1, 2. ¿Imanasqataq allinninchikpaq hukkunaman imatapas quspa aswan kusisqa kanapaq Diospa unanchawasqanchikqa?

 JEHOVA DIOSMI unanchawarqanchik imatapas chaskispa kusisqa kanamantaqa imatapas quspa aswan kusisqa kanapaq (Hech. 20:35). Hukkuna imatapas quykuwaptinchikqa kusisqam tarikunchik. Chaywanpas hukkunarayku imatapas ruwaspanchikmi aswan kusisqaqa tarikunchik. Chaynata Dios unanchawasqanchikqa allinninchikpaqmi. ¿Imanasqa?

² Chayna unanchasqa kasqanchikraykum kikinchikmanta aswan kusisqa kayta atichwan. Hukkunata yanapanapaq tukuyta ruwaspaqa aswan kusisqam kasun. ¡Anchatamá kusikunchik chaynata Dios unanchawasqanchikmantaqa! (Sal. 139:14).

3. ¿Imanasqam biblia nin Jehova Diosqa kusisqa Dios kasqanta?

³ Bibliam niwanchik pipas imatapas quspa kusisqa kasqanmanta. Chaywanmi allinta entiendenchik Jehova Diosninchik imanasqa ‘kusisqa Dios’ kasqanta (1 Tim. 1:11). Paymanta aswan qukuykuqqa manam pipas kanchu. Apostol Pablopa nisqanman hinataqmi ‘pay kaptin kawsanchik, purinchik hinaspa kay pachapipas kachkanchik’ (Hech. 17:28). Chaymantapas “tukuy imapas allin kaqkunaqa hinaspa allinkuna chaskisqanchikqa” hamun Jehova Diosmantam (Sant. 1:17).

4. ¿Imataq yanapawasun aswan kusisqa kanapaq?

⁴ Chaynaqa, ¿imatam ruwachwan imatapas quspanchik aswan kusisqaraq kanapaq? Chaypaqqa Diospa qukuykuq kasqantam qatipakuchwan. Chaymantam kay yachachikuypi yachasun (Efes. 5:1). Yachasuntaqmi hukkunarayku imatapas ruwaptinchik mana agradecekuq kasqankupaq rikchakuwaptinchik  imata ruwanamantapas. Chay yachasqanchikkunam yanapawasun imatapas hinalla kusisqa qunapaq, chaynapi aswan kusisqaraq kanapaq.

JEHOVA DIOS HINA QUKUYKUQYÁ KASUN

5. ¿Imakunatam Dios quwanchik?

⁵ Diosqa qukuykuq kasqanraykum imatapas quwanchik. Manachá apukuna hinachu tukuy imayuq kasun. Chaywanpas mikunapaq, pachakunapaq hinaspa maypi yachanapaqmi Diosqa imapas necesitasqanchikta quwanchik (Sal. 4:8; Mat. 6:​31-33; 1 Tim. 6:​6-8). Tukuy chaykunataqa quwanchik manam obligasqachu. Chaynaqa, ¿imanasqataq quwanchik?

6. ¿Imatam yachanchik Mateo 6:​25, 26 nisqanmanta?

⁶ Jehova Diosqa kuyawasqanchikraykum imapas necesitasqanchikta quwanchik. Chaypaqyá qawaykusun Jesuspa ima nisqanta (leey Mateo 6:​25, 26). Jesusmi alton pawaqkunamanta rimaspan nirqa: “Paykunaqa manam tarpunkuchu nitaq cosechankuchu, manataqmi taqimanpas huñunkuchu”, nispa. Nirqataqmi: “Hanaq pachapi taytaykichikmi paykunataqa mikuchin. ¿Manachu qamkunaqa paykunamantapas astawanraq valenkichik?”, nispa. Chaywanmi nichkarqa Diospaqqa animalkunamantapas aswan valorniyuq serviqninkuna kasqanta. Animalkunata Dios cuidasqanta qawaspanchikmi mana iskayrayanchikchu ñuqanchiktapas cuidawananchikmanta. Payqa taytanchik kasqanraykum hinaspa kuyawasqanchikraykum imapas necesitasqanchikta quwanchik (Sal. 145:16; Mat. 6:32).

7. ¿Imata ruwaspam Jehova Dios hina qukuykuq kachwan? (Qawaytaq fotokunatapas).

