Paul: 1985 watapa noviembre killanpim ancha kusisqallaña kachkarqaniku. Viajachkarqanikum Africa Occidental lawman Liberia nacionpi misionero kaspa Jehova Diosmanta willakunaykupaq. Avionqa puntatam Senegal nacionman chayarurqa. Chaypim Anne niwarqa manapas huk horapi Liberia nacionpi kanaykumanta. Hinaptinmi parlantemanta nimurqaku: “Liberia nacionman riqkunaqa bajanaykichikmi, presidentetam hurqurunku, chayraykum avionqa mana chaymanqa chayanqachu”, nispa. Chaymi 10 punchaw qipakurqaniku Senegal nacionpi misionerokunawan. Noticiakunapim uyarirqaniku Liberia nacionpi wañusqakunata camionkunapi apasqankumanta hinaspa tutankuna wasinkumanta mana lluqsinankupaq kamachisqankumanta, lluqsiqkunataqa balearuqkum.

Anne: Ñuqaykuqa tumpa manchapakuqmi kaniku. Warma kasqaymantapacham niwaqku “Anne manchati” nispa. Calleta chimpaytapas manchakunim. Chaywanpas kamachiwasqanku Liberiamanqa chayaytam munarqaniku.

Paul: Inglaterra nacionpim nacerqaniku, chay llaqtallapitaqmi wiñarqaniku. Colegioykuta tukuruspallaykum precursor kayta qallaykurqaniku. Iskayniykum tukuy tiempoykuwan Diosta serviyta munarqaniku. Chaypaqmi anchata kallpanchawarqa tayta-mamay, Annetapas mamanmi kallpancharqa. 19 wataypi kachkaptiymi invitawarqaku betel wasiman rinaypaq. 1982 watapim casarakururqaniku, chay watamantam kuskaykuña betel wasipi yanapakurqaniku.

Anne: Betelpi kusisqa kaspaykupas hinallam munarqaniku huklawkunapi yanapakuyta. Betelpim llamkarqaniku misionerokunawan. Paykunapa willakusqankuta uyarispaykum astawan munarqaniku maypipas Jehova Diosmanta willakuyta. Chaymantam kimsantin wata sapa tuta Diosta mañakurqaniku. Hinaptinmi 1985 watapi galaadpi yachachisqa kanaykupaq invitawarqaku 79 claseman, chaymi kusisqa karqaniku. Chaypim niykuwarqaku Africa lawpi Liberia nacionman rinaykupaq.

Paul: Avionkuna Liberiaman chayananpaq permisota chaskiruptinkum chaypi rirqaniku. Liberiapi runakunaqa mancharisqallañam kachkasqaku, manataqmi tutankunapas wasinkumantaqa lluqsiqkuchu. Qunqayllamanta carropa motornin bullata ruwaptinqa runakunaqa qaparispankum kallpaylla escapakuqku mercadomanta. Sunquykupi hawka kanaykupaqmi sapa tuta leeq kaniku Salmos librota. Chayna sasachakuy kaptinpas kusisqam Diostaqa servichkarqaniku.  Anneqa runakunamanmi Diosmanta yachachiq, ñuqañataqmi betelpi yanapakurqani iñiqmasinchik John Charukwan a. Payqa anchatam yachachiwarqa, payqariki unayñam Liberiapi yacharqa hinaspapas allintam yacharqa iñiqmasinchikkuna imawan sasachakusqankuta.

Anne: Liberiapiqa kusisqam kachkarqaniku, ¿imanasqa? Iñiqmasinchikkuna kuyakuqllaña hinaspa Diosman sunqu kasqankuraykum. Anchatam kuyanakurqaniku, chaymi paykunawanqa aylluntin hina karqaniku. Consejonkum yanapawarqaku Jehova Diosman sunqu kanaykupaq. Diosmanta willakuptiykupas lliw runakunam uyariwaqku. ¡Runakunaqa piñakuqkum paykunawan unayta mana parlaptiykuqa! Esquinakunapim runakunaqa huñunakuruspanku bibliamanta rimaqku. Chaymi rimasqankuman hukllawakuyqa mana sasachu karqa. Achka runakuna bibliamanta estudiayta munasqankuwanmi anchata kusikurqaniku. Ichaqa manam haypakurqanikuchu.

