1. ¿Jesuspa ima ruwananmi hichpallapiña kachkan?

 HATUN cambiokuna kanan tiempom hichpallapiña kachkan. Ñamá Jesusqa lliw runakunata juzganqaña. ¿Imaynatam chayta yachanchik? Jesusmi nirqaña kamachiqña kaptin hinaspa ‘kay tiempopa tukupayninpi’ ‘ima señal’ kananmanta utaq enteron pachapi imakuna pasakunanmanta (Mat. 24:3). Chay ‘señal’ cumplikusqanta qawaspanchikmi yachanchik juzganan tiempo hichpallapiña kasqanta. Jesuspa chay nisqankunam kachkan Mateo 24 hinaspa 25 capitulopi, Marcos 13 capitulopi hinaspa Lucas 21 capitulopi.

2. ¿Imakunamantam kay yachachikuypi yachasun hinaspa imanasqa?

² Jesuspa juzganan tiempopaq listo kananchikpaqmi payqa willakurqa ovejakunamantawan cabrakunamanta, 10 sipaskunamanta hinaspa wayqakunapi qullqimanta rikchanachiyta. Sapa rikchanachiywanmi allinta entiendesun sapa runapa ruwasqanman hina Jesus juzgananmanta. Kay yachachikuypim yachasun chay rikchanachiykuna imakuna yachachiwasqanchikmanta. Puntatayá yachaykusun ovejakunamantawan cabrakunamanta rikchanachiymanta.

OVEJAKUNAMANTAWAN CABRAKUNAMANTA

3. ¿Haykapitaq Jesusqa runakunata juzganqa?

³ Jesusmi nirqa Diosmanta sumaq willakuyta chaskikusqankuman hina hinaspa hanaq pachapaq wawqinkunata yanapasqankuman hina sapa runa juzgasqa kananmanta (Mat. 25:​31-46). ¿Haykapitaq Jesusqa runakunata juzganqa? Llumpa-llumpay ñakariy punchawkunapim, chayqa kanqa Armagedon punchaw qallaykunanpaqña kachkaptinmi (Mat. 24:21). Imaynam  michiqpas cabrakunamanta ovejakunata rakin, chaynam Jesuspas hanaq pachapaq wawqinkunata tukuy sunquwan yanapaqkunata rakinqa mana yanapaqkunamanta.

4. Isaias 11:​3, 4 nisqanman hinaqa, ¿imanasqam Jesusqa allin ruwayman hina runakunata juzganqa? (Qawaytaq fotokunatawan dibujotapas).

⁴ Jehova Diosmi Jesusta churarun juez kananpaq. Bibliam niwanchik Jesusqa allin ruwayman hina juzgananmanta (leey Isaias 11:​3, 4). Jesusqa sapa runapa ima ruwasqanta, ima piensasqanta hinaspa ima rimasqantam qawamuchkan. Qawamuchkantaqmi hanaq pachapaq akllasqa wawqinkunawan imayna kasqankutapas (Mat. 12:​36, 37; 25:40). Chaymi payqa yachanqa paykunata hinaspa ima ruwasqankupi pikuna yanapasqankuta. a Jesuspa wawqinkunataqa astawan yanapanchik Diosmanta willakuspanchikmi. Paykunata lliw yanapaqkunam ‘allin ruwaqkuna’ kasqankurayku kay pachapi wiñaypaq kawsakuyta atinqaku (Mat. 25:46; Apoc. 7:​16, 17). ¡Chayqa sumaq bendicionmá kanqa Diosman sunqu kaqkunapaqqa! Llumpa-llumpay ñakariy punchawkunapi hinaspa chay pasayta hinalla Diosman sunqu kaptinkuqa sutinkum ‘Diospa libronpi qillqasqa’ kanqa (Apoc. 20:15).

5. ¿Imatam yachachiwanchik ovejakunamantawan cabrakunamanta rikchanachiy? ¿Pikunapaqtaq chay rikchanachiyqa?

