1. ¿Imatam wakin iñiqmasinchikkunaqa nikunmanku?

 ¡ANCHATAM kusikunchik ‘Jehova Diosqa runankunawan kusisqallaña kasqanmanta’ yachaspa! (Sal. 149:4). Chaywanpas wakin iñiqmasinchikkunaqa hukmanyasqa tarikuspankum nikunmanku: “¿Diosqa yaqachu wakin iñiqmasiykunata hina ñuqatapas chaskiwanman?”, nispa. Ñawpaq tiempopipas Diosta serviqkunamanta wakinmi iskayrayaqku Dios chaskisqanmanta (1 Sam. 1:​6-10; Job 29:​2, 4; Sal. 51:11).

2. ¿Imakunatam ruwananchik Dios chaskiwananchikpaq?

² Bibliapim willawanchik Jehova Diosqa serviqninkunata pantaq kaptinkupas chaskisqanmanta. ¿Imakunatam chaskiwananchikpaqqa ruwananchik? Churin Jesucristopi iñispam bautizakunanchik (Juan 3:16). Bautizakuptinchikmi runamasinchikkuna yachanqaku huchanchikmanta wanakuspa Diosllapaqña kawsakunapaq prometekusqanchikta (Hech. 2:38; 3:19). Tukuy chaykunawanmi Jehova Diosqa anchata kusikun. Arí, prometekusqanchikman hina tukuy kallpanchikwan Diosta serviptinchikqa payqa chaskiwasunmi, hinaspapas amistadninpaqmi hapiwasun (Sal. 25:14).

3. ¿Imakunamantam kay yachachikuypi yachasun?

³ Ichaqa, ¿imanasqataq wakinpiqa piensachwan imapas ruwasqanchikta Dios mana chaskiwasqanchikta? ¿Imaynatam yachanchik imapas ruwasqanchikwan pay kusisqa kasqanta? ¿Imam yanapawasun chaskiwasqanchikmanta mana iskayrayanapaq?

¿IMANASQATAQ PIENSACHWAN DIOS MANA CHASKIWASQANCHIKTA?

4, 5. Mana valeqpaq hapikuspapas ¿imamantam mana iskayrayananchikchu?

⁴ Achka iñiqmasinchikkunam warmachankumantapacha mana valeqpaq hapikunku (Sal. 88:15). Adrianmi nin: “Warmacha  kasqaymantapacham mana imapaqpas valeq kasqayta piensani. Hinaspam Diosta mañakuq kani sumaq huertapi familiay kawsakunanpaq. Ichaqa piensarqanim chaypi kawsanaypaq hina mana kasqayta”, nispa. Toniñataqmi willakun mana testigo tayta-maman imayna uywasqanmanta, paymi nin: “Manam haykaqpas niwaqchu imapas ruwasqaywan kusisqa kasqankutaqa. Manataqmi niwaqchu kuyawasqankutapas. Aswanqa sapa kutim niwaqku imapas ruwasqayqa mana gustonkupaq kasqanta”, nispa.

⁵ Ñuqanchikpas mana valeqpaq hapikuspaqa yuyarisunyá kikin Jehova Dios llaqtanman pusamuwasqanchikta (Juan 6:44). Mana valeqpaq hapikuptinchikpas payqa yachanmi sumaq sunquyuq kasqanchikta (1 Sam. 16:7; 2 Cron. 6:30). Diosninchikmi niwanchik ancha valorniyuq kasqanchikta, chayna niwasqanchikmantaqa amayá iskayrayasunchu (1 Juan 3:​19, 20).

6. ¿Imaynam Pabloqa tarikurqa pantasqankunata yuyarispan?

