1. ¿Imaynatam Pablo qawarqa punta apaqkunapa yanapaqninkunata?

 SAPA congregacionpim punta apaqkunata yanapaqkunapa ruwasqankuqa ancha allin. Chayraykum apostol Pablopas Filipos llaqtapi iñiqmasinkunaman qillqaspan saludarqa punta apaqkunatapas chaynataq punta apaqkunapa yanapaqninkunatapas (Filip. 1:1). Chaywanmi yachanchik Pabloqa paykunatapas anchata valorasqanta.

2. ¿Imatam Luis nin punta apaqkunapa yanapaqnin kaspan imayna tarikusqanmanta?

² Achka bautizasqa qari iñiqmasinchikkunam musullaraq utaq yuyayniyuqña kaspankupas kusisqa kachkanku punta apaqkunapa yanapaqnin kaspanku. Diegom 18 watallanpiraq karqa punta apaqkunapa yanapaqnin kananpaq nombraptinku, Luisñataqmi karqa 50 masninpiña. Paymi nin: “Ñuqapaqqa ancha kusikuypaqmi punta apaqkunapa yanapaqnin kayqa. Astawanraqmi kusikuni lliw iñiqmasinchikkunapa kuyawasqankuta qawaspayqa”, nispa.

3. ¿Ima tapukuykunamantam kay yachachikuypi yachasun?

³ Qampas bautizasqa kaspaykiqa, ¿manachu munawaq punta apaqkunapa yanapaqnin kayta? ¿Imaraykutaq chaypaq kallpanchakuyta munanayki? Bibliapa nisqanman hinaqa, ¿imaynam kanayki punta apaqkunapa yanapaqnin kanaykipaq? Chaykunamanta manaraq yachachkaspayá puntata yachaykusun punta apaqkunapa yanapaqninkuna imakunata ruwanankumanta.

 ¿IMAKUNATAM RUWANKU PUNTA APAQKUNAPA YANAPAQNINKUNA?

4. ¿Imakunatam ruwanku punta apaqkunapa yanapaqninkuna? (Qawaytaq fotokunatapas).

⁴ Punta apaqkunapa yanapaqninkunaqa Diospa atiyninwanmi nombrasqa kanku punta apaqkunata congregacionpi yanapanankupaq. Wakinkum encargakunku Diosmanta willakunapaq territoriokunamanta hinaspa qillqanchikkunamanta. Achkataqmi yanapakunku huñunakunanchik wasita limpiaypipas chaynataq allichaypipas. Wakinkuñataqmi huñunakuyman hamuqkunata chaskinku hinaspa huñunakuyninchikpi takikunatawan videokunata churanku. Chaykunapi yanapakuspankupas astawanqa Jehova Diostam tukuy sunqunkuwan kuyanku, hinaspapas kamachikuyninkunaman hinam kawsakunku. Chaymantapas, iñiqmasinkutam anchata kuyanku (Mat. 22:​37-39). Chaynaqa, ¿imatam bautizasqa qari iñiqmasinchik ruwanan punta apaqkunapa yanapaqnin kananpaq?

5. ¿Imatam ruwanayki punta apaqkunapa yanapaqnin kayta munaspaykiqa?

⁵ Bibliapim niwanchik punta apaqkunapa yanapaqnin kanankupaq imayna kanankumantawan imakuna ruwanankumanta (1 Tim. 3:​8-10, 12, 13). Chaymi bibliapa chayna nisqanta estudiaspayki kasukunaykipaq kallpanchakunayki. Ichaqa, puntatam yuyaymananayki imarayku punta apaqkunapa yanapaqnin kayta munasqaykipi.

¿IMARAYKUTAQ PUNTA APAQKUNAPA YANAPAQNIN KAYTA MUNANAYKI?

6. ¿Imaraykum punta apaqkunapa yanapaqnin kayta munanayki? (Rimarimuytaq Mateo 20:28 nisqanmantapas, qawaytaq dibujotapas).

