7 KAQ YACHACHIKUY
15 KAQ TAKI Diospa piwi churinta kasukusun
¿Imanasqam Dios pampachawasqanchikqa allinninchikpaq?
“Qamllapim chiqaptapuni pampachakuyta tariniku” (SAL. 130:4).
¿IMAMANTAM YACHASUN?
Kay yachachikuymi yanapawasun Jehova Dios sapakamata pampachawasqanchikmanta aswan allinta entiendenapaq chaynataq valoranapaq. Chaypaqmi bibliapi rikuriq rikchanachiykunamanta astawan yachasun.
1. Pipas pampachaykuwaptinchikqa, ¿imanasqam mana yachanchikchu sunqumanta pampachaykuwasqanchikta?
PITAPAS “pampachaykullaway” nispa niptinchik “ama llakikuychu, imananchu” niwaptinchikqa hawkam tarikunchik. Ichaqa manam chayna niwasqallanchikwanchu yachanchik sunqumanta pampachaykuwasqanchiktaqa. Ichapas pampachaykuwarqanchikqa chay pasasqanmanta manaña rimayta munasqanraykulla utaq hawka tarikunanchikta munasqanraykulla. Sunqunpiqa ichaya manapas munanchu ñawpaqta hina allin amistad kananchiktaqa.
2. Bibliapa nisqanman hinaqa, ¿imatam Jehova Dioslla yachan? (Qawaytaq willakuytapas).
2 “Ama llakikuychu, pampachaykuykiñam” nispa Dios niwaptinchikmi ichaqa sunqumanta pampachaykuwasqanchikmantaqa mana iskayrayanchikchu. Salmos librota qillqaqmi Diosta nirqa: “Qamllapim chiqaptapuni pampachakuyta tariniku. Chayraykum qamllata hatunchaykiku”, nispa (Sal. 130:4). a Arí, Jehova Diosllam “chiqaptapuni pampachakuytaqa” yachan, manamá pipas pay hinaqa pampachawachwanchu. Chaymi ñuqanchikpas chiqaptapuni pampachaykuyta yachanapaqqa imayna pampachakuq kasqanta yachananchik. Wakinpiqa bibliata hebreo rimaypi qillqaqkunam pitapas Dios pampachasqanmanta rimanankupaq huk palabrata servichikuqku. Ichaqa manamá chay palabrataqa haykapipas servichikuqkuchu pipas runamasinta pampachasqanmanta rimanankupaqqa.
3. ¿Imanasqam ninchik runakunaqa Dios hina chiqaptapuni pampachakuq kayta mana atisqanchikta? (Rimarimuytaq Isaias 55:6, 7 nisqanmantapas).
3 Jehova Diosqa pitapas huchanmanta pampachaykuspanqa chay ruwasqantaqa qalaypaqñam qunqan, hinaspapas chay runataqa hinallam amistadninpaq chaskin. Arí, payqa maynataña huchallikuruptinchikpas mana amispam pampachaykuwanchik. ¡Chayqa mayna sumaqmi! (Leey Isaias 55:6, 7).
4. ¿Imakunawantaq Diosqa yanapawanchik pampachakuq kasqanta allinta entiendenapaq?
4 Pantaq runa kasqanchikraykum kikillanchikmantaqa mana entiendeyta atichwanchu imaynata Jehova Dios pampachawasqanchikmantaqa. Chaymi Diosqa palabranpi rikuriq rikchanachiykunawan yanapawanchik chayta allinta entiendenapaq. Kay yachachikuypim wakin rikchanachiykunamanta yachasun. Chaykunawanmi entiendesun huchanchikta qalaypaq chinkachinanpaq hinaspa paywan kaqmanta amistad kanapaq Dios imakuna ruwasqanta. Chay rikchanachiykunamanta yachaspaqa Diosninchiktam astawan kuyasun, hinaspapas pampachawasqanchikmantam agradecekusun.
JEHOVA DIOSQA HUCHANCHIKKUNATAM APAKUN
5. ¿Imaynam tarikunchik huchallikuruspaqa? ¿Imatam Jehova Diosqa ruwan?