⁶ Wakiqninchikqa Jehova Diosta manaraq riqsichkaspa mana allinkunata ruwasqanchikraykuchá piensachwan chaykunamanta huchayuqraq kasqanchikta (1 Ped. 4:3). Wakinkuñataqmi unay wataña Diosta servispankupas imayna kasqankuta cambianankupaq hinalla kallpanchakuchkanku. ¿Chaynachu qampas tarikunki? Chayna kaptinqa yuyariyá ñawpaq tiempopi Diosta serviqkuna wakinpi chayna tarikusqankuta. Paykunamanta hukninmi karqa apostol Pablo. Paymi pantasqankunata yuyarispan nirqa: “¡Imapiraq rikukullani!”, nispan (Rom. 7:24). Payqa tukuy mana allinkuna ruwasqanmanta wanakuruspanpas chaynataq bautizakuruspanpas hinallam nirqa: ‘Lliw apostolkunamantapas menosmi kani. Huchasapakunamantapas aswan huchallikuqmi kallani’, nispa (1 Cor. 15:9; 1 Tim. 1:15).

7. ¿Imamantam mana iskayrayananchikchu mana allin ruwasqanchikmanta sunqumanta pesapakuspaqa?

⁷ Jehova Diosqa niwanchikmi imapas mana allin ruwasqanchikmanta wanakuptinchikqa pampachaykuwananchikmanta (Sal. 86:5). Chaynaqa, mana allin ruwasqanchikkunamanta sunqumanta pesapakuspaqa manañam iskayrayananchikchu Dios pampachaykuwasqanchikmantaqa (Col. 2:13).

8, 9. ¿Imataq yanapawasun imapas ruwasqanchikwan Dios kusisqa tarikusqanmanta mana iskayrayanapaq?

⁸ Llapallanchikmi munanchik Jehova Diosta aswan allintaraq serviyta. Wakin iñiqmasinchikkunam ichaqa piensanmanku imataña ruwaspankupas Diostaqa mana kusichisqankuta. Amandam nin: “Ñuqaqa piensanim Diosta kusichinaypaq sapa punchaw aswan mastaraq paypaq ruwanaymanta. Chaymi wakinpiqa mana atisqay kaqkunatapas ruwayta munani. Mana atispayñataqmi kikiypaq piñakuspay nikuni ruwasqaywan Jehova Dios mana kusisqa kasqanta”, nispa.

⁹ ¿Imataq yanapawasun imapas ruwasqanchikwan Dios kusisqa tarikusqanmanta mana iskayrayanapaq? Yuyarinanchikmi payqa entiendeq kasqanta, chaymi atisqallanchikta mañawanchik. Arí, Jehova Diosqa sunqumanta paypaq imapas ruwasqanchikwanqa anchatamá kusikun. Yuyariykusunyá ñawpaq tiempopi tukuy sunqunkuwan Diosta serviqkunata. Paykunamanta hukninmi karqa apostol Pablo. Payqa karu-karu llaqtakunatam rirqa Diosmanta willakunanpaq, hinaspam achka runakunata yanaparqa Diosta servinankupaq. Ichaqa tiempopa risqanman hinam manaña ñawpaqta hinañachu Diosmantaqa willakuyta atirqa. ¿Chayraykuchu Jehova Diosqa manaña Pablotaqa chaskirqa? Manam. Aswanqa hinallam bendecirqa atisqanman hina hinalla servisqanrayku (Hech. 28:​30, 31). Chaynachá ñuqanchikpas manaña ñawpaqta hinachu  Diospaq imapas ruwaytaqa atisun. Chaywanpas paypaq imapas ruwasqanchiktam anchata valoran, yachantaqmi imanasqa chayta ruwasqanchiktapas. Qatiqnin parrafokunapim yachasun ñuqanchikwan Dios kusisqa kasqanta imakunawan yachasqanchikmanta.

¿IMAKUNAWANMI YACHANCHIK ÑUQANCHIKWAN DIOS KUSISQA KASQANTA?

10. ¿Imaynatam yachanchik Jehova Dios ñuqanchikwan kusisqa kasqanta? (Rimarimuytaq Juan 16:27 nisqanmantapas).

