BIBLIATA qillqaqkunam wakinpiqa qillqasqankuta kaqmanta churaqku. Wakinpiqa hina palabrallatam repiteqku. Imanasqa chayna ruwasqankumantayá qatiqninpi yachaykusun.

¿Haykapitaq qillqasqa karqa? Manam llapallan Israel runakunapachu Diospa kamachikuyninkunamanta copiakunaqa karqa. Yaqa llapankum Jehova Diospa carpanpi utaq templopi huñunakuspa leeptillanku uyariqku (Deut. 31:​10-12). Chayna uyarinankupaq achka hora sayanpalla kaspankuqa manachá allintaqa entiendeqkuchu (Neh. 8:​2, 3, 7). Chaymi yuyanankupaq kaqta repitesqankuqa ancha allin karqa, chaynapi yuyarispa kasukunankupaq. Chayna repitesqankuqa aswan allinraqmi karqa Diospa nisqankuna hinaspa kamachisqankuna kaptinqa (Lev. 18:​4-22; Deut. 5:1).

¿Imayna qillqasqam karqa? Bibliapiqa wakin librokunaqa takim. Chaykunam Salmos, Cantares hinaspa Lamentaciones. Wakin takikunapiqa hina chay palabrakunallatam repiteqku. Chayna repitesqankum yanapaq taki imamanta rimasqanta yachanankupaq hinaspa ima nisqanta mana chaylla qunqarunankupaq. Chayta astawan entiendenapaq leeykusun Salmos 115:​9-11 ima nisqanta, chaypim nin: “Israel runakuna, Jehova Diosllapiyá hapipakuychik. Payqa yanapasuqnikichikmi, payqa harkachikunaykichik hinam. Aaronpa mirayninkuna, Jehova Diosllapiyá hapipakuychik. Payqa yanapasuqnikichikmi, payqa harkachikunaykichikmi. Jehova Diosta manchakuqkuna, Jehova Diosllapiyá hapipakuychik. Payqa yanapasuqnikichikmi, payqa harkachikunaykichik hinam”, nispa. Pipas chay takita takispanqa manachá faciltaqa qunqaruqchu.

¿Imanasqataq qillqasqa karqa? Wakin qillqaqkunaqa repiteqku chaypi nisqanta astawan yuyarinankupaqmi. Chaytam yachanchik Israel runakuna yawarta ama mikunankupaq Jehova Diospa kamachisqanwan. Chay kamachikuyta achka kutikama repitenanpaqmi Moisesta Jehova Dios nirqa. Diosninchikqa munarqam Israel runakuna yawarllawan kawsasqankuta allinta entiendenankuta (Lev. 17:​11, 14). Chaymanta unay wata qipatapas Diospa munasqanman hina kawsakunapaq imakuna ruwanamanta rimaspankum apostolkunawan Jerusalenpi punta apaqkuna nirqaku yawarta imapaqpas ama servichikunamanta (Hech. 15:​20, 29).

Bibliapa wakin yachachikuyninkuna repiteptinpas manam chayraykuchu Diosqa munan rezakuchkaq hina kuti-kutirispa repitenanchikta. Chayraykum Jesus nirqa: ‘Mañakuspaykiqa amam kuti-kutirispachu hina kaqllata rimanayki’, nispa (Mat. 6:7). Nirqataqmi Diospa munasqanman hina imakunamanta mañakunanchikpaqpas (Mat. 6:​9-13). Diosta mañakuspanchik hina chay palabrallata mana repitespanchikpas imamanta mañakusqanchiktaqa achka kutikamapas repitechwanmi (Mat. 7:​7-11).

Chaynaqa, manamá yanqachu allin yachachiwaqninchik Diosqa palabranpi imatapas repitechirqa. Chaynataqa qillqachirqa allinninchikpaqmi (Is. 48:​17, 18).