1, 2. ¿Ima bendicionkunatam chaskin pipas bautizakuruspanqa?

 PIPAS bautizakuspanqa Jehova Diospa familianñam rikurin. ¡Chayqa mayna kusikunapaqmi! Bautizasqakunaqa David hinam tarikunku. Paymi Jehova Diosta nirqa: “Mayna kusisqam qampa akllasqayki runaqa. Mayna kusisqam wasikipi yachananpaq akllasqayki runaqa”, nispa (Sal. 65:4).

² Jehova Diosqa manamá llapallan runatachu akllan serviqnin kananpaqqa. Pasaq yachachikuypi yachamusqanchikman hinam Diosqa amistadnin kayta munaqkunaman asuykun (Sant. 4:8). Paykuna Jehova Diosllapaqña kawsakunankupaq tantiakuruspankuqa hinaspa bautizakuruspankuqa Dioswanmi allin amistad kanku. Paykunatam Diosqa prometen: ‘Ñuqaqa bendicionniytam qumusqaykichik, hinaptinmi imaykichikpas mana pisipusunkichikchu’, nispa (Mal. 3:10; Jer. 17:​7, 8).

3. ¿Imakunatam ruwananchik llapallan bautizasqakuna? (Rimarimuytaq Eclesiastes 5:​4, 5 nisqanmantapas).

³ Bautizakuyqa Diosta serviyninchikpa qallariyllanraqmi. Diosllapaqña kawsakunapaq tantiakuqkunaqa hinaspa bautizakuqkunaqa llapallanchikmi chayman hina kawsakunanchik ima tentacionña utaq ima sasachakuyña kaptinpas (leey Eclesiastes 5:​4, 5). Chaymantapas hinallam Jesusta qatinanchik hinaspa kamachikuyninkunata kasukunanchik (Mat. 28:​19, 20; 1 Ped. 2:21). Kay yachachikuymi chaypaq yanapawasun.

JESUSTAYÁ ‘HINALLA QATISUN’ IMA SASACHAKUYÑA UTAQ IMA TENTACIONÑA KAPTINPAS

4. ¿Imatam Jesusqa nichkarqa “ñakarichiqnin qirunta hombrokuykuspa hinalla qatiwachun” nispanqa? (Rimarimuytaq Lucas 9:23 nisqanmantapas).

⁴ Bautizakusqanchik qipatapas hinallam sasachakuykunaqa kanqa. Chaymi Jesuspas nirqa sapa qatiqninkuna ‘sapa punchaw ñakarichiqnin qirunta hombrokuykuspa hinalla qatinankumanta’  (leey Lucas 9:23). ¿Chaywanqa nichkarqa qatiqninkuna sapa punchaw ñakarinankumantachu? Manam. Nichkarqaqa bendicionkunata chaskispankupas wakinpiqa sasachakuykunapi kanankumantam utaq ñakarichisqa kanankumantam (2 Tim. 3:12).

5. ¿Diospa munayninta puntata ruwaqkuna ima bendicionkunata chaskinankumantam Jesus nirqa?

⁵ Yaqapaschá qamqa Diospa munasqanta puntata ruwasqaykirayku familiaykipa chiqnisqan karqanki utaq allin pagasqa llamkayta saqirqanki (Mat. 6:33). Chaykuna ruwasqaykitaqa Jehova Diosqa manam qunqanchu (Heb. 6:10). Jesuspa nisqanqa ciertochá qampaqpas. Paymi nirqa: “Chiqaptapunim nikichik, pipas ñuqarayku hinaspa sumaq willakuykunata willakunanrayku wasinta, wawqi-paninkunata, turi-ñañankunata, tayta-mamanta, churi-wawanta utaq chakrankunata saqiqqa ñakarichisqa kaspanpas 100 kuti mastaraqmi kay tiempopi chaskinqa: Wasikunata, wawqi-panikunata, turi-ñañakunata, mamakunata, churi-wawakunata chaynataq chakrakunata, hamuq tiempopiñataq wiñay kawsayta”, nispa (Mar. 10:​29, 30). Tukuy ima saqisqaykikunamantaqa Diosmanta chaskisqayki bendicionkunam aswan masqa (Sal. 37:4).

6. ¿Imanasqataq bautizakuruspaykipas hinalla kallpanchakunayki kanqa ‘aychapa munapayasqankunawan’ mana aysachikunaykipaq?

