1. Wañukunan punchaw hichpamuchkaptinpas, ¿imata ruwananpaqmi Diosqa Pedrota nirqa?

 APOSTOL Pedroqa tukuy sunqunwanmi Jehova Diosta servirqa wañukunan punchawkama. Jesuswan kuskam Diosmanta willakuypi purirqa, mana judio kaqkunatapas yanaparqam Diosta servinankupaq. Chaymantapas Diospa llaqtanpi hukkaqnin punta apaqmi karqa. Wañukunan punchaw hichpamuchkaptinpas Diosmi Pedrotaqa qillqachirqa iskay cartata. Chaytam kunan riqsinchik 1 kaq Pedro hinaspa 2 kaq Pedro libro nispa. Chaykunataqa qillqarqa 62 watamanta 64 watakamam. Payqa munarqam wañukuptinpas kay qillqasqan librokuna iñiqmasinkunata hinalla yanapananta (2 Ped. 1:​12-15).

2. ¿Imaynatam Pedropa qillqasqan iskay cartankunaqa chay tiempopi iñiqkunata yanaparqa?

² Chay librokunata qillqasqan tiempoqa iñiqmasinkunam ‘achka sasachakuykunawan ñakarichkarqaku’ (1 Ped. 1:6). Mana allin runakunam pantayta yachachispanku Diospi iñiqkunata pantachiyta munarqaku, chaynapi paykuna hina huchallikunankupaq (2 Ped. 2:​1, 2, 14). Chaymantapas manapas unaymantam Jerusalenpi yachaqkunaqa rikunanku karqa ‘tukuy imapa tukupaynin’ tiempo chayamusqanta. Arí, manapas unaymantam Jerusalen llaqtata hinaspa Diospa templonta Roma soldadokuna chinkachinan karqa (1 Ped. 4:7). Apostol Pedropa qillqasqan cartakunaqa anchatamá yanaparqa iñiqmasinkunataqa tukuy ima sasachakuyninkuta aguantanankupaq. Yanaparqataqmi hamuq sasachakuykunata aguantanankupaqpas. b

3. ¿Imaynatam ñuqanchiktapas Pedropa iskay cartakuna qillqasqanqa yanapawasun?

³ Pedroqa kay cartakunataqa qillqarqa chay tiempopi iñiqkunapi piensaspallanmi, ichaqa Jehova Diosmi hatallirqa bibliapa hukkaqnin  libron kananpaq, chaynapi ñuqanchikpas yanapachikunapaq (Rom. 15:4). Kay tiempopipas yaqa llapallan runakunam huchallikuyllapiña piensanku. Chaymantapas tukuy ima sasachakuywanmi ñuqanchikpas ñakarichkanchik. Chaywanmi wakinpiqa Jehova Dios serviyta sasachakunchik. Chaymantapas llumpa-llumpay ñakariy punchawkunam hichpallapiña kachkan. Chayqa kanqa Jerusalenta hinaspa Diospa templontapas chinkachisqanku tiempomantapas aswan manchakuypaq sasachakuyraqmi. Pedropa kay iskay carta qillqasqanqa yanapawasunmi Jehova Diospa punchawninta qawan-qawanlla suyanapaq, runamasinchikkunata mana manchakunapaq hinaspa llapallan iñiqmasinchikkunata tukuy sunqumanta kuyanapaq. Tukuy kaykunaqa yanapanqataqmi punta apaqkunatapas Diospa ovejachankunata sumaqta cuidanankupaq.

4. ¿Runamasinchikkunapa ima niwasqanchikwantaq iskayrayayta qallaykuchwan? (Rimarimuytaq 2 Pedro 3:​3, 4 nisqanmantapas).

⁴ Diosta mana serviq runakunaqa yaqa llapankum hamuq tiempomanta bibliapa nisqanpiqa mana creenkuchu. Testigokunaqa unay watañam willakuchkanchik Jehova Diospa piñakuynin punchaw chayamunanmanta, ichaqa manaraq chayamusqanta qawaspam wakin runamasinchikkuna asikuwanchik, hinaspam niwanchik chay punchawqa mana haykapipas chayamunanta (leey 2 Pedro 3:​3, 4). Sichu pipas Diosmanta willakusqanchikpi, llamkayninchikpi utaq ayllunchikpas chaynata niwaptinchikqa yaqapaschá iskayrayayta qallaykuchwan. Chaynaqa, ¿imataq yanapawachwan mana iskayrayanapaq? Chaypaqyá apostol Pedropa ima nisqanmanta yachaykusun.

