1, 2. (1) ¿Imakunatam kikinchikmanta iskayrayasqanchikrayku nikuchwan? (2) ¿Imamantam kay yachachikuypi yachasun?

 LLAPANCHIKMI wakinpiqa imamantapas iskayrayanchik. Ichapas huk musu Diospa kuyasqan kasqanmanta iskayrayasqanrayku bautizakunanpaq mana tantiakunmanchu. Huk iñiqmasinchikñataqmi familianta mantienenanpaq qullqin mana haypasqanrayku piensanman: “¿Allintachu tantiarqani? Musullaraq kachkaspay astawan llamkakuyman karqa Diosta servinaymantaqa, hinaspaqa manach kaynachu kachkayman karqa”, nispa. Yuyaq iñiqmasinchikñataqmi ñawpaqta hina manaña imatapas ruwasqanrayku iskayrayanman Diospaq valorniyuq kasqanmanta. Ñuqanchikpas yaqapaschá haykapipas kaynakunata nikurqanchik: “¿Jehova Diosqa ñuqamanta preocupakunchu? ¿Allinniypaqchu munasqayta saqispa Diosta servinayrayku tukuy ima ruwasqaykuna? ¿Hinallachu Diospaq valorniyuq kani?”, nispa.

² Tukuy chaykunamanta iskayrayaspaqa manaña tukuy sunquwan Diosta servispam paymanta karunchakuruchwan. Chaymi kay yachachikuypi yachasun Dios ñuqanchikmanta mana preocupakusqanta piensaptinchik, ñawpaqpi tantiakusqanchik mana allin kasqanta piensaptinchik utaq Diospaq manaña valorniyuq kasqanchikta piensaptinchik biblia imayna yanapawananchikmanta.

¿IMATAM RUWACHWAN MANA ISKAYRAYANAPAQ?

3. ¿Imatam ruwananchik imamantapas iskayrayaspaqa?

³ Imamantapas iskayrayaspaqa Diospa palabrantam allinta  estudiananchik. Allinta estudiaspaqa Jehova Dioswan astawan kuyachikuspam paypi ‘anchata hapipakusun’ (1 Cor. 16:13).

4. 1 Tesalonicenses 5:21 nisqanman hinaqa, ¿imatam ruwachwan tukuy imamanta allinta yachanapaq?

⁴ (Leey 1 Tesalonicenses 5:21). Bibliam niwanchik: “Tukuy imamantayá allinta yachaychik”, nispa. Chaypaqqa imayna piensasqanchiktam bibliapa nisqanwan tupachinanchik. Chaynaqa, ¿imatam ruwanman paymanta Dios preocupakusqanmanta iskayrayaq musuqa? Manaña iskayrayananpaqqa bibliatam allinta estudianan Diospa ima piensasqanta yachananpaq.

5. ¿Imatam ruwananchik Diospa rimapayawasqanchikta “uyarinapaq”?

⁵ Diosqa palabran bibliawanmi rimapayawanchik. Chaymi bibliata leespaqa rimapayawasqanchikta “uyarichkanchik”. Ichaqa manam leeyllachu-leenanchik, aswanqa imapas llakichiwaqninchik kaqkunamanta textokunatam maskananchik, hinaspapas chaykunata tarinapaqqa qillqanchikkunapim maskachwan (Prov. 2:​3-6). Ancha allintaqmi Jehova Diosta mañakuyninchikpas, chaynapi necesitasqanchik yachachikuykunata tarinapaq yanapawananchikpaq. Chay yachachikuykunata estudiaspam maskananchik imayna tarikusqanchikpi yanapawaqninchik textokunata hinaspa consejokunata. Anchatataqmi yanapawasun ñuqanchik hina tarikuq ñawpaq tiempopi Diospa serviqninkunamanta bibliapi yachayninchikpas.

6. ¿Imaynatam huñunakuykuna yanapawasun imamantapas manaña iskayrayanapaq?

