1, 2. ¿Imanasqataq Sansonpa vidanmanta yachayqa allinninchikpaq?

 SANSONMANTA rimaptinchikqa ¿imayna kasqantataq chaylla piensanki? Yaqapaschá kallpasapa kasqanpi. Arí, chaynam karqa. Ichaqa kallpasapa kaspanpas huk kutipim llumpayta pantarurqa, chayraykum wañukunan punchawkama sasachakuypi karqa. Chaywanpas Jehova Diosqa allin iñiyniyuq kasqantam qawarqa. Chaymi Sansonpa vidanmanta bibliapi qillqachirqa paymanta yachanapaq.

² Jehova Diosqa Sansonwanmi Israel runankunata yanaparqa hatun admirakuypaq kaqkunata ruwachispan. Chaymi wañukusqan unay wata qipatapas Sansonpa sutinta Pablowan qillqachirqa iñiyniyuq runakunamanta rimaspan (Heb. 11:​32-34). Sansonqa Jehova Diospim hapipakurqa llumpay sasachakuypiña kaspanpas. Kay yachachikuypim yachasun Sansonmanta yachayqa imaynata kallpanchawasqanchikta hinaspa imaynata qatipakunamanta.

3. ¿Imata ruwananpaqmi Sansonqa kamachisqa karqa?

³ Sansonpa nacesqan watakunaqa Filistea runakunam Israel runakunata munaychakuspa ñakarichirqa (Juec. 13:1). Filistea runakunaqa mana llakipayakuq runakunam karqaku. Chaymi Israel runakunataqa llumpayta ñakarichirqaku. Chayta qawaspam Jehova Diosqa Sansonta kamachirqa ‘Israel runakunata Filistea runakunapa makinmanta librananpaq’ (Juec. 13:5). ¡Jehova Diospa chay kamachisqanqa Sansonpaqqa llumpay sasachá karqa! Chaymi Sansonqa Diospi hapipakunan karqa chay ruwayta atinanpaq.

4. ¿Imaynatam Jehova Diosqa Sansonta yanaparqa? (Rimarimuytaq Jueces 15:​14-16 nisqanmantapas).

⁴ Huk kutipim Sansonpa Jehova Diospi hapipakusqan sutilla karqa. Lei lawmanmi achkallaña Filistea soldadokuna rirqaku Sansonta hapiq, yaqachusmi Leiqa Juda lawpi karqa. Filistea soldadokunata qawaykuspam Juda runakunaqa llumpayta mancharikurqaku. Chaymi Sansonta hapiruspa entregaykurqaku, Israelmasinku kachkaptinpas.  Iskay musuq waskakunawan chaqnaruspam Filistea runakunaman aparurqaku (Juec. 15:​9-13). Chayarachiptillankum ‘Jehova Diospa atiynin Sansonman huntaykurqa hinaptinmi kallpasapa rikurirurqa’, chaymi chaqnasqanku waskatapas tipiparurqa. Chaymantam Sansonqa “chayllaraq wañusqa asnopa kakichunta tarirurqa, chaywanmi 1.000 Filistea runakunata wañurachirqa” (Leey Jueces 15:​14-16).

5. ¿Imallawanmi Sansonqa pelearqa Jehova Diospi hapipakusqanrayku?

⁵ ¿Imanasqataq Sansonqa asnopa kakichunta servichikurqa peleananpaq? Peleananpaq imata servichikuspanpas Sansonqa manam iskayrayarqachu Jehova Dios yanapananmanta. Chaymi payqa asnopa kakichunwanpas pelearqa. Arí, Diosman sunqu Sansonqa imapas makinpi kaqtam servichikurqa Diospa munayninta ruwananpaq. Jehova Diospi hapipakusqanraykum Filistea runakunata vencerurqa.

6. ¿Imamantam mana iskayrayananchikchu Diospa llaqtanpi imatapas ruwanapaq niwaptinchikqa?