5 Bibliapim huchanchikkunata tupachin llasa-llasaq qipiwan. Chaymi kamachiq Davidpas nirqa: “Pantasqayraykum umallaypas wichiruchkanña. Tukuy chaykunam ñuqallaypaqqa llasa-llasaq qipi hina”, nispa (Sal. 38:4). Ichaqa Salmos 25:18 hinaspa 32:5 nisqanpim nin wanakuptillanchik Dios ‘pampachawasqanchikta’. Hebreo idiomapiqa “pampachay” ninanqa “huqariy” utaq “apay” ninanmi. Chayna nisqanmi piensarichiwanchik llasa-llasaq qipinchikta apaq kallpasapa runapi. Huchallikuruspaqa llumpaytam pesakunchik, chay pesakusqanchikqa llasa-llasaq qipi hinam. Ichaqa Jehova Diosmi chay kallpasapa runa hina chay llasa-llasaq qipinchikta huqariykuspa apakun.
“Pampachaykullawarqanki” (Sal. 32:5).
6. ¿Maymantaq Jehova Diosqa huchanchikta apan?
6 ¿Maymantaq Jehova Diosqa huchanchikta apan? Chaypaqyá huknin rikchanachiyta leeykusun Salmos 103:12 nisqanpi. Chaypim nin: “Imaynam intipa qispimunanmanta intipa siqaykunanpas karu-karupi kachkan, chaynatam huchanchikkunatapas ñuqanchikmanta karuncharun”, nispa. Bibliapi chayna nisqanwanmi yachanchik Diosqa huchanchikta pampachaykuwaspanchikqa karu-karuman aparusqanta. ¡Anchatam kusikunchik qalaypaq pampachaykuwasqanchikmanta yachaspa!
‘Intipa qispimunanmi intipa siqaykunanmanta karu-karupi kachkan’ (Sal. 103:12).
7. Miqueas 7:18, 19 nisqanman hinaqa, ¿imatam Jehova Diosqa ruwan huchanchikkunawan?
7 Huchanchikta karu-karuman aparuspanqa, ¿imatam Jehova Diosqa ruwan huchanchikwanqa? Kamachiq Ezequiasmi nirqa: “Huchaykunatapas qipaykimanmi wikapaykurqanki”, nispa (Is. 38:9, 17). Chaywanmi yachanchik Diosqa huchanchikmanta wanakuruptinchikqa qipanman wikaparuchkanmanpas hina qalaypaq qunqarusqanta. Huk rimaypiqa Ezequiasqa nichkarqa: “Qampa qayllaykipiqa mana haykapipas huchallikuchkayman hinam kani”, nispam. Miqueas 7:18, 19 (leey) nisqanpipas chaymantaqa rimanmi. Chaypim niwanchik Jehova Diosqa huchanchikkunata ukullay-uku lamar quchaman wischuykusqanta. Bibliata qillqasqanku tiempopiqa imapas ukullay-uku lamar quchaman wichiykuptinqa manañam tariqkuchu.
“Huchaykunatapas qipaykimanmi wikapaykurqanki” (Is. 38:17).
“Qamqa llapallan huchaykutam uku-uku lamar quchaman wischuykunki” (Miq. 7:19).
8. ¿Imatam kaykama yacharunchik?
8 Tukuy chay rikchanachiykunawanmi kaykama yacharunchik Diosqa pampachaykuwaspanchik huchanchikwan imata ruwasqanta. Payqa llasa-llasaq qipi hina huchanchiktam karu-karuman aparun. Ñuqanchikpas David hinam mana iskayrayaspa ninchik: “Mayna kusisqam mana allin ruwasqankumanta pampachasqa runakunaqa chaynataq huchankumantapas pampachasqa runakunaqa. Mayna kusisqam mana huchayuqta hinaña Jehova Diospa chaskisqan runaqa”, nispa (Rom. 4:6-8). Arí, Diosllam chiqaptapuni pampachakuykuqqa.
DIOSQA HUCHANCHIKKUNATAM QALAYPAQ CHINKACHIN
9. ¿Imaynatam biblia yanapawanchik huchanchikkunata qalaypaq Dios pampachawananchikmanta entiendenapaq?
