Diospa gobiernonta chaskinankupaq kaqkuna

“Kayqa qawachiwanchik Diospa juicionqa justo kasqantam, qamkunaqa Diospa munaychakusqanpaqñam kankichik.” (2 TESALONICENSES 1:5.)

1, 2. ¿Ima juiciotam Jehová Dios ruranqa, hinaspa pitam juzgananpaq churarun?

ÑAWPA cristianokunapa tiemponpi yaqa 50 watapim, apostol Pablo watukurqa Atenas llaqtata. Chay llaqtapim rikurqa achkallaña taytacha-mamachakunata, chayraykum Atenas llaqtayoq runakunaman yachachirqa. Yachaywan sumaq discurso qosqanqa admirachirqachá taytacha-mamacha yupaychaq runakunataqa. Paykunatam nirqa: “Kunanmi ichaqa llapallan runakunata enteron kay pachapi [Dios] kamachin huchankumanta wanakunankupaqña. Diosmi akllarun huk runata, paymi akllasqan punchawpi allin arregloman hina kay pachata juzganqa. Chayta llapa runakuna creenankupaqmi chay akllasqan Jesusta Dios kawsarichimurqa”, nispa (Hechos 17:30, 31).

² Runakunata juzgananpaq Diospa huk punchaw akllasqanqa, allinta piensarinapaqmi. Qawasqanchikman hinam Jehová Diosqa Jesucristota akllarun juzgananpaq. Pay juzgaptinqa runakuna kawsanankupaq otaq wañunankupaqmi kanqa.

3. ¿Imapaqmi Jehová Dios Abrahanwan contratota rurarqa, hinaspa chay contrato cumplikunanpaq pikunataq ancha allin rurayniyoq kanqaku?

³ Juicio Punchawqa waranqa watam kanqa, Diospa Gobiernonpi Kamachiq Jesucristom Taytanpa  sutinpi juzganqa. Jesuspas manamá sapallanchu juzganqa. Jehová Diosmi runakunata akllan Jesuswan kuska waranqa wata kamachinankupaq hinaspa juzganankupaqpas (tupachiy Lucas 22:29, 30 nisqanwan). Yaqa tawa waranqa wata ñawpaqtaraqmi, Jehová Diosqa Juzganan Punchawpaq contratota rurarqa tukuy sonqomanta serviqnin Abrahanwan, chay contratoqa qallaykurqachusmi 1943 watapi manaraq Jesus nacechkaptin (leey Genesis 22:17, 18). Arí, Abrahanqa manamá allintaqa entienderqachu chay contrato rurasqankumantaqa. Kunanmi ichaqa entiendenchik, Diospa munaynin cumplikunanpaqmi Abrahanpa mirayninqa ancha allin rurayniyoq kanqaku runakunata juzganankupaq.

4, 5. a) ¿Pitaq karqa Abrahanpa mirayninmanta aswan allin rurayniyoqqa, hinaspa imatam nirqa Diospa Munaychakusqanmanta? b) ¿Haykapitaq runakunapaq Diospa Munaychakusqanpi kamachinankupaq suyakuy qallaykurqa?

⁴ Abrahanpa mirayninmanta aswan allin rurayniyoqqa Jesusmi karqa, paymi 29 watapi Diospa chuya espiritunwan akllasqa karqa, chaynapim prometesqa Mesias otaq Cristo karqa (Galatas 3:16). Chaymanta qatiqnin kimsa wata hinaspa soqta killam Jesusqa Juda nacionpi Diospa Gobiernonmanta predicarqa. Bautizaq Juanta presochasqanku qepamanmi, Jesus qawachirqa runakuna hanaq pachamanta kamachimunankupaq suyakuyniyoq kasqankuta, kaynata nispa: “Bautizaq Juanpa tiemponmantapacha kunankamam runakunaqa Diospa munaychakusqanpi kanankupaq anchata kallpanchakunku, ñawparispa ancha kallpanchakuqkunam chaytaqa haypanku”, nispa (Mateo 11:12, NM).