¹⁰ Bibliapi niwasqanchikwanmi. Jehova Diosqa anchatam munan serviqninkuna kuyasqanta hinaspa chaskisqanta yachanankuta. Bibliapim willawanchik payqa churin Jesucristota ancha kuyasqanta hinaspa chaskisqanta iskay kutipi nisqanta (Mat. 3:17; 17:5). ¿Qampas munankichu Jehova Diosninchik chaynata nisunaykita? Payqa manañamiki Jesusta hinachu hanaq pachamantaqa rimapayamuwanchik, aswanqa bibliapa nisqankunawanmi. Apostolninkunata anchata kuyasqanmanta Jesuspa nisqanta leespanchikmi kikin Jehova Dios chaynata niwachkanchikmanpas hina tarikunchik (leey Juan 16:27). Jesusqa taytan hinamá imatapas ruwarqa. Chaymi Jesusqa qatiqninkunata nirqa pantaq kaptinkupas anchata kuyasqanmanta. Chayta leespam ñuqanchikpas kikin Jehova Dios chaynata niwachkanchikmanpas hina tarikunchik (Juan 15:​9, 15).

11. ¿Imanasqam mana piensanachu Dios mana chaskiwasqanchikrayku sasachakuykunapi tarikusqanchikta? (Rimarimuytaq Santiago 1:12 nisqanmantapas).

¹¹ Ñuqanchikrayku imapas ruwasqanwanmi. Jehova Diosqa imapas necesitasqanchik faltawaptinchikmi yanapaykuyta munawanchik. Wakinpim ichaqa Job hina ima sasachakuypipas tarikunanchikta saqin (Job 1:​8-11). Manam piensanachu Dios manaña chaskiwasqanchikrayku sasachakuykunapi tarikusqanchiktaqa. Aswanqa yuyarinanchikmi sasachakuykunata aguantaptinchikqa kuyasqanchikta hinaspa paypi hapipakusqanchikta Jehova Dios yachasqanta (leey Santiago 1:12). Cuentatataqmi qukusun kuyawasqanchikmantapas chaynataq yanapawananchikpaq tukuyta ruwasqanmantapas.

12. ¿Imatam yachanchik Dimitrimanta?

¹² Rimarisun Asia lawpi yachaq iñiqmasinchik Dimitrimanta. Payqa achka killam mana llamkayniyuqchu karqa. Chaymi llamkayta tarinankama Diosmanta astawan willakunanpaq tantiakururqa. Chaywanmi sutilla karqa Diospi  hapipakusqan. Ichaqa achka killakuna pasaytapas manam tarirqachu llamkaytaqa. Chaymantapas unquruspanmi camallapiña karqa. Chaymi wakinpiqa piensayta qallaykurqa churintapas chaynataq señorantapas mana yanapay atisqanta. Hinaspanmi nikuq: “Jehova Diosqa ñuqawanqa piñasqach kachkan”, nispa. Ichaqa huk tutam warmi churichan Isaias 30:15 nisqanta papelpi qillqasqata quykurqa. Chaypim nin: “Ñuqapi hapipakuspa hawkalla kaspaykichikqa kallpayuqmi kankichik”, nispa. Paymi papanta nirqa: “Papáy, llakisqa kaspaykiqa kay textopa nisqantam yuyarinayki”, nispa. Dimitriqa cuentatam qukururqa familianta Dios yanapasqanrayku mana imankupas faltasqanmanta. Dimitrim nin: “Hawkalla kaspaymi Diospi hinalla hapipakunay karqa”, nispa. Ñuqanchikpas ima sasachakuypipas tarikuspaqa manam iskayrayananchikchu Dios yanapawananchikmanta chaynataq hinalla aguantanapaq kallpata quwananchikmanta.

13. ¿Imaynatawanmi yachanchik Diosqa kuyawasqanchikta?

