1, 2. ¿Imatam ruwanayki manaraq bautizakuchkaspa?

 KAY pasaq pichqa watapim huk millon masnin runamasinchikkuna Jehova Diospa testigon kanankupaq bautizakurqaku. Paykunamanta wakinqa Timoteo hinam taksachankumanta Jehova Diosmanta yacharqaku (2 Tim. 3:​14, 15). Wakinñataqmi yuyayniyuqña kachkaspanku utaq yuyaqña kachkaspanku. Huk warmipas testigokunawan bibliata estudiaspanmi 97 watanpiña bautizakurqa.

² ¿Pi testigopas bibliamantachu yachachisuchkanki? ¿Utaqchu testigo tayta-mamayki bibliamanta yachachisuchkanki? Pi yachachisuptikipas yaqapaschá piensachkankiña bautizakuyta. ¡Chayqa allinpunim! Ichaqa manaraq bautizakuchkaspaykim Jehova Diosllapaqña kawsakunaykipaq tantiakunayki. Kay yachachikuypim chaymanta rimasun. Rimasuntaqmi Jehova Diosllapaqña kawsakuyta tantiakunaykipaq hinaspa bautizakunaykipaq listoña kaspaqa imanasqa mana manchakunaykimantapas.

DIOSLLAPAQÑA KAWSAKUNAPAQ PROMETEKUYMANTA

3. ¿Pikunataq ñawpaq tiempopi Diosllapaqña kawsakurqaku utaq chaypaq sapaqchasqa karqaku?

³ Pipas Jehova Diosllapaqña kawsakunanpaq tantiakusqanmanta bibliapi rimaspanqa Diosllataña servinanpaq rakisqa utaq sapaqchasqa kasqanmantam rimachkan. Israel runakunapas Diosllapaqña kawsakunankupaqmi akllasqa karqaku. Wakinkum ichaqa sapaq akllasqa karqaku imatapas ruwanankupaq. Aarontam Jehova Dios akllarqa sacerdotekunapa kamachiqnin kananpaq. Chaymi Aaronqa qurimanta llipipipiq llaspalla suytu tablachata hina urkunpi apaq. Chaymi karqa ‘Diospaqña kasqanta riqsichiqnin’ (Lev. 8:​9, qaway willakuyninta). Chaynam nazareo  runakunapas Diosllapaqña kawsakurqaku. Chayraykum nazareo palabrataqa hebreo rimaypi nazír ninku. Chay ninanqa “sapaqchasqa” utaq “akllasqa” ninanmi. Moisespa chaskisqan kamachikuypim nirqa paykunaqa ima kamachikuykunata kasukunankumanta (Num. 6:​2-8).

4. (1) ¿Imakunata ruwanapaqmi tantiakunchik Diosllapaqña kawsakunapaq prometekuspanchikqa? (2) ¿Imatam Jesusqa nichkarqa ‘amaña kikillanchikpaq kawsakunanchikmanta’ rimaspanqa? (Qawaytaq dibujotapas).

⁴ Diosllapaqña kawsakunapaq prometekuspanchikqa Jesuspa qatiqnin kanapaqmi chaynataq Diospa munayninta imamantapas puntata ruwanapaqmi tantiakunchik. Chaymanta rimaspanmi Jesus nirqa: ‘Pipas qatiwayta munaqqa amañayá kikillanpaqqa kawsachunchu’, nispa (Mat. 16:24). Chaywanqa nichkarqa Diosllapaqña kawsakunapaq tantiakuspanchikqa wakinpi “ama chaytaqa ruwaychu” nikuchkaq hina kananchikmantam. Arí, Jehova Diospa chiqnisqan kaqkunatam manaña ruwananchikchu (2 Cor. 5:​14, 15). Chaykunaqa ‘aychapa munasqanman hina ruwaykunam’, chaypim kachkan huchapakuykunapas (Gal. 5:​19-21; 1 Cor. 6:18). Chaykunata kasukuyqa manam sasachu kanqa Jehova Diosta kuyaptikiqa hinaspa kamachikuyninkuna allinnikipaq kasqanta entiendeptikiqa (Sal. 119:97; Is. 48:​17, 18). Nicolasmi nirqa: “Jehova Diospa kamachikuyninkunaqa rikchakusunkimanmi imapas munasqayki ruwanaykita harkasuqniki carcelpi reja hina, utaq zoologicopi leon mana imanarusunaykipaq harkasuqniki reja hina”, nispa.

5. (1) ¿Imata ruwaspam Jehova Diosllapaqña kawsakunapaq prometekunchik? (2) ¿Imanasqataq mana igualchu Diosllapaqña kawsakunapaq tantiakuywan bautizakuyqa? (Qawaytaq fotokunatapas).

