1, 2. ¿Imakunaraykum Jehova Diosta serviqkunaqa kusisqa kanchik? (Rimarimuytaq Santiago 1:​22-25 nisqanmantapas).

 JEHOVA DIOSWAN kuyasqan churin Jesusmi kusisqa kananchikta munanku. Salmos 119:2 nisqanta qillqaqmi nirqa: “Mayna kusisqam Diospa nisqankunata kasukuqkunaqa, mayna kusisqam kamachikuyninkunata tukuy sunqunkuwan maskaqkunaqa”, nispa. Jesuspas nirqataqmi: “¡Kusisqaqa kanku Diospa palabranta uyarispa kasukuqkunam!”, nispa (Luc. 11:28).

² Jehova Diosta serviqkunaqa kusisqam kanchik. ¿Imanasqa? Astawanqa bibliata sapa punchaw leesqanchikraykum hinaspa yachasqanchikkunata kasukunapaq kallpanchakusqanchikraykum (leey Santiago 1:​22-25).

3. ¿Allinninchikpaqchu Diospa palabranta ‘kasukuyninchik’?

³ ¿Allinninchikpaqchu Diospa palabranta ‘kasukuyninchik’? Arí, Jehova Diosta kusichisqanchikta yachaspam kusisqa kawsakunchik (Ecl. 12:13). Diosta kasukuyqa yanapawanchiktaqmi familianchikpi kaqkunawan hawka kawsakunapaq hinaspa iñiqmasinchikkunawan allin amistad kanapaq. Qampas cuentatachá qukurqanki bibliapa nisqankuna imayna yanapasusqaykita. Chaymantapas, Diosta mana serviqkunapa ñakarisqankuta qawaspanchikmi tukuy chaykunamanta Diospa kamachikuyninkuna librawasqanchikmanta agradecekunchik. Rey Davidmi Diospa kamachikuyninkunamanta hinaspa tantiasqankunamanta rimaruspan nirqa: “Pipas kasukuqqa allin kaqtam chaskinqa”, nispa (Sal. 19:​7-11).

4. ¿Imanasqam wakinpiqa sasa kanman Diospa palabranpa nisqanta kasukuyqa?

⁴ Diospa palabranta kasukuyninchik allinninchikpaq kasqanta  yachaptinchikpas wakinpiqa sasam kanman kasukuyqa. Sapa punchaw tukuy ima ruwayniyuq kaspapas tiempochakunanchikmi bibliata leenapaq hinaspa estudianapaq, chaynapi ima ruwananchikta Diospa munasqanta entiendenapaq. Chayraykum kay yachachikuypi yuyarisun sapa punchaw bibliata leenapaq imakuna yanapawananchikmanta. Yachasuntaqmi leesqanchikpi piensanapaq hinaspa yachasqanchikta kasukunapaq imakuna yanapawananchikmantapas.

LEENAPAQYÁ TIEMPOCHAKUSUN

5. ¿Imanasqam ninchik Diosta serviqkunaqa sapa punchaw tukuy ima ruwayniyuq kasqanchikta?

⁵ Yaqa llapallan Diosta serviqkunam sapa punchaw tukuy ruwayniyuq kanchik. Bibliapa nisqanman hinam kikinchikpaq utaq familianchikpaq llamkananchik (1 Tim. 5:8). Achka iñiqmasinchikkunam unquq utaq yuyaq familiankuta cuidanku. Llapanchiktaqmi saludninchikpi cuidakunapaqpas tiempochakunanchik. Chaymantapas, congregacionpi tukuy ima ruwaykunapaqmi tiempochakunanchik. Astawanraqmi tiempochakunanchik Diosmanta willakunapaqqa. Tukuy ima ruwayniyuq kasqanchikrayku ichapas nikuchwan: “¿Imatataq ruwayman bibliata sapa punchaw leenaypaq, leesqaypi yuyaymananaypaq hinaspa yachasqaykunata kasukunaypaq?”, nispa.

6. ¿Imatam ruwachwan sapa punchaw bibliata leenapaq? (Qawaytaq fototapas).

⁶ Diosta serviqkunapaqqa bibliata leeymi “aswan allin”. Chayraykum mana saqinanchikchu (Filip. 1:10). Salmos libropa qallariyninpim nin kusisqa runaqa ‘Jehova Diospa kamachikuyninkunawan kusikusqanta hinaspa kamachikuyninkunata tuta-punchaw leespan yuyaymanasqanta’ (Sal. 1:​1, 2). Chaynaqa, tiempochakunanchikmi bibliata leenapaqqa. ¿Imay horam aswan allin kanman leenapaq? Chayqa sapakamamantam. Ichaqa sapa punchaw leenapaqmi chay tantiasqanchik horaqa kanan. Iñiqmasinchik Victormi nin: “Tempranon biblia leeymi gustawan. Manam tutapayta hatariy gustawasqanraykuchu, aswanqa  leeptiy mana imapas distraewasqanraykum. Chay horataqmi leesqayta aswan allinta entiendeni”, nispa. ¿Victor hinachu ninchik? Chaynaqa nikusun: “¿Imay horataq ñuqapaqqa bibliata leey aswan allin kanman?”, nispa.

