1. ¿Imatam Pedro nirqa milagrota ruwaspan Jesus achkallaña challwakunata rikurirachiptin?

 PEDROQA tukuy tutam challwa hapiypi karqa, ichaqa manam chullallatapas hapirqachu. Chayna kachkaptinmi Jesus nirqa: “Botekita uku-uku yakupa kasqanman qachiy hinaspa mallaykichikta mastaychik challwanaykichikpaq”, nispa (Luc. 5:4). Pedroqa iskayrayarqam chaypi challwata hapinanmantaqa, ichaqa hinatam Jesusta kasukurqa. Achkallaña challwata hapiruptinkum mallankupas llikikuyta qallaykurqa. Chaynaña challwata Diospa atiyninwan hapirusqankumanta cuentata qukuspankum Pedropas hinaspa chaypi kaqkunapas anchata admirakurqaku. Chaymi Jesusta Pedro nirqa: “Señor ñuqamanta asurikuy, ñuqaqa huchasapa runam kani”, nispa (Luc. 5:​6-9). Pedroqa huchasapapaq hapikuspanmi Jesuspa qayllanpi kaytapas pinqakurqa.

2. ¿Imatam Jehova Diosmanta yachanchik Pedro imayna kasqanmanta yachaspa?

² Pedroqa ‘huchasapa runamá karqa’. Bibliapim willawanchik Pedroqa imatapas rimaruspanña utaq imatapas ruwaruspanña chayraq ñakakusqanmanta. ¿Pedro hinachu qampas wakinpiqa pantanki? ¿Unay tiempoña kallpanchakuspaykipas manaraqchu atinki imapas mana allin ruwayniki atipayta? Chayna tarikuspaykiqa amayá hukmanyaychu. Pedromanta yachasqanchikmi yanapasunki .Yuyaymanay Pedropa pantasqankunapi. Munaspanqa Jehova Diosqa manapaschá Pedropa pantasqankunata bibliapiqa qillqachinmanchu karqa. Ichaqa qillqachirqam ñuqanchikpas yachananchikpaq (2 Tim. 3:​16, 17). Bibliapim willawanchik Pedroqa ñuqanchik hina pantaq kachkaptinpas Diosqa chaskiykusqanmanta. Chaywanmi yachanchik Jehova Diosqa pantaptinchikpas hinalla kuyawasqanchikta. Payqa astawanqa kusikun pantaspanchikpas hinalla kallpanchakusqanchikwanmi.

3. ¿Imanasqan hinalla kallpanchakunanchik Jehova Diosta servinapaq?

³ ¿Imanasqataq pantaspapas hinalla kallpanchakunanchik? Imatapas hinalla ruwaspaqa astawan allintañam ruwanchik. Piensarisun  arpata tocay munaqpi. Qallariypiqa panta-pantatam takikunata tocan. Ichaqa tiempo pasasqanman hina kallpanchakuspanqa miskitañam tocan. Allin tocaqña kaspanpas wakinpiqa pantanqaraqchá. Chaywanpas mana hukmanyaspanmi hinalla kallpanchakun. Yaqa chaynam ñuqanchiktapas pasawachwan Dios serviyninchikpi. Allinña kachkaspapas wakinpiqa pantasunraqmi. Ichaqa mana hukmanyaruspam hinalla kallpanchakuna. Wakinpiqa chayllam imatapas rimarunchik utaq ruwarunchik, chaymantañam ñakapakunchik. Chaywanpas mana hukmanyaruspa hinalla kallpanchakuptinchikqa Jehova Diosmi yanapawasun (1 Ped. 5:10). Chaypaqyá Pedropa hinalla kallpanchakusqanmanta yachaykusun. Pantaq runa kaptinpas Pedrotaqa Jesusmi llakipayaykurqa, chayta yachasqanchikqa ñuqanchiktapas kallpanchawanchikmi Jehova Diosta hinalla servinapaq.

4. ¿Imayna runapaqmi Pedroqa hapikurqa, ichaqa imaynatam Jesusqa kallpanchaykurqa? (Rimarimuytaq Lucas 5:​5-10 nisqanmantapas).