⁶ Huñunakuykunaman rispanchikpas Jehova Diostaqa “uyarinchikmi”. Sapa semana riptinchikqa yaqapaschá mayqan yachachikuypas utaq iñiqmasinchikkunapa ima rimarisqankupas imamantapas manaña iskayrayanapaq yanapawasun (Prov. 27:17). ¿Imakunamantam wakinpi iskayrayachwan? ¿Imakunam iskayrayaptinchik yanapawachwan? Qatiqninpiyá chaykunamanta yachaykusun.

“¿PREOCUPAKUNCHU ÑUQAMANTA DIOS?”

7. ¿Imatam haykapillapas nikurqanchik?

⁷ Yaqapaschá haykapillapas nikurqanchik: “¿Preocupakunchu ñuqamanta Dios?”, nispa. Mana ancha valorniyuqpaq hapikuspanchikqa piensarqanchikpaschá tukuy ima unanchaqpa amistadnin kayta mana atisqanchikta. Yaqapaschá kamachiq Davidpas chaynata piensarqa. Payqa anchatam admirakurqa wañuqlla runakunamanta Diospa preocupakusqanmanta. Chaymi nirqa: “Jehova Dioslláy, ¿imataq runaqa yuyanaykipaqqa? ¿Imataq wañuqlla runapa churinqa payta nanachikunaykipaqqa?”, nispa (Sal. 144:3). Dios imayna qawawasqanchikmanta yachanapaqyá bibliapa nisqanta yachaykusun.

8. 1 Samuel 16:​6, 7, 10-12 nisqanman hinaqa, ¿imatam Jehova Diosqa sapa runapi qawan?

⁸ Bibliam willawanchik hukkunapaq mana valorniyuq runakunamantapas Jehova Diosqa preocupakusqanta. Huk kutipim Samuelta kacharqa Jeseypa wasinta rispan churinkunamanta hukninta Israel nacionpa kamachiqnin kananpaq churananpaq. Hinaptinmi Jeseyqa qanchis churinkunata Samuelman pusamurqa. Sullka kaq Davidtam ichaqa mana pusamurqachu. a Chaywanpas Diosqa paytam kamachiq kananpaqqa akllarurqa  (leey 1 Samuel 16:​6, 7, 10-12). ¿Imanasqa? Allin sunquchayuq kasqantam qawarqa, chaymi yacharqa Diospa munasqanman hina kawsakuy munasqanta.

9. ¿Imanasqam manapuni iskayrayasunchu ñuqanchikmanta Dios preocupakusqanmanta? (Qawaytaq fototapas).

⁹ Jehova Diosqa ñuqanchikmanta preocupakusqanraykum allinta kawsakunapaq yachachiwanchik (Sal. 32:8). ¿Manachu chaypaqqa imayna kasqanchiktawan imakuna necesitasqanchikta allinta yachanan? (Sal. 139:1). Yachachiwasqanchikta kasukuspaqa allinmi kawsakusun, chayta qawaspam manapuni iskayrayasunchu ñuqanchikmanta Dios preocupakusqanmanta (1 Cron. 28:9; Hech. 17:​26, 27). Diosqa yachanmi paypaq tukuy ima ruwasqanchikta hinaspa allin sunquyuq kasqanchikta (Jer. 17:10). Chaymi anchata kuyawasqanchikrayku amistadnin kanapaq niwanchik (1 Juan 4:19).

“¿ALLINCHU KARQA ÑAWPAQPI TANTIAKUSQAYKUNA?”

10. ¿Imatam nikuchwan Diosta astawan servinapaq ñawpaqpi tantiakusqanchikta yuyarispa?

¹⁰ Jehova Diosta astawan serviyta munasqanchikraykuchá wakiqninchikqa allin llamkayta utaq allin negociota saqirqanchik. Ichaqa qullqilla maskayman qukuruq riqsinakusqanchikkuna allin kawsakusqankupaqchá rikchakapuwachwan. Chaymi nikuchwan: “¿Allinpaqchu karqa munasqayta saqispa Dios serviyta puntapi churanaypaq tantiakusqay? ¿Icha wakin runakuna hina tantiakuspaychu aswan allin kawsakuchkayman karqa?”, nispa.

