Paykunaqa catolicom karqaku. Ichaqa Diospa sutin Jehova kasqanta bibliapi yacharuspankum testigonña kaspa tukuy sunquwan servirqaku. Papayqa carpintero kasqanraykum Jesuspa imagenninkunata ruwaq. Ichaqa chay ruwayta saqiruspanmi wasiykupi punta kaq pisota sumaqta allicharurqa Diosmanta yachanapaq huñunakuna wasi kananpaq. Chayqa karqa Filipinas nacionpa capitalnin Manila llaqtapi kaq San Juan del Montepi punta kaq salonmi.

Tayta-mamayqa Jehova Diosmantam allinta yachachisqaku mayorniy tawa wawqiykunatawan kimsa paniykunata. Chaymi 1952 watapi naceruptiy ñuqatapas yachachiyta qallaykuwarqaku. Leeyta yacharuptiymi taytayqa kallpanchawarqa bibliata sapa punchaw huk capitulota leenaypaq. Payqa achka qillqanchikkunawanmi Diosmanta yachachiwaq. Tayta-mamayqa wakinpim wasiykupi samachiq llaqtan-llaqtan watukuqkunata hinaspa betelmanta yachachiq hamuqkunata. Paykunapa tukuy ima experienciakuna willawasqankum anchata kallpanchawarqaku Dios serviyta imamantapas puntapi churanaykupaq.

Tayta-mamayqa Diosman sunqu kasqankuraykum qatipakunapaq karqa. Mamay unquspan wañukuptinmi papaywan kuska 1971 watapi precursor kayta qallaykurqaniku. Chaymantañataqmi 1973 watapi 20 watayuq kachkaptiy taytaypas wañukurqa. Manaña tayta-mamay kasqanraykum sapallay hina tarikurqani. Diospa prometesqankunam ichaqa yanapawarqa “mana imapa kuyurichinan hinaspa allin takyasqa” kanaypaq chaynataq Dios serviyta mana saqirunaypaq (Heb. 6:19). Taytaypa wañukusqan qipallatam Coron sutiyuq islaman rirqani chaypi precursor especial kanaypaq, chay islaqa karqa Palawan sutiyuq provinciapim.

21 wataypi kachkaspaymi Coron islamanqa chayarurqani. Hatun llaqtamanta kasqayraykum admirakurqani chay islaqa mana ancha luzniyuq hinaspa mana ancha yakuyuq kasqanmanta, manataqmi anchachu kasqa carrokunapas chaynataq  motokunapas. Chaypi testigokuna kaptinpas manam precursormasiyqa karqachu, chaymi wakinpiqa sapallay willakuqpas kani. Qallariynin killapiqa familiaytawan amistadniykunatam llumpayta extrañarqani. Tutan lucerokunata qawaspaymi waqaq kani. Precursor kasqayta saqiruspaymi wasiyman kutikuyta munaq kani.

Chayna tarikuspaymi Diosta mañakuspay imayna tarikusqayta lliwta willakuq kani. Bibliapiwan qillqanchikkunapi kallpanchawaqniy kaqkuna leesqaytam yuyariq kani. Salmos 19:14 nisqantam sapa kuti yuyariq kani, chaypim nin Jehova Diosqa “hatun rumi hina” hinaspa ‘libraykuwaqninchik’ kasqanmanta. Pay yanapawananpaqqa tukuy ima ruwasqankunapim hinaspa imayna kasqanpim yuyaymananay karqa. Anchatataqmi kallpanchawarqa La Atalaya qillqanchikpi “Usted nunca está solo” nisqan yachachikuypas. a Chaytam kuti-kutirispay leeq kani. Chay kutikunapiqa Jehova Diosllam ñuqawan karqa. Chayraykum Diosta astawan mañakuq kani, paymanta estudiaq kani hinaspa paypi yuyaymanaq kani.

Coron islaman chayasqaymanta qipallatam iñiqkunapi punta apaq kanaypaq nombraruwarqaku, chaymi huñunakuykunapaq lliw yachachikuykunamanta hinaspa Diosmanta willakuymanta ñuqalla encargakuq kani. Tukuy chaykunapi ocupasqallaña kasqayraykum manaña piensaqchu kani sapallay tarikusqaypiqa.

