¿Allin yachachiqchu kanchik?

“Diospa palabrantayá willakuy [. . .], runakunatapas faltanta qawachispayá qaqchay, kallpanchay hinaspa tukuy pacienciawan yachaykachiy [“allinta yachachiy”, NM].” (2 TIMOTEO 4:2.)

1. ¿Imatam Jesus qatiqninkunata kamachirqa, hinaspa ima ejemplotam qorqa?

JESUCRISTO kay Pachapi kachkaspanqa admirakunapaq milagrokunatam rurarqa, ichaqa manam milagrokuna rurasqanwanchu reqsichikurqa aswanmi allin yachachiq kasqanwan (Marcos 12:19; 13:1). Paypaqqa Diospa Gobiernonmanta sumaq noticia willakuymi aswan allin karqa, chaynallataqmi kunan tiempopi qatiqninkunapaqpas. Llapallan cristianokunam kamachikuyta chaskirqanchik runakunata yanapanapaq chaynapi Jesuspa qatiqninkuna kanankupaq, chaypaqmi Jesuspa tukuy ima kamachisqankunata kasukunankupaq yachachinchik (Mateo 28:19, 20).

2. ¿Imatam rurananchik predicanapaq kamachiwasqanchikta cumplinapaq?

² Jesuspa kamachisqanta allinta cumplinapaqmi, sapa punchaw kallpanchakunchik allin yachachiq  kanapaq. Apostol Pablom, predicaqmasin Timoteoman allin yachachiq kananpaq kallpanchaspan kaynata qellqarqa: “Chaynaqa cuidakuspayá allinta yachachiy. Chaynata ruraspaykiqa mana allinkunamantam salvakunki, salvankitaqmi uyarisuqnikikunatapas”, nispa (1 Timoteo 4:16). Apostol Pablo allin yachachiymanta rimaspanqa, manam rimachkarqachu Biblia estudiaqpa umanpi achka yachachikuykuna kananpaq yanapayllamantachu. Allin yachachiq cristianoqa yachachisqanwanmi runapa sonqonman chayan hinaspam kallpanchan vidanta tikrananpaq; chaymi allin yachachiyqa. Hinaptinqa, ¿imaynatam ‘allinta yachachichwan’ Diospa Gobiernonmanta runakunaman willaspa? (2 Timoteo 4:2.)

Kallpanchakusun ‘allin yachachiq’ kanapaq

3, 4. a) ¿Imaynatam ‘allin yachachiq’ kachwan? b) Diosmanta Willanapaq Yachachiq Escuela, ¿imaynatam yanapawanchik allin yachachiq kanapaq?

³ Allin yachachiq kanapaqqa estudiananchikmi, yachachiqkunatam qawananchik hinaspam chay yachasqanchikkunata rurananchik. Chaynaqa Diospa sumaq noticianmanta allin yachachiq kanapaqqa manam qonqananchikchu kay kimsa ruraykunata. Orakuspanchikmi estudiana ima yachachinanchikta allinta entiendenapaq (leey Salmo 119:27, 34). Qawananchiktaqmi allin yachachiq wawqe-paninchikkunapa imayna yachachisqankuta chaynapi qatipakunanchikpaq. Hinaspa kallpanchakunanchikmi chay yachasqanchikkunata rurananchikpaq chaynapi aswan allin yachachiq kanapaq (Lucas 6:40; 1 Timoteo 4:13-15).

⁴ Jehová Diosmi mana igualay atina Yachachiwaqninchikqa, chaymi llaqtanwan yachachiwanchik predicanapaq kamachiwasqanchikta imayna cumplinapaq (Isaias 30:20, 21). Chaypaqmi sapa semana congregacionkunapi Diosmanta Willanapaq Yachachiq Escuela nisqa huñunakuy apakun, chay escuelam yanapan matriculasqa kaqkunata Diospa Gobiernonmanta allinta willakunankupaq. Kay escuelapi yachachinapaq libroqa Bibliam. Diospa Palabranqa manam ima yachachinallapaqchu niwanchik, niwanchiktaqmi imayna yachachiy aswan allin kasqanmantapas. Diosmanta Willanapaq Yachachiq Escuelam sapa kuti yuyarichiwanchik allin yachachiq kanapaqqa, Bibliapim yachachisqanchikkuna takyanan, tapukuykunatam allinta servichikuna, entiendenankupaq hinam yachachina hinaspa sonqomantam paykunapi interesakuna. Kaykunamantam qatiqninpi yachachkasunchik. Yachasuntaqmi imaynatam Biblia estudiaqman yachachisqanchikwan sonqonman chayanamantapas.

Diospa Palabranman hina yachachisun

5. ¿Imapim yachachisqanchikkuna takyanan, hinaspa imanasqa?

