1923 watamantapacham Diospa llaqtanpi punta apaqkuna ingles rimaypi Willakuq qillqapi ruwachirqaku sapa semanapaq bibliapa huk textonmanta yachachikuyta. Chayqa yanaparqam iñiqmasinchikkuna huk sunqulla Diosta yupaychanankupaq. Chay textomantam yachaqku Diosta mañakuna, takipuna hinaspa Diosmanta willakuna sutiyuq huñunakuypi. Chaymantapas iñiqmasinchikkunaqa huk almanaquetam ruwarurqaku, chaypim qillqarqaku sapa semanapaq huk textota, sapa punchawpaqñataq huk takita. Chay takitam sapankupi estudiaspanku utaq ayllunkuwan Diosta yupaychaspanku takiqku.

Sapa huñunakuypim iñiqmasinchikkunaqa Diosmanta imayna willakusqankumanta willakuqku, Diosta agradecekuqku, takiqku utaq mañakuqku. 15 watachanpi kachkaspan 1923 watapi bautizakuq iñiqmasinchik Eva Barneymi nirqa: “Pipas willakuyta munaspanqa sayarispanmi kaynata nispa qallaykuq: ‘Señorninchiktam anchata agradecekuni tukuy imapi yanapawasqanmanta’, nispa. Wakin iñiqmasinchikkunaqa rimariytam gustaqku”, nispa. Evaqa nirqataqmi: “Yuyarinim kuyasqa iñiqmasinchik Godwinta, payqa yuyaqñam karqa hinaspapas tukuy imamantam señorninchikta agradecekuyta munaq. Wakinpim ichaqa warmichan cuentata qukuq puntamanta yachachimuq iñiqmasinchik chayllataña rimananta munasqanta, chaymi saconpa patanta chutatyaq, hinaptinmi iñiqmasinchik Gotwinqa tiyaykuqña”, nispa.

Diosta mañakuna, takipuna hinaspa Diosmanta willakuna huñunakuytaqa killapim huk kutillata ruwaqku. 1923 watapi 1 abrilpaq lluqsimuq ingles rimaypi Willakuq qillqapim nirqa: “Huñunakuspaykichikqa Diosmanta willakusqaykichikpi imakuna pasasusqaykichikmantam yaqa chawpi huñunakuykama willanakunaykichik hinaspa kallpanchanakunaykichik. Chayta ruwaspaykichikqa llapallaykichikmi aswan allin amistad kankichik”, nispa.

Chay huñunakuykunam anchata yanaparqa Canada nacionmanta iñiqmasinchik Charles Martinta, payqa 19 watanpim karqa, hinaspapas Diosmanta willakuqñam karqa. Paymi nirqa: “Iñiqmasinchikkunapa willakusqankuta uyarispaymi yacharqani ñuqapas Diosmanta imayna willakuyta. Sapa kutim iñiqmasinchikkunaqa willakuqku runakunawan imamanta rimasqankuta. Chayta uyarisqaymi ñuqatapas yanapawarqa imaynata willakunaypaq chaynataq mana uyariyta munaptinku ima ninaypaq”, nispa.

Iñiqmasinchikkunatam kallpanchaqku wakin punchawqa llapallanku Diosmanta willakuq lluqsinankupaq. Chayqa yanaparqam huk sunqulla kanankupaq.  1923 watapi 1 abrilpaq ingles rimaypi Willakuq qillqapim nirqa: “Diosmanta willakuypi llapallanchik kanapaqmi kay watapa mayo killapa qallariynin martes punchawpi llapallanchik Diosmanta willakuq lluqsisun. Chaynatam sapa killapa qallariynin martes punchawpi willakuna kanqa. Sapa hawaqpi huñunakuqkunam chay punchawqa hatunpas-uchuypas Diosmanta willakunanchik kanqa”, nispa.

Musu-sipaskunapas Diosmantam willakurqaku. 1923 watapi 16 watanpi kaq iñiqmasinchik Hazel Burfordmi nirqa: “Bulletin a sutiyuq qillqapim karqa Diosmanta imaynata willakuyta qallarinapaq. Chaypi nisqantam umallamanta yachanayku karqa. Ñuqaqa abueloypiwanmi sapa kuti kusisqallaña Diosmanta willakuq kani. Huk iñiqmasinchikmi ichaqa mana munarqachu Diosmanta willakunayta. Chay tiempoqa wakin iñiqmasinchikkunam piensarqaku musu-sipaskunaqa Diosmanta manaraq willakunankuta. Ichaqa bibliapiqa rimarqañam ‘musukunapas, sipaskunapas’ Jehova Diosta hatunchay atinankumanta”, nispa (Sal. 148:​12, 13). Hazelqa chay yuyaq iñiqmasinchik mana munaptinpas manam hukmanyarqachu, aswanqa hinallam willakurqa. Chaymi watakuna pasayta Galaad escuelaman rirqa. Chaymantam niykurqaku Panama nacionpi misionera kaspa Diosmanta willakamunanpaq. Tiempopa pasasqanman hinam ichaqa bibliapa nisqanta allinta entiendesqankurayku manaña harkakurqakuñachu musu-sipaskunapas Diosmanta willakunankutaqa.

