Jesucristopa kamachiwasqanchikta hinalla cumplisunchik

‘Señorninchik Jesucristopa kamachisqanta [...] cumplisunchik.’ (COLOSENSES 4:17.)

1, 2. Runakuna salvakunankupaq, ¿ima ruranapaqmi Biblia kamachiwanchik?

CRISTIANOKUNAQA runakunapa vidanmantam cuentata qosunchik, predicasqanchikman hina imayna tanteakusqankum kawsanankupaq otaq wañunankupaqpas kanqa ‘hatun-hatun ñakariy’ punchaw chayamuptin (Apocalipsis 7:14). Bibliapim Proverbios libro niwanchik: “Libray wañuyman pusasqakunata. Wañunayaqkunatayá harkay wañunanmanta”, nispa. ¡Mayna piensarinapaqmi kay palabrakunaqa! Sichu runakunaman mana predicasunchu imayna tanteakunankupaqpas, hinaptinqa wañusqankumantachá culpayoq kasunchik. Chaymantapas nintaqmi: “‘Cheqappunipas manam yacharqanichu’ niptikipas ¿manachum cuentata qokuchkan sonqokuna qawaqqa? ¿Manachum chaytaqa yachachkan vidakuna waqaychaqqa? Runakunapa rurasqanman hinataqmi payqa paganqa”, nispa. Manamá Jehová Dios serviqkunaqa runakunapa vidan peligropi kasqanmantaqa nichwanchu “manam yacharqanichu” nispaqa (Proverbios 24:11, 12).

² Jehová Diosqa runakunapa vidanta valorniyoqta qawasqanraykum, kallpanchawanchik atisqanchikman hina achka runakunata salvananchikpaq. Dios serviqkunaqa llapallanchikmi runakuna salvakunankupaq Bibliapa yachachisqanta willananchik. Llamkasqanchikqa rikchakunmi ima peligromantapas cuidaqpa willakusqanman. Manamá munanchikchu wañuqkunamanta ‘culpayoq kaytaqa’ (Ezequiel 33:1-7). Chaynaqa allinpunim hinalla kallpanchakuspa Diospa ‘palabranmanta willakuyninchikqa’ (leey 2 Timoteo 4:1, 2, 5).

3. ¿Imakunamantam yachasunchik kay estudiopi hinaspa qatiqnin iskay estudiokunapipas?

³ Kay estudiopim yachasunchik Dios serviyninchikpi sasachakuykunata imayna vencenamanta, hinaspa achka runakunata imayna yanapanamantapas. Qatiqnin estudiopim yachasun allin yachachiq kanamanta chaynapi Diospa Palabranmanta allintapuni yachachinapaq. Kimsa kaq estudioñataqmi yachachiwasun Diospa Gobiernonmanta enteron pachapi willakuqkunapa ima haypasqankunamanta. Manaraq kaykunamanta yachachkaspa, qawasunchik imanasqam kunan tiempopi kawsasqanchik llumpay sasallaña kasqanmanta.

¿Imanasqataq runakuna mana suyakuyniyoq kawsanku?

4, 5. ¿Imakunataq runakunata ñakarichichkan, hinaspa imaynam tarikunku chaykuna pasaptin?

⁴ Enteron pachapi tukuy imakuna pasasqanmi qawachiwanchik ‘puchukay’ tiempopi kawsasqanchikta. Runakuna llumpay sasachakuyllapiña kasqankum qawachin, Jesuspa hinaspa discipulonkunapa nisqankuman hina ‘tukupay tiempokunapi’ kasqanchikta. Runakunatam ñakarichiwanchik guerrakuna, yarqay hinaspa terremotokunapas. Chaynataq, maylawpipas runakunaqa kachkanku kikillanpaq munaqkuna, mana kasukuqkuna hinaspa Diosta mana respetaqkunapas. Cheqaptamá kay ‘tiempokunaqa sasallaña kachkan’, ñoqanchik cristianokunapaqpas (Mateo 24:3, 6-8, 12; 2 Timoteo 3:1-5).