⁶ Bautizakuruspaykipas hinallam pantaq runa kanki, chaymi hinalla kallpanchakunayki kanqa ‘aychapa munapayasqankunawan’ mana aysachikunaykipaq (1 Juan 2:16). Wakinpiqa apostol Pablo hinam tarikuwaq. Paymi nirqa: “Chiqaptapunim Diospa kamachikuyninkunamantaqa sunquypi kusikuni. Ichaqa yachanim kamachiwachkanmanpas hina cuerpoypi mana allin kaqta ruway munay ñuqapi kasqanta chaynataq chay mana allin munasqay allin kaqta ruway munasqaywan peleachkaq hina kasqanta. Chay kamachiwaqniy hinaqa cuerpoypi kaq hucham, chaymi mana allinta ruwanaypaq aysakachawan”, nispa (Rom. 7:​22, 23). Wakinpiqa ichapas hukmanyasqa tarikunki mana allinkunawan aysachikusqaykirayku. Chayna kaptinqa Jehova Diosllapaqña kawsakunaykipaq prometekusqaykita yuyariynikim yanapasunki ima tentacionpas kaptin mana wichiykunaykipaq. Arí, Diosllapaqña kawsakunapaq prometekusqanchikqa huchaman mana wichiykunapaqmi yanapawasun. Chaymantayá astawan yachaykusun.

7. ¿Imaynatam Diosllapaqña kawsakunapaq tantiakusqanchik yanapawasun payman sunqu kanapaq?

⁷ Jehova Diosllapaqña kawsakunapaq tantiakuspanchikqa manañam sunqunchikpa imapas munasqankunawanqa aysachikunanchikñachu nitaq Jehova Diospa chiqnisqan kaqkunataqa ruwananchikñachu (Mat. 16:24). Chayraykum ima sasachakuypas kaptinqa mana iskay-kimsataqa piensasunchu imatapas ruwananchikpaqqa, ñuqanchikqa imaña kaptinpas Jehova Diosllatamá kusichiyta munasun. Payllapaqña kawsakunapaq tantiakuspanchikqa lliw imapas munasqanchikkunatam qipancharqanchik. Job hinam kasun, payqa ima sasachakuyña kaptinpas mana iskayrayaspanmi nirqa: ‘Ñuqaqa Diosman sunqum kallasaq’, nispan (Job 27:5).

8. ¿Imaynatam Diosllapaqña kawsakunapaq prometekusqanchik yanapawasun tentacionkunata chaylla qipanchanapaq?

⁸ Jehova Diospa munayninta ruwanapaq prometekusqanchikpi yuyaymanaymi yanapawasun ima tentaciontapas chaylla qipanchanapaq. ¿Yaqachu chaypi yuyaymanaspaqa casarasqa warmita utaq qarita asipayasun? Manamá ¿aw? Chayta manaña ruwanapaqmi Diostaqa prometekurqanchik. Chay mana allin munaykuna sunqunchikpi sapichakunanta mana saqispaqa manañam qipataqa imamantapas preocupakusunchu. Chayna  kaspaqa ‘mana allin ruwaqkunapa ruwasqanmantam’ qalaypaqta karunchakusun (Prov. 4:​14, 15).

9. ¿Imaynatam Diosllapaqña kawsakunapaq prometekusqanchik yanapawasun Diospa munayninta puntapi churanapaq?

⁹ ¿Imatam ruwachwan huñunakunanchik punchawkunaraq allin pagasqa llamkayta munachiwaptinchikqa? Manamá “arí” nisunchu. Chaykuna manaraq pasawachkaptinchikmá tantiakurqanchikña imata ruwananchikpaq. Chayraykum chay llamkay munachiwasqanchiktaqa mana chaskisunchu. Chaskiruspanchikqa Diospa munayninta puntapi churaytam mana atichwanchu. Chaypaqqa Jesuspa ruwasqantam yuyarinanchik. Payqa taytanta kusichiyta munasqanraykum imapas chiqnisqan kaqkunataqa qipancharqa, chaynam ñuqanchikpas Diosta kusichiyta munasqanchikrayku imapas chiqnisqantaqa kamas qipanchananchik (Mat. 4:10; Juan 8:29).

10. ¿Imaynatam Dios yanapawasun bautizakuruspa Jesusta hinalla qatinapaq?

¹⁰ Chaynaqa, sasachakuykuna hinaspa tentacionkuna kaptinmi Jesusta hinalla qatikuy munasqanchikta qawachinanchik, chaypaqqa Jehova Diosmi yanapawasun. Bibliapim paymanta nin: “Diosqa rimasqanman hinam ruwan, chaymi payqa mana saqisunkichikchu mana aguantay atinaykichikkama sasachakuypi kanaykichiktaqa, aswanqa chayna hatun sasachakuypi kaptikichikqa yanapasunkichikmi imatapas ruwanaykichikpaq hinaspa aguantanaykichikpaq”, nispa (1 Cor. 10:13).

