WAKINPIQA ima llakipas pasaruwaptinchikchá mana pipapas yanapaykusqan hina tarikurqanchik. ‘Sasallaña punchawkunapi kawsasqanchikraykum’ wakinpiqa llakisqa hinaspa sapallanchik hina tarikuchwan. Ichaqa manam sapallanchikchu sasachakuytaqa atipananchik (2 Tim. 3:1). Bibliapim willawanchik ancha kuyakuq amistadninchikkuna ‘llumpay sasachakuypi tarikuptinchik yanapaykuwananchikmanta’ (Prov. 17:17).

Apostol Pablopa amistadninkunam viajasqankunapi riysirqaku hinaspa tukuy imapi yanaparqaku (Col. 4:​7-11). Romapi preso kaspanpas paypa ruwanankunatam amistadninkunaman encargarqa. Epafroditom imapas necesitasqanta hinaspa Filipospi iñiqkunapa apachisqanta Pabloman entregarqa (Filip. 4:18). Tiquicoñataqmi Pablopa carta qillqasqanta congregacionkunaman chiqichirqa (Col. 4:7). a Amistadninkuna yanapaptinmá Pabloqa iñiqmasinkunata kallpancharqa wasillanpi preso kaspanpas chaynataq huklawpi preso kaspanpas. ¿Imatam ñuqanchikpas ruwachwan ancha kuyakuq amistad kanapaq?

Qatipakuchwanmi sasachakuypi tarikuq amistadninkuta yanapaq iñiqmasinchikkunata. Rimarisun España nacionmanta precursora regular iñiqmasinchik Elisabetmanta. Paypa mamantam doctorkuna niykurqaku cancerwan kasqanta. Hinaptinmi huk iñiqmasinchik allin amistad kasqanrayku Elizabetman sapa kuti mensajekunata apachiq bibliapa textonkunatawan. Elisabetmi nin: “Chay mensajekuna apachimuwasqankuwanmi cuentata qukurqani mana sapallay tarikusqayta. Hinaspapas sapa punchaw kallpata hapinaypaqmi yanapawarqa”, nispa (Prov. 18:24).

Iñiqmasinchikkunawanqa allin amistadqa kasun paykunawan kuska Diospaq imatapas ruwaspam. Chaypaqmi yuyaq iñiqmasinchikta huñunakuyman utaq Diosmanta willakuq pusachwan. Chayta ruwaspanchikmi ñuqanchikpura kallpanchanakusun (Rom. 1:12). Chaywanpas, wakin iñiqmasinchikkunaqa manam wasinkumanta lluqsiyta atinkuchu. ¿Imatam ruwachwan paykunapa amistadnin kanapaq?

Wakin iñiqmasinchikkunam huñunakuyman riyta mana atinkuchu unqusqankurayku utaq ima sasachakuywanpas kasqankurayku. Cancerwan kasqanraykum iñiqmasinchik Davidta suqta killa masnin quimioterapia nisqanta doctorkuna ruwarqaku, chaymi señoran Lidiapiwan wasillankumanta huñunakuykunaman conectakuqku.

 ¿Imaynatam iñiqmasinchikkuna paykunata yanaparqaku? Sapa huñunakuy tukuytam tiempochakuqku videontakama paykunawan parlanankupaq. Chaymantapas, Davidwan Lidia huñunakuykunapi rimariptinkum iñiqmasinchikkunaqa kallpanchanankupaq mensajekunata apachiqku. Chaynata ruwasqankuwanmi Davidwan Lidiaqa kuyasqa tarikunku.

Tiempochakuchwantaqmi wasinkumanta mana lluqsiy atiqkunawan Diosmanta willakunapaqpas. Chayta ruwaptinchikmi paykuna yachanqaku anchata kuyasqanchikta (Prov. 3:27). Wasinkuman rispam cartata ruwachwan, utaqmi pitapas qayachwan Diosmanta willanapaq. Punta apaqkunapas tantianmankutaqmi Diosmanta willakunapaq huñunakuykunaman videontakama conectakamunankupaqpas. Davidwan Lidiam chayta ruwarqaku. Davidmi nin: “Diosmanta willakunapaq huñunakuyman conectakusqaykum hinaspa chaypi iñiqmasinchikkunapa Diosta mañakusqankum anchata kallpanchawarqaku”, nispa. Bibliamanta yachachisqanchik runamasinchiktapas nichwanmi wasinmanta mana lluqsiy atiq iñiqmasinchikpa wasinpi estudianapaq. Ichaqa, mana imapas kananpaqmi chaytaqa ruwananchik allinta piensarispa.

Wasinkumanta mana lluqsiy atiq iñiqmasinchikkunawan kuska imatapas ruwaspanchikqa astawanmi riqsisun sumaq sunqu kasqankuta, hinaspapas allin amistadmi kasun. Runakunapa sunqunman chayaqta yachachinankupaq bibliata allinta servichikusqankuta qawaspanchikmi paykunataqa astawanraq kuyasun. Iñiqmasinchikkunata chaynata kuyaspanchikqa aswan achka amistadniyuqmi kasun (2 Cor. 6:13).

Pablom ancha kallpanchasqa tarikurqa amistadnin Tito ladonpi kasqanwan (2 Cor. 7:​5-7). Tito hinam amistadninchikkunataqa kallpanchachwan mana rimaspallachu, aswanqa paykunawanmi kachwan, hinaspam imapipas yanapaykuchwan (1 Juan 3:18).

Rusia nacionpi iñiqmasinchikkunam qatipakunapaq kanku kikinkupura yanapanakusqankuwan. Rimarisun Sergueymantawan señoran Tatianamanta. Guardiakuna wasinkupi tukuy imata revisaruspankum comisariaman aparurqaku. Tapuruspankum puntataqa Tatianata kachaykurqaku. Sergueymi nin: “Tatiana wasiman chayaruptinmi mana manchakuq warmi iñiqmasinchik hamurusqa. Chaymantañataqmi achka iñiqmasinchikkuna hamuruspanku wasiykuta ordenaysiwarqaku”, nispa.

Sergueyqa ninraqmi: “Proverbios 17:17 nisqanmi anchata gustawan. Chaypim nin: ‘Ancha kuyakuq amistadqa imaña-haykaña kaptinpas hinallam kuyasunki, payqa llumpay sasachakuypi tarikuptikipas kuyasqa aylluyki hinam yanapaykusunki’, nispa. Kunanqa chayna nisqan cierto kasqantam astawanraq yachani. Manamá sapallayqa tukuy kaykuna aguantaytaqa atiymanchu. Chaymi Jehova Dios mana manchakuq amistadniykunawan yanapawan”, nispa. b

Kay sasa tiempokunapim necesitanchik allin amistadniyuq kayta. Astawanraqmi necesitasun llumpa-llumpay ñakariy punchawkunapiqa. Chayraykuyá kunanmanta tukuyta ruwasunchik ñuqanchikpas ancha kuyakuq amistad kanapaq (1 Ped. 4:​7, 8).