⁵ Diospa munaychakusqan ‘haypaqkunamanta’ manaraq rimachkaspanmi Jesus kaynata nirqa: “Cheqaptapunim nikichik: Warmimanta naceqqa manam pipas hoqarisqachu karqa Bautizaq Juanmanta mayorqa, aswanmi hanaq pachamanta kamachiqkunapa sullka kaqmi Juanmanta aswan mayorqa”, nispa (Mateo 11:11, NM). ¿Imanasqataq chaynata nirqa? Diospa Munaychakusqanpi kamachinankupaq suyakuyqa qallaykurqam Pentecostes 33 watapi Diosman sonqo runakuna chuya espirituta chaskisqankuwan, chay tiempopaqqa Bautizaq Juanqa wañukurqañam (Hechos 2:1-4).

Abrahanpa miraynintam mana huchayoqtaña qawan

6, 7. a) ¿Imanasqataq Biblia nin ‘lucerokuna’ hina achkallaña Abrahanpa miraynin kananmanta? b) ¿Ima bendiciontam Abrahan chaskirqa, hinaspa ima bendiciontam mirayninpas pay hina chaskinqa?

⁶ Jehová Diosmi Abrahanta prometerqa, ‘lucerokuna’ hina chaynataq ‘lamar qochapa patanpi aqo’ hina miraynin achkallaña kananpaq (Genesis 13:16; 22:17). Abrahanpa tiemponpiqa manam pi runapas yachayta atirqachu chay espiritualpi miray hayka runakuna kanankumanta. Ichaqa, tiempopa risqanman hinam yachakurqa hayka kasqankumanta, chay miraymi karqa: Jesus hinaspa 144.000 runakuna (Apocalipsis 7:4; 14:1).

⁷ Diospa Palabranmi nin: “Abramqa Tayta Diosman iñisqanraykum mana huchayoqpaqña chaskisqa karqa”, nispa (Genesis 15:5, 6). Arí, manam pi runapas llapanpiqa allin ruraqchu (Santiago 3:2). Chayna kaptinpas, Abrahan ancha iñiyniyoq kasqanraykum Jehová Dios mana huchayoqpaqña chaskirqa hinaspa amistadnin karqa (Isaias 41:8). Hanaq pachaman riqkuna Jesuswan kuska Abrahanpa espiritual miraynin kaspankum, Diospaqqa mana huchayoqña kanku chaymi Abrahanmantapas astawanraq achka bendicionkunata chaskinku.

8. ¿Ima bendicionkunatam chaskinku Abrahanpa espiritualpi mirayninkuna?

⁸ Ungido cristianokunaqa mana huchayoqpaqñam chaskisqa kanku Jesucristopa wañukusqanpi iñisqankurayku (Romanos 3:24, 28). Jehová Diospa qawasqanman hinaqa huchankumantam librasqaña kanku, chaymi chuya espirituwan akllasqa kaspanku  Diospa churin hinaspa Jesucristopa wawqenkunapas kanku (Juan 1:12, 13). Chaymantapas, paykunaqa Diospa mosoq contrato rurasqanpim kachkanku hinaspa mosoq nacionmi kanku, ‘Diospa cheqap akllasqankuna’ otaq Diospa Israelnin (Galatas 6:16; Lucas 22:20). ¡Mayna kusisqam tarikunku! Chaykunata Dios paykunapaq rurasqanraykum ungidokunaqa kay Pachapi wiñaypaq kawsakuytaqa manaña suyankuchu. Chay suyakuytam saqenku, Juicio Punchawpi Jesusta yanapanankupaq chaynataq paywan hanaq pachapi kamachinankupaq suyakuyninku ancha kusikunapaq kasqanrayku (leey Romanos 8:17).

9, 10. a) ¿Haykapitaq cristianokuna chuya espirituwan akllasqa kayta qallaykurqaku, hinaspa chaymantapacha imatam pasananku karqa? b) ¿Ima yanapakuytam ungido cristianokuna chaskirqaku?