Hatun huñunakuykunapas iñiqmasinchikkunatam yanaparqa huk sunqulla kanankupaq. Chay hatun huñunakuyman riqkunam llapallanku Diosmanta willakuq lluqsiqku. Chaynam karqa Canada nacionpa Winnipeg llaqtanpi. Chay hatun huñunakuyman riqkunatam kallpancharqaku marzo killapa 31 punchawninpi llapallanku Diosmanta willakuq lluqsinankupaq. Chayta ruwaspankum Diosmanta yachay munaq achka runakunata tarirqaku, chaymi kusisqallaña kutimuqku. Hina chay watapim agosto killapa 5 punchawninpi Winnipeg llaqtapi kaqmanta hatun huñunakuy karqa. Chaymanmi rirqaku yaqa 7.000 runakuna. Chay watapi hinaqa manamá ñawpaqtaqa Canada nacionpiqa achkallaña runaqa hatun huñunakuymanqa rirqachu.

1923 watapim agosto killapa 18 punchawninmanta 26 punchawninkama Los Angeles llaqtapi hatun huñunakuy karqa. Semanakuna ñawpaqtam iñiqmasinchikkuna periodicokunapi churachirqaku chay hatun huñunakuy kananmanta. Chaymantapas 500.000  masnin invitaciontam aypurqaku. Letrerokunatapas laqarurqakum carronkuman hinaspa huk carrokunaman.

Chay huñunakuypim agosto killapa 25 punchawninpi iñiqmasinchik Rutherford yachachirqa “Ovejakunamantawan cabrakunamanta” niq yachachikuyta. Chaypim nirqa ovejakunawan tupachisqa runakunaqa allin sunquyuq runakuna kasqanta hinaspa kay allpa pacha sumaq huerta kaptin chaypi kawsakunankumanta. Chaymantapas huk documentotam leerqa. Chay documentopim nirqa cristianotukuqkunaqa mana allinkuna ruwasqankuta, chaymi allin sunquyuq runakunata kallpancharqa ‘hatun babiloniamanta’ utaq pantay religionmanta lluqsikunankupaq (Apoc. 18:​2, 4). Chaymanta qipatam chay documentopa nisqanta taksa qillqanchikpi hurqumurqaku, hinaspam enteron allpa pachapi waranqantinta aypurqaku.

Chay hatun huñunakuypa tukupaynin punchawmi 30.000 masnin runakuna uyarirqaku iñiqmasinchik Rutherfordpa kayna yachachikuyninta: “Lliw nacionkunam Armagedonpaq kachkanku. Kay tiempopi kawsakuq millonnintin runakunañataqmi mana haykapipas wañunqakuchu” niqta. Chay huñunakuyman achkallay-achka runakuna hamunanta yachaspankum iñiqmasinchikkunaqa Los Angeles llaqtapi chayllaraq qispichisqa estadiota arriendarurqaku. Lliw yachachikuykunata allinta uyarinankupaqmi iñiqmasinchikkunaqa chay estadiopi kaq chayllaraq lluqsimuq parlantekunata servichikurqaku. Achka runakunataqmi chay yachachikuykunataqa radiontakamapas uyarirqaku.

1923 watapim Africa, Europa, Sudamerica lawkunapi hinaspa India nacionpipas iñiqmasinchikkunaqa astawanraq Diosmanta willakurqaku. India nacionniyuq iñiqmasinchik Adavimannatu Josepmi yanapakurqa hindi, tamil, telugu hinaspa urdu rimaykunapi qillqanchikkuna ruwaypi. Payqa casarasqam karqa, hinaspapas suqta churiyuqmi karqa.

Sierra Leonapi yachaq iñiqmasinchik Alfred Josep hinaspa Leonard Blackman Estados Unidospi Betel wasiman cartata apachirqaku yanapakuyta mañakuspa. 1923 watapi abril killapa 14 punchawninpi ima pasasqanmantam Alfred willakun: “Chay sabado punchawmi tutaña huk iñiqmasinchik qayaramuwarqa”, nispa. Chay iñiqmasinchiksi nisqa: “¿Qamchu betel wasiman cartata apachimurqanki Diosmanta willakuqkuna nacionnikiman hamunanpaq?”, nispa. Iñiqmasinchik Alfredñataqsi nisqa “arí, ñuqam” nispa. Hinaptinsi payñataq nisqa “ñuqatam kachamuwarqaku, sutiymi Wiliam Brown” nispa. Iñiqmasinchik Wilianqa chayllaraqmi chayaramurqa Caribe lawmanta señoranpiwan hinaspa iskay warmi churichanpiwan. Churinkunapa sutinmi karqa Louise hinaspa Lucy.