⁶ Jehova Diosqa ñuqanchikmanpas kallpatam quwasun ima ruwaypipas yanapakunapaq punta apaqkuna niwaptinchik, chay ruway sasaña rikchakapuwaptinchikpas. Payqa mana piensasqanchikman hinam yanapaykuwasun. Arí, Jehova Diospi hapipakuptikiqa payqa munayninta cumplinaykipaqmi Sansonta hina yanapasunki. Amayá chaymantaqa iskayrayaychu (Prov. 16:3).

7. ¿Pikuna hinam ñuqanchikpas Jehova Diospi hapipakuna?

⁷ Huñunakunanchik wasita ruwaq iñiqmasinchikkunapas Sanson hinam Jehova Diospi hapipakunku. Ñawpaqtaqa Diospa llaqtanmi lliw huñunakuna wasikunata hinaspa betel wasikunata ruwaq. Kunanmi ichaqa achka testigokuna kasqanchikrayku manaña chaynañachu. Huñunakunanchik wasi ruwaymanta encargakuqkunam Diosninchikta mañakurqaku achka wasikuna kananpaq imata ruwanankumanta. Chaymi tantiarurqaku atikuptinqa ruwasqa wasikunataña rantinankupaq chaynapi allichaykunallankupaqña. Iñiqmasinchik Robermi unay wataña llamkan huñunakunanchik wasikuna ruwaypi, paymi nin: “Qallariypiqa sasam karqa chay musuq kamachikuyman hina ruwayqa. Ñuqaykuqa ñawpaqta ruwasqaykumanmi amañarurqaniku. Chaywanpas huñunakuna wasi ruwaypi llamkaq iñiqmasinchikkunaqa chay musuq kamachikuyman  hinañam ruwarqaku. Hinaptinmi Jehova Diosqa bendeciwarqaku”, nispa. Chaywanmi cuentata qukunchik llaqtanpi ima cambiotapas ruwanankupaqqa Jehova Dios yanapasqanta, chaynapi munaynin ruwakunanpaq. Chaymi nikunanchik: “¿Imatapas tantianay kaptinqa Jehova Diospa yachaynintachu maskani? ¿Kallpanchakunichu musuq kamachikuyman hina ruwanaypaq?”, nispa.

8. ¿Imatam Sansonqa ruwarqa yakunayaruptin?

⁸ ¿Yuyachkankichu imakunataraq Sanson ruwasqanta? Payqa huk kutipim leonta wañurachirqa, chaymantapas 30 Filistea runakunatam Asquelon llaqtapi wañurachirqa (Juec. 14:​5, 6, 19). Sansonqa cuentatam qukurqa chaykunataqa Jehova Diospa yanapakuynillanwan ruwasqanta. Chaymantapas Sansonqa huk kutipim 1.000 Filistea runakunata wañurachisqanrayku yaqalla yakumanta wañururqa, chay kutipipas Diospim hapipakurqa. Kikinmanta yakuta maskananmantaqa Jehova Diostam mañakurqa yakuta quykunanpaq (Juec. 15:18).

9. ¿Jehova Diosqa uyariykurqachu Sansonpa mañakusqanta? (Rimarimuytaq Jueces 15:19 nisqanmantapas).

⁹ ¿Jehova Diosqa uyariykurqachu mañakusqanta? Arí, uchkumantam yakuta lluqsirachimurqa. Hinaptinmi chay yakuta tomaykuspan “Sansonqa kallpanchakururqa” (leey Jueces 15:19). Chay yakuqa hinallachusmi unay watakuna lluqsimurqa, chaychusmi Diosmanta willakuq Samuelpas Jueces librota qillqaspan chay yakumanta rimarqa. Israel runakunaqa chay yakuta qawaspankuqa yuyariqkuchá Jehova Diospi hapipakuptinkuqa payqa ima sasachakuyninkupipas yanapaykunanmanta.

10. ¿Imatam ñuqanchikpas ruwananchik Jehova Dios yanapawananchikpaq? (Qawaytaq fotokunatapas).