Paul: Tawa wataqa hawkallam karqaniku. Ichaqa 1989 watapim guerra qallaykurqa. 1990 watapim 2 de juliopi gobiernopa contranpi kaqkuna betelpa hichpanpi kaq allpakunata dueñochakururqaku. Chaymi kimsa killantin betelmantaqa mana lluqsirqanikuchu, manam familiaykuwanpas rimarqanikuchu nitaq Estados Unidos betel wasipi kaqkunawanpas. Tukuy lawpim sasachakuyllaña karqa, mikuypas manam karqachu, warmikunapas abusasqam karqaku. Chay sasachakuyqa enterollan nacionpim 14 watapuni karqa.

Anne: Huk kastamanta kasqankuraykullam wañuchinakuqku. Guerrata ruwaq runakunam armantin callekunapi purikuqku, huk clase pachayuqkamam wasikunaman yaykuspa tukuy ima munasqankuta apakuqku. Wakin soldadokunam rimaqku runataqa wallpata wañuchichkanmankupas hina wañuchisqankuta. Betelpa hichpankunallapim carrokunata sayachiqku hinaspam runakunata wañuchispa chayllapi munturuqku. Iskay misionerokunatapas hinaspa wakin Diosman sunqu iñiqmasinchikkunatapas wañurachirqakum.

Achka testigokunam vidankuta peligropi churaspanku huk kastayuq iñiqmasinchikkunata pakarurqaku. Misionerokuna hinaspa betelitakunapas chaytam ruwarqaku. Betelpa primer pisonpim ayqikuq achka iñiqmasinchikkuna puñurqaku, wakinkuñataqmi ñuqaykuwan yacharqaku segundo pisopi. Cuartoykupim karqaniku huk aylluwan, paykunam qanchis karqaku.

Paul: Sapa punchawmi guerrata ruwaq runakuna betelman yaykuyta munarqaku pi pakasqaykuta  yachayta munaspanku. Chayna kaptinmi iskay iñiqmasinchikkuna ventanallanta qawaqku, iskay iñiqmasinchikkunañataqmi chay runakunawan rimaq punkuman riqku. Punkupi kaq iñiqmasinchikkuna makinkuta ñawpaqninkuman churaptinkuqa peligro mana kasqantam ventanapi kaqkunaqa yachaq kaniku. Makinkuta qipankuman churaptinkuñataqmi yachaq kaniku chay runakunaqa piña-piña kasqankuta, chaymi apurawman wakin iñiqmasinchikkunata pakaq kaniku.

Anne: Semanakuna pasaytam iñiqmasinchikkuna harkakuchkaptinkupas piña-piña runakuna betelman yaykuramurqaku. Bañopim wichqakururqani warmi iñiqmasinchikwan, chaypim pakakunapaq uchuy espacioyuq armario karqa. Chaymanmi iñiqmasinchikqa imaynanpapas yaykururqa. Chay runakunam armayuqkama qatiramuwasqa, hinaspam bañopa punkunta piña-piñallaña takamurqaku. Mana yaykumunankupaqmi Paul nirqa: “Warmiymi bañopiqa kachkan”, nispa. Iñiqmasinchik yaykuruptinmi mana cuentata qukunankupaq tukuy imata maymi kasqanman kutiykachirqani hinaspaymi bullata ruwaykurqani. Chaymi katkatatayta qallaykurqani. Chaywanqa cuentatach qukurunmanku karqa pitapas pakasqayta. Chaymi upallalla Jehova Diosta mañakurqani yanapaykuwananpaq. Chaymantam punkuta kicharqani hinaspam hawkalla saludaykurqani. Huk kaqninmi bañoman yaykuspan armariota kicharurqa, hinaspam maskayta qallaykurqa. Mana imatapas tarispanmi wakiqninwan kuska huk cuartokunataña hinaspa wasipa altusnintaña maskaq rirqaku. Ichaqa manam pitapas tarirqakuchu.