⁵ Ancha allin yachachiq Jesucristom kay Pachapi kachkaspan sapa kuti Bibliapa nisqanman hina yachachirqa (Mateo 21:13; Juan 6:45; 8:17). Piensasqankunallata yachachinanmantaqa, Kamachimuqninpa sutinpim yachachirqa (Juan 7:16-18). Chay rurasqantam ñoqanchikpas qatipakunchik. Chaynaqa wasin-wasin predicaspa otaq estudiota qospaqa, Bibliawanmi yachachinanchik (2 Timoteo 3:16, 17). Kikinchikpa piensasqanchik maynaña allin kaptinpas, manam haykapipas igualayta atinmanchu Bibliapa imayna yachachisqanmanqa. Ama haykapipas qonqasunchu, Bibliaqa ancha atiyniyoqmi. Hinaptinqa imamanta yachachispapas, estudiaq allinta entiendenanpaqqa Bibliapa nisqantam leechinanchik (leey Hebreos 4:12).

6. ¿Imatam yachachiq ruranan yachachisqanta Biblia estudiaq allinta entiendenanpaq?

 ⁶ Arí, manamá chaywanqa nichkanchikchu, Bibliamanta yachachiq cristiano yachachinanpaq manaña preparakunantachu. Aswanqa ñawpaqmantaraqmi textokunata akllanan, chaynapi kikinpas otaq estudiaqpas Bibliamantapuni leenanpaq. Yaqa llapanpim allin kanman iñisqanchikkunata aswan yanapaq textokunata leeyninchikqa. Chaymantapas segurakunanchikmi Biblia estudiaq sapa texto leesqankunata entiendenanpaq (1 Corintios 14:8, 9).

Tapuykunata allintapuni servichikusun

7. ¿Imanasqataq tapukuykunata servichikuyqa yanapawanchik allinta yachachinapaq?

⁷ Tapuykunata allinta servichikuspaqa, Biblia estudiaqtam allinta piensarinanpaq yanapasun hinaptinmi yachasqankunapas sonqonman chayanqa. Ejemplopaq, estudiaqman textokunata explicanamantaqa, tapuykunata rurasun kikin explicananpaq. Wakinpiqa huk tapukuyllawanmi yanapachwan, wakinpiñataqmi ichaqa allinta entiendenanpaq achka tapuykunawan yanapachwan. Estudiopi astawan rimananpaq Biblia estudiaqta kallpanchaspaqa, yachasqankuna imanasqa chayna kasqanta entiendenanpaqmi yanapasun hinaspa kikinpas segurom kanqa yachasqankunamanta (Mateo 17:24-26; Lucas 10:36, 37).

8. ¿Imaynatam Biblia estudiaqkunapa sonqonpi ima kasqanta yachachwan?

⁸ Bibliamanta qellqanchikkunaqa kutichinapaq tapukuyniyoqkunam kachkan. Chaymi, ñoqanchikwan Biblia estudiaqkunaqa sapa parrafokunapi tapukuykunapa kutichiyninta tarinqaku. Chayna kaptinpas allin yachachiqqa, manam allin kutichisqallanwanchu qeparun. Ejemplopaq, ichapas estudiaqqa explicayta atinman huchapakuymanta Bibliapa ima nisqanta (1 Corintios 6:18). Cuidadollawan tapuykunata ruraspam yachachiqqa chay estudiasqankumanta ima piensasqanta yachanqa. Chaymantapas tapuchwanmi: “¿Imanasqataq mana allinchu Bibliapa nisqanman hina casado kachkaspa hukwan pierdekuyqa? ¿Imatam qam ninki kaymanta? ¿Allinchu kanman imayna kawsanapaq Diospa kamachisqanta kasukuy?” Kay tapukuykunata kutichisqanmi Biblia estudiaqpa sonqonpi ima kasqanta qawachinman (leey Mateo 16:13-17).

Entiendenanpaq hina yachachisun

9. ¿Imatam yuyarinanchik Bibliapa cheqap yachachikuyninkunata yachachispa?

⁹ Bibliapa yaqa llapallan yachachisqankunaqa manam sasa entiendenapaqchu. Ichapas Biblia estudiaqkuna pantaypi kachkanku mana allin religionkunapa yachachisqanwan. Yachachiq kaspanchikmi, Bibliapa yachachisqankuna mana sasa entiendena kasqanta qawachinanchik. Allin yachachiqkunaqa facil entiendenankupaq, clarota hinaspa imam kaqtam yachachin, chaynapim mana sasachankuchu cheqap yachachikuy entiendenankuta. Chaymi mana allinchu kanman yachachisqanchikta mana ancha yanapaq kaqkunamanta rimayqa nitaq leesqanchik textokunamanta lliw yachachisqanta explicaypas. Aswanqa yachachisqanchikta allinta entiendenankupaq hina yachachisun. Biblia estudiaq pisi-pisimanta astawan yachaspanmi, Bibliapi sasaniraq kaq yachachikuykunata astawan entiendenqa (Hebreos 5:13, 14).