9 Jesucristopa wañukusqanraykum Jehova Diosqa pipa huchantapas chinkachinman chay huchallikuq wanakuptinqa. Kunanñataq yachaykusun chayta allinta entiendenapaq ima rikchanachiykunawan biblia yanapawasqanchikmanta. Bibliapim niwanchik chuyaña kananchikpaq huchanchikta Dios mayllasqanmanta (Sal. 51:7; Is. 4:4; Jer. 33:8). Kikin Jehova Diosmi niwanchik chayta ruwasqanrayku imaynaña kananchikmanta. Ninmi: “Pukay-pukayña huchaykichik kaptinpas ritita hinam yuraqyachisaq, pukay-pukay latapa hinaña kaptinpas yuraq millwata hinam yuraqyachisaq”, nispa (Is. 1:18). Cochinillapas utaq ima pinturapas yuraq pachata tiñiruptinqa sasatam lluqsin. Diosmi ichaqa niwanchik maynaña huchallikusqanchiktapas yuraqyachichkaq hina qalaypaq pampachaykuwananchikmanta.
“Pukay-pukayña huchaykichik kaptinpas ritita hinam yuraqyachisaq” (Is. 1:18).
10. ¿Imawanraqtaq tupan huchanchikkunaqa? ¿Imatam chaykunawan Dios ruwan?
10 Pasaq yachachikuypim yacharqanchik huchanchikkunata hatu-hatun deudawan biblia tupachisqanta (Mat. 6:12; Luc. 11:4). Sapa kuti huchallikusqanchikwanmi debekusqanchikqa aswan-aswan yapakuchkan. Huchanchikmanta pampachaykuwaspanchikmi ichaqa chay debekusqanchikta chinkachin manaña paganapaq. Huk rimaypiqa huchanchikmanta pampachaykuwaspanchikqa Diosqa manañam yuyarayanñachu. ¡Chayta entiendeyninchikqa maynatam sunqunchikta tiyaykachin!
“Huchaykuta pampachaykuwayku” (Mat. 6:12).
11. ¿Imawanmi tupachichwan huchanchikkunata Jehova Dios qalaypaq chinkachisqanta? (Rimarimuytaq Hechos 3:19 nisqanmantapas).
11 Jehova Diosqa manam niwanchik debekusqanchikta mana paganallapaqchu, aswanqa huchanchiktam qalaypaq chinkarachin (leey Hechos 3:19, tupachiy Chuya Qellqa 2012 bibliawan). Chayna nisqanqa piensarichiwanchikchá pitapas debekusqanchik papelpi anotasqa kasqanta. Debekusqanchik pagasqaña kaptinmi ichaqa chay anotawasqanchikqa lapicerowan rayapasqaña kanqa. Rayapasqaña kaptinpas hayka debekusqanchik numerokunaqa hinallam rikukun, manam chinkanchu. Diosmi ichaqa huchanchikkunataqa qalaypaqta chinkachin. Chayta allinta entiendenapaq kayta yuyarisun: Bibliata qillqasqanku tiempopim qillqanankupaq servichikuqku carbonwan, gomawan hinaspa yakuwan chapusqa tintata. Chaymi nuyu trapowan chay qillqasqankuta pipas picharuptinqa qalaypaq chinkaruq, manañam pipas hayka debekusqantaqa rikuqchu. Chayqa karqa mana haykapipas debekuchkanman hinam. Chaynallataqmi Diospas huchanchikkunata pampachaykuwaspanchikqa qalaypaqta chinkachin. ¡Chay ruwasqanmantam anchata agradecekunchik! (Sal. 51:9).
“Tukuy huchaykichik chinkachisqa kaptin” (Hech. 3:19, Chuya Qellqa 2012).
12. ¿Imanasqam biblia nin huchanchikkunaqa yana puyupa pampasqan hina kasqanta?
12 Isaias 44:22 nisqanpim Jehova Diosqa huk rikchanachiywanraq entiendechiwanchik huchanchikmanta pampachawasqanchikta. Chaypim nin: “Mana allin ruwasqaykikunamantam pampachasqayki, puyupa pampasqan hinam kanqa, huchaykikunatam chinkachisaq, yana puyupa pampasqan hinam kanqa”, nispa. Imaynam yana-yanay puyupas urquta tapaykuptinqa mana imaniraqllapas rikukunchu, chaynam Diospas huchanchikkunata qalaypaq taparun manaña pipas rikunanpaq.
“Mana allin ruwasqaykikunamantam pampachasqayki, puyupa pampasqan hinam kanqa” (Is. 44:22).
