Ñuqaqa nacerqani 1934 watapim. Tayta-mamayqa Suiza nacionmanta kachkaspankupas Canada nacionpi Timmins sutiyuq llaqtachamanmi ripukurqaku minapi llamkanankupaq. Yaqa 1939 watapim mamayqa Willakuq revista leeyta hinaspa huñunakuykunaman riyta qallaykurqa. Chay huñunakuykunamanmi qanchisnintin wawankunata pusawaqku. Mamayqa manapas unaymantam bautizakururqa.

Mamay bautizakuruptinmi papay piñakurqa. Chaywanpas mamayqa hinallam tukuy sunqunwan Diosta servirqa. Hinallamá Diosman sunqu karqa 1940 wata ukupi Canada nacionpi autoridadkuna Dios servinanchikta harkakuptinkupas. Mamayqa tukuy tiempotaqmi papaytaqa kuyakuywan hinaspa respetowan rimapayaq tukuyta nichkaptinpas. Chayna kasqanmi ñuqatawan wawqiykunata yanapawarqaku testigo kanaykupaq. Tiempopa risqanman hinam papaypas cambiayta qallaykuspan kuyakuqllaña karqa.

1950 watapim Nueva York llaqtapi “Aumento de la Teocracia” sutiyuq asambleaman rirqani. Chaypim tukuy hinastinmanta iñiqmasinchikkunata riqsirqani. Uyarirqanitaqmi galaad escuelaman riq iñiqmasinchikkunapa willakusqanku sumaq experienciakunatapas. Tukuy chaykunata uyarispaymi astawanraq munarqani tukuy tiempoywan Jehova Dios serviyta. Wasiman kutiruspallaymi precursor regular kanaypaq solicitudta apachirqani. Betel wasimantam ichaqa nimuwarqa puntataqa bautizakunaypaqraq. Hinaptinmi chay watallapi 1 de octubre punchawta bautizakurqani. Qatiqnin killallatam precursor regularña karqani, hinaptinmi Kapuskasing sutiyuq llaqtachapi yanapakunaypaq niwarqa, chay llaqtachaqa yachasqaymanta karupiraqmi karqa.

1951 watapim francesta yachaq iñiqmasinchikkunata betelmanta kallpanchamurqa Quebec llaqtapi yanapakunankupaq. Chay llaqtapi testigokunaqa aschallam karqa. Ñuqaqa francestawan inglesta yachasqayraykum kikiymanta nirqani yanapakunaypaq, hinaptinmi niwarqaku Rouyn llaqtachapi yanapakunaypaq. Qallariypi nisqayman hinataqmi quwasqanku direccionllata riqsirqani. Chaywanpas tawa watam Quebec llaqtapi Diosta kusisqa servirqani. Marcelwanmi allin amistad karqani. Hinaspapas tiempopa risqanman hinam niwarqaku precursor especial kanaypaq.

Quebec llaqtapi servichkaptiymi Nueva Yorkpi apakuq galaad escuelaman rinaypaq invitaruwarqaku. Ancha kusisqam tarikurqani. Chay capacitacionqa tukurqa 1956 watapi febrero killapa 12 punchawnintam. Hinaptinmi niwarqaku Africa Occidentalpi Ghana b nacionman rinaypaq. Chayman rinaypaq papelniykuna listo kanankamam Canada nacionman kutirqani. Ñuqaqa piensarqani iskay-kimsa semanalla suyaytam.

Ichaqa viajanaypaq papelniykuna listo kanankamam 7 killa Toronto llaqtapi karqani. Chay tiempopim familia Crippspa wasinpi samapakuspay warmanku Sheilata riqsirurqani, paymi  sunquyta suwaruwarqa. Paywan casarakunaypaq ninaypaqña kachkaptinmi niykuwarqaku viajanaypaq papelniykuna listoña kasqanta. Sheilawan kuska Diosta mañakuykuspaykum tantiarurqaniku Ghana nacionman pasakuptiypas cartata apachinakunaykupaq. Chayna tantiakuyniyku sasa kaptinpas allinniykupaqmá kasqa.

Trenwan, carga apaq barcowan hinaspa avionwan huk killapuni viajasqaymantam chayarurqani Ghana nacionpa capitalnin Accra sutiyuq llaqtaman. Chaypim niwarqaku llaqtan-llaqtan watukuq iñiqmasinchikkunata watukunaypaq. Chaymi viajarqani Ghana, Costa de Marfil hinaspa Togowan sutichasqanku Togolandia nacionkunata. Yaqa llapanpim sapallay riq kani betelmanta quwasqanku carrowan, chaywanpas iñiqmasinchikkunata watukuspaymi anchata kusikuq kani.