10. ¿Imakunam yanapawasun sapa estudiopi haykata estudianapaq?

¹⁰ Biblia estudiaqta yachachispanchik, ¿haykatam  estudiananchik? Manam niyta atichwanchu; ¿imanasqa? Estudiaqpa chaynataq yachachiqpapas entiendesqan hinaspa tiemponpas mana chaynalla kasqanrayku. Imayna kaptinpas, Biblia estudiaqtaqa yanapananchikmi iñiyninpi qaqa hina kananpaq. Chaymi paykunawan estudiaspaqa tiempota qonanchik leenanpaq, entiendenanpaq chaynataq Bibliapa cheqap yachachisqankunata chaskinanpaqpas. Hinaspa atisqanman hinallayá estudiachisunchik, ichaqa estudiopi ama qepaspalla. Yachachisqanchikta entienderuptinqa, qatiqninmanña pasasun (Colosenses 2:6, 7).

11. ¿Imatam yachanchik apostol Pablo imayna yachachisqanmanta?

¹¹ Runakunaman apostol Pablo predicaspaqa entiendenankupaq hinam yachachirqa. Estudioyoq kaspanpas manam yachaysapa runakuna hinachu rimarqa (leey 1 Corintios 2:1, 2). Bibliapa cheqap yachachiyninkuna mana sasa entiendey kasqanraykum, allin sonqoyoq runakuna yachayta munanku; manam yachaysapa runaraqchu kana entiendenapaqqa (Mateo 11:25; Hechos 4:13; 1 Corintios 1:26, 27).

Yachasqankuna allinpuni kasqanta qawananpaq yanapasun

12, 13. ¿Imam Biblia estudiaqta yanapanqa yachasqankunata rurayman churananpaq? Huk ejemplota churay.

¹² Bibliapa yachachikuynin runakunata yanapananpaqqa, sonqonmanmi chayananchik. Estudiaqqa entiendenanmi yachasqankuna paypaq hina chaynataq allinninpaq kasqanta. Entiendenantaqmi Bibliapa nisqankunata kasukuptinqa, imayna kawsasqanpas allinyananta (Isaias 48:17, 18).

¹³ Ejemplopaq, Hebreos 10:24, 25 nisqanmanta yachachichkanchikman, chaypim cristianokunata nichkan huñunakuspa kallpanchanakunankupaq hinaspa wawqe-panikunawan kuyanakunankupaqpas. Biblia estudiaq huñunakuykunaman manaraq riptinqa, pisillapim nichwan chay huñunakuykuna imayna kasqanmanta hinaspa imakunamanta yachachisqantapas. Nichwantaqmi, huñunakuyman rispa Dios yupaychasqanchikmanta hinaspa allinninchikpaq kasqanmantapas. Hinaspa kuska rinanchikpaq invitasunchik. Arí, Bibliapa kamachisqanta kasukunanpaqqa Jehová Dios kuyasqanmi yanapanan, manam estudiachiqninta kusichiy munasqanchu (Galatas 6:4, 5).

14, 15. a) ¿Imatam Biblia estudiaq yachanman Jehová Diosmanta? b) ¿Imaynatam yanapanqa Diospa imayna kasqanta yachasqan?

¹⁴ Estudiaqkuna Bibliamanta astawan yachaspanku hinaspa kamachikuyninkunatapas kasukuspankuqa, Jehová Dios imayna kasqantam reqsinqaku hinaspa astawan kuyanqakupas (Isaias 42:8). Jehová Diosqa kuyakuq Taytanchikmi, tukuy Unanchaqmi hinaspa Paypam tukuy imapas. Chaymantapas, serviqninkunatam astawan yachaykachin sumaq kayninkunamanta hinaspa ima ruray atisqanmantapas (leey Exodo 34:6, 7). Egipto nacionmanta israelitakunata manaraq Moises horqochkaptinmi, Jehová Diosqa reqsichikurqa kaynata nispan: “Ñoqaqa Kani Hina Kaqllam”, nispa (Exodo 3:13-15). Kayna nisqanwanqa Jehová Diosqa nichkarqa, imatapas ruraspan akllasqan llaqtanrayku prometesqanta cumplinanmantam. Chaynatam israelitakuna Jehová Diosta reqsirqaku Salvaqninkuta hina, Guerrapi peleaqta hina, imapas Qoqninkuta hina, prometesqankunata Cumpliqta hina chaynataq hukkunapipas yanapaqninkuta hina (Exodo 15:2, 3; 16:2-5; Josuey 23:14).