Coron islapi Diosmanta yachachisqay wakin runamasinchikkunam bautizakururqaku, chaymi anchata kusikurqani. Ichaqa karqam sasachakuykunapas. Wakinpiqa yaqa suqta hora utaq masninmi riq kani Diosmanta willakunay llaqtaman. Manam yachaqchu kani chayaruspay maypi puñunaytapas. Rinaytaqmi karqa taksa islachakunamanpas, mana nadiayta yachaspaypas sapa kutim chay islachakunamanqa wayrallapiña riq kani motorniyuq botechakunawan. Tukuy chaykunapim Jehova Diosqa yanapawarqa hinaspa cuidawarqa. Chaymantam cuentata qukurqani payqa aswan sasachakuykunapaqraq preparawasqanmanta.

1978 watapim Papua Nueva Guinea nacionman rinaypaq niwarqaku. Chay nacionpiqa achkallañam urqukuna kakun. Anchatam admirakurqani yaqa kimsa millon runakunalla kaspapas 800 masnin idiomata rimasqankumanta. Ichaqa kusikurqanim yaqa llapallanku tok pisin idiomata rimasqankuwan.

Qallariypim niwarqaku chay nacionpa capitalnin Port Moresby llaqtapi inglesta rimasqanku congregacionpi huñunakunaypaq. Chaymantam ichaqa tok pisin idiomata rimaq congregacionmanña pasaruspay chay idiomata estudiayta qallaykurqani. Chay idiomataqa ratullam yacharurqani lliw estudiasqaykunata Diosmanta willakusqaypi practicasqayrayku. Chaymanta qipataqa tok pisin idiomapim semana tukuyta huñunakuypi discursotaña quq kani. Manapas watapim niykuwarqaku chay idiomapi llaqtan-llaqtan watukuq kanaypaqña.

Watukusqay congregacionkuna karu-karu kasqanraykum achka hawaqpi asambleakunamanta encargakunay karqa. Huklaw nacionpi kasqayraykum, huk idiomata rimasqayraykum hinaspa huk costumbreyuq kasqankuraykum qallariypiqa hukman tarikurqani. Huk congregacionmanta huklaw congregacionmanqa manam allpantaqa riyta atiqchu kani urqukunallaña kasqanrayku. Chaymi yaqa  sapa semana avionllawan riq kani. Wakinpiqa laqla avionpim ñuqalla pasajero kaq kani. Chayna viajasqayqa manchakuypaqmi karqa. Motorniyuq botechapi ñawpaqta viajasqaytam yuyarichiwaq.

Chay tiempopi runakunaqa asllam telefonoyuq karqaku. Chaymi congregacionkunaman cartata apachiq kani haykapi chayanayta yachanankupaq. Wakinpim ichaqa cartata apachisqaymantapas puntataraq chayaruq kani. Chaymi llaqtapi runakunata tapunay karqa iñiqmasinchikkuna maypi yachasqankumanta. Iñiqmasinchikkunawan tupaykuptiyqa kuyakuyllawanñam chaskiykuwaqku. Chaymi yanapawarqa tukuy ima ruwasqaykuna mana yanqapaq kasqanta yuyarinaypaq. Tukuy imapi yanapawasqanraykum Jehova Diosqa allin amistadniy karqa.

Bougainville sutiyuq islapi huñunakuyman chayllaraq riruptiymi casarasqa warmi-qari asirispan asuykamuwarqa, hinaspam niwarqa: “¿Yuyachkankichu pim kasqaykuta?”, nispa. ¡Imaynamá manaqa yuyaymanchu karqa! Port Moresby llaqtaman chayllaraq chayaruspaymi paykunataqa bibliamanta yachachiyta qallaykurqani, chaymantañam huk iñiqmasinchik yachachirqa. Chay punchawmi ancha kusisqa tarikurqani bautizasqaña kasqankumanta niykuwaptin. Arí, Papua Nueva Guinea nacionpim kimsa wata Dios serviyniypi achka bendicionkunata chaskirqani.