Paul: Achka killam mikuyniyku pisilla karqa. Manam desayunaqchu kaniku. Ichaqa sapa tempranom bibliamanta yachachikuyta uyariq kaniku hinaspa bibliata leeq kaniku. Chaymi yanapawarqaku sapa punchaw aguantanaykupaq.

Mikuyniyku hinaspa yakuyku tukurusqanrayku betelmanta lluqsiruptiykuqa pakakuq iñiqmasinchikkunata tariruspankuch wañurachinmanku karqa. Anchatam admirakurqaniku Jehova Dios mikuyta, yakuta hinaspa imapas necesitasqaykuta tiempollanpi apachimuwasqankumanta. Yanapawarqakutaqmi hawkalla kanaykupaqpas.

Sasachakuykuna yapakuptinpas Diosmanta yachasqaykum kallpata quwarqaku. Iñiqmasinchikkunaqa mana wañuchisqa kanankupaqmi sapa kuti ayqikunanku karqa, chaywanpas Diospi hapipakuspankum hawkalla karqaku. Wakinkum niqkuraq chay guerraqa ‘llumpa-llumpay ñakariy punchawkunapi’ aguantanankupaq yanapananmanta. Punta apaqkunawan musullaraq kaqkunam iñiqmasinkuta yanapanankupaq mana manchakuspanku tukuyta ruwarqaku. Ayqikuq iñiqmasinchikkunaqa kuskam maypipas kaqku, chayasqanku lawkunapim Diosmanta willakuqku hinaspa montekunapi huñunakuykunata ruwaqku. Chaykunam iñiqmasinchikkunata yanaparqa hinalla aguantanankupaq. Mikuyta, pachata hinaspa imatapas aypuptiykum pachamantaqa Diosmanta willakunankupaq mañakuqku maletinta utaq carterata, chayqa sunquykumanmi chayarurqa. Guerrapi tukuyta pasasqankuraykum hinaspa llakisqa kasqankuraykum runakunaqa Diosmanta sumaq noticiakunataqa  kusikuywan uyariwaqku. Admirakuqkum testigokuna kusisqallaña kasqaykumanta. Iñiqmasinchikkunaqa kay tutayay mundopim achki hina kancharirqaku (Mat. 5:​14-16). Lliwman Diosmanta willakusqankuraykum guerrapi peleaqkunamanta wakinqa iñiqmasinchikkunaña karqaku.

Paul: Achka kutipim Liberia nacionmanta ayqinayku karqa. Kimsa kutipim kamas kutimurqaniku, iskay kutipim ichaqa watamantaña. Huk misioneram imayna sientekusqaykumanta kaynata nirqa: “Galaad escuelapim yachachiwarqaku imaña-haykaña kaptinpas tukuy sunqunchikwan Jehova Diosninchikpaq hinaspa iñiqmasinchikkunapaq tukuyta ruwanapaq, chaytamá ruwarqanchik. Chaymi chay sasa tiempopi iñiqmasinchikkunata saqiyqa anchata llakichiwarqaku”, nispa. Liberia nacionpa hichpan nacionkunallapi kasqaykuraykum chaypi iñiqmasinchikkunataqa hinalla yanapayta atirqaniku.

Anne: 1996 watapa mayo killanpim Paulwan hinaspa iskay iñiqmasinchikkunapiwan betelpa carronpi importante documentokunata aparqaniku. Chay documentokunatam llaqtamanta karupiraq pakanayku karqa. Chay ratopim kasqayku lawman peleaqkuna chayaramurqaku, hinaspam altokunaman baleaspanku sayarachiwarqaku, kimsaykutam bajarachiwarqaku hinaspam carrota apakurqaku Paultawan kuskata. Manam ima ruwaytapas atirqanikuchu. Ratollanmanmi runakunapa chawpinmanta Paul rikuriramurqa yawarllaña umayuq. Piensarqanikum balearusqankuta, ichaqa balearuptinkuqa manach puriyta atinmanchu karqa. Paytaqa hukkaqnin peleaq runam umanpi takaspan carromanta tanqaykusqa.