13. ¿Imaynam tarikunki huchaykikunata qalaypaq Dios chinkarachisqanmanta yachaspayki?
13 Rimamusqanchik rikchanachiykunawanmi mana iskayrayanchikchu Diosqa huchanchikta pampachaykuwaspanchikqa qalaypaq chinkarachisqanta. Chaymi manapuni piensananchikchu ñawpaqpi imapas huchallikusqanchikta Jehova Dios hinalla yuyasqantaqa. Señorninchik Jesucristomiki huchanchikmantaqa yawarninwan pagarunña, chaymi manaña ñuqanchikqa pagananchikchu. Huk rimaypiqa Diosqa ima huchatapas ruwasqanchikmanta pampachaykuwaspanchikqa manañam yuyanñachu, qalaypaqmi chinkarachin. Sunqumanta wanakuruptinchikqa Diosqa qawawanchik mana haykapipas huchallikuqta hinañam. Arí, payqa chiqaptapuni pampachakuqmi.
DIOSQA AMISTADNINPAQMI KAQMANTA CHASKIYKUWANCHIK
Jehova Dios pampachaykuwasqanchikraykum paywan allin amistad kayta atinchik. (Qaway 14 parrafota).
14. ¿Imanasqam hawkaña tarikunchik huchanchikta Dios pampachaykuwaptinchik? (Qawaytaq fotokunatapas).
14 Ima huchanchikmantapas Jehova Dios pampachaykuwaspanchikqa amistadninpaqmi kaqmanta chaskiykuwanchik. Chaymi hawkaña tarikunchik. Manañam pantasqanchiktaqa sapa kutichu yuyarinchik. Chayraykum manaña hukmanyanchikchu, nitaqmi piensanchikchu ñawpaqpi mana allin ruwasqanchikta yuyarispa Dios castigawananchiktaqa. ¡Manapunim Diosqa chaytaqa ruwanmanchu! ¿Imanasqam chaynata ninchik? Kikinmi Jeremiasta nirqa: “Imapas pantasqankuta pampachaspaymi huchankutaqa manaña yuyarisaqñachu”, nispa (Jer. 31:34). Diospa chayna nisqanta yuyarispanmi apostol Pablopas qillqarqa: “Huchankutaqa manañam yuyarisaqñachu”, nispa (Heb. 8:12). Diospa chayna nisqanmantayá qatiqninpi astawan yachaykusun.
“Imapas pantasqankuta pampachaspaymi huchankutaqa manaña yuyarisaqñachu” ( Jer. 31:34).
15. ¿Imatam Diosqa niwachkanchik “huchaykichiktaqa manañam yuyarisaqñachu” nispanqa?
15 Jesuspa waqtanpi warkusqa runam Jesusta nirqa: “Yuyarillawankimá kamachiqña kaspaykiqa”, nispa (Luc. 23:42, 43). Chayna nisqanwanqa, ¿sutinta yuyanallanpaqchu nichkarqa? Manam, aswanqa chay runata Jesus yuyarispan imatapas ruwapunanmantam. Jesuspas nirqam chay runata yuyarispa kawsarichinanmanta. Arí, bibliapi yuyariymanta rimaspanqa manam chaypi piensayllamantachu riman, aswanqa chayta yuyarispa imatapas ruwaymantam. Chaynaqa, ¿imatam Diosqa niwachkanchik “huchaykichiktaqa manañam yuyarisaqñachu” nispanqa? Pampachaykuwaspanchik contranchikpi manaña imatapas ruwananmantam. Manañataqmi haykapipas ñawpaqpi imapas mana allin ruwasqanchikkunataqa yuyarichiwasunñachu.
16. Bibliapa nisqanman hinaqa, ¿imaynam tarikunchik huchanchikta Jehova Dios pampachaykuwasqanchikmanta yachaspa?
16 Huchanchikmanta Jehova Dios pampachaykuwaptinchik imayna tarikusqanchikmanta allinta entiendenapaqyá yachaykusun huk rikchanachiymantaraq. Pantaq runa kasqanchikraykum biblia nin “huchapa serviqnin” kasqanchikta. Huchanchikmanta kikillanchik librakuyta mana atisqanchikraykum cadenawan watasqa hina tarikunchik. Dios pampachaykuwaspanchikmi ichaqa chay watawasqanchik cadenata tipichkanmanpas hina ‘huchanchikmanta libraykuwanchik’ (Rom. 6:17, 18; Apoc. 1:5). Imaynam ñawpaq tiempopipas cadenasqa runata pipas paskaruptinqa ancha kusisqa tarikuq, chaynam ñuqanchikpas huchanchikta Dios pampachaykuwasqanchikmanta yachaspa ancha kusisqa tarikunchik.