¹⁰ Sanson hinam ñuqanchikpas Jehova Diospa yanapakuyninta maskananchik. Ima ruwayta yachaspapas utaq Diospa llaqtanpi imapi yanapakuspapas hinallam necesitanchik Diospa yanapakuyninta. Riqsikunanchikmi Diospi hapipakuspalla imatapas allinta ruwanamanta. Sansonpas Diospa qusqan yakuta tomaruspallanmi yapamanta kallpayuqqa rikurirurqa. Chaynallataqmi ñuqanchikpas iñiyninchikpi allin takyasqa kanapaqqa Jehova Diosmanta hamuq yachachikuykunata lliwta estudiana (Mat. 11:28).

11. ¿Imatam ruwana Jehova Dios achkanpi bendeciwananchikta munaspaqa? (Rimarimuytaq iñiqmasinchik Alexeimantawan señoranmantapas).

¹¹ Rimarisunchik Rusia nacionpi yachaq iñiqmasinchik Alexeimanta. Paytam ñakarichichkanku Jehova Diospa testigon kasqanrayku. ¿Imataq yanapachkan hinalla aguantananpaq? Payqa warmichanpiwanmi Diosmanta allinta yachanankupaq sapa kuti estudianku. Chayraykum aguantachkan. Kikinmi willakurqa: “Tantiakurunim imay punchaw hinaspa imay hora bibliayta sapa punchaw leenaypaq hinaspa sumaqta estudianaypaq. Sapa tempranom warmichaypiwan sapa punchawpaq textonchikta leeniku hinaspam taytanchikta mañakuniku”, nispa. ¿Imatam Alexeimanta yachachwan? Ñuqanchikpas Jehova Diospim hapipakunanchik, manam kikillanchikpichu. Chaypaqqa biblianchiktam sapa punchaw leena, mañakunanchik, huñunakuykunaman rinanchik hinaspa Diosmanta willakunanchik. Hinaspaqa allin iñiyniyuqmi kasun. Chaykunata ruwaptinchikqa Jehova Diosmi achkanpi bendeciwasun chaynataq yanapawasun hinalla servinapaq. Sansonman kallpata qusqanman hinam ñuqanchikmanpas kallpata quwasun.

12. ¿Haykapim Sansonqa mana allinta tantiarurqa? ¿Imanasqan chayqa mana yanaparqachu Diospa munayninta ruwananpaq?

¹² Sansonqa ñuqanchik hina pantaq runam karqa. Chaymi huk kutipi Diospa kamachisqanta mana yuyarispan mana allinta tantiarurqa, chayraykum wañukunan punchawkama sasachakuypi tarikurqa. Israel runakunapa jueznin kachkaspanmi  “Sansonqa Sorec wayqupi yachaq Dalila sutiyuq warmita kuyarurqa” (Juec. 16:4). Dalilata manaraq riqsichkaspanqa Sansonqa Filistea warmiwanmi casarakuyta munarqa. Bibliapim nin Sansonpa chay tantiasqanqa “Jehova Diospa yanapakuyninwan kasqanta, payqa Filistea runakunawan peleaytam maskachkarqa”. Huk kutipiñataqmi Filistea lawpi Gaza llaqtata Sansonqa rirqa, hinaspam chuchumika warmipa wasinpi samarqa. Chay llaqtapi kasqanraykum Jehova Diosqa Sansonta yanaparqa llaqtapa punkunta apakunanpaq. Hinaptinmi Filistea runakunaqa facil venceyllaña karqaku (Juec. 14:​1-4; 16:​1-3). Ichaqa Dalilaqa manam Filistea warmichu karqa, yaqachusmi karqa Israel kastamanta. Chaymi Dalilawan casarakuyninqa mana yanaparqachu Filistea runakunata guerrapi ganananpaqqa.

13. ¿Imatam Dalilaqa ruwarqa kallpasapa kasqanmanta Sanson willananpaq?

