1. ¿Imaynatam Jesusqa ñawpaqmantaraq kunankama yanapawachkanchik?

 MANAM pi runapas Jesus hina hukkunata yanapaqqa karqachu. Jesusqa kay pachapi kachkaspanmi milagrokunata ruwarqa achka runakunata yanapananpaq (Luc. 9:​12-17). Chaymantapas ñuqanchikrayku wañukusqanmi karqa aswan valorniyuq regalo hina quwasqanchik (Juan 15:13). Kawsariramuspanpas hinallam payqa yanapawachkanchik. Prometekusqanman hinam taytanta mañakurqa chuya espiritunwan yachachiwananchikpaq hinaspa consuelawananchikpaq (Juan 14:​16, 17; 16:13). Jesusqa huñunakuykunawanpas yachachiwanchikmi qatiqnin kanankupaq runamasinchikkunata yanapanapaq (Mat. 28:​18-20).

2. ¿Pikunatam Jesus quwarqanchik ‘regalota hina’? (Rimarimuytaq Efesios 4:​7, 8 nisqanmantapas).

² Ichaqa manam chayllachu. Pablom nirqa hanaq pachaman Jesus kutikuspan ‘runakunata regalota hina quwasqanchikmanta’ (leey Efesios 4:​7, 8). Nirqam tukuy imapi yanapawananchikpaq paykunata Jesus quwasqanchikmanta (Efes. 1:​22, 23; 4:​11-13). Chay ‘regalokunamanta’ wakinmi punta apaqkunapa yanapaqninkuna, punta apaqkuna hinaspa llaqtan-llaqtan watukuqkuna. a Paykunaqa ñuqanchik hina pantaqmi kanku (Sant. 3:2). Chaywanpas paykunawanmi Jesusqa yanapawanchik.

3. ¿Imaynatam ‘regalota hina’ Jesuspa quwasqanchik runakunata yanapachwan? Rimarimuy tupanachiywan.

³ Jesusqa chay runakunatam ‘regalota hina’ quwarqanchik iñiyninchikpi yanapawananchikpaq (Efes. 4:12). Ichaqa llapallanchikmi yanapachwan chay ruwayninkuta allinta cumplinankupaq. Kaywan tupachisun: Huñunakunanchik wasita ruwaypiqa wakinmi pirqanku, wakinkuñataqmi yanapanku mikuyta ruwaspanku, materialkunata apaspanku utaq imatapas  ruwaspanku. Chaynam punta apaqkunapa yanapaqninkunatapas, punta apaqkunatapas chaynataq llaqtan-llaqtan watukuqkunatapas llapallanchik yanapachwan ruwasqanchikwan hinaspa rimasqanchikwan. Chaynaqa, yachaykusunyá paykunapa ruwasqanku allinninchikpaq kasqanmanta hinaspa paykunatawan Jesusta imayna agradecekunamanta.

PUNTA APAQKUNAPA YANAPAQNINKUNAQA ‘HUKKUNATAM YANAPANKU’

4. ¿Imakunatam apostolkunapa tiemponpi punta apaqkunapa yanapaqninkuna ruwaqku?

⁴ Apostolkunapa tiemponpiqa wakin qarikunam nombrasqa karqaku punta apaqkunapa yanapaqnin kanankupaq (1 Tim. 3:8). Yaqachusmi Pabloqa paykunamanta rimaspan nirqa ‘hukkunata yanapaqkuna’ kasqankumanta (1 Cor. 12:28). Paykunachusmi Diospa palabranta copiaypi yanapakuqku utaq copiakuna ruwanankupaq materialkunata rantiqku, chaynapi punta apaqkuna iñiqkunata astawan yachachinankupaq hinaspa watukuspa kallpanchanankupaq.

5. ¿Imakunapim punta apaqkunapa yanapaqninkunaqa kunan tiempopi yanapakunku?