¿IMATAM RUWAWAQ JESUSTA HINALLA QATINAYKIPAQ?

11. ¿Imatam ruwawaq bautizakuruspayki Jesusta hinalla qatinaykipaq? (Qawaytaq dibujokunatapas).

¹¹ Jesusqa tukuy sunqunwanmi taytantaqa servirqa, hinaspapas paywan rimasqanraykum allin amistad karqa (Luc. 6:12). Chaynaqa,  ¿imatam ruwawaq bautizakuruspayki Jesusta hinalla qatinaykipaq? Qampas Jehova Diosman astawan asuykachisuqniki kaqkunatam hinalla ruwanayki. Bibliapim nin: “Maykama Dios servisqanchikpi ñawparisqanchikmantaqa aswanraqyá ñawparisun”, nispa (Filip. 3:16). Wakinpim uyarinki Diospa gobiernonmanta willakuqkunapaq escuelaman riqkunamanta utaq mana ancha testigokunapa kasqanpi willakuqkunamanta. ¿Qampas atiwaqchu chaykuna ruwayta? ¡Atispaykiqa ruwawaqmi! Jehova Diosta serviqkunaqa payta astawan serviytam munanchik (Hech. 16:9). Ichaqa, ¿imatam ruwawaq chay ruwayta kunan mana atispaykiqa? Amayá piensaychu wakinkuna qanmanta aswan allin kasqankutaqa. Diosta serviyninchikpi aguantaymi imamantapas aswan allinqa (Mat. 10:22). Amayá qunqaychu: Jehova Diosqa anchatam kusikun kawsakuynikipi imapas ruway atisqaykiman hina kallpanchakuptikiqa. Chayta ruwaspaykim bautizakuruspaykipas Jesusta hinalla qatikunki (Sal. 26:1).

12, 13. ¿Imatam ruwawaq ñawpaqta hina Diosta manaña kusisqa servispaykiqa? (Rimarimuytaq 1 Corintios 9:​16, 17 nisqanmantapas. Qawaytaq “ ¿Imatam ruwachwan hinalla kallpanapaq?” niqtapas).

¹² ¿Imatam ruwawaq Jehova Diosta sunqumanta manaña mañakuspaykiqa, ñawpaqta hina manaña Diosmanta kusisqa willakuspaykiqa hinaspa bibliaykita manaña ancha leespaykiqa? Bautizakuruptiki chayna pasasuptikiqa amayá piensaychu Jehova Dios manaña yanapasusqaykitaqa. Pantaq kasqanchikraykum wakinpiqa chaykuna pasawachwan. Ñawpaqta hina manaña Diosta kusisqa servispaqa apostol Pablopa imayna tarikusqanpiyá yuyaymanasun. Payqa Jesusta qatipakunanpaq tukuyta ruwaspanpas wakinpim ima ruwananta ruwananpaq mana kallpayuq hina tarikuq (leey 1 Corintios 9:​16, 17). Paymi nirqa: “Kay  llamkaytaqa mana munastinpas ruwasaqmi señorninchikmanta chaskisqayrayku”, nispa. Arí, Pabloqa wakinpi mana kallpayuq hinaña tarikuspanpas Diostaqa hinallam serviyta munarqa.

¹³ Ñuqanchikpas amayá imayna tarikusqanchikman hinallaqa imapaqpas tantiasunchu. Aswanqa ruwananchikpaq mana ganasninchik kaptinpas hinallayá allin kaqkunata ruwasun. Allin kaqkunata ruwaptikiqa tiempopa pasasqanman hinam imayna tarikusqaykipas cambianqa. Chaynaqa, sapaykipi estudianaykipaq, Diosta mañakunaykipaq, Diosmanta willakunaykipaq hinaspa huñunakuykunaman rinaykipaq kallpanchakuspaykiqa bautizakuruspapas hinallam Jesustaqa qatikunki. Tukuy chaykunata hinalla ruwaptikiqa congregacionpi iñiqkunapas qawasuspaykim kallpanchasqa tarikunqaku (1 Tes. 5:11).

“HINALLAYÁ QAWAKUYCHIK”

14. ¿Imatam sapa kuti qawakunanchik? ¿Imanasqa? (Rimarimuytaq 2 Corintios 13:5 nisqanmantapas).