⁵ Chayna kaptinpas, yaqa llapallan runakunam mana yachankuchu enteron pachapi tukuy imakuna pasasqan imanasqa chayna kasqanta. Chayraykum achkallaña runakuna kikinkumanta hinaspa ayllunkumantapas preocupasqallaña  kachkanku, otaq kuyasqan ayllunku wañukuptin hinaspa ima mana allinkunapas pasaruptin llakisqallaña tarikunku. Kaykuna imanasqa pasasqanta chaynataq imayna allicharuyta mana yachasqankuraykum, mana suyakuyniyoq kawsanku (Efesios 2:12).

6. ¿Imanasqataq “Hatun Babilonia” mana atinchu runakuna yanapayta?

⁶ “Hatun Babilonia” otaq enteron pachapi pantasqa religionqa manam tumpallatapas runakunaman hawkayayta qonchu. Aswanqa ‘vinowan sinkachichkaq hinam [. . .] huchapakusqanwan’ runakunata espiritualpi hukmanyasqata hinaspa pantasqata saqerun. Chuchumika warmi hinam engañaspa controlan ‘kay pachapi reykunata’. Chaymantapas servichikunmi pantasqa yachachikuykunata hinaspa imaymana layqa ruraykunatapas chaynapi kamachiqkunapa munasqanta achkallaña runakuna ruranankupaq. Chaynatam pantasqa religionqa atiyniyoq rikurirun, Bibliapa cheqap yachachisqankunata mana kasukuspanku (Apocalipsis 17:1, 2, 5; 18:23).

7. ¿Imataq pasanqa achka runakunata, ichaqa imaynatam yanapachwan?

⁷ Jesuspa nisqanpi hinam hatun ñanninta achka runakuna richkanku wañuyman (Mateo 7:13, 14). Wakin runakunaqa chay ñanpim kachkanku Bibliapa nisqanta yachachkaspanku mana kasukusqankurayku. Achkallaña runakunañataqmi chay hatun ñanpi kachkanku engañasqa kasqankurayku, paykunatam creerachinku chayna kawsakuy Diospaq allin kasqanta. Chayna kaptinpas, wakinqa cambianmankum Bibliapa nisqanman hina yachachiptinchikqa. Ichaqa, Hatun Babiloniapi otaq pantasqa religionpi kaspanku Bibliapa yachachisqankunata mana kasukuyta munaspankuqa, ‘hatu-hatun ñakariypim’ wañunqaku (Apocalipsis 7:14).

‘Mana samaykuspa’ hinalla predicasunchik

8, 9. Punta pachaq watapi kaq cristianokuna, ¿imatam rurarqaku qatikachasqa kaspanku, hinaspa imanasqa?

⁸ Jesusmi nirqa qatiqninkuna Diospa Munaychakuyninmanta willakunankuta hinaspa qatiqnin kanankupaq yachachinankumantapas (Mateo 28:19, 20). Cheqap cristianokunaqa, predicasqankuwanmi qawachinku Diosman hapipakusqankuta hinaspa iñisqankutapas. Kaymi qawachiwanchik harkakuykuna kaptinpas Jesuspa punta qatiqninkuna imanasqa predicayta mana saqesqankumanta. Aswanmi kallpata Jehová Diosmanta mañakurqaku “mana manchakuspa” paymanta hinalla rimanankupaq. Paymi mañakusqankuta uyarispan chuya espirituta qorqa, chaymi Diospa palabranmanta mana manchakuspa willakurqaku (Hechos 4:18, 29, 31).

⁹ ¿Hukmanyarurqakuchu discipulokuna llumpay sasallaña harkakuykuna rikuriruptin? Manapunim. Qawasunchik imataq pasarqa. Judiokunapa religionninkupi yachachiqkunam apostolkunapa predicasqankumanta piñakuspanku presocharqaku, amenazarqaku hinaspa azoterqakupas. Chayna kaptinpas, “mana samaykuspankum sapa punchaw [. . .] yachachiqku hinaspa Jesucristomanta willakuqku”, paykunaqa  yacharqakum ‘runakunamanta puntataqa Dios kasukunankuta’ (Hechos 5:28, 29, 40-42).

10. ¿Ima sasachakuykunatam kunan tiempopi cristianokuna pasanchik, ichaqa allin rurasqanchikkuna imapim tukunman?