5. ¿Imata yuyariytaq yanapawasun Diospa piñakuynin punchawta pacienciawan suyanapaq? (Rimarimuytaq 2 Pedro 3:​8, 9 nisqanmantapas).

⁵ Wakinqa ninmanpaschá mana allinkunata chinkachinanpaq Jehova Dios llumpayta unamusqanta. Ichaqa Pedropa niwasqanchikmi piensarichiwanchik. Yuyarichiwarqanchikmi Jehova Diosqa mana runakuna hinachu tiempota qawasqanmanta (leey 2 Pedro 3:​8, 9). Paypaqqariki waranqa watam huk punchaw hinalla. Chaymantapas Diosqa ancha pacienciakuqllañam, payqariki manam munanchu pipas wañunanta. Ichaqa Jehova Diospa piñakuynin punchawqa chayamunqapunim, hinaptinmi ima mana allin ruwaytapas manaña rikusunchu. Chay punchaw chayamunankamaqa hinallam runamasinchikkunaman Diosmanta willakuchkanchik. ¡Chayta ruwaspaqa ancha kusisqam tarikunchik!

6. ¿Imapi yuyaymanaytaq yanapawasun Jehova Diospa punchawninta qawan-qawanlla suyanapaq? (Rimarimuytaq 2 Pedro 3:​11, 12 nisqanmantapas).

⁶ Pedrom niwanchik ‘Diospa punchawnin chayamunanta qawan-qawanlla suyanapaq’ (leey 2 Pedro 3:​11, 12). ¿Imaynatam qawan-qawanlla kachwan? Chaypaqqa yaqa sapa punchawmi yuyaymanana sumaq huertapiña kasqanchikta. Chay tiempoqa kay allpa pachapiqa tukuy imapas limpioñam kanqa. Tukuy ima tarpukusqanchikpas mana hampillawanñam qispinqa. Chay tiempoqa kuyasqa ayllunchikkunapas kawsarimunqam, hinaptinmi paykunawan tupaykusun. Ñawpaq tiempopi Diosta serviqkunatapas yachachinam kanqa bibliapi willakuykuna imaynata cumplikusqanmanta. Chaykunapi piensayqa yanapawanchikmi qawan-qawanlla kanapaq hinaspa tukupay punchawkunapiña kasqanchikta yuyanapaq. Qipa punchawkunata imakuna pasakunanmanta allinta yachasqanchikraykum runakunapa pantay yachachisqankutaqa mana creenchikchu (2 Ped. 3:17).

7. Runata manchakuspaqa, ¿ima ruwaytam manchakuchwan?

⁷ Diospa piñakuynin punchaw hichpallapiña kasqanta yachasqanchikraykum lliw runakunaman Diosmanta willakuyta munanchik. Wakinpim ichaqa runakunata manchakusqanchikrayku Diosmanta willakuyta manchakuchwan. Pedropas runata manchakusqanraykum Jesusta juzgaptinku negarurqa, payqa Jesuspa qatiqnin kasqantam mana riqsikurqachu. Hinaspam kimsa kutikama Jesusta negarurqa (Mat. 26:​69-75). Chaymantam ichaqa manaña runakunataqa manchakurqachu.  Chaymi qipakunata kaynata qillqarqa: “Amayá runakunapa manchakusqantaqa manchakuychikchu, amataqyá hukmanyaychikchu”, nispa (1 Ped. 3:14). Pedromantam yachanchik runakunata manaña manchakuyta atinamanta.

8. ¿Imapi yuyaymanaytaq yanapawasun runata mana manchakunapaq? (Rimarimuytaq 1 Pedro 3:15 nisqanmantapas).

⁸ ¿Imapi yuyaymanaytaq yanapawasun runakunata mana manchakunapaq? Chaypaqqa Pedropa kayna niwasqanchiktam yuyarinanchik: “Sunquykichikpiyá riqsikuychik Cristoqa señorninchik kasqanta chaynataq chuya kasqantapas”, nispa (leey 1 Pedro 3:15). Arí, sapa kutim yuyaymanananchik señorninchik hinaspa kamachiqninchik Jesucristo mayna atiyniyuq kasqanpi. Wakinpiqa Diosmanta willakuytam munanchik, ichaqa manchapakunchikmi. Chay pasawaptinchikqa señorninchik Jesucristopim piensana. Piensananchikmi hanaq pachapi wara-waranqantin angelkunapa chawpinpi kamachisqantaña. Jesusqariki ‘tukuy atiytam chaskirun hanaq pachapipas kay pachapipas’. Payqa ‘sapa punchawmi ñuqanchikwan kanqa kay tiempopa tukupayninkama’ (Mat. 28:​18-20). Chaymantapas, Pedroqa niwanchikmi iñisqanchikmanta pimanpas willakunapaq ‘listo kanapaq’. ¿Munawaqchu llamkaynikipi kaspapas, escuelaykipi kaspapas utaq maypipas Diosmanta willakuyta? Chayna kaptinqa piensay imay hora hinaspa imata nispa pimanpas willakunaykipaq. Chaymantapas Jehova Diostayá mañakuy mana manchakuq kanaykipaq. Diosqa yanapasunkim mana manchakuspa paymanta willakunaykipaq (Hech. 4:29).