⁵ Diosman sunquyá kasun. Ovejakunamantawan cabrakunamanta rikchanachiymi kay pachapi wiñaypaq kawsakuy suyaqkunata yachachiwanchik Diosman sunqu kasqanchikta imaynata qawachinapaq. Manam Jesuspa wawqinkunataqa Diosmanta willakuspallachu yanapanchik. Yanapanchiktaqmi Jesuspa nombrasqan allin ruwaq yuyayniyuq sirvientepa niwasqanchikkunata kasukuspapas (Mat. 24:45). Hanaq pachapaq kaqkunapas ovejakunamantawan cabrakunamanta rikchanachiywan Jesuspa yachachisqantam yuyarinanku. Jesusqa qawamuchkanmi paykunapa ima ruwasqankutapas, ima piensasqankutapas hinaspa ima rimasqankutapas. Chaymi paykunapas Diosman sunqu kananku. Qatiqninpim yachasun paykuna imayna kanankupaq Jesuspa iskay rikchanachiykuna rimasqanmanta. Chaypas kachkan Mateo 25 capitulopim. Puntatayá yachaykusun 10 sipaskunamanta.

10 SIPASKUNAMANTA

6. ¿Imaynanpitaq nichwan pichqa sipaskunaqa allin yuyayniyuq kasqankuta? (Rimarimuytaq Mateo 25:​6-10 nisqanmantapas).

⁶ Jesusmi rimarqa noviota taripaq 10 sipaskunamanta (Mat. 25:​1-4). Paykunaqa llapallankum casarakuy convidoman noviowan yaykuyta munarqaku. Jesusqa nirqataqmi paykunamanta pichqa sipaskuna “allin yuyayniyuq” kasqankumanta, pichqa sipaskunañataq “mana yuyayniyuq” kasqankumanta. Allin yuyayniyuq sipaskunaqa imay horaña novio chayamunan kaptinpas mana amispa suyanankupaqmi listo karqaku. Chayraykum mecheronkuta aparqaku tutayaypi achkikunankupaq. Aparqakutaqmi novio tardearamuptin yapanankupaq aceitenkutapas (leey Mateo 25:​6-10). Novio chayaramuptinmi allin yuyayniyuq sipaskunaqa casarakuy convidoman paywan yaykurqaku. Yaqa chaynam pasanqa hanaq pachapaq kaqkunawanpas. Novio utaq Jesus chayamunankama Diosman sunqu kaspankuqa hinaspa qawan-qawanlla kaspankuqa hanaq pachamantam Jesuswan kamachimunqaku (Apoc. 7:​1-3). b Ichaqa, ¿imam pasarqa mana yuyayniyuq sipaskunawanqa?

7. ¿Imam pasarurqa mana yuyayniyuq sipaskunawan? ¿Imanasqa?

 ⁷ Mana yuyayniyuq sipaskunaqa manam listochu karqaku novio chayamunanpaqqa. Jesuspa willakusqanman hinaqa novio chayamusqanmanta willakuyta uyariruspankum cuentata qukururqaku mecheronku wañunayasqanta. Yapanankupaq aceiteta mana apasqankuraykum rantiq rirqaku. Novio chayamunanpaqqa paykunaqa manam kutimurqakuraqchu, “hinaptinmi listo kaq sipaskuna casarakuy convidoman noviowan yaykuruptillanku punku wichqakururqa” (Mat. 25:10). Mana yuyayniyuq sipaskunaqa kutiramuspankum yaykuyta munarqaku. Ichaqa noviom nirqa: “Qamkunataqa manam riqsikichikchu”, nispa (Mat. 25:​11, 12). Paykunaqa manamá novio chayamunanpaqqa listochu karqaku. ¿Imatam hanaq pachapaq kaqkunaqa chaymanta yachanmanku?