⁴ Bibliapiqa manam willawanchikchu imanasqa Pedro huchasapapaq hapikusqanmanta (leey Lucas 5:​5-10). Wakinpiqa llumpaytapaschá imapipas pantarqa. Jesusmi cuentata qukururqa Pedroqa manchakuq kasqanmanta, yaqapaschá chaynaqa karqa mana atisqanpaq hapikusqanrayku. Chaywanpas Jesusqa manam iskayrayarqachu Pedroqa Diosman sunqu kay atinanmanta. Chaymi kuyakuyllawan nirqa: “Amaña manchakuychu”, nispa. Jesuspa chaynata niykusqanwanmi Pedroqa tukuy tiempo kallpanchasqa karqa. Chaymanta qipataqa, Pedroqa wawqin Andrespiwanmi challwa hapiyta saqiruspanku Jesuswan kuskaña puriyta qallaykurqaku. Jesuswan purinankupaq tantiakusqankuraykum achka bendicionkunata chaskirqaku (Mar. 1:​16-18).

5. ¿Imakunatam Pedroqa rikurqa Jesusta hinalla qatisqanrayku?

⁵ Pedroqa Jesuspa qatiqnin kasqanraykum admirakuypaq tukuy ima ruwasqanta qawarqa. Rikurqam unquqkunata Jesus hampisqanta, demoniokunata qarqusqanta hinaspa wañusqakunata kawsarichisqanta (Mat. 8:​14-17; Mar. 5:​37, 41, 42). b Rikurqataqmi kamachiqña Jesus kaspan hatun atiyniyuq kanantapas. Chaytaqa manam haykaqpas qunqarqachu (Mar. 9:​1-8; 2 Ped. 1:​16-18). Arí, Pedroqa haykaqpas mana rikusqan kaqkunatamá rikurqa. ¡Diosta servinanpaq hinalla kallpanchakusqanraykum tukuy chaykunata rikurqa! Manachayqa, manam rikunmanchu karqa.

6. Jesusta unayña qatikuchkaspanpas, ¿imakunapiraqtaq Pedroqa pantarqa?

⁶ Tukuy chaykunata qawachkaspanpas, uyarichkaspanpas, Pedroqa hinallaraqmi imakunapipas pantaq. Bibliapi willakusqanman hina ñakarichispa wañuchisqa kananmanta Jesus  qatiqninkunaman willaptinmi, Pedroñataq qaqcharurqa (Mar. 8:​31-33). Chaymantapas, Pedrowan wakin apostolkunaqa sapa kutim atipanakurqaku mayqinninku ancha riqsisqa kanankumanta (Mar. 9:​33, 34). Jesusta presochasqanku tutapas, Pedroqa espadawanmi huk runapa rinrinta qurururqa (Juan 18:10). Hina chay tutallataqmi Pedroqa runakunata manchakusqanrayku Jesustapas kimsa kutikama negarurqa (Mar. 14:​66-72). Chay ruwasqanmantam aminankama waqakurqa (Mat. 26:75).

7. Kawsariramuspanpas, ¿imata ruwananpaqmi Jesusqa Pedrota nirqa?

⁷ Jesusqa Pedrowanqa manam piñakururqachu, aswanqa kallpanchaykurqam. Chaymi kawsariramuspanpas nirqa hinalla kuyaspanqa ovejachankunata michinanpaq (Juan 21:​15-17). Hinaptinmi Pedroqa Jesuspa kamachisqanta kusikuywan ruwarqa. Chaymi Jerusalenpi Pentecostes fiesta kaptinpas iñiqmasinkunawan karqa, hinaspam chuya espirituta chaskirqa.

8. ¿Imapim Pedroqa pantarurqa Antioquia llaqtapi?