⁹ Pentecostes 33 watapim, yaqa pachak iskay chunka qarikunawan warmikuna Diosman sonqo kaqkuna akllasqa karqaku hanaq pachamanta Jesuswan kuska Juicio Punchawpi kamachimunankupaq. Chaypi lliw huñunakuqkunam chuya espirituwan bautizasqa karqaku, chaynapim hanaq pachaman rinankupaq punta akllasqa cristianokuna karqaku. Chuya espirituta chaskisqankuqa hanaq pachaman rinankupaq qallariyllanraqmi karqa. Chaymantapacham Satanas tukuy ima pruebakunaman churanman karqa, paykunañataqmi Diosman sonqo kananku karqa. Chay premiotaqa chaskinmankum iñiyninkupi qaqa hina wañunankukama kaspallanku (Apocalipsis 2:10).

¹⁰ Jehová Diosmi ungidokunataqa paymanta mana karunchakuspa qaqa hina kanankupaq consejaspan kallpancharqa, chaypaqmi servichikurqa congregacionta hinaspa Palabrantapas. Ejemplopaq, apostol Pablom Tesalonica llaqtapi ungido kaq wawqenkunaman kaynata qellqarqa: “Yachankichikmi imaynatam taytaqa churin rimapayasqanta, chaynam ñoqaykupas qamkunata kallpancharqaykiku hinaspam kunarqaykiku Diospa churin hina allinta kawsanaykichikpaq. Paypunim qayasuchkankichik munaychakusqanmanwan hatunchasqa kanaykichikman”, nispa (1 Tesalonicenses 2:11, 12).

11. ¿Ima qellqatam Jehová Dios ungidokunaman qorqa?

¹¹ Punta ungidokuna akllasqa kasqankumanta qatiqnin watakunapim, Jehová Dios allinpaq qawarqa Jesus kay pachapi kachkaspa rurasqankuna qellqasqa kananpaq. Chaymantapas tantearurqam ungidokunawan Jesus imayna kasqanta hinaspa consejokuna qosqanmantapas qellqasqa kananpaq. Chayraykum parten Bibliata griego rimaypi Jehová Dios qellqachirqa, ñawpaqpiqa karqañam hebreo rimaypi Bibliaqa. Hebreo rimaypi qellqasqa parten Bibliaqa Israel nacion runakunapaqmi puntapiqa karqa, Jehová Diosta yupaychasqanku tiempokunapi. Griego rimaypi qellqasqa kaqñataqmi hanaq pachaman riqkunapaq qellqasqa karqa, paykunam chuya espirituwan akllasqa karqaku Jesucristopa wawqenkuna hinaspa Diospa churinkuna kanankupaq. Ichaqa, israelitakunamanta huk runakunapas hebreo rimaypi qellqasqa Bibliawan yanapachikusqankuman hinam, kunanpas mana ungido kaq cristianokunapas yanapachikunmankum griego rimaypi qellqasqa Bibliata estudiaspa chaynataq rurayman churaspankupas (leey 2 Timoteo 3:15-17).

12. ¿Imatam yuyarichirqa apostol Pablo ungidokunata?

¹² Punta cristianokunatam Jehová Dios mana huchayoqpaqña qawarqa hinaspam chuya espiritunwan sapaqcharqa chaynapi hanaq pachapi herenciata chaskinankupaq, kay Pachapi kachkaspa sapaqchasqa kasqankuqa manam chayllachu tikrarurqa kamachiqña kanankupaqqa. Wakinkunaqa manachusmi chaynatachu entiendesqaku, chaymi sapaqchasqa wawqe-paninkunamanta astawan hatunchakuspanku respetasqa kayta maskarqaku, hinaspam rey hinaña paykunapaq rikurirurqaku. Chayraykum apostol Pablo paykunata kaynata nirqa: “Qamkunapaqa kapususqankichikñachusmi tukuy munasqaykichikqa, qamkunaqa apuñachusmi kasqankichik, mana yanapachkaptillaykum rey hinaña rikurirusqankichik. ¡Amalaya reyña kawaqchik ñoqaykupas qamkunawan kuska reyña kanaykupaq!”, nispa (1 Corintios 4:8). Chaymantapas yuyarichirqam kaynata nispan: “Ñoqaykuqa manam iñisqaykichikpi munaychakuytachu munachkaniku, munachkanikuqa kusisqa kanaykichikpaq yanapaykuytam”, nispa (2 Corintios 1:24).