⁵ ¿Imakunapim punta apaqkunapa yanapaqninkunaqa kunan tiempopi yanapakunku? (1 Ped. 4:10). Paykunam yanapakunku qullqi churasqanchikta hinaspa ima gastokuna kasqanta anotaypi, Diosmanta willakunapaq mapakunata ruwaypi, qillqanchikkunata mañaspa aypuypi, huñunakuypi takikunatawan videokunata churaypi, huñunakuyman hamuqkunata chaskiypi hinaspa huñunakunanchik wasita allichaypi. Tukuy chaykunapi yanapakusqankum yanapawanchik Diosta allinta servinapaq (1 Cor. 14:40). Wakinkuñataqmi semanapi punta kaq huñunakuypi hinaspa semana tukuyta huñunakuypi yachachinku. Yanapanmankutaqmi grupomanta encargakuq punta apaqtapas. Wakinpiqa mayqin punta apaqpas ninmankum iñiqmasinkuta watukuspa kallpanchanankupaq.

6. ¿Imanasqam agradecekunchik punta apaqkunapa yanapaqninkunata?

⁶ ¿Imanasqam agradecekunchik punta apaqkunapa yanapaqninkunata? Bolivia nacionpi yachaq iñiqmasinchik Betim b nin: “Allinta yanapakusqankuraykum huñunakuypi yachachikuykunataqa allinta entiendeni. Yanapakuyninkuwanmi takini, huñunakuykunapi rimarini, yachachikuykunata uyarini hinaspa videokunatawan fotokunatapas hatun pantallapi qawani. Tukuytataqmi ruwanku huñunakuypi seguro kananchikpaqpas. Yanapankutaqmi zoomnintakama yaykuq iñiqmasinchikkunatapas. Huñunakuy tukuytañataqmi yanapakunku pichaypi hinaspa qullqi churasqanchikta anotaypi. Segurakunkutaqmi necesitasqanchik qillqanchikkuna kapuwananchikpaqpas. Tukuy chaykunapi yanapakusqankuraykum anchata agradecekuni”, nispa. Colombia nacionmanta Lesliñataqmi nin: “Qusay punta apaq kasqanraykum yachani punta apaqkunapa yanapaqninkunaqa anchata yanapakusqankuta. Paykuna tukuypi mana yanapakuptinkuqa aswan ocupasqachá qusallayqa tarikunman. Chayraykum paykunata anchata agradecekuni imapaqpas listo kasqankumanta hinaspa kusisqa yanapakusqankumanta”, nispa. Ñuqanchikpas paykunataqa anchatachá agradecekunchik (1 Tim. 3:13).

7. ¿Imata ruwaspataq punta apaqkunapa yanapaqninkunata agradecekuchwan? (Qawaytaq fototapas).

⁷ Bibliapim nin: ‘Agradecekuqyá kaychik’, nispa (Col. 3:15). Punta apaqkunapa yanapaqninkunataqa agradecekuchwan manam rimaspallachu, aswanqa ruwasqanchikpiwanmi. Finlandia nacionmanta punta apaq Davidmi nin: “Tarjetachata utaq mensajechatam apachini. Chaypim churani textota, hinaspaymi  nini imapi kallpanchawasqanmanta utaq imapi yanapakusqanwan kusisqa kasqaymanta agradecekusqayta”, nispa. Nueva Caledoniapi yachaq Pascalwan señoran Jaelñataqmi punta apaqkunapa yanapaqninkunapaq Diosta mañakunku. Paykunam ninku: “Diosta mañakuspaykum anchata agradecekuniku congregacionniykupi punta apaqkunapa yanapaqnin iñiqmasinchikkunamanta. Mañakunikutaqmi paykunata Dios yanapaykunanpaqpas”, nispa. Ñuqanchikpas chaynata mañakuspanchikqa congregacionninchik huk sunqulla Diosta yupaychananpaqmi yanapakusun (2 Cor. 1:11).

PUNTA APAQKUNAQA ANCHATAM ‘LLAMKANKU’

8. ¿Imanasqataq Pablo nirqa punta apaqkuna anchata llamkasqankuta? (Rimarimuytaq 1 Tesalonicenses 5:​12, 13 nisqanmantapas).