8, 9. ¿Imatam hanaq pachapaq kaqkuna yachanmanku Jesuspa rikchanachisqan 10 sipaskunamanta? (Qawaytaq fotokunatawan dibujokunatapas)

⁸ Listollayá hinaspa qawan-qawanllayá kasun. 10 sipaskunamanta Jesus rimaspanqa manam nichkarqa hanaq pachapaq kaqkunamanta huk grupo preparasqa kananmantachu nitaq huk grupo mana preparasqa kananmantachu. Nichkarqaqa tukupaykama Diosman sunqu mana kaspankuqa premionkuta mana chaskinankumantam (Juan 14:​3, 4). Chaynaqa, ¿imatam yachachwan kay pachapaq utaq hanaq pachapaq kaspanchikpas Jesuspa rikchanachisqan 10 sipaskunamanta? Tukupaykama qawan-qawanlla kaspa aguantanapaqmi listo kananchik (Mat. 24:13).

⁹ Arí, chay rikchanachiywanmi Jesusqa yachachiwarqanchik haykapipas listolla hinaspa qawan-qawanlla kanapaq. Chaymanta rimaruspallanmi Jesusqa willakurqataq wayqakunapi qullqimantapas. Chaywanmi yachachiwarqanchik Diospaq tukuy ima ruwaypi ocupasqa kay imanasqa ancha allin kasqanta.

WAYQAKUNAPI QULLQIMANTA

10. ¿Imaynatam iskay sirvientekuna confianza kasqankuta qawachirqaku? (Rimarimuytaq Mateo 25:​19-23 nisqanmantapas).

¹⁰ Jesusmi rimarqa confianza iskay sirvientekunamanta  hinaspa mana confianza sirvientemanta (Mat. 25:​14-18). Patronninkum huklaw nacionta manaraq viajachkaspan paykunaman achka qullqita saqirqa. Iskay sirvientekunam confianza kasqankuta qawachirqaku patronninpa qullqi qusqanta mirachinankupaq allinta llamkaspanku. Patron kutimunanpaqmi paykunaqa chaskisqankumantapas huk chaynatawanraq mirarachirqaku. Chaymi patronqa iskayninkuta felicitaspa nirqa: “Ñuqawanyá kusikuy”, nispa (leey Mateo 25:​19-23). Ichaqa, ¿imatam kimsa kaq sirvienteqa ruwarqa?

11. ¿Imataq pasarqa qilla sirvientewan? ¿Imanasqa?

¹¹ Kimsa kaq sirvientemanpas qullqitaqa qurqa mirachinanpaqmi. Chay sirvientem ichaqa “qilla” kasqanrayku allpata uchkuruspan chay wayqa qullqita pakarurqa. Hinaptinmi patron kutiramuptin qullqitaqa hina kaqllata kutiykachipurqa. Qullqinta mana mirachisqanmanta “pampachaykuway” ninanmantaqa “piñakuq” patron kasqantam nirqa. Hinaptinmi patronqa qaqchaspan hinaspa chay qusqan qullqita qichuruspan wasinmanta qarqururqa (Mat. 25:​24, 26-30).

12. ¿Pikunawantaq tupan confianza iskay sirvientekuna?

¹² Confianza iskay sirvientekunam tupan Diosman sunqu hanaq pachapaq kaqkunawan. Patronñataqmi tupan Jesuswan. Paymi hanaq pachapaq kaqkunata sapakamata nin: “Ñuqawanyá kusikuy”, nispan. Huk rimaypiqa nichkarqa punta kawsarimuq kasqankuwan premionkuta chaskisqankumantam (Mat. 25:​21, 23; Apoc. 20:5a). Qilla sirvienteñataqmi hanaq pachapaq kaqkunata yachachin imayna mana kanankupaq.

13, 14. ¿Imatam hanaq pachapaq kaqkuna yachanmanku wayqakunapi qullqiwan Jesuspa rikchanachisqanmanta? (Qawaytaq fototawan dibujotapas).