Imaynatam Diospa Gobiernonpi kamachiqkuna completakun

13. Pentecostes 33 watamantapacha, ¿imaynam karqa Jehová Diospa ungidokunata hinalla akllaynin?

¹³ Punta pachak watakunapiqa 144.000 ungido kaqkunaqa manaraqmi completakurqachu. Apostolkunapa tiemponpim qallaykurqa hanaq pachaman rinankupaq ungidokuna akllayqa hinaspa chay tiempomantam akllayqa hinalla karqa. Chay watakunamanta qepamanqa pisillañachusmi akllasqa  karqaku kunan tiemponchikkamapas (Mateo 28:20). Hanaq pachapi Jesucristo 1914 watapi kamachiyta qallaykuptinmi, kay pachapi utqayllaman tukuy imakuna pasarqa.

14, 15. Kunan tiemponchikpi, ¿imanasqam Jehová Dios runakunata hinalla akllachkan hanaq pachaman rinankupaq?

¹⁴ Puntataqa Jesusmi Diospa gobiernonpa contranpi kaqkunata hanaq pachamanta qarqoramurqa (leey Apocalipsis 12:10, 12). Chaymantañataqmi paywan kamachinankupaq faltaqkunata akllayta qallaykurqa 144.000 kanankupaq. Yaqañachusmi 1930 watapaqqa ungidokunata akllayqa tukuruchkarqaña, chay tiempokunapim Diospa munaychakusqanmanta uyariqkunaqa manaña hanaq pachaman riytaqa munarqakuñachu. Chuya espirituqa manañam paykunaman willarqañachu Diospa churinkuna kanankumanta (tupachiy Romanos 8:16 nisqanwan). Aswanmi ‘sapaq ovejakuna’ kasqankuta reqsichikurqaku, paykunaqa kay pachapi wiñaypaq kawsakuy suyakuyniyoqmi kanku (Juan 10:16). Hinaptinmi, 1935 watamanta huñuyta qallaykurqaku kay pachapi wiñaypaq kawsakuy suyaq “achkallaña runakunata”, paykunam “hatu-hatun ñakariymanta” librasqa kanqaku apostol Juanpa mosqoyninpi rikusqanman hina (Apocalipsis 7:9, 10, 14).

¹⁵ Chayna kaptinpas, 1930 watamantaqa wakin cristianokunam hinallaraq akllasqa karqaku ungido kanankupaq. ¿Imanasqataq chay pasakun? Wakinpiqa ichapas ungidokuna mana kasukuqña rikuriruptinku paykunapa rantinpi hukña akllasqa kasqanrayku (tupachiy Apocalipsis 3:16 nisqanwan). Ejemplopaq, apostol Pablom reqsirqa cheqap yachachikuyta saqeruspanku Diosmanta karunchakuruq achka cristianokunata (Filipenses 3:17-19). Hinaptinqa, ¿pikunatam Jehová Dios akllanman karqa chay ungidokunapa rantinpi? Chaytaqa Jehová Diosllam tanteanman. Ichaqa manachá akllanmanchu chayllaraq bautizakuqkunataqa, aswanqa unay tiempoña sasachakuykunapi tarikuspankupas Jehová Diosta hinalla serviqkunatam. Chaynam karqaku Jesuspa discipulonkuna, paykunawanmi Jesus kachkarqa wañukunan punchawta yuyarinankupaq qallarichiptin (Lucas 22:28). *

16. ¿Imanasqam Jehová Diosta agradecekunchik ungidokunamanta, hinaspa imamantam seguro kachwan?