¹⁰ Kunan tiemponchikpi Dios serviqkunaqa, yaqa llapanchikmi sumaq noticiamanta willakuspanchikqa mana maqasqachu nitaq presochasqachu kanchik. Chayna kaptinpas llapanchikmi tarikunchik pruebakunapi otaq sasachakuykunapipas. Ejemplopaq, runakuna ichapas mana allintachu otaq hukmanta qawawasunchik Bibliapa yachachisqanman hina conciencianchikpa niwasqanchikta kasukuptinchik. Llamkaqmasinchik hinaspa estudiaqmasinchik otaq vecinonchikkunapas ichapas hukmanta qawawasun Bibliapa nisqanman hina imatapas ruraptinchik. Imayna nisqankupas manam hukmanyachiwananchikchu. Kay pachapi runakuna tutayaypi kaptinkupas, cristianokunaqa “kanchaq lucero hinam” kananchik (Filipenses 2:15). Yaqapaschá allin sonqoyoq runakuna allin rurasqanchikkunata valorniyoqta qawanqaku, hinaspa Jehová Diosta hatunchanqaku (leey Mateo 5:16).

11. a) ¿Imaynatam wakin runakuna predicasqanchikta qawanku? b) ¿Ima sasachakuytam apostol Pablo pasarqa, hinaspa imatam rurarqa?

¹¹ Diospa Gobiernonmanta mana samaykuspa predicanapaqqa valorchakunam. Wakin runakunam otaq ayllunchikpas munanqakum burlakusqankuwan otaq imakunawanpas hukmanyananchikta (Mateo 10:36). Ejemplopaq, apostol Pablotam achka kutita azoterurqaku predicasqanmanta. Imatam chaywanpas rurarqa, paymi nin: ‘Kamisqa ñakarichisqa kachkaptiykupas Diosninchikmi kallpanchawarqaku chaymi mana manchakuspa willarqaniku Diosmanta allin noticiata, willarqanikumá achkallaña runakuna contraykupi sayarichkaptinkupas’, nispa (1 Tesalonicenses 2:2). Apostol Pablopaqqa sasachá karqa hinalla predicayninqa, paypa pachantam yaqa llapallanta qechururqaku hinaspam kaspikunawan maqaparuspa presocharurqaku (Hechos 16:19-24). ¿Imanasqataq valorchakuspa hinalla predicarqa? Puntataqa, Diospa kamachisqanta cumpliyta munasqanraykum (1 Corintios 9:16).

12, 13. ¿Ima sasachakuykunatam wakin cristianokuna pasachkanku, hinaspa imaynatam kallpanchakunku atipanankupaq?

¹² Diospa Gobiernonmanta ganasllawanña predicayninchikqa chinkarunmanmi, runakuna mana uyariwaptinchik otaq wasinkupi mana tarisqanchikwanpas. ¿Imatam rurachwan predicasqanchik lawpi chayna pasakuptin? Valorchakuspam maypi kaspapas astawan predicananchik. Ichapas imay hora predicasqanchikta cambiachwan otaq runakunapa kasqan lawpi astawan predicanapaq kallpanchakuchwan (tupachiy Juan 4:7-15; Hechos 16:13; 17:17 nisqanwan).

¹³ Chaynallataqmi achka wawqe-paninchikkuna sasachakunku yuyaq kasqankuwan hinaspa onqosqankuwanpas, chaykunam sasachan predicacionpi astawan llamkanankuta. Chayna tarikuspaykiqa ama hukmanyaychu. Jehová Diosqa yachanmi sasachakusqaykita hinaspam anchata chaninchan atisqaykiman hina rurasqaykita (leey 2 Corintios 8:12). Imayna sasachakuyniyoq kaspaykipas —harkakuykuna, runakuna mana uyariyta munaptin otaq onqospaykipas—, atisqaykiman hina predicanaykipaq kallpanchakuy (Proverbios 3:27; tupachiy Marcos 12:41-44 nisqanwan).

Jesucristopa kamachisqanta hinalla cumplisunchik

14. ¿Ima rurasqanpitaq apostol Pabloqa iñiqmasinkunapaq ejemplo karqa, hinaspa ima consejotam qorqa?