⁸ Apostolkunapa tiemponpi punta apaqkunaqa anchatam llamkaqku (leey 1 Tesalonicenses 5:​12, 13; 1 Tim. 5:17). Huñunakuykunapim yachachiqku hinaspapas punta apaqmasinkuwanmi imapaqpas tantiaqku. Chaymantapas iñiqmasinkutam kuyakuywan rimapayaqku, chaynapi ima mana allinmanpas mana wichiykunankupaq (1 Tes. 2:​11, 12; 2 Tim. 4:2). Kallpanchakuqkutaqmi allin iñiyniyuq kanankupaqpas chaynataq wasinpi kaqkunata allinta uywanankupaqpas (1 Tim. 3:​2, 4; Tito 1:​6-9).

9. ¿Ima ruwayniyuqmi kanku kunan punta apaqkuna?

⁹ Kunanpas punta apaqkunaqa tukuy ima ruwayniyuqmi kanku. Diosmanta sumaq willakuykunatam willakunku (2 Tim. 4:5). Kusikuywan Diosmanta willakusqankuraykum qatipakunapaq kanku. Tantiankutaqmi maykunapi Diosmanta willakunapaqpas, hinaspapas yanapawanchikmi allin yachachiq kananchikpaq. Pipas hatun huchata ruwaruptinmi pimanpas mana sayapakuspa hinaspa llakipayakuywan juzganku. Paykunaqa tukuytam ruwanku chay iñiqmasinchik kaqmanta Dioswan kuyachikunanpaq. Paykunaqa cuidawanchiktaqmi mana kasukuyta munaq iñiqkunamantapas (1 Cor. 5:​12, 13; Gal. 6:1). Punta apaqkunaqa imamantapas astawanqa kuyakuywan cuidawananchikpaqmi kachkanku (1 Ped. 5:​1-3). Huñunakuypi yachachinankupaqmi allinta preparakunku, lliw iñiqmasinkuta riqsinankupaqmi kallpanchakunku, hinaspapas iñiqmasinchikkunata kallpanchanankupaqmi watukunku. Wakinkum kanku huñunakunanchik wasikunata ruwaypi utaq allichaypi yanapakuqkuna, kimsa punchaw asambleanchik apakunanpaq tukuy imata ruwaqkuna, hospitalpi hampichikunapaq yanapakuqkuna hinaspa huk ruwaykunapi yanapakuqkuna. Arí, ¡ñuqanchikraykum anchata llamkanku!

10. ¿Imanasqataq punta apaqkunata valoranchik?

¹⁰ Jehova Diosmi willakurqaña punta apaqkuna ovejachankunata cuidaptinku ‘mana manchakunankumanta’ (Jer. 23:4). Chaynam pasarqa Finlandia nacionmanta Yohanata, paymi willakun maman unquruptin imayna yanapaykusqankumanta: “Ñuqapaqqa sasam llakiymanta hukkunaman willakuyqa. Chayllaraq riqsisqay punta apaqmi ichaqa pacienciawan uyariykuwarqa, ñuqawan kuskam Diosta mañakurqa, hinaspam niwarqa Dios anchata kuyawasqanta. Tukuy niwasqanta allinta mana yuyaspaypas chay punchawmantam manaña llakisqañachu tarikurqani. Dioschusmi chay iñiqmasinchikta servichikurqa chayna llakisqa kachkaptiy yanapaykuwananpaq”, nispa. ¿Imaynatam qamtapas punta apaq yanapasurqanki?

11. ¿Imatataq punta apaqkunapaq ruwapuchwan llamkasqankumanta agradecekuspa? (Qawaytaq dibujotapas).