¹⁶ Chaywanpas, 1930 watamanta hanaq pachaman rinankupaq akllasqa kaqkunaqa, manachusmi mana kasukuq ungidokunapa rantinpichu llapallankuqa akllasqa kanku. Qawasqanchikman hinaqa,  Jehová Diosmi segurakuyta munan kay tukupay tiempokunapi ungidokuna ñoqanchikwan kuskaraq kanankupaq, “Hatun Babilonia” otaq lliw pantasqa religionkuna puchukachisqa kanankama (Apocalipsis 17:5). * Segurom kachwan Jehová Diospa munasqan tiempopi 144.000 ungidokuna completakunanta, hinaspa hanaq pachamanta kamachimunankupaq rinankutapas. Chaymantapas segurom kachwan, Bibliapa willasqanman hina kay pachapi kawsakuy suyaq, Diospa llaqtan iñiyninkupi suni kanankumanta. Pisi tiempollamantaña “hatu-hatun ñakariy” Satanaspa runankunapaq kaptinmi, Diospa llaqtanpi kaqkunaqa librasqa kanqaku hinaspam kusikuyllawanña Diospa prometesqan mosoq pachaman yaykunqaku.

¡Diospa gobiernonpi kamachiqkunaqa yaqa lliwñam kachkanku!

17. 1 Tesalonicenses 4:15-17 hinaspa Apocalipsis 6:9-11 nisqanman hina, ¿imataq pasarunña Diosta kasukuchkaspa wañukuq ungidokunata?

¹⁷ Waranqantin ungidokunam 33 watamantapacha iñiyninkupi qaqa hina allinta takyarqaku hinaspa wañunankukama sasachakuykunatapas aguantarqaku. Paykunaqa Diospa Gobiernonpi kamachinankupaqñam chaskisqa kachkanku. Chaymantapas Jehová Diosmi sumaq regalota hina qoykunña hanaq pachamanta kamachimunankupaq, chaykunaqa yaqapaschá pasakurqa Jesucristo hanaq pachapi kamachiyta qallaykusqan watakunapi (leey 1 Tesalonicenses 4:15-17; Apocalipsis 6:9-11).

18. a) ¿Imamantam seguro kachkanku kay Pachapi puchuq ungidokuna? b) ¿Imatam piensanku ungidokunamanta kay pachapi wiñaypaq kawsakuy suyaqkuna?

¹⁸ Kay Pachapi puchuq ungidokunaqa seguropunim kachkanku iñiyninkupi qaqa hina takyaspankuqa, hanaq pachamanta kamachinankupaq regalota chaylla chaskinankumanta. Millonnintin kay pachapi kawsanankupaq suyakuyniyoq kaqkunañataqmi ungidokunapa iñiyninkuta qawaspanku, Tesalonica lawpi ungidokunaman apostol Pablopa nisqanman hina paykunapas ninku: “Qatikachasqa kaspaykichikpas chaynataq ñakarichisqa kaspaykichikpas pacienciawan hinaspa iñiywan aguantasqaykichikraykum Diosman iñiqkunapa huñunakuyninkupi qamkunamanta alabakuniku. Kayqa qawachiwanchik Diospa juicionqa justo kasqantam, qamkunaqa Diospa munaychakusqanpaqñam kankichik, chayraykum ñakarichkankichikpas”, nispa (2 Tesalonicenses 1:3-5). Kay pachapi ungidokuna llapallanku wañukuptinkuqa, Diospa Gobiernonpi kamachiqkunaqa completoñam kanqaku. ¡Mayna kusikuychá kanqa chayrayku hanaq pachapi hinaspa kay Pachapipas!

[Willakuykuna]

¿Kutichiyninta yachankichu?

• ¿Imatam Jehová Dios Abrahanman prometerqa Juicio Punchawman tupaqta?

• ¿Imanasqataq Abrahanta mana huchayoqtaña Jehová Dios qawarqa?

• ¿Ima bendicionkunatam chaskinku Abrahanpa miraynin kaqkuna mana huchayoqña qawasqa kasqankurayku?

• ¿Imamantam seguro kachkanchik llapallan cristianokuna?

[Kay yachachikuypa tapukuyninkuna]

[23 kaq paginapi dibujo]

Jesusqa qatiqninkunatam kallpancharqa Diospa Gobiernonpi kanankupaq

[24 kaq paginapi dibujo]

Pentecostes 33 watapim Jehová Dios akllayta qallaykurqa hanaq pachaman rinankupaq runakunata, paykunapas Abrahanpa mirayninmi kanku

[26 kaq paginapi dibujokuna]

Kay pachapi wiñaypaq kawsakuy suyaqkunapas kusikunkum ungidokunawan kay tukupay tiempopi kaspanku