⁷ Jehova Dios hina runamasinchikkunata kuyasqanchikraykum imapas necesitasqankuta atisqanchikman hina qunchik. ¿Riqsinkichu mikuyta utaq pachata necesitaq iñiqmasinchikta? Diosmi qamta servichikunman chay iñiqmasinchikta yanapananpaq. Diospa serviqninkunaqa astawanmi qukuykuq kayninkuta qawachinku imapas sasachakuykuna kaptin. Chaypaqyá yuyarisun coronavirus unquy kaptin iñiqmasinchikkuna imata ruwasqankumanta. Wakinkum mikuyta, pachata hinaspa tukuy imata necesitaqkunaman qurqaku. Chaymantapas achkam qullqichankuwan yanapakurqaku enteron pachapi sasachakuypi tarikuq iñiqmasinchikkunata yanapanankupaq. Paykunaqa Hebreos 13:16 nisqanman hinamá ruwarqaku. Chaypim nin:  “Allin ruwaytawan kapuqnikichikwan yanapanakuytaqa amayá qunqaychikchu. Chay ruwasqaykichikqa Diospa munasqanman hinam, yaqapas animalta nakapuspa qusqaykichik hinam”, nispa.

8. ¿Imakunapaqmi Jehova Dios kallpata quwanchik? (Rimarimuytaq Filipenses 2:13 nisqanmantapas).

⁸ Jehova Diosqa kallpatam quwanchik. Payqa mana tukuq atiyniyuqmi, chaymi mana amispa serviqninkunaman kallpata qun (leey Filipenses 2:13). Diostaqa mañakurqanchikchá ima tentacionmanpas mana wichiykunapaq, ima sasachakuytapas aguantanapaq utaq imatapas ruwanapaq kallpata quwananchikpaq. Tukuy chaykunapaq kallpata quwaptinchikqa apostol Pablo hinachá tarikurqanchik. Paymi nirqa: “Dios kallpata quwaptinmi tukuy imata ruwanaypaq kallpayuq kani”, nispa (Filip. 4:13).

9. ¿Imaynatam Jehova Diospa qukuykuq kasqanta qatipakuchwan? (Qawaytaq fototapas).

⁹ Ñuqanchikqa manamá Jehova Dios hina atiyniyuqchu kanchik pimanpas kallpata qunapaqqa. Chaywanpas Diospa qukuykuq kasqantam qatipakuchwan hukkunata yanapanapaq kallpanchikta servichikuspa. Ichapas yuyaq utaq unquq iñiqmasinchikta yanapachwan imapas rantiypi utaq wasinpi imapas ruwaypi. Atispaqa yanapakuchwantaqmi huñunakunanchik wasita limpiaypipas utaq allichaypipas. Chaykunapaq kallpanchikta servichikuspaqa iñiqmasinchikkunatam anchata yanapachkanchik.

10. ¿Imaynatam rimasqanchikwan hukkunata kallpanchachwan?

¹⁰ Rimasqanchikkunawanpas hukkunataqa kallpanchachwanmi. Pipas kallpanchanata utaq consuelanata necesitasqanta yachaspanchikqa mana pipas niwachkaptillanchikmi visitaykuchwan, celularwan qayaykuchwan utaq mensajetapas apaykachichwan. Imapas ninanchikmanta llumpayta preocupakunamantaqa imapas nisqanchik sunqumanta kanantam yuyarinanchik. Ichapas imallatapas kuyakuywan niykusqanchikwan hinalla Diosman sunqu kanqa utaq kallpanchasqa tarikunqa (Prov. 12:25; Efes. 4:29).

11. ¿Imaynatam yachanchik Jehova Diospa yachayninqa mana kikillanpaq kasqanta?

¹¹ Jehova Diosqa yachaytam quwanchik. Santiagom qillqarqa: “Mayqinnikichikpapas yachaynikichik pisilla kaptinqa Diostayá tukuy tiempo mañakuychik yachayta qusunaykichikpaq”, nispa. Nirqataqmi: “Payqa mana piñakuspa tukuy sunqunmanta achkanpi llapallanman quykuqmi”, nispa (Sant. 1:5). Arí, Diospa yachayninqa manam kikillanpaqchu, aswanqa hukkunamanmi achkanpi qun. Chaymantapas yachayta quwananchikpaq mañakuptinchikqa  Diosqa ‘manam piñakunchu’. Manataqmi yachayta necesitasqanchikta riqsikusqanchikmantaqa hukmanyachiwanchikchu. Aswanqa hinalla mañakunapaqmi kallpanchawanchik (Prov. 2:​1-6).

12. ¿Ima yachasqanchikkunatam hukkunamanpas yachachichwan?