Coron islamanta manaraq ripukuchkaspaymi riqsirurqani tukuy sunqunwan Diosta serviq hinaspa kuyayllapaq iñiqmasinchik Adelta. Payqa wawan Samueltawan Shirleytam uywasqa. Mamantapas cuidasqam, hinaspapas precursora regularmi kasqa. 1978 watapi Coronmanta pasakuspaypas 1981 watapim Filipinasman kutimurqani Adelwan casarakunaypaq. Iskayniyku precursor regular kaspaykum aylluykuta uywarqaniku.

Señoraytawan warmachankunata uywaptiypas 1983 watapim kaqmanta precursor especial kanaypaq niwarqaku. Chaymi astakurqaniku Palawan provinciapi kaq Linapacan islaman. Chay islapiqa ñuqallaykum testigo karqaniku. Chay islapi yaqa wata kachkaptiykum Adelpa maman wañukurqa. Llumpay llakisqa mana kanaykupaqmi yanapawarqaku sapa kuti Diosmanta willakuyniyku. Bibliamanta yachachisqayku achka runakunam Diosta serviyta munarqaku, chaymi huñunakunapaq wasita chay islapi ruwarqaniku. Chayarusqaykumanta kimsa wata pasayllatam 110 runakuna Jesuspa wañukusqanta yuyarinapaq huñunakuyman hamurqaku. Chayqa anchatam kusichiwarqaku. Pasakusqayku qipatam chay runakunamanta achka bautizakururqaku.

1986 watapim Culion islaman rinaypaq niwarqaku. Chay islapa huknin barrionpim lepra unquywan runakuna yachaqku. Chay islapi kachkaptiykum Adeltapas nombrarqaku precursora especial kananpaq. Leprawan unquq runakunapa cuerponqa manchakuypaqmi karqa. Chaymi qallariypiqa manchakuywan chay runakunaman Diosmanta willaq kaniku. Chaypi yachaq iñiqmasinchikkunam niwarqaku chay runakuna tratamientota chaskisqankurayku sasata contagiaruwanankumanta. Iñiqmasinchikpa wasinpi huñunakuykunata ruwaptiykum wakinku hamuqku. Paykunaqa piensarqakum Diospa hinaspa runakunapa qunqasqan kasqankuta.  Chaymi kusikuywan Diospa promesankunamanta yachachiq kaniku. Paykunapas anchatam kusikurqaku hamuq tiempopi sanoy-sanoyña kanankumanta yachaspanku (Luc. 5:​12, 13).

Culion islapi yachachkaptiykum Coron islamanta iskay sipas iñiqmasinchikkunata invitarqaniku hamunankupaq, chaynapi warmaykuna allin amistadniyuq kanankupaq. Samuel, Shirley hinaspa invitasqayku sipaskunam bibliamanta achka warmachakunaman kusisqa yachachiqku. Adelwan ñuqañataqmi yachachiq kaniku tayta-mamankuman. Wakinpiqa 11 familiamanmi yachachiq kaniku. Achka runakuna Dios serviyta qallaykusqanraykum manapas unaymanta musuq congregacionña karqa.

Qallariypiqa ñuqallam chaypiqa punta apaq karqani. Chaymi betelpi punta apaqkuna niwarqa Culion islapi pusaq iñiqmasinchikkunawan huñunakuykunata ruwanaypaq, chaynallatataqmi ruwanay karqa Marily llaqtapi isqun iñiqmasinchikkunawanpas. Chay llaqtachaman chayanaykupaqqa yaqa kimsa horam botechawan riq kaniku. Huñunakuy tukuytañataqmi llapallayku achka hora urquntakama riq kaniku Halsey llaqtachapi yachaqkunaman bibliamanta yachachiq.

Tiempopa risqanman hinam Marily hinaspa Halsey llaqtachakunamanta achka bautizakururqaku, hinaptinmi sapa llaqtachapi huñunakunapaq salonta ruwarqaniku. Linapacan islachapi hinam iñiqmasinchikkunawan Diosmanta yachay munaq runakunaqa huñunakuna salonpaq yaqa lliw materialkunata churarqaku, hinaspapas salonta ruwaypim yanapakurqaku. Marily llaqtachapi salonmanqa 200 runakunam yaykuq hinaspapas chaypi asamblea apakunanpaqmi hatunyachinapaq campo karqa.