¹⁴ Apostol Pabloqa Diospaqmi allintapuni llamkarqa hinaspam iñiqmasinkunatapas kallpancharqa chaynata ruranankupaq (Hechos 20:20, 21; 1 Corintios 11:1). Huk kutipim Arquipo sutiyoq iñiqmasinta chaynata rurananpaq kallpancharqa. Colosas llaqtapi cristianokunaman cartaspanmi, apostol Pablo kaynata qellqarqa: “Niychiktaqyá wawqenchik Arquipotapas Señorninchik Jesucristopa kamachisqanta paypa sutinpi cumplinanpaq”, nispa (Colosenses 4:17). Arquipo, pi kasqanta hinaspa imayna kasqantapas manam yachanchikchu, ichaqa allintam yachanchik predicananpaq llamkay chaskisqanmanta. Ñoqanchikpas Jehová Diosman qokuspanchikqa, predicanapaq llamkaytam chaskirunchik. Chayta allinta cumplinapaq, ¿cuidachkanchikchu  hinaspa sapa kutichu imayna rurasqanchikta qawakuchkanchik?

15. ¿Imatam qawachinchik Jehová Diosman qokuspanchik, hinaspa ima tapukuykunatam rurakuchwan?

¹⁵ Manaraq bautizakuchkaspam, Jehová Diosman tukuy sonqonchikmanta orakuspa qokurqanchik paypaqña kawsananchikpaq, chaynatam qawachirqanchik Diospa munasqanta cumplinapaq listo kasqanchikta. Chaymi allin kanman tapukuyninchik: ¿Cheqaptachu vidaypi kallpanchakuchkani Diospa munayninta cumplinaypaq? Yaqapaschá Bibliapa kamachiwasqanchikman hina achka rurayninchik kachkan, ejemplopaq, ayllunchikta mantienenapaq; chayna kaptinqa Jehová Diosqa munanmi atiendenanchikta (1 Timoteo 5:8). Ichaqa, ¿imaynatam chaymanta puchuq tiemponchikta hinaspa kallpanchiktapas servichikuchkanchik? ¿Imatam vidanchikpi puntata churachkanchik? (Leey 2 Corintios 5:14, 15.)

16, 17. ¿Imapaqmi mozo-sipas cristianokuna tanteakunmanku otaq ayllunkupi mana ancha rurayniyoq kaqkunapas?

¹⁶ Mozo-sipas kaspaykiqa, ¿vidaykita qorunkiñachu Jehová Diosman? ¿Chunka pusaq watayoqñachu kachkanki hinaspa estudioykita tukurunkiñachu otaq tukunaykipaqñachu kachkanki? Chaynaqa, manaraqchá aylluykipi achka llamkaynikiqa kanraqchu. Chayna kaptinqa, ¿imatam vidaykiwan rurayta munanki? Jehová Diostam nirqanki munayninta ruranaykipaq, ¿ima tanteasqaykikunam yanapasunki chayta haypanaykipaq? Achka mozo-sipaskunam ima ruranankutapas allicharunku precursor kanankupaq, chayna tanteasqankuwanmi ancha kusisqa kachkanku (Salmos 110:3; Eclesiastes 12:1).

¹⁷ Chaymantapas, icha qamqa yuyayniyoqña kaspayki kikillaykipaq tukuy punchaw llamkachkankiña hinaspa aylluykipi mana llumpay rurayniyoq kachkanki. Chaynataq kusisqachá kachkanki tiempoykipa kasqanman hina congregacionpi imakunatapas ruraspa. Ichaqa, ¿munawaqchu astawan kusisqa kayta? ¿Yaqachu piensarqanki Dios servisqaykipi astawan llamkayta? (Salmos 34:8; Proverbios 10:22.) Wakin sitiokunapiqa llapallan runakunaman predicanapaqmi achka llamkayraq kachkan. ¿Atiwaqchu arreglokuna rurayta chaynapi Dios servisqaykipi astawan llamkanaykipaq? Ejemplopaq, wakin llaqtakunapim astawan necesitakun predicaqkunata, ¿atiwaqchu chay llaqtakunaman rispayki yanapayta? (Leey 1 Timoteo 6:6-8.)