⁶ Señorninchik Jesucristotam qatipakunayki. Payqa taytanta hinaspa runamasinkunatam anchata kuyarqa. Chaymi humilde kaspan hukkunarayku imatapas ruwaq (leey Mateo 20:28; Juan 13:​5, 14, 15). Qampas hukkunata kuyasqaykirayku punta apaqkunapa yanapaqnin kayta munaptikiqa Jehova Diosmi yanapasunki (1 Cor. 16:14; 1 Ped. 5:5).

7. ¿Imanasqam pipas nombrasqa kananpaqqa hatuntukuqqa utaq kikillanpaq munaqqa mana kananchu?

⁷ Runakunaqa imapas ruwasqankumanta alabakuq runakunatam admiranku. Jehova Diospa llaqtanpim ichaqa mana chaynachu. Jesus hina runamasinta kuyaq iñiqmasinchikqa manam hukkunata kamachiq kaytaqa utaq riqsisqa kaytaqa piensanchu. Hukkunamanta aswan allin kasqanta piensaq nombrasqa kaspanqa manamá Diospa ovejachankunarayku  lliw imapipas yanapakuytaqa munanqachu. Hatuntukuq kasqanraykum piensanqa congregacionpi wakin ruwaykunaqa paypaq hina mana kasqanta (Juan 10:12). Diosqa manamá bendecinqachu hatuntukuq hinaspa kikillanpa munasqanta maskaq runataqa (1 Cor. 10:​24, 33; 13:​4, 5).

8. ¿Imatam Jesus nirqa apostolninkunata?

⁸ Wakinpiqa Jesuspa amistadninkunapas kikillankupaq munaq kaspankum imapaqpas nombrasqa kayta munaqku. Huk kutipim Santiagowan Juan Jesusta mañakurqaku kamachiqña kaspan iskay lawninpi tiyaykachinanpaq. Chayna kikillankupaq munaq kasqankumanta felicitananmantaqa 12 apostolninkunatam Jesusqa nirqa: “Qamkunamanta pipas riqsisqa kayta munaspanqa qamkunapa serviqnikichikmi kanan. Qamkunamanta pipas puntapi kayta munaspanñataqmi llapallaykichikpa serviqnikichik kanan”, nispa (Mar. 10:​35, 43, 44). Hukkunata yanapanankurayku punta apaqkunapa yanapaqnin kayta munaspankuqa congregacionpim allinta yanapakunqaku (1 Tes. 2:8).

¿IMATAM RUWAWAQ HUKKUNATA ASTAWAN SERVIYTA MUNANAYKIPAQ?

9. ¿Imatam ruwawaq hukkunata astawan serviyta munanaykipaq?

⁹ Yachanikum Jehova Dios kuyasqaykita hinaspa iñiqmasikikunata serviy munasqaykitaqa. Chaywanpas manapaschá punta apaqkunapa yanapaqnin kaytaqa munankichu achka ruwayniyuq kasqankuta yachasqaykirayku. Chaynaqa, ¿imatam ruwawaq iñiqmasikikunata astawan serviyta munanaykipaq? Paykunata yanapay ancha kusikunapaq kasqanpim piensawaq. Jesuspas kaynatam nirqa: “Imapas quqmi aswan kusisqaqa imapas chaskiqmantaqa”, nispa (Hech. 20:35). Arí, Jesusqa hukkunata servispanmi kusisqa kawsakurqa. Qampas chayta ruwaspaykiqa kusisqam kawsakunki.

10. ¿Imaynatam yachanchik Jesus hukkunata servispan kusisqa kasqanmanta? (Rimarimuytaq Marcos 6:​31-34 nisqanmantapas).