Iñiqmasinchik Alfredqa nirqataqmi: “Paqarintin tempranom sapa semana ruwasqaykuman hina Leonardwan bibliata estudiachkarqaniku, hinaptinmi wasiy punkupi rikurirurqa iñiqmasinchik Wiliam Brown. Payqa Diosmanta willakuytam anchata munarqa,  chaymi paqarintillan discurso ruwayta munarqa”, nispa. Manapas killapim iñiqmasinchik Wilianqa apasqan qillqata lliwta aypukuyta tukururqa. Chaymantam apachimurqaku 5.000 masnin libronchikkunata, chaytapas ratullam tukurachirqa. Wiliamtaqa runakunaqa riqsiqku manam libro rantikuq kasqanwanchu. Payqa wañukunan punchawkamam yachachinanpaqqa bibliata astawan servichikuq, chaymi paytaqa riqsiqku “Bibliamanta rimaq Brown” nispa.

Chaymantapas, chay wataqa Alemania nacionpi Barmen llaqtapi betel wasim manaña haypakurqachu achka ruway kasqanrayku. Hinaspapas uyarirurqakum Francia nacionniyuq soldadokuna manapas unaymanta chay llaqtata munaychakunankuta. Chaymi iñiqmasinchikkunaqa Magdeburgo llaqtapi hatun wasita tarirurqaku, hinaspam piensarurqaku chaypiña qillqanchikkunata ruwanankupaq. Junio killapa 19 punchawninpim chay betel wasipi yachaq iñiqmasinchikkunaqa tukuy imankuta chaynataq qillqakuna ruwananku maquinata aparikuspa Magdeburgo llaqtapi betel wasimanña astakurqaku. Estados Unidospi betel wasimanmi willarqaku astakuyta tukusqankumanta. Chaymanta huk punchaw pasayllatam periodicokunapi willakuy karqa Barmen llaqtata Francia nacion munaychakurusqanmanta. Iñiqmasinchikkunaqa cuentatam qukururqaku imapas ruwasqankupi Jehova Dios bendecisqanta chaynataq waqaychasqantapas.

Brasil nacionpiñataqmi iñiqmasinchik George Young yaqa llapallan llaqtakunapi Diosmanta willakurqa. Chaymantam Betel wasita qallarichirqa, hinaspam ruwayta qallaykurqa portugues rimaypi Willakuq qillqanchikta. Iskay-kimsa killakuna pasayllatam 7.000 masnin qillqanchikkunata aypururqa. Chaymantapas Sara Ferguson sutiyuq warmitam bautizakunanpaq yanaparqa. Payqa 1899 watamantapacham ingles rimaypi Willakuq qillqanchikta leerqa, yaqa 24 wataña. Ichaqa manam pipas yanapaykurqachu bautizakunanpaq. Iñiqmasinchikpa chayasqanmanta iskay-kimsa killakuna qipallatam Sarawan tawa wawankunaqa bautizakururqaku.

1923 watapi diciembre killapa 15 punchawninpim ingles rimaypi Willakuq qillqanchikpi rimarqa huñunakuyninchik, Diosmanta willakuyninchik chaynataq hatun huñunakuyninchik imayna kananpaq cambiokuna ruwasqankuqa allin kasqanta. Chay Willakuq qillqanchikpim nirqa: “Sutillam qawakun maypiñapas huñunakuq iñiqmasinchikkunapa huk sunqulla kasqankuqa […]. Peleananchikpaq Diospa tukuy ima quwasqanchikwan churakuspayá kay watapas Jehova Diosninchikta tukuy sunqumanta kusisqa servisun”, nispa.

1924 wataqa mana qunqanapaq watam karqa ñawpaq iñiqmasinchikkunapaqqa. Estados Unidospi Brooklyn betel wasipi iñiqmasinchikkunam Staten Island lawpi achka killakunaña musuq betel wasita ruwachkarqaku. 1924 watapa yaqa qallariynin killakunallam chay musuq betel wasita qispirachirqaku. Chay musuq betel wasikunapi tukuy ima ruwasqankuqa anchatam yanapakurqa lliw iñiqmasinchikkuna huk sunqulla kanankupaq hinaspa mana haykapipas piensasqankuman hinam Diosmanta willakunankupaq.