Sapa semana asambleakuna kasqanraykum tukuy ima ruwayniyuq kaq kani. Asambleakuna ruwana localkunaqa manam karqachu,  chaymi iñiqmasinchikkunaqa bambu sutiyuq qirukunawan hinaspa palmerapa llaqinkunawan taparuqku mana rupaypi kanaykupaq. Mana refrigeradora kasqanraykum encargasqa iñiqmasinchikkuna animalkunata pusaqku chaypi nakaspa yanunankupaq.

Huk kutipim Herb Jennings c sutiyuq iñiqmasinchik yachachimuchkaptin huk torocha lluptiramuspan chawpiykuman kallpaylla yaykuramurqa. Chay torochaqa manam maymanpas riyta atirqachu. Yachachimuq iñiqmasinchikpas manataqmi ima niytapas atirqachu. Chaymantam torochataqa tawa iñiqmasinchikkuna kutichirqaku. Huñunakuypi kaqkunañataqmi taqllakuyllawanña qawarqaku.

Asamblea apakusqan punchawkunapim La Sociedad del Nuevo Mundo en acción sutiyuq videota hichpapi yachaq runakunaman qawachirqani. Qawachiqqa kani iskay kaspikunaman yuraq mantelta wataruspaymi. Lliw runakunam qawaytaqa gustaqku. Achkam videotaqa chayllaraq qawarqaku. Bautizakuqkunata videopi qawaspankum kusikuyllawanña taqllakurqaku. Chay videowanmi yacharqaku testigokunaqa enteron pachapi huk sunqulla kasqanchikta.

Africapi iskay wata kasqaymantam Nueva York llaqtapi huklaw nacionniyuqkunapaqwan apakuq asambleaman rirqani. Chayqa karqa 1958 watapim. ¡Chaypi Sheilawan tuparuspaymi anchata kusikurqani! Payqa Quebec llaqtapi precursora especial kasqanmantam chay asambleaman hamusqa. Cartantakamallam rimaqqa kaniku. Kaqmanta tupaykuspaymi paywan casarakuy munasqayta nirqani, payñataqmi “allinmi” niwarqa. Hinaptinmi iñiqmasinchik Knorrta d tapurqani galaad escuelaman Sheila rinanpaq hinaspa Africaman mandamunankupaq. Payñataqmi “allinmi” niwarqa. Ghana nacionman Sheila chayaramuptinmi Accra sutiyuq llaqtapi casarakurqaniku. Chayqa karqa 1959 watapim octubre killapa 3 kaq punchawninta. Diosta puntapi churasqaykurayku bendeciwasqankumantam cuentata qukurqaniku.

1961 watapim Camerun nacionpi betel wasita qallarichinaykupaq niwarqaku. Tukuy imam ruwayniy karqa. Chaymantapas, betel wasimanta cuentallikunaypaq churaruwasqankuraykum tukuyta  yachanay karqa. 1965 watapim Sheilaqa wiksayakururqa. Manamá tayta-mama kanaykupaqqa preparasqachu karqaniku. Chaywanpas, warmachayku kananmanta kusisqaña kachkaptiykum hatun llaki pasaruwarqaku.

Warmachaykum wiksallapiraq wañururqa. Doctormi niwarqaku wañuq warmachaykuqa qaricha kasqanmanta. Chay pasawasqankutaqa manam qunqanikuchu 50 wataña pasaruptinpas. Chayna llaki pasaruwaptinkupas betelpi hinalla yanapakunaykupaqmi tantiarurqaniku.

Camerun nacionpi iñiqmasinchikkunaqa gobiernokunaman mana sayapakusqankuraykum chiqnisqa hinaspa ñakarichisqa karqaku. Aswan sasaraqmi karqa votacion killakuna chayamuptinqa. 1970 watapim 13 de mayo punchawta Camerun nacionpi gobierno Jehova Diospa testigonkunapa lliw ruwayninkuta prohibirurqa. Chayllaraq qispisqa sumaq betel wasitapas gobiernom apakurqa. Chay nacionpi lliw misionerokunatapas semanallapim qarquruwarqaku. Lliw iñiqmasinchikkunawan kuyanakusqaykuraykum hinaspa imayna kanankumanta preocupakusqaykuraykum anchata llakikurqaniku.

Francia betelpiñataqmi suqta killa karqaniku. Chay betelmantam Camerun nacionpi iñiqmasinchikkunata imapas necesitasqankupi yanaparqaniku. Hina 1970 watapim diciembre killata niwarqaku Nigeria betelman rinaykupaq. Chay betelmantañam Camerun nacionpi iñiqmasinchikkunamanta encargakurqaku. Nigeriapi iñiqmasinchikkunaqa kusikuywanmi chaskiykuwarqaku. Paykunawan Diosta serviyqa sumaqmi karqa.