⁸ Chuya espirituta chaskiruspanpas Pedroqa hinallam kallpanchakunan karqa imapipas pantasqanta cambiananpaq. 36 watapim Pedro qawarqa qari kayninpi mana señalasqa Corneliomanpas atiyninta Dios quykusqanta. Chaywanmi Pedroqa cuentata qukururqa ‘Diosqa mana pimanpas sayapakusqanta’ hinaspa mana judio kaqkunapas Diospa llaqtanman yaykukamuy atinankumanta (Hech. 10:​34, 44, 45). Chaymantapacham Pedroqa huklaw nacionniyuqkunawanpas kuskaña mikurqa, manamá chaytaqa ñawpaqtaqa ruwaqchu (Gal. 2:12). Jesusta qatikuq wakin judiokunam ichaqa hinallaraq piensaqku huklaw nacionniyuqkunawan kuska mikuyqa mana allin kasqanta. Chayna piensaq judiokunam Antioquia llaqtaman chayarurqaku, paykunata rikuykuspam Pedroqa huklaw nacionniyuq iñiqmasinkunawan kuska mikuytaqa manaña munarqachu. Chaytaqa yaqapaschá ruwarqa judiomasinkuna hukmanyanankuta mana munasqanrayku. Pedropa iskay uya kasqanta qawaykuspanmi apostol Pablo lliwpa qayllanpi qaqcharurqa (Gal. 2:​13, 14). Chaywanpas Pedroqa hinallam kallpanchakurqa Diosta servinanpaq. ¿Imataq yanaparqa?

9. Juan 6:​68, 69 nisqanman hinaqa, ¿imatam Pedro ruwarqa Diosman sunqu kasqanrayku?

⁹ Pedroqa Diosman sunqum karqa. Manam imaña pasaptinpas Jesus qatikuytaqa saqirqachu. Huk kutipim Jesuspa yachachisqanta qatiqninkuna mana entienderqakuchu (leey Juan 6:​68, 69). Chaymi achka qatiqninkuna Jesustaqa chaylla saqirurqaku. Paykunaqa manam tapukuykurqakuchu allinta entiendeykachikunankupaqqa nitaqmi suyarqakuchu astawan yachaykachikunankupaqqa. Pedrom ichaqa mana saqirqachu. Aswanmi llapallankupa qayllanpi Jesusta nirqa: “Rimasqaykikunaqa wiñaypaq kawsachikuqmi”, nispa.

10. ¿Imatam Jesusqa Pedrota nirqa paymanta mana iskayrayasqanrayku? (Qawaytaq dibujotapas).

¹⁰ Jesusqa manam haykapipas Pedrotaqa qipancharqachu. Jesusqa yacharqañam wañukunan tuta Pedropas hinaspa wakin apostolninkunapas saqirunanta. Chaywanpas, Jesusqa manam iskayrayarqachu Pedro hinalla Diosman sunqu kananmanta, chaymi nirqa kutiramuspa iñiqmasinkunata kallpanchananpaq (Luc. 22:​31, 32). Jesusqa yacharqam ‘allin ruwayta runa munaptinpas cuerpoqa mana kallpayuq kasqanta’ (Mar. 14:38). Chaymi Jesusqa Pedro negaruchkaptinpas mana qipancharurqachu. Chayraykum kawsariramuspanpas Pedrowan parlarqa, yaqachusmi sapanpi (Mar. 16:7; Luc. 24:34; 1 Cor. 15:5). Chayna tupaykusqankuqa maynatachá Pedrotaqa kallpancharqa manaña llakisqa kananpaq.

11. ¿Imaynatam Jesusqa Pedrota entiendechirqa Jehova Dios haykapipas cuidananmanta?

¹¹ Jesusmi Pedrota entiendechirqa Diosta servispanqa imanmantapas mana usunanpaq. Chaytam Pedro yacharurqa achka challwata hapinanpaq  yapamanta Jesus yanapaykuptin, chaytaqa wakin apostolkunapas qawarqakum (Juan 21:​4-6). Chaywanmi Pedroqa cuentata qukururqa Jehova Diosqa imapas necesitasqanta qunanmantapuni. Chay milagrota qawaspanqa Pedroqa yuyarirqachá ‘Diospa munayninta puntata ruwaqkunata’ Dios cuidananmanta Jesuspa nisqanta (Mat. 6:33). Chayta yacharuspanmi Pedroqa challwa hapiypi llamkananmantaqa Diosmanta willakuypiña karqa. Chaymi 33 watapi Pentecostes fiestapipas mana manchakuspan Diosmanta willakurqa, hinaptinmi waranqantin runakuna taytanchikpa ñanninmanña churakurqaku (Hech. 2:​14, 37-41). Chaymanta qipatapas Pedroqa Samaria llaqtayuqkunatam, mana judio runakunatam Jesuspa qatiqnin kanankupaq yanaparqa (Hech. 8:​14-17; 10:​44-48). Yachamusqanchikman hinam Jehova Diosqa tukuy rikchaq runakunata Pedrowan yanaparqa. ¡Arí, Pedroqa ancha valorniyuqmá Diospaqqa karqa!