9. ¿Pikunata manchakusqanraykutaq Pedroqa manaña lliw iñiqmasinkunata kuyachkarqachu? (Qawaytaq dibujotapas).

⁹ Pedroqa kuyakuq kaytam yacharurqa. Apostolninkunatam Jesus kaynata nirqa: “Musuq kamachikuytam quykichik, kuyanakuychikyá. Imaynam ñuqapas qamkunata kuyarqaykichik chaynayá qamkunapas kuyanakuychik”, nispa. Jesus chaynata niptinqa Pedropas chaypim karqa (Juan 13:34). Ichaqa tiempo pasaytam Pedroqa judio iñiqmasinkunata manchakusqanrayku huklaw nacionniyuq iñiqmasinkunawan kuskaqa manaña mikuyta munarqachu. Chayta qawaspam apostol Pabloqa Pedrota nirqa iskay uya kasqanta (Gal. 2:​11-14). Chaynata Pablo corregiruptinqa Pedroqa manañam chaynachu karqa. Chaymi Pedroqa iskaynin carta qillqasqanpi nirqa iñiqmasinchikkunataqa sunqullanchikpi mana kuyanamanta, aswanqa imapas ruwaykapusqanchikpim sutilla qawakunan kuyasqanchik.

10. ¿Imanasqataq lliw iñiqmasinchikkunata ‘ayllunchikta hina’ kuyananchik? (Rimarimuytaq 1 Pedro 1:22 nisqanmantapas).

¹⁰ Pedrom niwarqanchik huk tayta-mamallamanta kachkachwanpas hina wawqi-panintin hina ‘sunqumanta kuyanakunapaq’ (leey 1 Pedro 1:22). “Chiqap yachachikuyta kasukusqanchikraykum” chaynataqa kuyanakunchik. Chiqap yachachikuyta estudiasqanchikraykutaqmi yacharunchik ‘Diosqa mana pimanpas sayapakuq’ kasqanta (Hech. 10:​34, 35). Sichu wakin iñiqmasinchikkunallata kuyachkanchik chayqa manam kasukuchkanchikchu Jesuspa ‘kuyanakunaykichik’ nispa kamachiwasqanchikta. Yaqapaschá wakin iñiqmasinchikkunawanqa allin amistad kanchik. Jesuspasriki chaynam karqa wakin apostolninkunawan (Juan 13:23; 20:2). Ichaqa Pedrom yuyarichiwanchik lliw iñiqmasinchikkunata ‘ayllunchiktapas hina kuyanapaq’ (1 Ped. 2:17).

11. ¿Imatam ruwasun ‘sunqumanta llapallan iñiqmasinchikta anchata kuyaspanchikqa’?

¹¹ Pedrom niwarqanchik: “Sunqumantayá llapallaykichik anchata kuyanakuychik”, nispa. “Anchata kuyanakuychik” nispaqa Pedroqa niwachkanchik mana amistadninchikpaq hapisqanchik iñiqmasinchiktapas kuyanamantam. Kaypi yuyaymanasun, pi iñiqmasinchikpas sientirachiwaptinchikqa utaq mana allinta ruwaruwaptinchikqa pantaq runa kasqanchikraykum vengakuyta munachwan. Vengakuyqa manamá Jehova Diosninchiktaqa kusichinchu. Chayna kasqantam Jesuspas Pedrota yachachirqa (Juan 18:​10, 11). Chaymi Pedropas kaynata qillqarqa: “Mana allin ruwasusqaykichikmantaqa amayá mana allinwanqa kutichiychikchu, kamisuqnikichiktapas amayá kamiychikchu, aswanqa allinkunatayá paykunapaq ruwaykapuychik”, nispa (1 Ped. 3:9). Chaynaqa, lliw iñiqmasinchikkunata anchata kuyaspanchikqa sientirachiwaqninchik iñiqmasinchikkunawanpas kuyakuqllañam kasun.