¹¹ Diosqa munan ‘ñuqanchikpaq llamkasqankurayku’ punta apaqkunata kuyananchiktam (1 Tes. 5:​12, 13). Finlandia nacionmanta  Estermi nin: “Punta apaqkunaqa kusikuywanmi iñiqmasinkuta imapipas yanapanku. Chaywanpas ñuqanchik hinam pisipanku, sasachakuyniyuqtaqmi kanku. Chaymi wakinpiqa mayqin punta apaqmanpas asuykuspay nini: ‘Allin punta apaqmi kanki’”, nispa. Turquia nacionmanta Sarañataqmi nin: “Punta apaqkunaqa kallpanchanatam necesitanku hinalla allinta llamkanankupaq. Chaymi tarjetachapi qillqaruspay quni, mikunaykupaq invitani utaq paykunawan Diosmanta willakuni”, nispa. ¿Qamqa mayqin punta apaqtataq astawan agradecekunki? ¿Yaqachu imatapas ruwawaq agradecekunaykipaq? (1 Cor. 16:18).

LLAQTAN-LLAQTAN WATUKUQKUNAQA IÑIQKUNATAM KALLPANCHANKU

12. ¿Pikunaraqtaq apostolkunapa tiemponpi iñiqkunapaq ‘regalo hina’ karqaku? (Rimarimuytaq 1 Tesalonicenses 2:​7, 8 nisqanmantapas).

¹² ¿Pikunaraqtaq apostolkunapa tiemponpi iñiqkunapaq ‘regalo hina’ karqaku? Llaqtan-llaqtan watukuqkunam. Jesuspa yanapakuyninwanmi Jerusalenpi punta apaqkunaqa Pablota, Bernabeyta hinaspa wakin iñiqkunata llaqtan-llaqtan watukuq kanankupaq churarqaku (Hech. 11:22). Chaynapi punta apaqkunawan yanapaqninkuna hina iñiqkunata kallpanchanankupaq (Hech. 15:​40, 41). Paykunaqa vidankutapas peligropi churaspankum tukuyta ruwarqaku iñiqmasinkuta yachachinankupaq hinaspa kallpanchanankupaq (leey 1 Tesalonicenses 2:​7, 8).

13. ¿Imakunatam ruwanku llaqtan-llaqtan watukuqkuna?

¹³ Llaqtan-llaqtan watukuqkunaqa wakinpim huk congregacionmanta huklaw congregacionman rinankupaq karu-karuta viajananku. Paykunaqa sapa semanam achka discursokunata qunanku, iñiqmasinchikkunata watuykuspa kallpanchananku, precursorkunawan huñunakunanku, punta apaqkunawan huñunakunanku hinaspa Diosmanta willakuq  lluqsinankupaq huñunakuyta ruwananku. Paykunataqmi huk punchawlla hinaspa kimsa punchaw apakuq asambleanchikkuna imayna ruwakunanpaqpas tantianku hinaspa chaykunapipas yachachinku. Chaymantapas precursorkunapaq escuela haykapi kananpaqmi tantianku, asamblea manaraq qallarichkaptinmi precursorkunawan huñunakuyta ruwanku hinaspapas betelpi punta apaqkunapa urgente kamachisqankutam ruwanku.

14. ¿Imakunaraykum llaqtan-llaqtan watukuqkunata anchata valoranchik?

¹⁴ Llaqtan-llaqtan watukuqkuna imayna yanapakusqankumantam Turquia nacionniyuq iñiqmasinchik nin: “Sapa kuti watukamuptinkum kallpanchasqa tarikuni iñiqmasiykunawan mas tiempo kanaypaq hinaspa yanapanaypaq. Llaqtan-llaqtan watukuqkunaqa tukuy ima ruwayniyuq kachkaspankupas ñuqawan parlanankupaqmi tiempochakunku”, nispa. 10 parrafopi rimamusqanchik Yohanam llaqtan-llaqtan watukuqwan willakuq lluqsispan mana pitapas wasipiqa tarirqakuchu. Paymi nin: “Chaywanpas chay punchawtaqa manam haykapipas qunqanichu. Iskay ñañaykunam huklawman astakururqaku, hinaptinmi paykunamanta anchata llakikurqani. Chaymi payqa kuyakuywan niwarqa familianchikkunawan musuq pachapi hayka tiempopas kuska kanapaq kayllapiña kasqanta. Chay nisqanwanmi kallpanchaykuwarqa”, nispa. Arí, paykunaqa watukusqan iñiqmasinchikkunapa ancha kuyasqanmi kanku (Hech. 20:37–21:1).