11. ¿Imanasqam Salmos 73 capitulota qillqaqqa hukmanyasqa karqa?

¹¹ Ñuqanchikpas ñawpaqpi tantiakusqanchikkunamanta iskayrayaspaqa Salmos 73 capitulota qillqaq imayna tarikusqanpim piensananchik. Paymi Diosta mana serviqkuna  sano, hawka hinaspa tukuy imayuq kawsakusqankuta piensarqa (Sal. 73:​3-5, 12). Chay mana allin ruwaq runakunapa allin kawsakusqankuta qawaspanmi piensarqa Diospaq tukuy ima ruwasqankuna yanqapaq kasqanta. Tukuy chaykunapi piensaspanmi payqa ‘tukuy punchaw hukmanyasqa karqa’ (Sal. 73:​13, 14). ¿Imam payta yanaparqa?

12. Salmos 73:​16-18 nisqanman hinaqa, ¿mayman riruspantaq Salmos qillqaqqa allin piensaytaña qallaykurqa?

¹² (Leey Salmos 73:​16-18). Chay Salmosta qillqaqqa Jehova Diospa wasinman riruspanmi hawkaña tarikurqa, hinaspapas allintañam piensayta qallaykurqa. Payqa entienderurqam mana allin runakuna allin kawsakuspankupas mana allinpi tukunankumanta. Chaymi manaña hukmanyasqañachu tarikurqa, aswanqa cuentatam qukururqa Diosta servinanpaq tantiakusqan aswan allin kasqanta, hinaspapas kallpanchasqam tarikurqa Diosta hinalla servinanpaq (Sal. 73:​23-28).

13. ¿Imatam ruwananchik ñawpaqpi tantiasqanchikkunamanta manaña iskayrayanapaq? (Qawaytaq fototawan dibujotapas).

¹³ Ñawpaqpi tantiasqanchikkunamanta manaña iskayrayanapaqqa Salmos qillqaq hinam piensananchik Jehova Diosmanta tukuy ima chaskisqanchikkunapi. Yuyarinanchiktaqmi Diosta mana serviqkunataqa pay mana yanapasqantapas. Paykunaqa kay tiempollapi piensasqankuraykum allin llamkayniyuq hinaspa tukuy imayuq kanankupaq tukuyta ruwanku. Jehova Diosmi ichaqa serviqninkunata niwanchik piensasqanchikmantapas astawanraq hamuq tiempopi quwananchikmanta (Sal. 145:16). Chaymantapas, ¿imaynataq vidanchik kanman karqa Jehova Diosta servinapaq mana tantiakuptinchikqa? Manapunim iskayrayanchikchu Diosninchikta  chaynataq runamasinchikkunata kuyasqanchikrayku imapas tantiakusqanchikmanta Dios bendeciwananchikmantaqa. Payqa tukuy imapas kusichiwaqninchik kaqkunatam quwasunpuni.

“¿VALORNIYUQCHU DIOSPAQ KANI?”

14. ¿Imanasqam wakinkuqa imatapas Diospaq astawan ruwayta mana atinkuchu? ¿Imatam nikunmanku?

¹⁴ Wakin iñiqmasinchikkunaqa Diospaqmi astawan imatapas ruwayta munanmanku, ichaqa manam atinkuchu yuyaqña kasqankurayku, unqusqankurayku utaq imawanpas sasachakusqankurayku. Chayrayku ichapas imapas ruwasqankuta Jehova Dios valorasqanmanta iskayrayaspanku nikunmanku: “¿Valorniyuqchu Diospaq kani?”, nispa.

15. ¿Imamantam mana iskayrayarqachu Salmos 71 capitulota qillqaq runaqa?