¹³ Iñiqmasinchikkunawanmi. Jehova Diosqa mayqin iñiqmasinchiktapas valekunmanmi necesitaptinchik kallpanchaykuwananchikpaq. Asia lawmanta kaq iñiqmasinchikmi mana llamkayniyuq qiparurqa hinaspapas llumpaytam unqururqa. Chaymantapas qusanmi huchallikururqa, chaymi manaña punta apaqchu karqa. Chaykunawanqa iñiqmasinchikqa ancha llakisqam tarikurqa. Paymi nin: “Manam yacharqanichu imanasqa chaykuna pasawasqanmanta. Piensarqanim ima mana allintapas ruwarusqayrayku Dios saqiruwasqanta”, nispa. Chaymi tukuy sunqumanta Diosta mañakurqa sichu hinalla kuyasqanta yachananpaq. Hinaptinmi Jehova Diosqa uyariykurqa mañakusqantaqa. Paymi hinalla willakun: “Punta apaqkunam ñuqawan rimarqa hinaspam yanapawarqaku Diosqa hinalla kuyawasqanmanta  mana iskayrayanaypaq”, nispa. Punchawkuna pasaytam Diosta kaqmanta mañakurqa yanapaykunanpaq. Paymi nin: “Chay punchawllam iñiqmasinchikkuna sumaq cartata apachimuwasqaku. Chay cartata leespaymi cuentata qukurqani Jehova Diosqa uyariykuwasqanmanta”, nispa. Arí, pipas kuyakuywan rimapayaykuwaptinchikqa yachanchikmi Dios kuyawasqanchikta (Sal. 10:17).

14. ¿Imaynatawanmi yachachwan Jehova Dios chaskiwasqanchikta?

¹⁴ Dios chaskiwasqanchiktaqa yachachwantaqmi iñiqmasinchikkunawan tiempollanpi consejaykachiwasqanchikwanpas. Apostolkunapa tiemponpim Diosqa Pablowan 14 cartakunata qillqachirqa. Chay cartakunapim iñiqmasinkunata Pabloqa kuyakuyllawan corregirqa. ¿Imanasqataq Jehova Diosqa chay consejokunata qillqachirqa? Ancha kuyakuq kasqanraykum, payqariki corregiwanchik kuyakuq tayta ‘churinta rimapayaq hinam’ (Prov. 3:​11, 12). Chaynaqa, pipas bibliawan consejaykuwaptinchikqa amayá piensasunchu Dios manaña chaskiwasqanchiktaqa. Chaywanmi yachanchik hinalla kuyawasqanchikta (Heb. 12:6). ¿Imaynatawantaq yachachwan Dios chaskiwasqanchikmanta?

¿IMAKUNAWANRAQTAQ YACHANCHIK DIOS CHASKIWASQANCHIKTA?

15. ¿Pikunamanmi Jehova Diosqa atiyninta qun? ¿Imamantam mana iskayrayananchikchu?

¹⁵ Jehova Diosqa atiynintam qun haykam chaskisqankunamanqa (Mat. 12:18). Tapukuchwanmi: “¿Diospa atiynin yanapawasqanman hinachu Diospa imayna kasqanta qatipakuchkani?”, nispa. Jehova Diosta riqsirusqayki qipamanqa, ¿aswan pacienciakuqchu kanki? Diospa atiynin yanapawasqanchikman hina kawsakuspaqa manapunim iskayrayasunchu ñuqanchikwan Dios kusisqa kasqanmantaqa. (Qaway “ ¿Imaynam kasun Diospa atiynin yanapawaptinchikqa?” niqta).

16. 1 Tesalonicenses 2:4 nisqanman hinaqa, ¿pikunatam Diosqa akllan sumaq willakuyta willakunankupaq? ¿Imaynam chayta yachaspayki tarikunki?