Qawarqanikum militarkunapa camionninman mancharisqallaña achka runakuna qispirusqankuta, hunta kasqankuraykum waqtallanmanña hapipakurqaniku. Carrota manejayta qallaykuptinmi yaqalla wichiykurqaniku. Sayananpaqmi ruegakurqaniku, ichaqa mancharisqallaña kaspanmi uyariwarqakupaschu. Chayna kaptinpas manam kacharikurqanikuchu. Mancharisqallaña hinaspa nanay-nanay cuerpoyuqmi chayarurqaniku.

Paul: Hawaykupi pachayuqllam karqaniku, chay pachaykuqa karqa qachallañam hinaspa llikillañam. Qawanakuspaykum ninakurqaniku: “Kayqaya antis kawsachkanchikraq”, nispa. Baleasqa helicopteropa waqtanpim puñurqaniku, chay helicopterom paqarintin apawarqaku Sierra Leona nacionman. Kusisqam karqaniku kawsasqaykumantaraq, ichaqa Liberiapi iñiqmasinchikkunamantam llakikurqaniku.

Anne: Sierra Leonapi betelmanmi chayarurqaniku, chaypiqa allintam cuidawarqaku. Ichaqa yuyariruqmi kani guerrapi tukuy ima pasasqaykuta. Tukuy punchawmi imapas pasarunanmanta qawan-qawanlla hinaspa mancharisqallaña kaq kani, sueñoyniypi kachkaymanpas hinam tukuy imapas rikchakuwarqa. Imapas mana allin pasaruwananmanta piensaspaymi tuta qunqayllamanta rikchariruq kani katkatatastin hinaspa sudaypa pampasqan. Chaymi qusay abrazaykuwaspan ñuqawan kuska Diosninchikta mañakuq. Takinchikkunatapas takiqmi kaniku hawkayaykunaykama. Nikuqmi kani: “Locayachkanichusmi, manañach misionera kaytapas atiymanchu”, nispay.

Manam qunqasaqchu Diosninchik imayna yanapawasqantaqa. Chay semanallam iskay revistata chaskirurqaniku. Hukninmi karqa 1996 watapi 8 de juniopaq ¡Despertad! qillqanchik, chaypim karqa “Qué hacer ante los ataques de pánico” niq yachachikuy. Chayta leeruspaymi entienderurqani ima pasawasqanta. Hukninñataqmi karqa 1996 watapi 15 de mayopaq La Atalaya qillqanchik, chaypim karqa “¿De dónde proviene su fuerza?” niq yachachikuy. Chay qillqapim rikurirqa rapran pakisqa pillpintucha, nirqam chayna kaspanpas hinalla pawayta hinaspa mikuyta atisqanmanta. Nirqataqmi ñuqanchikpas chay pillpintu hina mancharisqallaña utaq llakisqallaña kaspapas Diosninchikpa yanapakuyninwanqa hukkuna yanapayta atinanchikmanta. Chay yachachikuykunaqa necesitasqay tiempopi chayaramusqanraykum anchata yanapaykuwarqa (Mat. 24:45). Huñururqanitaqmi chaymanta rimaq yachachikuykunatapas hinaspaymi leeq kani. Tukuy chaykunam yanapawarqa allinña tarikunaypaq.

Paul: Liberia nacionman sapa kuti kutispaykuqa kusisqam tarikuq kaniku. 2004 watapaqqa 20 watañam chay nacionpi Diosninchikta servirqaniku. Manañam guerrapas karqañachu, betel wasitapas allichanankupaqmi tantiarurqaku. Chayna  kachkaptiykum qunqayllamanta niykuwarqaku huklaw nacionpiña yanapakunaykupaq.