¹³ Diospaq allin llamkaqyá kasun. Wayqakunapi qullqimanta Jesus rimaspanqa manam nichkarqa hanaq pachapaq kaqkuna qilla rikurirunankumantachu. Aswanqa 10 sipaskunamanta rimasqanpi hinam imayna mana kanankumanta rimachkarqa. Nichkarqaqa haykapipas manaña Diosman sunqu kaspanku ‘qayasqa hinaspa akllasqa kasqankuta’ pierderuspa manaña hanaq pachaman rinankumantam (2 Ped. 1:10).

 ¹⁴ 10 sipaskunamanta hinaspa wayqakunapi qullqimanta rimasqanwanmi Jesusqa nichkarqa hanaq pachapaq kaqkuna preparasqa, qawan-qawanlla hinaspa Diospaq llamkaypi ocupasqa kanankumanta. Mateo 24:​40, 41 nisqanpipas Jesusqa nirqataqmi hanaq pachapaq kaqkuna imayna mana kanankumantaqa. Chay versiculokunapa nisqantayá qawaykusun.

¿PITAQ “APASQA KANQA”?

15, 16. Mateo 24:​40, 41 nisqanman hinaqa, ¿imanasqataq hanaq pachapaq kaqkunapa qawan-qawanlla kayninkuqa ancha allin?

¹⁵ Kimsa rikchanachiykunamanta manaraq willakuchkaspanmi Jesusqa rimarqa hanaq pachapi yachanankupaq suyakuyniyuqkunamanta pikunata Dios chaskinanmanta. Chaypaqmi willakurqa chakrapi llamkaq iskay runakunamanta hinaspa maraypi kutaq iskay warmikunamanta. Yaqachusmi chay iskay qarikunaqa chaynataq iskay warmikunaqa hina chayllata ruwachkarqaku. Jesusmi ichaqa nirqa: “Hukninmi apasqa kanqa, hukninñataqmi saqisqa kanqa”, nispan (leey Mateo 24:40, 41). Chaynata niruspallanmi qatiqninkunata nirqa: “Qawan-qawanllayá kaychik, manam yachankichikchu ima punchaw señornikichik hamunantaqa”, nispa (Mat. 24:42). Yaqa chaynatam Jesusqa nirqa 10 sipaskunamanta rikchanachiyta willakuruspanpas (Mat. 25:13). Chaywanmi Jesusqa entiendechichkarqa hanaq pachapaq kaqkunamanta pikuna chaskisqa kasqanku yachakunan tiempo chayamunanmanta. Arí, Jesusqa hanaq pachapaq chiqaptapuni akllasqa kaqkunallatam hinaspa tukupaykama Diosman sunqu kaqkunallatam ‘apanqa’ paywan kuska kamachimunankupaqqa (Juan 14:3).

¹⁶ Qawan-qawanllayá kasun. Hanaq pachapaq kaqkunamanta mayqinpas Dios serviyninpi mana qawan-qawanlla kaspanqa manam ‘akllasqakunawan’ huñusqachu kanqa (Mat. 24:31). Kay pachapi wiñaypaq kawsakuyta suyaqkunapas Jesuspa nisqanta kasukuspam Diosman sunqu kananchik, hinaspapas qawan-qawanllam kananchik.

17. ¿Imanasqataq mana preocupakunanchikchu kay watakunapi serviqninkunamanta wakinta hanaq pachaman rinankupaq Dios akllaptinqa?

¹⁷ Ñuqanchikqa manam iskayrayananchikchu Jehova Diospa tantiasqankuna allin kasqanmantaqa. Chayraykum kay watakunapi serviqninkunamanta wakinta hanaq pachaman rinankupaq Dios akllaptinqa mana preocupakunanchikchu. c Uvas chakrayuqmanta Jesuspa willakusqantam yuyarinanchik, chaypim nirqa pichqa hora tardetapas peonkunata hinallaraq chaskisqanmanta (Mat. 20:​1-16). Tardellaña llamkayta qallariqkunapas tempranomanta llamkaqkuna hinam pagonkutaqa igualta chaskikurqaku. Chaynataqmi hanaq pachapaq Diosman sunqu kaqkunapas hanaq pachaman rinqaku haykapi akllasqa kaspankupas.