¹² ¿Imaynatam Diosta qatipakuspa imapas yachasqanchikmanta hukkunaman yachachichwan? (Sal. 32:8). Chayllaraq Diosmanta willakuqkunata imayna willakunankupaq yachachispam. Punta apaqkunapas yanapaqninkutam hinaspa bautizasqa wakin iñiqmasinkutam congregacionpi imapas ruwayninkupi pacienciawan yachachinku. Chaymantapas wasikunata pirqaypi hinaspa allichaypi allin experienciayuq iñiqmasinchikkunam hukkunata yachachinku salonpi imatapas ruwanankupaq hinaspa allichanankupaq.

13. ¿Imaynatam Jehova Diosta qatipakuchwan hukkunata yachachispa?

¹³ Hukkunata yachachispaqa Jehova Diostam qatipakunanchik. Yachamusqanchikman hinam payqa yachaynintaqa achkanpi pimanpas qun. Ñuqanchikpas chayllaraq yachaqkunamanmi imapas yachasqanchikta yachachinchik. Pitapas yachachispanchikqa manam ninchikchu “yacharachiptiymi ñuqapa ruwasqayta qichuruwanqa” nispaqa. Manataqmi ninchikchu “kikinmantayá yachachun, manam ñuqataqa pipas yachachiwarqachu” nispaqa. Diospa llaqtanpiqa manamá mayqanninchikpas chaynataqa piensananchikchu. Yachasqanchikkunataqa manam yachachiyllachu-yachachinakunchik, aswanqa allinta yachachinapaqmi ‘tukuyta ruwanchik’ (1 Tes. 2:8). “Chaynapim paykunapas atinqaku hukkunaman allinta yachachiyta” (2 Tim. 2:​1, 2). Yachasqanchikkunata allinta yachachinakuspaqa llapallanchikmi yachayniyuq hinaspa aswan kusisqa kasun.

PIPAS MANA AGRADECEKUQ KASQANPAQ RIKCHAKUWAPTINCHIK

14. ¿Imaynam iñiqmasinchikkuna tarikunku imatapas ruwaykapusqanchikwan?

¹⁴ Iñiqmasinchikkunapaq imatapas ruwaykapuptinchikqa anchatam agradecekuwanchik. Ichapas papelchapi qillqaspanpas utaq imata ruwaspanpas agradecekuwasqanchikta qawachiwanchikman (Col. 3:15). Chayna agradecekusqankuwanmi aswan kusisqa tarikunchik.

15. ¿Imatam ruwananchik imapas ruwaykapusqanchikmanta mana agradecekuwasqanchikpaq rikchakuwaptinchik?

¹⁵ Ichaqa manamá llapallankuchu imapas ruwaykapusqanchikmantaqa agradecekuwasun. Ichapas tiemponchikwan, kallpanchikwan utaq qullqinchikwan pitapas yanaparuptinchik mana agradecekuq kasqanpaq rikchakuwachwan. Chayna kaptinqa, ¿imataq yanapawachwan hinalla kusisqa kanapaq hinaspa mana piñakurunapaq? Hechos 20:35 textopa ima nisqanta yuyariyninchikmi. Imatapas quspa kusisqa kayqa manam hukkuna agradecekuwasqanchikmantachu nitaq mana agradecekuwasqanchikmantachu. Imapas ruwapusqanchikmanta mana agradecekuq kasqankupaq rikchakuwaptinchikpas makinchikpim kachkan hinalla kusisqa quyqa. Chaypaq imakuna yanapawananchikmantayá qawaykusun.

16. ¿Imatam yuyarinanchik imatapas quspaqa?

¹⁶ Imatapas quspaqa Diosta qatipakusqanchiktayá yuyarisun. Payqa allin kaqkunatam llapallan runakunaman qun agradecekuptinkupas utaq mana agradecekuptinkupas (Mat. 5:​43-48). Jehova Diosmi prometewanchik ‘imatapas chaskiyta mana munaspalla’ quspanchikqa hatun premiota chaskinanchikmanta (Luc. 6:35). Chaynaqa, amayá hukmanyasunchu imapas ruwaykapusqanchikmanta pipas mana agradecekuwaptinchikqa. Hukkunarayku “kusikuywan”  imapas ruwaykapusqanchikmanta Dios bendeciwananchiktam yuyarinanchik (2 Cor. 9:7; Prov. 19:17).

17. ¿Imapiwanraqmi yanapawasun Diosta qatipakunapaq? (Rimarimuytaq Lucas 14:​12-14 nisqanmantapas).