Warmayku hatunña kachkaptinmi 1993 watapi iskayniyku Filipinas nacionpi llaqtan-llaqtan watukuq kayta qallaykurqaniku. 2000 watapim invitawarqa solterokunapaq bibliamanta escuelaman rinaypaq, chaynapi qipakunaman chay escuelapi yachachiq kanaypaq. Ñuqaqa manamá chaypaq hinachu hapikurqani, ichaqa Adelmi sapa kuti kallpanchawaq hinaspa yuyarichiwaq chayta ruwanaypaq Jehova Dios yanapawananta (Filip. 4:13).  Adelqa chaynataqa niq unquptinpas tukuy ima ruwasqanpi Dios yanapasqanraykum.

2006 watapi escuelapi yachachiq kachkaptiymi doctorkuna Adelta niykurqaku parkinsonwan unqusqanta. Chayta yacharuspaykum mana ima ruwaytapas atirqanikuchu. Adeltam nirqani escuelapi yachachiq kasqayta saqispay saludninpi cuidanaypaq. Payñataqmi niwarqa: “Ama hina kaspaykiyá doctorta maskarapuway yanapawananpaq. Jehova Diosmi yanapawasunchik paypaq ruwananchik kaqkunapiqa”, nispa. Chaymantaqa suqta wataraqmi Adelqa mana imatapas nispan hinalla Jehova Diosta servirqa. Manaña puriyta atispanmi ichaqa silla ruedawanña Diosmanta willakuq. Manaña rimayta atispanñataqmi huñunakuykunapiqa huk utaq iskay palabrallataña rimariq. Achka iñiqmasinchikkunam Adelmanqa mensajekunata apachimuqku aguantasqanwan qatipakunapaq kasqanmanta nispanku. Payqa 2013 watapim wañukurqa. Paywanqa 30 wata masninmi maypiñapas kuskayku karqaniku. Wañukuptinmi ichaqa llakisqa hinaspa sapallayña karqani.

Escuelapi hinalla yachachiq kanaypaqmi tantiarurqani. Chaytamá Adelpas munaq. Ocupasqallaña kasqayraykum mana sapallay hinaqa tarikuqchu kani. 2014 watamanta 2017 watakamam niwarqaku Diosmanta willakusqanchikta harkakusqanku nacionkunapi tagalo rimaq iñiqmasinchikkunata watukunaypaq. Chaymantañataqmi Taiwan, Estados Unidos hinaspa Canada nacionpi tagalo idiomata rimaq congregacionkunata watukurqani. 2019 watapiñataqmi India hinaspa Tailandia nacionpi Diospa munaychakuyninmanta willakuqkunapaq escuelapi yachachirqani ingles rimaypi. Chaykunapi yanapakuspaymi ancha kusisqa tarikuq kani. Jehova Diospaq imapas ruwaypi astawan yanapakuspayqa aswan kusisqam tarikuni.

Maypiña yanapakuspaypas iñiqmasinchikkunatam anchata kuyani. Chaymi paykunata saqiyqa mana facilchu. Chaynakuna pasaptinqa Jehova Diospim astawan hapipakuni. Chaymi yanapawarqa huklawpiña yanapakunaypaq niwaptinkupas sunqumanta kasukunaypaq. Kunanqa Filipinas nacionpim precursor especial kachkani. Kay congregacionniypi iñiqmasinchikkunawanmi ancha kusisqa tarikuni. Paykunaqa aylluy hinam kuyakuywan cuidawanku. Anchatataqmi kusikuni Samuelwan Shirleypas mamanku hina Diosman sunqu kasqankuta qawaspay (3 Juan 4).

Vidaypiqa tukuy ima sasachakuykunam karqa. Hukninmi karqa kuyasqay warmiyta wañukunankama unquqta qawasqay. Jehova Diospa llaqtanpi yanapakusqaypipas tukuy ima cambiokunatam pasarqani. Chaywanpas cuentatam qukururqani Diosqa ‘mana ñuqamanta llumpay karupi kasqanta’ (Hech. 17:27). “Jehova Diospa atiyninqa manam pisillachu”, payqa serviqninkunataqa kallpanchaykunmanmi hinaspa yanapaykunmanmi maypiña kaptinkupas (Is. 59:1). Diostam anchata agradecekuni tukuy vidaypi yanapaykuwasqanmanta hinaspa cuidaykuwasqanmanta. Manam haykapipas sapallayqa karqanichu.