12. (1) Iñiqmasinchikkunata anchata kuyaspaqa, ¿imatawanraqtaq ruwasun? (2) ¿Imata ruwanapaqmi kallpanchawanchik Bibliapa nisqanman hinayá pampachanakuykuq kasun niq videonchikqa?

¹² Punta kaq carta qillqasqanpipas Pedroqa nirqam ‘tukuy sunqumanta kuyanakunapaq’, chaynata kuyanakuspaqa manam iskay-kimsa kutikamallachu pitapas pampachasun, aswanqa ‘maynaña huchatapas pampachasunmi’ (1 Ped. 4:8). Chayta rimaspanqa Pedroqa yuyarirqachá runamasinchikta pampachaymanta Jesuspa yachachisqanta. Chay kutipim Pedroqa ‘qanchis kutikama’ pitapas pampachananmanta nirqa. Chaywanqa yaqapaschá Pedroqa piensarqa pampachakuqllaña kasqanta. Jesusmi ichaqa nirqa ‘77 kutikama’ pitapas pampachananpaq. Chaywanmi Jesusqa yachachichkarqa haykaqpas hinalla pampachananmanta. Ñuqanchikpas chay nisqantam kasukunanchik (Mat. 18:​21, 22). Jesuspa nisqanman hina pampachakuq kanaykipaqqa yaqapaschá sasachakunki. Ichaqa amayá hukmanyaychu. Pantaq kasqanchikraykum llapallanchik sasachakurqanchik pitapas pampachaykunapaq. Chaynaqa, ¿imatam ruwawaq pampachakuq kanaykipaq? Tukuytam ruwanayki pampachaykunaykipaq hinaspa allinyanakunaykipaq. Chaypaq kallpanchakusqaykiqa ancha allinmi. c

13. ¿Imanasqataq punta apaqkunaqa sasachakunmanku iñiqmasinkuta watuykuspa kallpanchanankupaq?

¹³ Kawsariramusqan qipatam Jesusqa Pedrota nirqa: “Ovejachaykunatayá michiy”, nispa. Chayna nisqantaqa Pedroqa manachá haykaqpas qunqarqachu (Juan 21:16). Punta apaq kaspaykiqa, yachankichá Jesuspa chayna nisqanta kasukunaykimanta. Ichaqa wakinpiqa manapaschá tiempo haypasunkichu iñiqmasikita watuykuspa kallpanchaykunaykipaq. Familiayuq punta apaqkunaqa familianpaqmi llamkananku, tukuytam ruwananku kusisqa kanankupaq, Diosta serviyninkupipas yanapanankum. Chaymantapas, punta apaqkunaqa kallpanchakunankum sapa kuti Diosmanta willakunankupaq, huñunakuykunapi allinta yachachinankupaq chaynataq hatun huñunakuykunapipas. Wakin punta apaqkunaqa hospitalpi hampichikunapaq yanapakuqkunam kanku, wakinñataqmi huñunakuna wasikunata allichaypi yanapakuqkuna kanku. Qawasqanchikman hinam, punta apaqkunaqa tukuy ima ruwayniyuq kanku.

14. ¿Imanasqataq punta apaqkunaqa iñiqmasinkuta watuykuspa kallpanchaykuyta munanku? ¿Imataq yanapanman chayta ruwanankupaq? (Rimarimuytaq 1 Pedro 5:​1-4 nisqanmantapas).

¹⁴ Pedrom punta apaqmasinkunata nirqa: “Diospa ovejankunatayá allinta michiychik”, nispa (leey 1 Pedro 5:​1-4). Yachanchikmi punta apaqkunaqa iñiqmasinkuta anchata kuyasqankuta, chayraykum paykunaqa munanku iñiqmasinkuta watuykuspa kallpanchaykuyta. Tukuy ima ruwayniyuq utaq pisipasqa kasqankuraykuchá wakinpiqa piensanmanku chayta ruwanankupaq mana tiempochakuy atisqankuta. Qampas chayna tarikuptikiqa, ¿imataq yanapasunkiman iñiqmasikikunata watuykuspa kallpanchanaykipaq? Jehova Diostam mañakunayki hinaspam willawaq imayna tarikusqaykimanta, Diosqariki kallpatam qusunki. Pedrom niwanchik: “Pipas hukkunata yanapaspanqa Diospa kallpa qusqanwan yanapasqantayá riqsikuchun”, nispa (1 Ped. 4:11). Wakin iñiqmasikichikpa sasachakuynintaqa manapaschá kay tiempopiqa allichayta atinkichu. Kayta yuyariy: “Michiqkunapa kamachiqnin” Jesucristom qanmantaqa astawan yanapayta atinman, astawanraqmi musuq allpa pachapiqa yanapanqa. Chaymi Jehova Diosqa munan punta apaqkuna iñiqmasinkuta kuyanankuta, watuykuspa kallpanchanankuta hinaspa ‘qatipakunankupaq hina kanankuta’.

