna imayna kasqanmanta allinta yachasqanchikrayku, Etiopia nacionniyuq runataqa manaña dibujanchikchu iskay ruedayuq taksa carretachapi viajaqtaqa, aswanqa tawa ruedayuq hatun carretapi viajaqtañam.