¹⁰ Jesuspa imakuna ruwasqanta yuyarispam cuentata qukusun hukkunata servispan kusisqa kasqanmanta (leey Marcos 6:​31-34). Huk kutipim Jesuswan apostolninkunaqa pisipasqa kasqankurayku mana runapa kasqanman samariq rirqaku. Ichaqa achkallaña runakunam yachachisqanta uyariyta munaspanku paykunatapas llallirurqakuraq. Jesuswan apostolninkunaqa pisipasqallañam karqaku, ‘mikunankupaqpas tiemponkum mana karqachu’. Chaymi Jesusqa manaña yachachinanpaq ninman karqa utaqmi ratolla yachaykachispan pasakunankupaq ninman karqa. Ichaqa runakunata kuyasqanraykum ‘tukuy imamanta yachachirqa tardeykuqkama’ (Mar. 6:35). Chaytaqa ruwarqa manam pipas obligasqanraykuchu, aswanqa ‘runakunata llakipayasqanraykum’. Arí, kuyasqanraykumá yachachiyta munarqa, hukkunata servispanmi anchata kusikurqa.

11. ¿Imatam Jesus ruwarqa uyariqninkunata yanapananpaq? (Qawaytaq dibujotapas).

¹¹ Jesusqa manam yachachispallanchu hukkunataqa servirqa, aswanqa necesitasqankuta quspanpas yanaparqam. Chaymi chay kutipi mikuyta achkayarachispan qatiqninkunaman qurqa runakunaman aypunankupaq (Mar. 6:41). Chaykunata ruwaspanmi yachachirqa hukkunata servinankupaq. Qawachirqataqmi imapas necesitasqankupi hukkunata yanapay ancha allin kasqantapas. Chaynatam ruwanku kunan tiempopi punta apaqkunata yanapaqkunapas. Apostolkunaqa mayna kusisqachá tarikurqaku Jesus milagrota ruwaptin mikuyta aypuypi yanapakuspankuqa. Chay punchawmi “llapallanku mikurqaku saksanankukama” (Mar. 6:42). Jesusqa manamá chay kutillapichu munasqanta saqispan hukkunata servirqa, aswanqa wañukunankamam tukuyta ruwarqa hukkunata yanapananpaq (Mat. 4:23; 8:16).  Payqa anchatam kusikuq hukkunata yachachispanqa hinaspa imapas necesitasqankupi yanapaspanqa. Qampas hukkunata yanapanaykirayku punta apaqkunapa yanapaqnin kayta munaspaykiqa ancha kusisqam tarikunki.

12. ¿Imanasqam mana piensananchikchu hukkunata yanapanapaq imatapas mana ruway yachaq kasqanchikta?

¹² Hukkunata yanapanaykipaq imatapas mana ruway yachaq kasqaykita piensaspaykiqa amayá hukmanyaychu. Sumaq sunquyuq kasqaykiraykum congregacionpi yanapakuytaqa atiwaq. Chaypaqmi astawan yanapasunki Diosta mañakuyniki hinaspa 1 Corintios 12:​12-30 nisqanta leeyniki. Chay textowanmi Pabloqa entiendechiwanchik qampas congregacionnikipi ancha valorniyuq kasqaykita. Chaymi punta apaqkunapa yanapaqnin kanaykipaq manaraq listo kaspaykiqa astawan kallpanchakunayki Diosta servinaykipaq hinaspa iñiqmasikikunata yanapanaykipaq. Punta apaqkunaqa imata yachasqaykiman hinam imapipas yanapakunaykipaqqa nisunki (Rom. 12:​4-8).

13. ¿Imatam yuyarinanchik punta apaqkunapa yanapaqnin kanapaq requisitokunamanta?

¹³ ¿Imaraqtaq yanapasunki punta apaqkunapa yanapaqnin kanaykipaq? Yuyarinaykim chaypaq yaqa lliw requisitokunata llapallanchik cumplinanchikta. Arí, Diosta lliw serviqkunam payman asuykunanchik, hukkunata yanapaspa kusisqa kananchik hinaspa Diospa munasqanman hina kawsakuspa qatipakunapaq kananchik. Chaynaqa, ¿imakunapitaq bautizasqa qarikunaqa kallpanchakunanku?