¹⁴ Bautizakuruspaykiqa sapa kutim qawakunayki imayna kawsakusqaykita hinaspa imakuna ruwasqaykita (leey 2 Corintios 13:5). Yuyaymanarinaykim, ¿sapa punchawchu Diosta mañakuchkani? ¿Leechkanichu hinaspa estudiachkanichu bibliata? ¿Richkanichu huñunakuykunaman hinaspa Diosmanta willakuq? Chaykunataqa tukuy sunqumantam ruwananchik, chaynapi kusisqa tarikunanchikpaq. Nikuwaqmi: “¿Yaqachu bibliamanta imatapas tapuwaptinku allinta contestayta atini? ¿Imatam ruwayman Diosmanta aswan kusisqa willakunaypaq? ¿Yanapawananmanta mana iskayrayaspaychu Jehova Diosta mañakuni? ¿Kallpanchakunichu huñunakuykunaman mana faltakunaypaq? ¿Imatam ruwayman huñunakuykunapi allinta uyarinaypaq hinaspa allinta rimarinaypaq?”, nispa.

15, 16. ¿Imatam Robertmanta yachawaq?

¹⁵ Allintaqmi kanman imakunawan sasachakusqanchikta yachayninchikpas. Imanasqa chay ancha allin kasqanmanta yachanapaq rimarisunchik iñiqmasinchik Robertmanta. Paymi willakun: “20 wataypi kachkaptiymi llamkaqmasiy warmi llamkayniyku tukuyta niwarqa wasinpi mana pipas kasqanrayku huk ratullapas kuska kanaykupaq. Qallariypiqa manam kamaschu ‘manam’ nirqani. Chaymantam ichaqa clarota nirqani imanasqa mana rinaymanta”, nispa. Robertpa “manam” nisqanqa allinmi karqa. Chaymantam ichaqa imaynata aswan allinta ruwananmanta yuyaymanaspan nirqa: “¿Imanasqataq ñuqaqa mana Josey hinachu chaylla ‘manam’ nirqani? Payqa Potifarpa warmin paywan puñunanpaq hikutaptinmi  chaylla ‘manam’ nirqa (Gen. 39:​7-9). Manamá piensarqanichu chayna pasawaptin iskayrayaytaqa, chayna pasawasqanmi yanapawarqa Jehova Dioswan allin amistad kanaypaq hinalla kallpanchakunaypaq”, nispa.

¹⁶ Robertpa ima ruwasqanqa qamtapas yanapasunkimanmi. Ima tentaciontapas venceruspaqa Robert hinam nikuwaq: “¿Kamaschu ‘manam’ nirqani, icha iskayrayarqanichu?”, nispa. “Manam” ninaykipaq iskayrayasqaykimanta cuentata qukuspaykiqa amayá hukmanyaychu. Chaypi hinalla kallpanchakunaykimanta cuentata qukusqaykiqa allinmi. Chaymantam Jehova Diosman willakunayki, hinaspam kallpanchakunayki paypa kamachikuyninkunata kasukunaykipaq (Sal. 139:​23, 24).

17. ¿Imaynatam yachanchik Diosta kasukuspaqa sutinta pinqayman mana churananchikta? Willarimuy Robertmanta.

¹⁷ Robertqa nintaqmi: “Llamkaqmasiy warmi wasinman rinaykupaq niwasqanta mana munaptiymi payqa niwarqa: ‘allintam ruwarunki’, nispa. Chaynata niwaptinmi ñuqañataq nirqani: ‘¿Imanasqataq chaynataqa ninki?’, nispay. Hinaptinmi niwarqa: ‘Ñawpaqta testigo kaq amistadniymi niwarqa musu-sipas testigokunaqa pipas hikutaptinqa pakallapi mana allinkunata ruwasqankumanta’, nispa. Chaymi payqa amistadninta nisqa musu-sipas testigokuna cierto chayna kasqanta yachanapaq ñuqata pruebawananpaq. Anchatam kusikuni Jehova Diospa sutinta pinqayman mana churasqaymanta”, nispa.

18. ¿Imatam hinalla ruwayta munanki bautizakuruspaykipas? (Qawaytaq “ Yanapasuqniki iskay yachachikuykuna” niqtapas).

¹⁸ Diosllapaqña kawsakunaykipaq tantiakusqaykiwanmi hinaspa bautizakusqaykiwanmi lliw runakuna yachanqaku imaña kaptinpas Diospa sutinta hatunchay munasqaykita. Diosqa yachanmi ima sasachakuykunapi tarikusqaykita hinaspa ima tentacionkunata vencesqaykita. Hinalla payman sunqu kaptikiqa bendecisunkim. Amayá iskayrayaychu imatapas allinta ruwanaykipaq Jehova Dios yanapasunaykimantaqa (Luc. 11:​11-13). Pay yanapasuptikiqa bautizakuruspaykipas hinallam Jesusta qatikunki.