¿IMATAM YACHARUNCHIK JESUSPA RIKCHANACHIY RIMASQANMANTA?

18, 19. ¿Imakunamantam kay yachachikuypi yacharunchik?

¹⁸ Ovejakunamantawan cabrakunamanta rikchanachiywanmi yacharunchik kay pachapi wiñaypaq kawsakuyta suyaqkunaqa kunanpas chaynataq llumpa-llumpay ñakariy punchawkunapas hinalla Diosman sunqu kayninku ancha allin kasqanmanta. Juzganan tiempo chayaramuptinmi Jesusqa tantianqa pikuna Diosman sunqu kasqankuta, chaynapi ‘wiña-wiñaypaq kawsakunankupaq’ (Mat. 25:46).

¹⁹ Yachamurqanchiktaqmi hanaq pachapaq kaqkunata yanapaq iskay rikchanachiykunamantapas. 10 sipaskunamanta pichqam karqaku preparasqa hinaspa listolla. Paykunaqa allin yuyayniyuq kasqankuraykum novio imay hora chayamunan kaptinpas suyanankupaq listo karqaku. Pichqa sipaskunañataqmi  mana yuyayniyuq hinaspa mana preparasqa karqaku. Chaymi casarakuy convidoman mana yaykurqakuchu. ¿Imatam chaymanta yachachwan? Ñuqanchikpas tukuy mana allinkunata Jesuspa tukuchinan punchawkamam listolla suyananchik. Wayqakunapi qullqimanta rikchanachiypiñataqmi iskay sirvientekuna allin llamkaq karqaku. Paykunaqa confianza kasqankuraykum hinaspa chaskisqanku qullqita mirachinankupaq tukuyta ruwasqankuraykum patronninpa chaskisqan karqaku. Qilla sirvientetam ichaqa hawaman wischururqaku. ¿Imatam chaymanta yachachwan? Diospaq tukuy imapas ruwaypim ocupasqa kananchik tukupaykama. Yacharunchiktaqmi akllasqa kaqkuna hanaq pachaman apasqa kanankupaq hinalla rikchan-rikchan kanankumanta Jesuspa rimasqanmantapas. Paykunaqa anchatam munachkanku hanaq pachapi Jesuswan ‘huñusqa’ kananku punchaw chayamunanta. Armagedon guerra pasaytam hanaq pachapaq kaqkunaqa “carneropa casarakuyninpi” Jesuspa novian kanqaku (2 Tes. 2:1; Apoc. 19: 7, 9).

20. ¿Imaynam kasun Jesuspa rikchanachisqankunapi niwasqanchikta kasukuspaqa?

²⁰ Hichpallapiñam kachkan runakunata Jesuspa juzganan tiempoqa. Ichaqa manam manchakunanchikchu. Hinalla Diosman sunqu kaptinchikqa ‘runakunapa mana haypay atisqan hatu-hatun atiytam’ quwasun. Chaywanmi “churinpa qayllanpi” allin ruwaqpaq hapisqa kasun (2 Cor. 4:7; Luc. 21:36). Chaynaqa, hanaq pachapaq utaq kay pachapaq kaspanchikpas rikchanachisqankunapi Jesuspa yachachiwasqanchikkunatayá kasukusun. Chayna kaspanchikqa Diospa chaskisqanmi kasun. Chaymantapas ancha kuyakuq kasqanraykum Diosqa sapakamapa ‘sutinchikta libronpi qillqanqa’ (Dan. 12:1; Apoc. 3:5).