LEESQANCHIKPIYÁ PIENSASUN

7, 8. Rikchanachiywan rimarimuy bibliata imayna leenamanta.

⁷ Imay hora biblianchikta leenapaq tantiaruspaqa manataqmi leeyllachu-leenanchik. Vidanchikpiqa sapa punchawmi imakunatapas leenchik. Achka kutita leespapas manam imatapas yuyanchikchu. Manamá chaynachu biblia leesqanchikwanqa kanan. Ichapas tantiakurqanchik sapa punchaw hayka capitulota leenapaq. Chayna tantiakusqanchikman hinamá ruwananchik (1 Cor. 9:26). Ichaqa manam leeyllachu-leenanchik yanapawananchikpaqqa. Chaynaqa, ¿imatawanraqtaq ruwananchik?

⁸ Piensarisun kaypi: Paraqa lliw plantakunapaqmi ancha allin. Ichaqa manam allpamanqa yaykunchu loco paraqa, manataqmi allinchu plantapaqpas. Llampuchallata paramuspanmi ichaqa allpaman yaykun. Chaynapim plantakunapas allinta wiñan. Chaynam bibliata apurawllamanña leeypas mana yanapawasunchu. Allimanta leespam ichaqa leesqanchikkunata yuyasun hinaspa yachasqanchikkunata kasukusun (Sant. 1:24).

9. ¿Imatam ruwachwan apurawllamanña biblia leesqanchikta cuentata qukuruspaqa?

⁹ ¿Imatam ruwawaq apurawllamanña biblia leesqaykita cuentata qukuruspaqa? Qatiqnin versiculokunata allimanta leey yuyaymananaykipaq hina. Amayá piensaychu yuyaymanay sasa kasqantaqa. Yuyaymanayqa leesqaykipi piensayllam. Ichapas mas tiempo estudiawaq yuyaymananaykipaqwan, utaqmi as versiculollata leeruspayki puchususqayki tiempo yuyaymanawaq. Suqta parrafopi rimamusqanchik Victormi nin: “Manam achka versiculokunatachu leeni, wakillanpim huk capitulomanpas chayani. Tempranon bibliata  leesqayraykum tukuy punchaw tiempo kan chay leesqaypi yuyaymananaypaq”, nispa. Imamantapas aswan allinqa manam mayna achkata leeychu, aswanqa yanapawananchikpaq hina leeymi (Sal. 119:​97, qaway “ Yuyaymananapaq tapukuykuna” niqta).

10. Rimarimuy bibliapi leesqaykita imayna kasukunaykimanta. (Rimarimuytaq 1 Tesalonicenses 5:​17, 18 nisqanmantapas).

¹⁰ Imay hora utaq hayka tiempo bibliaykita leespapas sapa kutim piensanayki chay leesqaykita imayna kasukunaykipi. Iskay-kimsa versiculota leeruspayki nikuy: “¿Imaynatam kay leesqay yanapawanman kunan utaq hamuq punchawkunapi?”, nispa. Ichapas leechkawaq 1 Tesalonicenses 5:​17, 18 (leey) nisqanta. Chayta leeruspaykim kaykunapi yuyaymanawaq: ¿Tukuy sunquywanchu Diosta mañakuni? ¿Hayka kutitataq mañakuni? ¿Imakunamantataq Diosta agradecekuni? Ichapas yuyariruwaq imakunamanta Diosta agradecekunaykimanta kimsata. Chaykunapi yuyaymananaykipaq huk ratollapas tiempochakuspaykiqa manam leeyllachu-leechkanki, aswanqa yachasqaykikunata kasukunaykipaqmi kallpanchakuchkanki. Sapa punchaw bibliata leesqaykiwan chaynata ruwaspaqa Jehova Diostam aswan allintaraq servinki. Ichaqa, ¿imatam ruwawaq tukuypi kallpanchakunaykimanta cuentata qukuruspaykiqa?

ATISQALLANCHIKTA RUWANAPAQYÁ TANTIAKUSUN

11. ¿Imanasqataq bibliata leespaqa wakinpi hukmanyaruchwan? Rimarimuy Santiago librota leeptinchik ima pasawananchikmanta.