18. Chayllaraq casarasqa wawqe-paninchik, ¿imatam rurarqaku Diosta astawan servinankupaq, hinaspa imaynam tarikurqaku?

¹⁸ Qawasunchik Estados Unidos nacionpi Kevin hinaspa Elena casarakuspanku ima rurasqankuta. *  Chayllaraq casarasqa kaspankum wakin casadokuna hina paykunaqa wasi rantiyta munarqaku, hinaspa rantirurqakumá. Iskayninkum anchata llamkarqaku, hinaspam tukuy imayoq kawsakurqaku. Ichaqa tukuy punchaw llamkasqanku hinaspa wasinkupi imapas rurayniyoq kasqankuraykum, predicanankupaqqa pisi tiempollaña puchurqa. Huk punchawmi cuentata qokururqaku kapuqniyoq kanankupaq llumpayllataña llamkasqankuta. Paykunam qawarqaku casarasqa huk wawqe-paninchik mana ancha imayoq kaspankupas precursor kaspa kusisqa kasqankuta, hinaspam tantearurqaku imayna kawsasqankuta cambianankupaq. Chaymi allinta tanteakunankupaq Jehová Diosta mañakuruspanku wasinta rantikururqaku hinaspa taksa wasimanña astakurqaku. Elenam pisi tiempollataña llamkarqa hinaspam precursoraña karqa. Predicacionpi sumaq kusikuykunata Elenapa tarisqanwanmi Kevinqa kallpanchasqa karqa, hinaspam llumpay llamkayninta saqeruspan paypas precursorña karqa. Tiempopa risqanman hinañataqmi sudamerica lawpi huk kaqnin nacionman rirqaku, chaypim Diosmanta predicaqkunaqa mana achkachu karqaku. Kevinmi nin: “Casado vidaykupiqa kusisqam karqaniku, ichaqa espiritualpi allin kaqkunata haypay munasqaykupi kallpanchakusqaykumantam kusikuyniykuqa astawan yapakurun”, nispa. (Leey Mateo 6:19-22.)

19, 20. Diospa munaychakuyninmanta predicayqa, ¿imanasqataq kay Pachapi wakin llamkaymantaqa ancha allin?

¹⁹ Kay Pachapi ancha allin llamkayqa Diospa munaychakuyninmanta predicaymi (Apocalipsis 14:6, 7). ¿Imanasqa? Jehová Diospa sutinta hatunchasqanrayku (Mateo 6:9). Chaymantapas Bibliamanta allin noticiam runakunapa vidanta astawan allinyachin hinaspa salvakunankupaqpas yanapanman. Arí, sapa watam wara-waranqantin runakuna uyarispanku kasukuchkanku. Hinaptinqa, apostol Pablopa tapusqanman hinaqa: ‘¿Imaynataq uyarinqaku pipas paykunaman mana willaptinqa?’ (Romanos 10:14, 15). Manach uyarinmankuchu ¿aw? Chaynaqa, ¿imanasqataq mana kallpanchakunkichu Diospa munayninta atisqaykiman hina cumplinaykipaq?

²⁰ Chaymantapas, runakuna tanteakusqankuman hina imayna kanankumanta hinaspa sasallaña tiempopi kawsasqanchikmanta entiendechinapaqmi huk yanapakuyraq kachkan. ¿Ima yanapakuytaq chayqa? Allin yachachiq kanapaq kallpanchakuyninchikmi. Kaymantam qatiqnin estudiopi astawan yachasunchik.

[Willakuy]

¿Ima niwaqtaq?

• ¿Imatam cristianokuna rurananchik runakunata yanapanapaq?

• ¿Imaynatam atipachwan predicasqanchikta harkaq sasachakuykunata?

• ¿Imaynatam Diospa munayninmanta predicanapaq chaskisqanchikta cumplichwan?

[Kay yachachikuypa tapukuyninkuna]

[11 kaq paginapi dibujo]

Harkakuykuna kaptinqa valorchakunanchikmi predicanapaq

[13 kaq paginapi dibujo]

¿Imatam rurawaq predicasqayki lawpi runakuna wasinkupi mana tarikuptinkuqa?