‘Huchanchikmantam libraykuwanchik’ (Rom. 6:18).
17. ¿Imanasqam nichwan unqusqanrayku wañuypa patanpi tarikuq runa hina kasqanchikta? ¿Imatam Jehova Dios ruwarqa? (Rimarimuytaq Isaias 53:5 nisqanmantapas).
17 (Leey Isaias 53:5). Bibliapiqa huchayuq kasqanchiktaqa tupachintaqmi wañuyman apakuq unquywanpas. Jehova Dios churinta mana kachamuptinqa wañuyllatañach suyachkachwan karqa. Ichaqa manam chaynachu tarikunchik, aswanqa allinñam kachkanchik Jehova Dios churinwan sanoyaykachiwasqanchikrayku (1 Ped. 2:24). Allinña tarikuspaqa kaqmantam Dioswan allin amistad kaytapas atinchik. Pipas unqusqanrayku wañuypa patanpi tarikusqanmanta sanoyaruspanqa ancha kusisqam tarikun, chayna kusisqam ñuqanchikpas tarikunchik ima hucha ruwasqanchikmantapas Dios pampachaykuwaptinchikqa hinaspa kaqmanta amistadnin kanapaq chaskiykuwaptinchikqa.
“Heridasqa kasqanraykum ñuqanchikqa allinña kachkanchik” (Is. 53:5).
DIOSNINCHIK PAMPACHAWASQANCHIKMANTAM ANCHATA AGRADECEKUNCHIK
18. ¿Imakunatam yacharamunchik rimamusqanchik rikchanachiykunamanta? (Qawaytaq “Huchanchikta Jehova Dios pampachawasqanchikmanta” niqtapas).
18 ¿Imakunatam yacharamunchik rimamusqanchik rikchanachiykunamanta? Ima huchanchiktapas Dios pampachaykuwaspanchikqa wiñaypaqmi chinkachin, chayta ruwasqanraykum paywan allin amistad kaytapas atinchik. Ichaqa kaytam yuyarinanchik: Jehova Diosqa manam pampachawanchik imatapas allinta ruwasqanchikraykuchu. Manataqmi paytaqa hikutachwanchu pampachawananchikpaqqa. Payqa mana imallapaqmi pampachaykuwanchik anchata kuyawasqanchikrayku (Rom. 3:24).
19. (1) ¿Imatam ruwananchik Jehova Dios pampachawananchikpaq? (Rimarimuytaq Romanos 4:8 nisqanmantapas). (2) ¿Imamantam qatiqnin yachachikuypi yachasun?
19 (Leey Romanos 4:8). ¡Ancha kusisqam tarikunchik Salmos 130:4 nisqanman hina Jehova Dios ‘chiqaptapuni pampachakuykuq’ kasqanmanta yachaspanchik! Ichaqa pampachawananchikpaqqa Jesuspa nisqantam kasukunanchik, paymi nirqa: “Mana pampachaptikichikmi ichaqa, qamkunapa pantasqaykichiktapas taytaykichikqa mana pampachasunkichikchu”, nispa (Mat. 6:14, 15). Chaynaqa, Dios hinam ñuqanchikpas hukkunata pampachananchik. Qatiqnin yachachikuypim yachasun pampachakuykuq kanapaq ima yanapawananchikmanta.
46 KAQ TAKI “Gracias” nillaykikum Jehova Dioslláy
a Quechua idiomapi kaq huk bibliakunapim kay versiculopiqa nichkan: “Qamllapim pampachakuyta tariniku”, nispalla. Musuq allpa pachapi kawsaqkunapaq bibliapim ichaqa nin: “Qamllapim chiqaptapuni pampachakuyta tariniku”, nispa. Chaynataqa churarqaku hebreo rimaypi kasqanman hinapuni kananpaqmi. Kay versiculota qillqaq runapa servichikusqanku palabrataqa manam servichikuqkuchu runakunapa pampachasqankumanta rimanankupaqqa.