¿IMAKUNAPIM ASTAWAN KALLPANCHAKUNAYKI?

14. ¿Imaynam kanan punta apaqkunapa yanapaqnin? (Rimarimuytaq 1 Timoteo 3:​8-10, 12 nisqanmantapas).

¹⁴ Punta apaqkunapa yanapaqnin kanapaq requisitokunamantam rimachkan 1 Timoteo 3:​8-10, 12 (leey) nisqanpi. Punta apaqkunapa yanapaqninqa kanan ‘kamachisqankuta ruwaqmi’ hinaspa respetanam. Chaywanqa manam nichkanchik mana asiriq kananmantachu nitaq imawanpas mana kusirikunanmantachu (Ecl. 3:​1, 4). Kananqa imapas kamachisqankuta allinta ruwaqmi hinaspa confiana runam. Chayna kaptinqa lliw iñiqkunam respetanqaku.

15. ¿Ima ninantaq ‘mana iskay-kimsa rimaq kayqa’? ¿Ima ninantaq ‘mana allinkunata ruwaspa qullqita ganakuyta munaq kayqa’?

¹⁵ ‘Manam iskay-kimsa rimaqchu kanan’. Chaywanqa nichkan imam kaqta rimaq, mana llullakuq hinaspa confianapaq kananmantam. Chaymantapas nisqanta cumpliqmi kanan, manamá imapipas pitapas engañananchu (Prov. 3:32). ‘Manataqmi mana allinkunata  ruwaspa qullqita ganakuyta munaqchu kanan’. Huk rimaypiqa negociota ruwaspanpas utaq iñiqmasinchikkunapa qusqanku qullqiwanpas honradom kanan. Manataqmi iñiqmasinkunawan congregacionpi amistad kasqantaqa servichikunanchu qullqita ganananpaqqa.

16. (1) ¿Ima ninantaq ‘vinota mana llumpay tomaq kayqa’? (2) ¿Ima ninantaq ‘allin concienciayuq’ kayqa?

¹⁶ ‘Vinota mana llumpay tomaqmi kanan’. Huk rimaypiqa manam sinkakuqchu kanan nitaqmi sapa kuti trago tomaq kasqanwanchu riqsisqa kanan. Chaymantapas Diospa kamachikuyninkunaman hina kawsakusqanraykum “allin concienciayuq” kanan. Llapallanchikmi pantaq kanchik, chaywanpas Dioswan kuyachikunapaq kallpanchakuspaqa ‘allin concienciayuqmi’ kasun.

17. ¿Imaynatam punta apaqkuna yachanmanku musukuna yanapakunankupaq hina allin utaq mana allin kasqankuta? (Rimarimuytaq 1 Timoteo 3:10 nisqanmantapas, qawaytaq fototapas).

¹⁷ Chaymantapas ‘yanapakunanpaq hina allin utaq mana allin kasqanmi puntataqa qawakunan’. Chaymi qari iñiqmasinchikkunata wakinpi ninmanku imamantapas encargakunanpaq, chaynapi confianza runa kasqanmanta yachanankupaq. Imatapas ruwaspanqa Diospa llaqtanpi chaskisqan kamachikuykunatawan consejokunatam kasukunan. Allintataqmi yachanan imata ruwananmanta hinaspa chayta haykapi tukunanmanta. Imapas nisqankuta allinta ruwananpaq kallpanchakuptinqa iñiqmasinkunam cuentata qukunqaku astawan yanapakuy munasqanta. Punta apaqkuna, piensaychik astawan yanapakunankupaq pikunata yanapanaykichikpi (leey 1 Timoteo 3:10). ¿Kachkanchu congregacionnikipi bautizasqa musukuna utaq warmallaraq kaqkuna? ¿Allintachu estudianku bibliatawan qillqanchikkunata? ¿Sapa kutichu huñunakuykunapi rimarinku hinaspa willakuq lluqsinku? Chayna kaptinqa hayka watayuq kasqankuman hinam hinaspa imatapas ruwayta yachasqankuman hinam niwaqchik imapipas yanapakunankupaq. Chayta ruwaspaykichikmi qawankichik yanapakunankupaq allin utaq mana allin kasqankuta. Allin yachachisqa musukunaqa yaqa 18 watanpi kachkaspankuqa punta apaqkunapa yanapaqninñam kanmanku.