15. ¿Imatam punta apaq iñiqmasinchik Wilianqa ruwan iñiqmasinkunata kallpanchananpaq? (Qawaytaq fototapas).

¹⁵ Unay wataña punta apaq iñiqmasinchik Wilianmi cuentata qukururqa iñiqmasinchikkunata watukuykuspa kallpanchaykuyqa ancha allin kasqanta. Chaymi coronavirus unquy qallaykuptin  punta apaqmasinkunawan rimarqa gruponkupi kaq iñiqmasinkuta sapa semana qayaykunankupaq. Paymi nin: “Achka iñiqmasinchikkunam chay tiempoqa wasinkupi sapallanku karqaku. Mana piwanpas parlayta atispankum yanqakunataña piensayta qallaykurqaku”, nispa. Iñiqmasinchik Wilianqa pi iñiqmasinchikpas sasachakuyninmanta willaptinqa sumaqtam uyariykun entiendenanpaq. Chaymantañam yanapaykunanpaq ima yachachikuytapas maskan. Astawanmi servichikun jw.org paginanchikpi tukuy rikchaq videonchikkunata. Wilianqa ninraqmi: “Sasachakuy tiempopi kawsasqanchikraykum iñiqmasinchikkunata watuykuspa kallpanchaykuyqa ancha allin. Imaynam runamasinchikkunaman Diosmanta willanapaqpas anchata kallpanchakunchik, chaynallataqmi kallpanchakuna iñiqmasinchikkunata kallpanchaykunapaqpas. Chaynata ruwaspam Diospa ovejachankunata yanapachkanchik Diospa llaqtanpi hinalla kanankupaq”, nispa.

16. ¿Imakunata ruwanapaqmi kallpancharuwanchik Pedropa iskay cartakuna qillqasqanqa?

¹⁶ Kay yachachikuypiqa apostol Pedropa iskay cartakuna qillqasqanpi wakin yachachikuyllamantam rimaramunchik. Cuentatapaschá qukurunki imakunapi kallpanchakunaykimanta. ¿Tantiakurunkichu kay allpa pachanchik sumaq huertaña kaptin imaynaña kawsakunaykipi sapa kuti yuyaymananaykipaq? Chaymantapas, ¿tantiakurunkichu llamkaynikipi kaspapas, escuelaykipi kaspapas utaq maypipas Diosmanta willakunaykipaq? ¿Tantiakurunkichu lliw iñiqmasinchikkunata kuyasqayki sutilla kananpaq imapas ruwayta? Punta apaq kaspaykiqa, ¿tantiakurunkichu Diospa ovejachankunata sapa kuti watukuspa kallpanchaykunaykipaq? Sichu cuentata qukurunki imachapipas kallpanchakunaykimanta hinaspaqa amayá hukmanyaychu. Yuyariy ‘señorninchikqa sumaq sunquyuq kasqanta’, payqa yanapaykusunkim aswan allintaña imatapas ruwanaykipaq (1 Ped. 2:3). Pedrom niwanchik: ‘Diosqa tukuy imapi aswan allin kanaykichikpaqmi yachachisunkichik […]. Paymi yanapasunkichik qaqa hina sayaq kanaykichikpaq, kallpayuq hinaspa allin takyaq kanaykichikpaq’, nispa (1 Ped. 5:10).

17. ¿Imatam premiota hina chaskisun Diospa yachachikuyninta hinalla chaskispaqa?

¹⁷ Huk kutipim Pedroqa Jesuspa qayllanpi kayta pinqakurqa (Luc. 5:8). Ichaqa Jehova Diospas, Jesuspas kuyakuywan yanapasqanraykum Pedroqa Jesusta wañukunan punchawkama qatikurqa. Chayna kasqanraykum Pedroqa “señorninchik Jesucristopa wiña-wiñay gobiernonman” yaykurqa (2 Ped. 1:11). ¡Mayna sumaqmi Pedropa chay chaskisqanqa! Sichu qampas Pedro hina Jehova Diospa yachachisusqaykita hinalla chaskikunki hinaspaqa premiota hinam wiñay kawsayta chaskinki. Arí, ‘Diospi iñisqaykiraykum salvasqa’ kanki (1 Ped. 1:9).