Sheilam unayña unquchkarqa. Nueva York llaqtata asambleaman hamusqaykupim niwarqa: “Manañam atiymanñachu, sapa punchawmi unqusqallaypi kani”, nispa. Sheilawanqa Africa Occidental lawpim 14 wata masnin Diosta servirqaniku. Diosta imayna servisqanwanqa ancha kusisqamá tarikurqani. Chaywanpas, iskayniyku parlaruspaykum hinaspa Diosta unaysu mañakuruspaykum tantiarurqaniku Canada nacionman kutispa saludninpi allinta atiendechinaykupaq. Diosta tukuy sunquwan servisqaykuta saqiyqa sasam karqa. Chayqa karqa 1973 watapim.

Canada nacionman chayasqayku pasayllatam puntata riqsinakusqay amistadniypa carro rantikusqan negocionpi llamkayta qallaykurqani. Chayqa karqa Toronto llaqtapa norte lawninpim. Yachanaykupaq wasita arriendaruspaykum utilizasqaña mueblekunata rantirurqaniku mana imatapas deudakuspayku. Kaqmanta tukuy tiempoykuwan Dios serviyta munaspaykum imapas kapuwasqallankuwan kawsakuyta munarqaniku. Manapas unaymantamá kaqmanta tukuy tiempoykuwan Dios serviyta qallaykurqaniku.

 Sabadonpim Norval llaqtapi asamblea ruwananku localta ruwaypi yanapakuyta qallaykurqani. Chaymantam asambleata ruwananku localmanta encargakuq kanaypaqña niykuwarqaku. Chaymi Sheila saludninpi allinchaña kasqanrayku chaypi yanapakunaykupaq “arí” niykurqaniku. Chayraykum 1974 watapa junio killanpi chayman astakururqaniku. Ancha kusisqamá tarikurqaniku kaqmanta tukuy tiempoykuwan Diosta servisqaykuwanqa.

Punchawkuna pasasqanman hinam Sheilaqa aswan allinña karqa. Chaymi iskay wata pasayta llaqtan-llaqtan watukuq kanaykupaq niykuwaptinku “allinmi” nirqaniku. Watukurqanikuqa Manitoba llaqtapi congregacionkunatam. Chay llaqtataqa llumpaytam chirikun. Chaypi kaq iñiqmasinchikkunaqa ancha kuyakuqllañam karqaku. Aswan allinqa manam maypi Diosta servisqanchikchu, aswanqa maypiña kaspapas tukuy sunquwan serviymi.

Unayña llaqtan-llaqtan watukuq kachkaptiykum 1978 watapi Canada betelman invitaruwarqaku. Chaymanta qipatam Montreal llaqtapi sumaq huñunakuy apakurqa. Chaypi huk hora parten yachachinaypaqmi niykuwarqaku. Ichaqa manamá iñiqmasinchikkunapa sunqunman chayaqtachu yachachirqani. Chaymi Diosmanta willakuypi cuentallikuqkunamanta huknin iñiqmasinchik yachachisqaymanta consejawarqa. Chaywanmi cuentata qukururqani achka runakunapa qayllanpi allin yachachiq mana kasqayta. Chaywanpas, yachachisqaymanta consejawasqanqa manamá gustawarqachu. Imayna kasqaykuwan mana tupasqaykutam hinaspa yachachisqaymanta yanqakunataña niwasqantam piensarqani. Chaymi pi consejawasqanrayku hinaspa imaynata consejawasqanrayku mana allintachu chaskikurqani.

Punchawkuna pasaytam betelpi cuentallikuqkunamanta huknin iñiqmasinchik ñuqawan parlarqa. Chaypim riqsikurqani consejawasqanta allinta mana chaskikusqayta, hinaspapas hukman sientekusqaytam nirqani. Chaymantam consejawaqniy iñiqmasinchikman rirqani pampachaykuwananpaq. Hinaptinmi payqa kuyakuywan pampachaykuwarqa. Chay pasawasqanmi yachachiwarqa humilde kanaypaq kallpanchakunayta (Prov. 16:18). Chay pantarusqaymantam Diosta achka kutikama mañakurqani. Kunanqa pipas consejawaptinqa allintañam chaskikuni.

40 wata masninñam Canadapi yanapakuchkani. Hinaspapas 1985 watamantapacham betelpi cuentallikuqkunamanta huknin kani. 2021 watapa febrero killanpim kuyasqay señoray Sheila wañukurqa. Paytaqa anchatam extrañani. Chaymantapas saludniypim aswanyachkani. Ichaqa Diosta servispay ocupasqallaña kasqayraykum punchawkuna pasasqanmantaqa mana cuentatapas qukunichu (Ecl. 5:20). Vidaypiqa achka sasachakuykunata pasaspaypas Diosta servispaymi kusisqa kawsakurqani. Anchatam kusikuni 70 watapuni tukuy tiempoywan Diosta servisqaymanta. Diostam mañakuni musu-sipaskunapas tukuy tiemponkuwan servinankupaq, chaynapi kusisqa kawsakunankupaq.