¹⁵ Ichapas Biblia estudiaqkuna mana haykapipas uyarinqakuchu Diospa rimasqanta Moises hinaqa. Imayna kaptinpas, iñisqan hinaspa kuyasqan yachasqankunata rurayman churananpaq kallpanchaptinqa, munanqachá yanapananpaq Jehová Dios mañakuyta chaynataq valorta hinaspa yachayta qonanpaqpas. Jehová Dios imayna yanapasqanta musyakuspankum yachanqaku Jehová Diosqa Waqaychakuq, Qokuykuq, allin Consejakuq hinaspa confianapaq kasqantapas (Salmos 55:22; 63:7; Proverbios 3:5, 6).

Sonqomanta interesakusqanchikta qawachisun

16. Allin yachachiq kanapaqqa, ¿imataq astawan yanapawasun mana ancha allin yachachiq kaptinchikpas?

¹⁶ Mana ancha allin yachachiq kaspaykiqa ama hukmanyaychu. Jehová Dioswan Jesucristom qawachkanku enteron pachapi predicacion  apakusqanta (Hechos 1:7, 8; Apocalipsis 14:6). Paykunam kallpanchakusqanchikta bendecinqaku hinaptinmi allin sonqoyoq runakunata imayna yachachisqanchik yanapanqa (Juan 6:44). Yachachiqpa kuyasqanmi hinaspa sonqomanta interesakusqanmi astawan Biblia estudiaqta yanapanqa mana ancha allin yachachiq kaptinpas. Apostol Pabloqa yacharqam yachachisqan runakunata kuyayqa allinpuni kasqanta, chaytam qawachirqa imapas rurasqanpi (leey 1 Tesalonicenses 2:7, 8).

17. Ñoqanchikwan Biblia estudiaqkunapi, ¿imaynatam sapakamapi interesakusqanchikta qawachichwan?

¹⁷ Ñoqanchikpas Biblia estudiachisqanchikkunapi interesakusqanchiktam qawachichwan. ¿Imaynata? Astawan reqsinanchikpaq tiempochakuspa. Bibliapa yachachikuyninkunamanta paykunawan rimaspaqa, astawanmi reqsisunchik imayna kasqankumanta. Imayna kawsasqanpi ichapas Bibliapi yachasqanman hina rurasqantaña wakinpiqa qawanchik, hukkunapiñataq manaraqpas. Bibliapa yachachikuyninkunata imayna rurayman churanankupaq yachachispaqa, kuyasqanchiktam qawachisun hinaspa yanapasuntaqmi Jesuspa cheqap qatiqnin kanankupaq.

18. ¿Imanasqataq allinpuni Biblia estudiaqwan orakuyqa hinaspa chay orakusqanchikpi paypaqpas mañakuyqa?

¹⁸ Allinpunim Biblia estudiaqwan kuska orakuyqa hinaspa chay orakusqanchikpi paypaq mañakuypas. Runamasinchikqa allintam musyakunanku, Unanchawaqninchikta allintapuni reqsinankuta, payman asuykunankuta hinaspa nisqankuna kasukunankutapas munasqanchikta (leey Salmo 25:4, 5). Bibliamanta yachasqankunata kasukuypi kallpanchakusqanta Jehová Dios bendecinanpaq mañakuptinchikqa, payqa musyanqachá Bibliamanta ‘uyarisqanman hina ruray’ allinpuni kasqanta (Santiago 1:22). Chaymantapas sonqomanta mañakusqanchikta uyarispanmi, paypas mañakuyta yachanqa. ¡Anchatamá kusichiwanchik Dioswan allin kanankupaq Biblia estudiaqkunata yanapayninchikqa!

19. ¿Ima tapuytam qatiqnin yachachikuypi kutichichkasun?

¹⁹ Ancha kusikunapaq hinam soqta millonmanta masninraq wawqe-paninchikkunapa ‘allin yachachiq’ kanankupaq kallpanchakuyninkuqa, llapallankum yanapayta munanku allin sonqoyoq runakuna Jesuspa kamachisqanta kasukunankupaq. Chaynaqa, ¿imakunatam predicasqanchikwan hayparunchik? Kay tapukuytam qatiqnin estudiopi kutichichkasun.

¿Yuyachkankichu?

• ¿Imanasqataq ‘allin yachachiq’ kananchikpaq allinpuni kallpanchakuyninchik?

• ¿Imaynatam allin yachachiq kasunchik?

• ¿Imakunataq yanapawasun mana ancha allin yachachiq kaptinchikpas?

[Kay yachachikuypa tapukuyninkuna]

[15 kaq paginapi dibujo]

¿Diosmanta Willanapaq Yachachiq Escuelapi matriculasqañachu kachkanki?

[16 kaq paginapi dibujo]

¿Imanasqataq ancha allin kanman estudiaqta Bibliamantapuni leenanpaq kallpanchay?

[18 kaq paginapi dibujo]

Biblia estudiaqwan orakuy hinaspa chay orakusqaykipi paypaqpas mañakuy