Filipinas nacionniyuq achka runakunam astakunku Maripawan Yonpa a yachasqanku nacionman, chaymi paykunaqa tukuyta ruwanku paykunaman Diosmanta willanankupaq. Coronavirus unquy tiempopim Mariqa huk nacionniyuq runakunamanpas bibliamanta yachachiyta qallaykurqa. ¿Imaynatam paykunata riqsirqa?

Marim estudiachisqankunata tapuq: “¿Riqsinkichu pitapas bibliamanta yachay munaqta?”, nispan. “Arí” niptinkuñataqmi niq: “¿Riqsiykachillawankimanchu?”, nispan. Chaynata tapuspallanmi Diosmanta yachay munaq achka runamasinchikkunata yanaparqa. ¿Imanasqa? Diospa palabranta kuyaq runakunaqa munankum familiankumanpas chaynataq amistadninkumanpas imapas yachasqankumanta willayta. Chaytam ruwarqaku Maripa estudiachisqankunapas.

Estudiachisqan Yasminmi bibliamanta yachay munaq tawa runamasinchikkunata riqsiykachirqa. Hukninmi karqa Kristin, payqa semanapi iskay kutita estudiachinanpaqmi nirqa. Mariqa Kristintapas tapurqam sichu bibliamanta yachay munaqta pitapas riqsisqanmanta. Hinaptinmi payqa nirqa: “Arí, amistadniykunatayá riqsiykachisqayki”, nispan. Qatiqnin semanakunallatam Kristinqa estudiayta munaq tawa amistadninkunata riqsiykachirqa. Riqsiykachirqataqmi huk runakunatapas, paykunamanta wakinkupas chaynallatam ruwarqaku.

Chaymantam Kristinqa munarqa Filipinaspi kaq familiankunapas bibliamanta yachanankuta. Chaymi wawan Andreata estudiananpaq kallpancharqa. Paymi qallariypiqa kaynata nirqa: “Testigokunaqa sectam kanku. Jesuspiqa manam creenkuchu, hinaspapas ñawpaq testamentollamantam yachachinku”, nispa. Huk kutita estudiaruspallanraqmi ichaqa cuentata qukururqa mana chayna kasqanta. Estudiasqankupim niq: “¡Biblia chaynata niptinqa ciertomiki!”, nispan.

Tiempopa risqanman hinam Andreapas Mariman riqsiykachirqa iskay amistadninkunata hinaspa huk llamkaqmasinta. Paykunapas biblia estudiaytam qallaykurqaku. Andreapa tian Angelam ñawsacha karqa. Paymi Andreaman Mari yachachiptin mana cuentata qukuchkaptillanku lliwta uyariq. Uyarisqankuna gustarusqanraykum Angelaqa Andreata nirqa estudiachinanpaq Marita niykapunanpaq. Angelataqa anchatam gustarurqa estudiasqanqa. Chaymi manapas killapiqa achka textokunataña umallamanta yacharurqa. Chaymantapas, Maritam nirqa semanapi tawa kutita yachachinanpaq. Payqa Andrea yanapaptinmi wasillamanta videowan conectakuspan huñunakuyta uyariq.

 Kristin estudiaptinmi qusan Yoshuañataq hichpankumanta uyariq. Chayta cuentata qukuruspanmi Mariqa tapurqa sichu bibliamanta yachay munasqanta. Hinaptinmi Yoshuañataq nirqa: “Allinmi, ichaqa uyariyllam-uyariyta munani. Amam imamantapas tapuwankichu, manachayqa pasakusaqmi”, nispan. Ichaqa manaraqpas pichqa minutomantam Yoshuaqa señoranmantapas aswan achkataña tapukururqa. Hinaspapas bibliamanta yachay munasqantam nirqa.

“¿Pitapas riqsinkichu bibliamanta yachay munaqta?” nispa tapusqallanwanmi Mariqa achka runamasinchikkunaman bibliamanta yachachiyta qallaykurqa. Wakintaqa iñiqmasinchikkunamanmi quykurqa yachachinankupaq. Tawa nacionmanta 28 runamasinchikkunatamá Mariqa estudiachiyta qallaykurqa.

Maripa estudiachisqan Yasminqa 2021 watapa abril killanpim bautizakururqa. Kristinñataqmi 2022 watapa mayo killanpi. Payqa kaqmantam Filipinas nacionpi familianwan kuska yachachkan. Kristin riqsiykachiptin Maripa yachachisqankunapas bautizakurunkuñam. Angelapas killakuna pasayllata bautizakuruspanmi kunanqa precursora regularña kachkan. Kristinpa qusan Yoshuapas, warmanku Andreapas chaynataq wakin estudiantekunapas hinallam ñawparichkanku.

Apostolkunapa tiemponpi achka runakunam sumaq willakuykunata yacharurqaku familianku hinaspa amistadninku yachasqankumanta willaptin (Juan 1:​41, 42a; Hech. 10:​24, 27, 48; 16:​25-33). Ñuqanchikpas estudiachisqanchik runamasinchikkunatawan yachay munaqkunatam tapuchwan: “¿Riqsinkichu pitapas bibliamanta yachay munaqta?”, nispa. Chaynata tapusqallanchikwanmi achka runamasinchikkunata yachachiyta qallaykuchwan.