15. (1) 3 Juan 5-8 nisqanman hinaqa, ¿imaynatam llaqtan-llaqtan watukuqkunata yanapachwan? (Qawaytaq fototapas). (2) ¿Imaynatam congregacionpi yanapakuqkunapa señorankuta yanapachwan? (Qaway “ Amataqyá qunqasunchu señorankutaqa” niqta).

¹⁵ Apostol Juanmi Gayota kallpancharqa llaqtan-llaqtan watukuqkunata allinta atiendeykunanpaq. Chaymi nirqa: ‘Viajanankupaq  imapas necesitasqankupiyá Diospa munasqanman hina yanapaykuy’, nispa (leey 3 Juan 5-8). ¿Imaynatam ñuqanchikpas paykunata yanapachwan? Mikunapaq invitaykuspam hinaspa chay semana willakuq lluqsispam. 6 parrafopi rimamusqanchik Leslim agradecekuspan ima ruwasqanmanta nin: “Diostam mañakuni ima necesitasqankuta qunanpaq. Anchata kallpanchaykuwasqankumantam qusaypiwan cartakunata qillqaniku”, nispa. Llaqtan-llaqtan watukuqkunaqa ñuqanchik hinallam kanku. Wakinpiqa unqunkum, imapas llakiyuqmi kanku, hinaspapas hukmanyankum. Chaymi kallpanchaykusqanchikqa utaq ima regalochatapas quykusqanchikqa sunqunkuta tiyaykachinqa. Chaykuna ruwasqanchikwanmi yachanmanku mañakusqankuta Dios uyarisqanta (Prov. 12:25).

‘REGALO HINA’ KANANKUPAQMI QARIKUNATA ASTAWAN NECESITANCHIK

16. ¿Imakunapaqmi kallpanchakunanku qari iñiqmasinchikkuna? (Rimarimuytaq Proverbios 3:27 nisqanmantapas).

¹⁶ Enteron allpa pachapim qarikunata astawan necesitanchik ‘regalo hina’ kanankupaq. ¿Qampas bautizasqaña kaspaykiqa chaypaq kallpanchakuwaqchu? (leey Proverbios 3:27). ¿Punta apaqkunapa yanapaqnin kanaykipaqchu kallpanchakuchkanki? Punta apaqkunapa yanapaqnin kaspaykiqa, ¿kallpanchakuchkankichu punta apaqña kanaykipaq? c ¿Tantiakuwaqchu Diospa munaychakuyninmanta willakuqkunapaq escuelaman rinaykipaq? Chay escuelaman risqaykiraykum Jesusqa imapaqpas listo kanaykipaq astawan yanapasunki. Tukuy chaykunata mana haypayta atispaykiqa Jehova Diosta mañakuy imatapas ruwanaykipaq nisuptiki chuya espiritunwan yanapasunaykipaq (Luc. 11:13; Hech. 20:28).

17. ¿Imatam sutillata yachanchik regalo hina iñiqmasinchikkunapa tukuy ima ruwasqankuwan?

¹⁷ ‘Regalo hina’ iñiqmasinchikkunapa tukuy ima ruwasqankuwanmi sutillata yachanchik Jesusqa ‘kay tiempopa tukupayninpi’ yanapawasqanchikta (Mat. 28:20). Kamachiwaqninchik Jesusqa ancha kuyakuqmi, imapas necesitasqanchikta yachaqmi hinaspa iñiqmasinchikkunawan yanapawaqninchikmi. Chaymi anchata agradecekunchik. Chaynaqa, tukuytayá ruwasun agradecekusqanchikta qawachinapaq. Amataqyá qunqasunchu Diosninchikta agradecekuytapas. Paymi quwanchik tukuy ‘imapas allin kaqkunataqa hinaspa allinkuna chaskisqanchikkunataqa’ (Sant. 1:17).