⁵ ¿Imata ruwaspam Jehova Diosllapaqña kawsakunapaq prometekunchik? Jehova Diosta mañakuspam. Mañakuspanchikmi prometekunchik payllataña yupaychanapaq hinaspa imamantapas puntataqa paypa munayninta ruwanapaq. Chaywanqa nichkanchik Diosta tukuy sunqunchikwan, tukuy vidanchikwan, tukuy  yuyayninchikwan hinaspa tukuy kallpanchikwan haykapipas kuyanapaq prometekuymantam (Mar. 12:30). Chaynaqa, sapallaykipim Jehova Diosta mañakuspa prometekunki payllapaqña kawsakunaykipaq. Bautizakunkiñataqmi achkapa qayllanpi, chaynapim runakuna yachanqaku Jehova Diosllapaqña kawsakunaykipaq prometekusqaykita. Diosllapaqña kawsakunapaq tantiakusqanchikqa manam pukllay hinallachu. Chayraykum tantiakusqaykiman hina cumplinayki. Chay ruwanaykitamá Jehova Diospas munan (Ecl. 5:​4, 5).

¿IMANASQATAQ DIOSLLAPAQÑA KAWSAKUNAYKIPAQ TANTIAKUNAYKI?

6. ¿Imanasqataq Jehova Diosllapaqña kawsakunaykipaq tantiakunayki?

⁶ Jehova Diosta kuyasqaykiraykum payllapaqña kawsakunaykipaqqa tantiakunayki. Chay kuyakuyqa manam hawa sunqullachu, aswanqa tukuy sunqumanta Diosta kuyanaykipaqmi paypa “munayninmanta imam kaqta” yacharqanki hinaspa ‘yanapakuyninwan palabranta entienderqanki’ (Col. 1:9). Bibliata estudiaspaykim manapuni iskayrayankichu 1) Jehova Diosqa amistadniki kananmanta, 2) chuya espiritunwan palabranta qillqanankupaq yanapasqanmanta hinaspa 3) munayninta cumplinanpaq kay pachapi serviqninkunata yanapasqanmanta.

7. ¿Imakunatam ruwanan Diosllapaqña kawsakunanpaq tantiakuq runaqa?

⁷ Jehova Diosllapaqña kawsakunanpaq tantiakuq runaqa puntatam bibliamanta imam kaqta yachanan, Diospa kamachikuyninkunata kasukunan, hinaspapas yachasqankunatam atisqanman hina hukkunaman willanan (Mat. 28:​19, 20). Chaymantapas, Jehova Diostam tukuy sunqunwan kuyanan hinaspapas payllatam servinan. ¿Yaqañachu qam chayta ruwachkankiña?  Diosta anchata kuyaspaykiqa manam bibliamanta yachachisuqnikita kusichiyta munasqaykiraykullachu Diosllapaqña kawsakunaykipaqqa tantiakunki hinaspa bautizakunki. Musu-sipas kaspaykipas manataqmi chaypaqqa tantiakunki tayta-mamaykita kusichiyta munasqaykiraykullachu utaq amistadnikikuna bautizakusqankuraykullachu.

8. ¿Imaynatam Diosta agradecekuyqa yanapawanchik payllapaqña kawsakunapaq tantiakunanchikpaq? (Rimarimuytaq Salmos 116:​12-14 nisqanmantapas).

⁸ Qamrayku Jehova Dios tukuy imata ruwasqanmanta cuentata qukuspaykiqa agradecekusqaykiraykum payllapaqña kawsakunaykipaq tantiakuyta munanki (leey Salmos 116:​12-14). Bibliapim nin “tukuy imapas allin kaqkunaqa hinaspa allinkuna chaskisqanchikqa” Diosmanta hamusqanta (Sant. 1:17). Imamantapas aswan allin chaskisqanchikqa ñuqanchikrayku wañunanpaq churin Jesusta kachamusqanmi. Chayraykum Jehova Diospa amistadnin kayta atiwaq chaynataq wiñaypaqpas kawsakuwaq (1 Juan 4:​9, 10, 19). Chaynaqa, tukuy chaykuna ruwasqanmanta agradecekusqaykiraykum payllapaqña kawsakunaykipaq tantiakunki (Deut. 16:17; 2 Cor. 5:15). Chaymantam Kusisqa kawsakunapaq libronchik rimachkan 46 yachachikuypi 4 kaqpi, chaypitaqmi rikurichkan ¿Imapaq tantiakuspam Diosta kusichichwan? sutiyuq videopas.