18. ¿Imatam punta apaqkunapa yanapaqninqa ruwanman ‘hukkunapa mana tumpasqan kananpaq’?

¹⁸ Punta apaqkunapa yanapaqninqa ‘imamantapas hukkunapa mana tumpasqataqmi kanan’. Huk rimaypiqa manam ima hatun huchatapas ruwananchu. Wakinpim imamantapas  yanqa tumpasqa kachwan. Chaynam pasarqa kikin Jesustapas, chaymi qatiqninkunatapas nirqa chayna yanqamanta tumpasqa kanankumanta (Juan 15:20). Chaywanpas Jesusta qatipakuspanku allin ruwaq iñiqmasinchikkunaqa congregacionpi allin qawasqam kanmanku (Mat. 11:19).

19. ¿Imaynatam qariqa “huk warmiyuqlla” kananpaq bibliapa kamachisqanta kasukunman?

¹⁹ Iñiqkunapi punta apaqkunapa yanapaqninqa casarasqa kaspanqa ‘huk warmiyuqllam kanan’. Jehova Diospa munasqantam respetanan, payqariki qallariymantapacham munarqa qariqa huk warmiyuqlla kananta (Mat. 19:​3-9). Arí, iñiqkunaqa manamá hukwanqa pierdekunankuchu (Heb. 13:4). Chaywanpas, ¿imatawanraqmi ruwanan casarasqa qariqa? Warmillantam tukuy sunqunwan kuyanan, hinaspapas manam huk warmikunataqa munapayananchu utaq warminmanta astawanqa atiendenanchu (Job 31:1).

20. ¿Imaynatam qariqa wasinpi kaqkunata allinta uywanman?

²⁰ Chaymantapas punta apaqkunapa yanapaqninqa kanan ‘wasinpi kaqkunatawan churinkunata allintapuni uywaqmi’. Chaymi sapa semana ayllunwan Jehova Diosta yupaychanan. Kallpanchakunantaqmi warminwan hinaspa churinkunawan Diosmanta sapa semana willakunanpaqpas. Churinkunatapas yanapanantaqmi Dioswan allin amistad kanankupaq (Efes. 6:4). Familianta allinta cuidaq qariqa iñiqmasinkunatapas allintam cuidanqa (tupachiy 1 Timoteo 3:5 nisqanwan).

21. ¿Imatam ruwanayki manaraq punta apaqkunapa yanapaqnin kaspaykiqa?

²¹ Punta apaqkunapa yanapaqnin manaraq kaspaykiqa Jehova Diosta mañakuy hinaspa kay yachachikuypa nisqankunata estudiay. Punta apaqkunapa yanapaqnin imayna kananmanta estudiay hinaspa chayta kasukunaykipaq kallpanchakuy. Piensariy Jehova Diosta hinaspa iñiqmasinchikkunata maynata kuyasqaykipi. Kallpanchakuytaq paykunata servinaykipaq astawan munanaykipaqpas (1 Ped. 4:​8, 10). Chaynapim yachanki iñiqmasinchikkunata yanapayqa ancha kusikunapaq kasqanta. Jehova Diostam mañakuniku punta apaqkunapa yanapaqnin kanaykipaq anchata kallpanchakusqaykipi Dios bendecisunaykipaq (Filip. 2:13).