12. Unayña mana allin ruwayninchikta utaq mana allin munayninchikta mana atipaptinchikqa, ¿imaynatam kallpanchawanchik Pedromanta yachasqanchik?

¹² Ñuqanchiktapas Jehova Diosqa yanapawasunmi hinalla payta servinapaq. Ichapas unay tiempoña kallpanchakuchkanchik imapas mana allin ruwayninchikta utaq munayninchikta atipanapaq. Chaywanpas manaraq atipaspaqa piensanchikchá manaña Diosta servinapaq hina kasqanchikta. Nikunchikmanpaschá Pedromantapas aswan huchasaparaq kasqanchikta. Chaywanpas Jehova Diosqa manam qipanchawasunchu, aswanqa hinallam yanapawasun servinapaq (Sal. 94:​17-19). Rimarisunchik huk iñiqmasinchikmanta. Payqa manaraq Diosta riqsichkaspanmi unay wata qarimasillanwan kakuq. Chay mana allin ruwasqanta qalaypaq saqiruptinpas, wakin kutikunaqa chay mana allin munaysi umanman chayamunraq. ¿Imataq yanapan mana hukmanyaspan hinalla Diosta servinanpaq? Kikinmi nin: “Jehova Diosmi kallpanchallawanchik”, nispa. Ninraqmi: “Atiyninwan Diosninchik yanapawasqanraykum cuentata qukuruni Diospa ñanninpi hinalla kayta atinaymanta. Jehova Diosqa paypaq ruwasqaykunatam hinalla kusikuywan chaskichkan, pantaptiypas manam qipancharuwanchu aswanqa kallpanchaykullawanmi”, nispa.

13. Manchapakuq kaspaqa, ¿imatam Pedro hina ruwachwan? (Rimarimuytaq Hechos 4:​13, 29, 31 nisqanmantapas, qawaytaq fotokunatapas).

¹³ Yachamusqanchikman hinam, Pedroqa wakinpiqa runata manchakusqanrayku mana allinta ruwarurqa. Qipakunatam ichaqa Jehova Diosta mañakusqanrayku manaña manchakuq karqa (leey Hechos 4:​13, 29, 31). Ñuqanchikpas  mana manchakuq kaytaqa atichwanmi Pedro hina Diosta mañakuspaqa. Chaypaq rimaykusun Horst iñiqmasinchikmanta. Payqa warmallaraq kaspanqa kawsakurqa Hitlerpa kamachisqan tiempopim Alemania nacionpi. Chay tiempopim gobierno kamachirqa llapa runakuna “Hitlerllam salvawasun”, nispa saludanakunankupaq. Chaymi Horstpas escuelanpi hikutasqankurayku wakinpi chaynata saludakurqa. Chay ruwasqanmanta tayta-maman qaqchananmantaqa Jehova Diostam warmachanpiwan kuska mañakurqaku mana manchakuq kananpaq Dios yanapaykunanpaq. Chaynata tayta-maman yanapasqanrayku hinaspa Jehova Diospi hapipakusqanraykum tiempopa risqanman hina Horstqa manaña manchakurqañachu. Chaymi yuyaqña kaspan nirqa: “Cuentatam qukuni Jehova Diosqa mana haykapipas saqillawasqanta”, nispa. c

14. ¿Imaynatam punta apaqkunaqa kallpanchanmanku Diosmanta karunchakuy munaq iñiqmasinchikkunata?