¿LISTOÑACHU KACHKANKI DIOSLLAPAQÑA KAWSAKUNAYKIPAQ HINASPA BAUTIZAKUNAYKIPAQ?

9. ¿Imatam ruwanayki Diosllapaqña kawsakunaykipaq imakunapiraq kallpanchakunaykita qawakuspaykiqa?

⁹ Ichapas piensanki Diosllapaqña kawsakunaykipaq prometekunaykipaqqa hinaspa bautizakunaykipaqqa manaraq listo kasqaykita. Icha imapiraqpas kallpanchakunayki kachkan Jehova Diosta kasukunaykipaq, utaq astawanraq tiempota necesitanki Diospi astawan hapipakunaykipaq (Col. 2:​6, 7). Bibliata estudiaqkunaqa manam llapallankuchu Diosta kuyasqankupiqa chaynalla kanku. Manataqmi musu-sipaskunapas chay watallankupichu Jehova Diostaqa tukuy sunquwan serviyta qallarinku. Chayraykuyá imakunapiraq kallpanchakunaykita qawakuspayki chayman hina ruway hukkunawan ama tupachikuspayki (Gal. 6:​4, 5).

10. ¿Imatam ruwanayki Diosllapaqña kawsakunaykipaq manaraq listo kasqaykita piensaspaykiqa? (Qawaytaq “ Tayta-mamayki testigo kaptin” niqtapas).

¹⁰ Diosllapaqña kawsakunaykipaq prometekunaykipaq manaraq listo kasqaykita piensaspaykiqa hinallayá chaypaq kallpanchakuy. Jehova Diostayá mañakuy imakunapiraq kallpanchakunaykipi yanapasunaykipaq (Filip. 2:13; 3:16). Payqa mañakusqaykita uyariykuspam yanapaykusunki (1 Juan 5:14).

¿IMANASQATAQ WAKINKUQA BAUTIZAKUYTA MANCHAKUNKU?

11. ¿Imaynatam Dios yanapawasun payman sunqu kanapaq?

¹¹ Wakinkuqa Diosllapaqña kawsakunankupaq hinaspa bautizakunankupaq listoña kaspankupas manam tantiakunkuchu. Paykunaqa ima hatun huchatapas ruwaruspanku qarqusqa kaytam manchakunku. Ichaqa bibliapim nin Jehova Diosqa ‘munasqanman hina kawsakuspa tukuy ima ruwasqanchikwan payta kusichinapaq’ yanapawananchikmanta (Col. 1:10). Chayraykum manapuni iskayrayanaykichu allinkunata ruwanaykipaq Dios yanapasunaykimantaqa. Chaynatamá achkaqta yanaparqa (1 Cor. 10:13). Chaymi as testigokunalla qarqusqa kanku. Jehova Diospa yanapakuyninwanqa payman sunqu kaytaqa atichwanmi.

12. ¿Imataq yanapawasun huchaman mana wichiykunapaq?

¹² Pantaq kasqanchikraykum imapas mana allinkuna ruwayta munanchik (Sant. 1:14). Ichaqa ima tentacionpas kaptinqa qanmi tantianayki imatapas ruwanaykipaq. Kawsakuynikipi imatapas ruwaynikiqa utaq mana ruwaynikiqa  qanmantam kanqa. Wakin runakunam ninku imapas piensasqanchikwan ruway munasqanchikqa mana controlay atina kasqanta. Ichaqa manam chayqa ciertochu, chaykunata controlaytaqa atichwanmi. Chaypaqmi yanapawasun Diosta sapa punchaw mañakuy, sapanchikpi bibliata estudiay, huñunakuykunaman riy hinaspa Diosmanta willakuy. Chaykunata sapa kuti ruwaspanchikqa atisunmi Diosllapaqña kawsakunapaq prometekusqanchikta cumpliyta. Manataqmi qunqananchikchu tukuy imapipas Jehova Dios yanapawasqanchiktaqa (Gal. 5:16).

13. ¿Imatam Joseymanta yachachwan?

¹³ Ima tentacionpas kaptin imata ruwanapaq ñawpaqmantaraq piensaymi yanapawasun huchaman mana wichiykunapaq. Bibliapim willawanchik ñuqanchik hina pantaq kachkaspankupas tentacion kaptin imata ruwanankupaq ñawpaqmantaraq tantiaq runakunamanta. Hukninmi karqa Josey. Paytam Potifarpa warmin sapa kuti hikutaq puñunankupaq. Joseymi ichaqa yacharqaña ima niyta. Joseyqa huchaman wichiykuyta mana munaspanmi kaynata niq: “¿Imaynamá kay mana allintaqa ruwayman hinaspa Diostapas qipanchayman?”, nispa (Gen. 39:​8-10). Joseyqa Potifarpa warmin paywan puñunanpaq manaraq nichkaptinmi ña yacharqaña ima niyta. Chayraykum Potifarpa warmin paywan puñunanpaq hikutayta qallaykuptinpas chaylla nirqa “manam” nispan.