Chayqa sasam ñuqaykupaqqa karqa. Liberia nacionpi iñiqmasinchikkunaqa aylluyku hinañam karqa, chaymi paykunata saqiytaqa mana munarqanikuchu. Ñawpaqtapas galaadman rinaykupaqqa familiaykutam saqirqaniku, chaypim cuentata qukurqaniku Diospa makinpi churakuptiykuqa pay bendeciwasqankumanta. Chayta yuyarispaykum Ghana nacionpi yanapakunaykupaq niykuwaptinku rirqaniku.

Anne: Waqakustinmi Liberia nacionmanta pasakurqaniku. Yuyaq hinaspa ancha yachayniyuq iñiqmasinchik Frankmi niwarqaku: “Ñuqaykutaqa qunqawanaykikuñam”, nispa. Chaymantam niwarqaku: “Yachanikum haykapipas mana qunqawanaykikuta. Ichaqa kunanmantaqa Ghanapi iñiqmasinchikkunatañam anchata kuyaspa yanapanaykichik. Chaypaqmi Jehova Dios kachasuchkankichik”, nispa. Chayna niwasqankuqa anchatam yanapawarqaku, ganaswanmi kachkarqaniku Ghana nacionpi iñiqmasinchikkunawan amistadta armanaykupaq.

Paul: Ghana nacionpi iñiqmasinchikkunawanqa chayllam allin amistadta armarurqaniku. Chaypiqa achkallay-achkam testigokunaqa kanku. Paykunapa Diosman sunqu kasqankuqa hinaspa paypi hapipakusqankuqa ancha qatipakunapaqmi karqa. Chaypi 13 wataña kachkaptiykum niykuwarqaku Kenia nacionpi betel wasipiña yanapakunaykupaq. Liberiapi hinaspa Ghanapi amistadniykumanta llakikuspaykupas chayllam Keniapi iñiqmasinchikkunawan amistadta armarurqaniku. Kunankamam Kenia nacionpi kachkaniku, kay hatun nacionpi runakunaqa Diosmanta yachaytam anchata munanku.

Anne: Achka watam llumpay sasachakuykunapi hinaspa mancharisqallaña tarikurqani. Guerrapi utaq peligrokunapi tarikuyqa qipakunamanmi unqurachiwachwan utaqmi llumpay llakisqallataña, mancharisqallataña kachiwachwan. Jehova Diosqa manamá chaykuna pasawananchiktaqa harkakunqachu. Balakunapa tuqyasqanta uyariptiyqa manchakuymantam makiykunapas susunkarun. Ichaqa yacharunim Jehova Diospi astawan hapipakuyta, payqa yanapawantaqmi iñiqmasinchikkunawanpas. Cuentatataqmi qukurqani Diospaq kaqkunata sapa punchaw ruwayninchik maypipas Diosta servisqanchikpi unay kanapaq anchata yanapawasqanchikta.

Paul: Wakinpim tapuwanku: “¿Gustasunkichikchu maymi kasqaykichik llaqta?”, nispa. Ima nacionpas sumaqmi, ichaqa qunqayllamantam guerrapas utaq imapas karunman. Ñuqaykuqa astawan kusisqaqa kaniku iñiqmasinchikkunata riqsispaykum, paykunaqa aylluyku hinam kanku. Mana huk nacionllamanta kaspaykupas hinaspa mana chaynalla uywasqa kaspaykupas llapallaykum chaynallata piensaniku. Maymanpas rispaykuqa piensaqmi kaniku chaypi kaq iñiqmasinchikkunata kallpanchayta, ichaqa paykunam astawanqa kallpanchaykuwaqku.

Maymanpas chayaruspaykuqa qawanikum iñiqmasinchikkunaqa kuyakuqllaña kasqankuta. Diosta servispanchikqa maymanña rispanchikpas iñiqmasinchikkunawanmi huk ayllu hinalla kanchik. Manam iskayrayanikuchu imaña kaptinpas Jehova Diospi hapipakuptiykuqa necesitasqayku tiempopi yanapawanankumanta (Filip. 4:13).