¹¹ Bibliata leespaqa tukuypi kallpanchakunamanta cuentata qukuruspam wakinpiqa hukmanyaruchwan. Ichapas leeruchwan pimanpas sayapakuy mana allin kasqanmanta (Sant. 2:​1-8). Chaymi tantiakuruchwan hukkunawan imayna kasqanchikta cambianapaq. ¡Chayqa allinpunim! Paqarintinñataqmi leeruchwan rimasqanchikta controlakuy ancha allin kasqanmanta (Sant. 3:​1-12). Hinaspam wakinpi mana kuyakuywan rimasqanchikta cuentata qukuruspa tantiakuruchwan pitapas kallpanchanapaq hina allinta rimanapaq. Minchantinñataqmi leeruchwan Diosta mana yupaychaqkunapa amistadnin mana kanamanta (Sant. 4:​4-12). Hinaspam cuentata qukuruchwan wakin peliculakuna qawasqanchik hinaspa takikuna uyarisqanchik mana allin kasqanta. Tukuy chaykunapi cambiananchikmanta cuentata qukuruspaqa ichapas paqarintinqa hukmanyaruchwan.

12. ¿Imanasqam mana hukmanyanaykichu bibliata leespayki tukuy imapi kallpanchakunaykimanta cuentata qukuruspaqa? (Qawaytaq willakuytapas).

¹² Amayá hukmanyaychu tukuy imakunapi  kallpanchakunaykimanta cuentata qukuruspaqa. Tukuy chaykunamanta cuentata qukusqaykiwanmi sutilla kanqa biblia yanapasunaykita munasqayki hinaspa humilde kasqayki. a Yuyarinaykitaqmi bibliapa nisqanman hina “musuq runaña” kanapaq llapallanchik hinalla kallpanchakunanchiktapas (Col. 3:10). Chaynaqa, ¿imam yanapasunki biblia leesqaykita hinalla kasukunaykipaq?

13. ¿Imatam ruwachwan biblia leesqanchik vidanchikpi yanapawananchikpaq? (Qawaytaq fotokunatapas).

¹³ Biblia leesqanchikta kasukunapaqqa lliw leesqanchikta mana ruway atisqanchikta riqsikuymi yanapawasun (Prov. 11:2). Chaypaqqa ichapas imakunapi kallpanchakunamanta listata ruwaruchwan. Hinaspam hukta utaq iskayta akllachwan qatiqnin punchawkuna chaypi kallpanchakunapaq. ¿Mayqinkunatataq akllachwan?

14. ¿Imapi cambiananchikpaqmi puntata tantiakuchwan?

¹⁴ Puntatam tantiakuchwan facil kaqpi utaq imakuna cambiay necesitasqanchikpi kallpanchakunapaq. Imapi kallpanchakunapaq tantiaruspanchikñataqmi Índice de las publicaciones Watch Tower utaq Jehova Diospa testigonkunapa qillqankunapi maskanapaq niqpi chaymanta astawan maskachwan. Jehova Diosta mañakuspa nisun chay ruwayta atinanchikpaq kallpata quwananchikpaq (Filip. 2:13). Chaymantañataq yachasqanchikkunata kasukusun. Chaypi cambiasqanchikmanta cuentata qukuspanchikqa wakinkunapipas cambiananchikpaqmi kallpanchasqa tarikusun. Arí, manañapaschá anchatachu kallpanchakunanchik kanqa anotasqanchik kaqkunamanta wakinpi cambianapaqqa.

 BIBLIAPA NISQAN YANAPAWANANCHIKTAM SAQINANCHIK

15. ¿Imanasqataq bibliata leeq wakin runakuna hinachu mana kanchik? (Rimarimuytaq 1 Tesalonicenses 2:13 nisqanmantapas).

¹⁵ Wakin runakunam ninku bibliataqa achka kutikama leesqankuta. Ichaqa manam creenkuchu Diospa palabran kasqantaqa. Manataqmi leesqanku vidankupi yanapanantapas saqikunkuchu. Ñuqanchikqa manamá chay runakuna hinachu kanchik. Aswanqa apostolkunapa tiemponpi iñiqkuna hinam bibliaqa Diospa chiqap palabran kasqanmanta mana iskayrayanchikchu. Chayraykum nisqankunata kasukunapaq kallpanchakunchik (leey 1 Tesalonicenses 2:13).

16. Biblia leeyta sasachakuspanchikpas, ¿imatam ruwananchik yanapawananchikpaq?

¹⁶ Manamá facilchu bibliata leeyqa hinaspa tukuy ima nisqankunata kasukuyqa. Wakinpiqa manam tiempo haypawanchikchu leenapaq. Ichapas apurawllamanña leesqanchikrayku mana imatapas yuyanchikchu. Utaq tukuy imapi cambiananchikmanta cuentata qukuruspa hukmanyarunchik. Leenapaq imawanpas sasachakuptinchikqa Diosmi yanapawasun. Bibliata leespaqa vidanchikpi yanapawananchiktam saqikunanchik. Manam leeyllachu-leenanchik, aswanqa yachasqanchikkunata mana qunqaspam kasukunanchik. Chayraykum sapa punchaw bibliata leespaqa hinaspa yachasqanchikkunata kasukuspaqa kusisqa kasun (Sant. 1:25).