14. ¿Imatam ruwachwan Jehova Diospa chiqnisqan kaqkunata “manam” ninapaq?

¹⁴ ¿Imatam ruwachwan Josey hina Diosman sunqu kanapaq? Chaypaqqa kunanmantam tantiakunanchik ima tentacionpas kaptin imata ruwanapaq. Jehova Diospa chiqnisqan kaptinqa mana iskayrayaspam chaylla “manam” ninanchik (Sal. 97:10; 119:165). Chaymi yanapawasun hatun huchaman mana wichiykunapaq. Chaynapim ima tentacionpas kaptinqa manaña iskayrayasunñachu ima niyta.

15. ¿Imaynatam sutilla kanqa Diosta ‘tukuy sunquykiwan’ serviy munasqayki? (Rimarimuytaq Hebreos 11:6 nisqanmantapas).

¹⁵ Yaqapaschá qamqa yachankiña testigokuna chiqap religion kasqanta, hinaspapas Diostachá tukuy sunquykiwan serviyta munachkanki. Ichaqa, ¿imapas harkachkasunkichu Diosllapaqña kawsakunaykipaq hinaspa bautizakunaykipaq tantiakunaykita? Chayna kaptinqa David hinam Jehova Diosta ruegakuspayki kaynata niwaq: “Taytalláy, sumaqtayá qawaykuway [ . . . ]. Sunquyta qawaykuwaspaykiyá imakuna piensasqaytapas yachaykuy, imakuna llakichiwasqantayá  yachaykuy. Qawaykuwayá, ñuqapi kachkanchus mana allin kaqkuna, qawaykuwaspaykiyá wiñaypaq allinta kawsakunaypaq yanapaykullaway”, nispa (Sal. 139:​23, 24). Diosllapaqña kawsakunaykipaq hinaspa bautizakunaykipaq tukuyta ruwasqaykiwanmi sutilla kanqa Diosta tukuy sunquykiwan serviy munasqayki. Bibliapim niwanchik chayna ruwaqkunataqa Diosninchik bendecisqanmanta (leey Hebreos 11:6).

HINALLAYÁ JEHOVA DIOSMAN ASUYKUY

16, 17. ¿Imaynatam Dios pusamusurqanki tayta-mamayki testigo kaptinpas? (Rimarimuytaq Juan 6:44 nisqanmantapas).

¹⁶ Jesusmi nirqa kikin Jehova Dios runakunata llaqtanman pusamusqanmanta (leey Juan 6:44). ¡Chayta yachaspamá ancha kusisqa tarikunchik! Jehova Diosqa sapa runapa sunqunpi allin kaqta qawasqanraykum llaqtanman pusamun. Paypaqqa sapa serviqninkunam “kuyasqan runankuna” kanchik (Deut. 7:6). Chaynamá qampas Diospaqqa kanki.

¹⁷ Musu-sipas, yaqapaschá piensanki tayta-mamayki yachachisuspayki huñunakuyman pusasusqaykirayku Jehova Dios mana pusamususqaykita. Ichaqa bibliapim kaynata nin: “Diosman asuykuptikichikqa paypas asuykusunkichikmi”, nispa (Sant. 4:8; 1 Cron. 28:9). Chaywanqa nichkan qam puntata Diosman asuykuptiki pay asuykamusunaykimantam. Chaymi mana iskayrayanaykichu tayta-mamayki testigo kaptinpas allin sunquyuq kasqaykita Diosninchik qawamuspan llaqtanman pusamususqaykimanta. Congregacionpi iñiqkunaqa sapakamata Dios pusamuptinmi kachkanku. Chaynaqa, Santiago 4:8 nisqanman hinam pipas Diosman asuykuptinqa paypas asuykun (tupachiy 2 Tesalonicenses 2:13 nisqanwan).

18. ¿Imamantam qatiqnin yachachikuypi yachasun? (Rimarimuytaq Salmos 40:8 nisqanmantapas).

¹⁸ Jesusqa bautizakuruspanmi taytanpa munasqanta kusisqa ruwananpaq listo karqa (leey Salmos 40:8; Heb. 10:7). Qampas Jehova Diosllapaqña kawsakunaykipaq tantiakuspaykiqa hinaspa bautizakuspaykiqa Jesustam qatipakuchkanki. Qatiqnin yachachikuypim yachasun bautizakuruspa hinalla Diosman sunqu kanamanta.