¹⁵ Salmos 71 capitulota qillqaqpas hukmanyasqa tarikuspanmi Jehova Diosta nirqa: ‘Kallpallay pisiruptinqa amayá saqirullawaychu’, nispa (Sal. 71:​9, 18). Pisi kallpayuqña kaspanpas payqa manam iskayrayarqachu Diosman sunqu kaptinqa tukuy imapipas yanapaykunanmanta. Payqariki yacharqam ima sasachakuyniyuq kaspankupas Diosta servinanpaq tukuyta ruwaqkunaqa Diosta anchata kusichisqankuta (Sal. 37:​23-25).

16. ¿Imanasqataq yuyaq iñiqmasinchikkunapas Diospaqqa ancha valorniyuq kanku? (Rimarimuytaq Salmos 92:​12-15 nisqanmantapas).

¹⁶ Yuyaqña kaspaykiqa Jehova Diospaq imayna kasqaykipiyá piensay. Pisi kallpayuqña kaspaykipas Diospa yanapakuyninwanmi hukkunata Dios serviyninkupi anchata yanapawaq (leey Salmos 92:​12-15). Mana ruway atisqaykikunamanta hukmanyasqa kanaykimantaqa imapas ruway atisqaykikunapiyá astawan piensay. Iñiqmasinchikkunatam kallpanchawaq Diospa munasqanman hina  kawsakuspa hinaspa paykunamanta preocupakuspa. Paykunamanqa willawaqtaqmi tukuy vidaykipi Dios imayna yanapasusqaykimantapas chaynataq paypa prometewasqanchikkunata rikuytaña munasqaykimantapas. Amataqyá qunqaychu hukkunapaq Diosta mañakusqayki paypaqqa ancha valorniyuq kasqantapas (1 Ped. 3:12). Musu-sipas utaq yuyaqña kaspapas llapallanchikmi Diospaq chaynataq iñiqmasinchikkunapaq imapas ruwaytaqa atichwan.

17. ¿Imanasqataq hukkunawanqa mana tupachikunanchikchu?

¹⁷ Ñawpaqta hina Jehova Diospaq imatapas ruwayta mana atisqanchikrayku hukmanyasqa kaspaqa yuyarinanchikmi imapas ruwasqanchikta anchata valorasqanta. Chaymantapas manam hukkunawanqa tupachikunanchikchu. ¿Imanasqa? Jehova Diosqa manam piwanpas tupachiwanchikchu (Gal. 6:4). Bibliam willawanchik achka qullqipa chanin aceiteta Jesuspa chakinman Maria tallisqanmanta (Juan 12:​3-5). Wakcha viudañataqmi mana ancha valorniyuq iskay uchuy qullqichata templopi qullqi churana cajaman churaykurqa (Luc. 21:​1-4). Jesusmi nirqa iskayninku Diospi iñisqankurayku chayta ruwasqankuta. Chaywanmi yachanchik taytanchik Jehova Diosqa payta kuyasqanchikrayku imapas ruwasqanchiktaqa anchata valorasqanta.

18. ¿Imam yanapawanchik imamantapas iskayrayaptinchikqa? (Qawaytaq “ Iskayrayaptikiqa bibliam yanapasunki” niqtapas).

¹⁸ Llapallanchikmi wakinpiqa imamantapas iskayrayanchik. Yachamusqanchikman hinam ichaqa biblia yanapawanchik. Chaymi kikinchikmanta iskayrayaspaqa bibliata allinta estudiananchik yachachikuykunata hinaspa consejokunata tarinanchikpaq. Hinaspaqa manañam hukmanyasqañachu kasun, aswanqa yachasunmi ñuqanchikmanta Dios preocupakusqanta, paypaq imapas ruwasqanchikta anchata valorasqanta hinaspa hamuq tiempopi bendeciwananchikta. Chaynaqa amayá qunqasunchu: Jehova Diosqa payman sunqu serviqninkunataqa anchata kuyawasqanchikraykum cuidawasun.