¹⁶ Jehova Diosqa chaskisqan runakunatam akllan sumaq willakuykunata willakunankupaq (leey 1 Tesalonicenses 2:4). Yocelynmi chayna kasqanmanta cuentata qukururqa. Paymi huk punchaw qalaypaq mana ganasniyuq achikyarurqa. Paymi willakun: “Mana kallpayuqmi karqani, manam ima ruwaytapas munarqanichu. Ichaqa precursora kasqayraykum chay punchaw Diosmanta willakuq lluqsinay  karqa. Chaymi Jehova Diosta mañakuykuspay lluqsirqani”, nispa. Chay tempranom Yocelynqa Mary sutiyuq llampu sunquyuq warmiwan bibliamanta rimarqa. Paymi biblia estudiayta munarqa. Killakuna pasaytam Maryqa Yocelynman willakurqa chayllaraq watukusqan punchaw yanapaykunanpaq Diosta mañakusqanmanta. ¿Imamantam Yocelynqa cuentata qukururqa? Paymi willakun: “Chayna niwasqanqa karqa ‘qamtaqa chaskikim’ nispa Jehova Dios niwachkanmanpas hina”, nispa. Manamá lliw runakunachu Diosmanta willakuptinchikqa uyariwasun. Chaywanpas Jehova Diosqa anchatam kusikun imaña kaptinpas sumaq willakuykunamanta hinalla willakuptinchik.

17. ¿Imatam yachachiwanchik Jesus wañukusqanmanta Vikipa nisqan? (Rimarimuytaq Salmos 5:12 nisqanmantapas).

¹⁷ Jehova Diosqa chaskisqan runakunatam Jesuspa wañukusqanrayku huchankumanta pampachaykun (1 Tim. 2:​5, 6). Bautizasqaña kaspapas chaynataq ñuqanchikrayku Jesus wañukusqanta yachaspapas Dios chaskiwasqanchikmanta iskayrayaptinchikqa, ¿imam yanapawachwan? Kikinchikpa piensasqanchikpi hapipakunamantaqa Diospim haykapipas hapipakunanchik. Payqa Jesuspa wañukusqanpi iñiqkunataqa allin ruwaqpaqmi hapin hinaspam bendecin (leey Salmos 5:12; Rom. 3:26). Iñiqmasinchik Vikim qallariypi iskayrayaq Dios kuyasqanmanta, ichaqa Jesuspa wañukusqanpi yuyaymanasqanmi yanaparqa manaña iskayrayananpaq. Ninmi: “Jehova Diosqa unay watam ñuqawan pacienciakurqa [ . . . ]. Chaywanpas paytam nichkarqani: ‘Ñuqa hina huchasapataqa manam kuyawankimanchu. Churikipa wañukusqanpas huchaytaqa manam pampachanmanchu’”, nispa. Ñuqanchikpas Viki hina Jesuspa wañukusqanpi yuyaymanaspaqa Jehova Dios kuyawasqanchikmanta hinaspa chaskiwasqanchikmantam mana iskayrayasunchu.

18. ¿Imamantam mana iskayrayananchikchu Jehova Diosta hinalla kuyaspanchikqa?

¹⁸ Kunan yachamusqanchikman hina Jehova Dios chaskiwasqanchikmanta mana iskayrayanapaq tukuyta ruwaspapas, wakinpiqa hukmanyasqa kasqanchikraykum iskayrayachwanraq. Sichus hinallaraq qampas iskayrayanki hinaspaqa yuyariy ‘hinalla kuyaqninkunataqa’ Jehova Dios chaskisqanta (Sant. 1:12). Chaynaqa Diosmanyá hinalla asuykuy hinaspayá qanwan kusisqa kasqanmanta cuentata qukunaykipaq kallpanchakuy. Amataqyá haykaqpas qunqaychu ‘Diosninchikqa ñuqanchikmanta mana llumpay karupi kasqantaqa’ (Hech. 17:27).