¹³ Filistea runakunam Dalilawan Sansonta sumaqllata tapuchirqaku imaynanpi kallpasapa kasqanta yachanankupaq chaynapi wañuchinankupaq. Chayta yachanankupaqmi Dalilaman qullqita munachirqaku hinaptinmi payqa chaskikuykurqa. ¿Sansonqa manachu cuentata qukurqa warmim Dalila ima ruway munasqanta? ¿Llumpayta kuyarusqanraykuchu mana cuentata qukurqa? Ichapas. Dalila sapa kuti hikutapayasqanraykum Sansonqa willaykurqa imaynanpi kallpasapa kasqanta. Chaymi chukchanta ruturuptinku Sansonqa manaña kallpayuq rikurirurqa. Willakurusqanraykum Jehova Diosqa huk tiempo mana yanaparqachu (Juec. 16:​16-20).

14. ¿Ima sasachakuypim Sansonqa tarikurqa warmin Dalilapi confiasqanrayku?

¹⁴ Sansonqa Jehova Diospi confiananmantaqa warmin Dalilapim confiarqa. Chayraykum sasachakuypi tarikurqa. Manaña kallpayuq kasqanraykum Filistea runakuna hapiruspanku ñawintapas hurqururqaku, hinaspam Gaza llaqtaman aparuspanku carcelman hinarurqaku. Chaypim molino rumiwan trigota kutachirqaku.  Sansonqa ñawpaqtam chay llaqtapa punkunta aparurqa, kunanmi ichaqa sirvientenkuña karqa. Chaymantam Filistea runakunaqa hatun fiestata ruwarqaku Sansonta hapirusqankurayku. Taytachanku Dagonpaqmi animalkunata kañapurqaku “¡taytachanchik Dagonmi chiqniwaqninchik Sansonta makinchikman churaykun!”, nispanku. Chaymantam Sansontaqa carcelmanta pusaramurqaku paykunata asichinanpaq, chaynatam Sansonmanta burlakuchkarqaku hinaspa humillachkarqaku (Juec. 16:​21-25).

15. ¿Imatam Sansonqa ruwarqa kaqmanta Jehova Dios yanapaykunanpaq? (Rimarimuytaq Jueces 16:​28-30 nisqanmantapas, qawaytaq qaranpi kaq dibujotapas).

¹⁵ Sansonqa llumpayta pantaruspanpas manam hukmanyarurqachu, aswanqa hinallam kallpanchakurqa. Sunqunpiqa hinallam munarqa Jehova Diospa nisqanta cumpliyta. Sansontaqariki Diosqa kamachirqa Filistea runakunata chinkachinanpaqmi (leey Jueces 16:​28-30). Chaymi Sansonqa Jehova Diosta mañakurqa: “Diosnilláy kunanllañayá kallpata quykullaway […] Filistea runakunata wañurachinaypaq”, nispa. Diosqa Sansonpa mañakusqantaqa uyariykurqamá, hinaspanmi yapamanta kallpasapa kananpaq yanapaykurqa. Chay kutipim Sansonqa ñawpaqkunata wañuchisqanmantapas aswan mastaraq Filistea runakunata wañurachirqa.

16. ¿Imatam Sansonmanta yachachwan?

¹⁶ Sansonqa pantarusqanrayku sasachakuypi tarikuspanpas hinallam kallpanchakurqa Jehova Diospa nisqanta cumplinanpaq. Ñuqanchikpas imapipas pantaruspanchikqa manam hukmanyarunanchikchu, aswanqa hinallam kallpanchakuna. Pantarusqanchikraykuchá corregisqa kasunchik utaq manaña imapipas yanapakusunchu. Chaywanpas Jehova Diosqa manam qalaypaqchu qipanchawasun (Sal. 103:​8-10). Payqa Sansonta hinam yanapawasun munayninta hinalla ruwanapaq.