¹⁴ Jehova Dioswan Jesusqa pantaruptinchikpas manam haykaqpas saqiwasunchu. Pedroqa Jesusta negarusqan qipallatam tantiakunan karqa Jesusta hinalla qatinanpaq utaq manañapas. Ichaqa Jesusmi taytanta mañakurqaña imaña kaptinpas Pedro mana hukmanyananpaq. Paypaq mañakusqantam Pedroman Jesus willarqa, hinaspapas nirqam kutiramuspan iñiqmasinkunata kallpanchananmanta mana iskayrayasqanta (Luc. 22:​31, 32). ¡Jesuspa chayna nisqanqa Pedrotaqa anchatachá kallpancharqa! Wakinpim ñuqanchikpas Pedro hina tantiakunanchik kanqa. Chayna tarikuptinchikqa Jehova Diosmi punta apaqkunawan kallpanchawanchikman hinalla payta servinapaq, paykunaqa kuyakuywanmi yanapaykuwasun (Efes. 4:​8, 11). Unay wataña kaq punta apaq Paulmi kallpanchakullan iñiqmasinchikkunata consuelaykunanpaq. Pipas Diosmanta karunchakuq hina kaptinqa yuyarichinmi  hatun kuyakuywan llaqtanman Diosninchik pusamusqanta. Chaymantapas yuyarichinmi pantaruptinpas Diosqa hinalla kuyasqanmanta hinaspa mana haykapipas saqinanmanta. Chayna rimapayasqanraykum hukmanyasqa achka iñiqmasinchikkuna Diospa llaqtanpi hinalla kachkanku Jehova Diospa yanapakuyninwan.

15. ¿Imaynatam Mateo 6:33 nisqan cumplikurqa Pedropa vidanpi hinaspa iñiqmasinchik Horstpa vidanpi?

¹⁵ Yacharamunchikmi Jehova Diosqa Pedromanpas hinaspa wakin apostolkunamanpas imapas pisipuqninta qusqanta. Ñuqanchikmanpas imapas pisipuwaqninchiktam quwasun paypa munayninta puntapi churaptinchikqa (Mat. 6:33). 13 parrafopi rimamusqanchik iñiqmasinchik Horstmi iskay kaq hatun guerra tukuruptin tantiakururqa precursor kananpaq. Ichaqa wakcha kasqanraykum piensarqa llamkasqanrayku precursor kayta mana atinanmanta. Chaywanpas, ¿imatam ruwarqa? Llaqtan-llaqtan watukuq iñiqmasinchik congregacionninta watukamusqan semanam tantiakururqa paypas chay semana sapa punchaw willakunanpaq. Piensarqam chaynata ruwaptinqa Jehova Diosqa yanapaykunanta. ¡Chaynamá karqa! Semana tukuytam llaqtan-llaqtan watukuqqa sobrechapi qullqita quykurqa, ichaqa manam nirqachu pi qusqanmanta. Chay qullqichaqa yanaparqam achka killa precursor kananpaq. Chaywanmi iñiqmasinchik Horstqa cuentata qukururqa Jehova Diosqa pisipuqninta haykapipas qunanmanta. Chaymantapacham Diospa munayninta puntapi churarqa (Mal. 3:10).

16. ¿Imatam ñuqanchikpas Pedropa vidanmanta hinaspa qillqasqan cartakunamanta yachachwan?

¹⁶ ¡Pedroqa mayna kusisqachá tarikurqa paymanta karunchakunanpaq nichkaptinpas Jesus mana saqisqanwanqa! Jesusqa hinallam Pedrotaqa yanaparqa Diosman sunqu kananpaq chaynataq iñiqkunapa qatipakunan kananpaq. Pedrota Jesuspa imayna yanapasqanmantaqa ñuqanchikpas tukuy imatam yachachwan. Chay yachasqankunatam Pedropas iñiqmasinkunaman cartakunapi apachirqa. Chaytam kunan riqsinchik 1 kaq Pedro hinaspa 2 kaq Pedro qillqa nispa. Hawantam yachasunchik chay cartakunapi ima yachachikuykuna qillqasqanmanta hinaspa imaynata ruwayman churanamanta.