¹⁷ Imatapas quypi Diosta qatipakunapaqqa yanapawasuntaqmi Jesuspa nisqanta kasukuypas (leey Lucas 14:​12-14). Manam imananchu kutichiwananchikta yachachkaspa mikunapaq invitayqa utaq imatapas quyqa. Ichaqa, ¿imatam ruwachwan imatapas chaskinanchikraykulla imapas qusqanchikta cuentata qukuruspaqa? Chayna kaptinqa Jesuspa nisqantam kasukuchwan. Paymi niwarqanchik mana kutichipuy atiwaqninchikkunawan qukuykuq kanapaq. Chayta ruwaspaqa Diosta qatipakusqanchikraykum kusisqa kasun. Chaymantapas kutichipuwananchikta mana suyaspanchikqa qusqanchikmanta mana agradecekuwaptinchikpas hinallam kusisqa qusun.

18. ¿Imam yanapawasun hukkunamanta mana allinta mana piensanapaq?

¹⁸ Amayá hukkunamantaqa mana allintaqa piensasunchu (1 Cor. 13:7). Imatapas ruwaykapusqanchikmanta mana agradecekuwaptinchikqa kaynatam nikuchwan: “¿Ciertotachu mana valoran icha agradecekuwaytachu qunqarurqa?”, nispa. Ichapas agradecekuq kaspanpas mana niyta atiwanchikchu. Yaqapaschá ñawpaqta hina hukkunarayku imatapas manaña ruwayta atisqanrayku pipas yanapaykuptin pinqakun. Iñiqmasinchikkunata sunqumanta kuyaspaqa manam paykunamantaqa mana allintaqa piensasunchu, hinaspapas hinallam kusisqa qusun (Efes. 4:2).

19, 20. ¿Imanasqataq pacienciakuq kayqa ancha allin? (Qawaytaq fotokunatapas).

¹⁹ Pacienciakuqyá kasun. Qukuykuq kaymanta rimaspanmi rey Salomon nirqa kaynata: “Tantaykita yakuman wischuy, punchawkuna pasaruptinpas kaqmantam tarinki”, nispa (Ecl. 11:1). Chayna nisqanmi yachachiwanchik wakin runakunaqa ‘punchawkuna pasaruptinña’ agradecekuwananchikta. Huk iñiqmasinchikta chayna pasasqanmantayá yachaykusun.

²⁰ Llaqtan-llaqtan watukuq iñiqmasinchikpa señoranmi chayllaraq bautizakuq iñiqmasinchik  Sandraman qillqaruspan tarjetachata quykurqa hinalla Diosman sunqu kananpaq. Pusaq wata pasaytañam Sandraqa contestaspan kaynata nirqa: “Tarjetachapi qillqamuwasqayki textopa nisqanmi sunquyman chayaruwarqa. Kunankamam chay nimuwasqaykiqa anchata yanapawarqa”, nispa. a Tukuy ima sasachakuykunapi tarikusqanmanta willakuspanmi kaynatawan qillqarqa: “Wakinpiqa Jehova Diosta serviytapas chaynataq paypaq tukuy ima ruwaytapas saqiruytam piensaq kani. Ichaqa qillqamuwasqaykipi bibliapa nisqanmi yanapawarqa hinalla Diosta servinaypaq. Kay pusaq watapiqa manamá imapas chaynataqa yanapawarqachu”, nispa. ¡Chay cartata chaskiruspanqa mayna kusisqachá tarikurqa llaqtan-llaqtan watukuq iñiqmasinchikpa señoranqa! Ñuqanchikpas hukkunarayku imatapas ruwaptinchikqa ichapas unaymantaña agradecekuwasun.

21. ¿Imanasqataq Diosninchikpa qukuykuq kasqanta qatipakuyninchikqa allinninchikpaq?

²¹ Yachamusqanchikman hinam Diosqa imatapas chaskinamantaqa imatapas quspa aswan kusisqa kaqta unanchawarqanchik. Arí, iñiqmasinchikkunata yanapaspanchikmá hawka tarikunchik, hinaspapas agradecekuwaptinchikmi kusisqa tarikunchik. Ichaqa agradecekuwaptinchikpas utaq mana agradecekuwaptinchikpas allinta ruwasqanchikraykum kusisqa kanchik. Imataña quspanchikpas 2 Cronicas 25:9 nisqantam yuyarinanchik. Chaypim nin: “Jehova Diosta chaymantapas astawanraqmi kutichipusunki”, nispa. ¡Manam pipas kanchu Dios hina qukuykuqqa! Qukuykuq kasqanchikmanta bendeciwasqanchikqa anchatam kusichiwanchik. Chayraykum Diosninchikpa qukuykuq kasqanta qatipakuyninchikqa allinninchikpaq.