17, 18. ¿Imatam yachanchik iñiqmasinchik Maicolmanta? (Qawaytaq fotokunatapas).

¹⁷ Rimarisun musullaraq iñiqmasinchik Maicolta ima pasarusqanta. Payqa punta apaqkunapa yanapaqninmi hinaspa precursor regularmi karqa, chaymi taytanchikta servikuypi tukuy tiempo karqa. Ichaqa huk kutipim llumpayta pantarurqa. Chaymi congregacionpi ima ruwaypipas manaña yanapakunanpaq niykurqaku. Maicolmi willakun: “Manaraq chay pasawaptinqa Jehova Diostam tukuy kallpaywan kusisqallaña servikurqani, ichaqa pantarusqayrayku corregiwaptinkum mana valeqpaq hinaña hapikurqani. Yacharqanim Jehova Diosqa mana haykapipas saqiwananmanta, ichaqa nikuqmi kani: ‘¿Ñawpaqta hinachu Jehova Diosqa kuyawanqa? ¿Yaqachu ñawpaqta hina congregacionpi yanapakuyta atisaq?’”, nispa.

 ¹⁸ Iñiqmasinchik Maicolqa pantaruspanpas manam hukmanyarurqachu, hinallam kallpanchakurqa. Paymi nin: “Pantasqallaypi piensanaymantaqa Jehova Dioswan kaqmanta kuyachikunaypaqmi kallpanchakurqani. Chaypaqmi sunqumanta mañakuq kani hinaspa qillqanchikkunatapas estudiaspay yuyaymanaq kani”, nispa. Chayna ruwasqanraykum manapas unaymanta Maicolqa congregacionpi yapamanta yanapakuyta qallaykurqa. Kunanqa punta apaqñam hinaspa precursor regularñam. Paymi nin: “Iñiqmasinchikkunaqa hinallam yanapallawaq hinaspa kallpanchallawaq, astawanraqmi punta apaqkunaqa. Chaywanmi cuentata qukurqani Diosqa hinalla kuyallawasqanta. Kunanqa Diosninchik pampachaykuwasqanraykum hawkaña servini. Chay pasawasqanwanmi yacharuni Diosqa imapiña pantaruptinchikpas sunqumanta wanakuptinchikqa pampachaykuwananchikmanta”, nispa. Maicolmantam yachanchik pantarusqanchikmanta wanakuptinchikqa Diosqa munayninta hinalla ruwanapaq yanapawananchikmanta hinaspa bendeciwananchikmanta, chaypaqqa paypim hinalla hapipakuna (Sal. 86:5; Prov. 28:13).

19. ¿Imanasqam Sansonta Jehova Dios yanapasqanmanta yachayqa ñuqanchiktapas anchata kusichiwanchik?

¹⁹ Kay yachachikuypim yacharamunchik Sansonpa wakin ruwasqankunallamanta. Sansonqa pantaq kasqanraykum warmin Dalilaman mana willananta willaykurqa. Chay ruwasqanqa hucham karqa. Chaywanpas kallpanchakurqam Jehova Diosta hinalla servinanpaq. Chayraykum Diospas pampachaykuspan yapamanta kallpata qurqa admirakuypaq kaqta ruwananpaq. Diospaqqa Sansonqa allin iñiyniyuqmi karqa. Chaymi Hebreos 11 capitulopi iñiyniyuq runakunamanta qillqachispan Sansonpa sutintapas churachirqa. Ancha kusisqam tarikunchik taytanchik Jehova kuyawasqanchikmanta yachaspa hinaspa Sansonman hina kallpata quyta munawasqanchikmanta yachaspa. Payqa astawanraqmi yanapayta munawanchik sasachakuypi tarikuptinchikqa. Chaymi ñuqanchikpas Sanson hina confianzawan Jehova Diosta mañakunanchik kaynata nispa: “Dioslláy, amayá qunqarullawaychu. Diosnilláy, kunanllañayá kallpata quykullaway”, nispa (Juec. 16:28).