Kawsachiq yakukunaman pusasqa kaqkuna
Kawsachiq yakukunaman pusasqa kaqkuna
“[Jesucristom] paykunataqa harkanqa ovejakunata michichkaq hina, paykunataqa kawsachikuq yakukunamanmi, pusanqa.” (APOCALIPSIS 7:17.)
1. ¿Imaynatam Biblia sutichan ungidokunata, hinaspa ima llamkaytam Jesus qorqa paykunaman?
DIOSPA Palabranmi reqsichiwanchik Jesucristopa kay Pachapi kapuqninkunata waqaychaq ungidokuna “allin yuyayniyoq confianza sirviente” kasqankuta. Jesucristom patron hina 1918 watapi, kay ‘sirvientepa’ llamkasqankuta qawaspan Diospa llaqtanta “imam horapi mikuchinanpaq” kamachisqanta allinta cumplisqankuta rikurqa, chayraykum kusikuywan nombrarqa ‘tukuy kapuqninkunapiña nanachikunankupaq’ (leey Mateo 24:45-47). Chaymi ungidokunaqa manaraq hanaq pachaman richkaspanku kay Pachapi cristianokunata yanapachkanku.
2. ¿Pikunapiwantaq kanku Jesucristopa kapuqninkuna?
2 Patronqa derechonpim kachkan kapuqninkunata munasqanman hina servichikunanpaq. Jehová Diospa churasqan Rey Jesucristopa kapuqninkunaqa, Diospa Gobiernonpaq imakunapas kay Pachapi kaqkunam. Jesucristopa kapuqninkunapas ‘achkallaña runakunam’, apostol Juan mosqoyninpi qawaspanmi paykunamanta kaynata nirqa: “Chaymantam rikurqani achkallaña runakunata llapallan nacionkunamanta, ayllukunamanta, castakunamanta hinaspa tukuy rikchaq rimayniyoqkunamanta. Paykunaqa sayachkasqaku hatun tiyanapa ñawpaqninpim hinaspa Carneropa qayllanpim. Achka-achkallaña kaptinkum mana pipas yupayta atirqachu. Yuraq pachawan pachasqakama kaspam sapakama hapirqaku palmerapa kallmanta”, nispa (Apocalipsis 7:9).
3, 4. ¿Imaraykum ancha kusisqa tarikunmanku kay pachapi wiñaypaq kawsakuy suyaqkuna?
3 Chay achkallaña runakunaqa, otaq Jesuspa nisqanman hina ‘sapaq ovejakunaqa’, kay Pachapi wiñay kawsanankupaq suyakuyniyoqmi kanku (Juan 10:16). Paykunam confianku Jesucristo ‘kawsachikuq yakukunaman pusananta’ hinaptin ‘weqenkutapas Dios pichananta’. Chayraykum pachankutapas taqsaspa Jesucristopa yawarninwan yuraqyachinku (Apocalipsis 7:14, 17). Jesucristopa wañukusqanpi iñisqankuraykum, paykunaqa Diospa qawasqanman hinaqa yuraq pachawan pachasqa hinaña tarikunku. Abrahanta hinam Jehová Diosqa paykunatapas qawan mana huchayoqpaqña hinaspa amistadninta hina.
4 Allin ruraq runakunapaqña Jehová Dios qawasqanraykum, kay achkallaña runakunaqa confianzawan suyanku hatu-hatun ñakariypi mana allin runakunata Dios puchukachiptin kawsaqlla pasayta (Santiago 2:23-26). Atinmankum Jehová Diosman asuykuyta hinaspa Armagedon chayaramuptin Diospa llaqtan hina librasqa kaytapas (Santiago 4:8; Apocalipsis 7:15). Paykunaqa manam sapaqchu kanku, aswanmi Diosta kusikuywan servinku Jesucristopa kamachisqanta hinaspa kay Pachapi kaq ungidokunatapas kasukuspanku.
5. ¿Imaynatam ungidokunata yanapanku kay pachapi wiñaypaq kawsakuy suyaqkuna?
5 Ungidokunatam Satanaspa controlasqan runakuna llumpayllataña sapa kuti sasachanku. Ichaqa paykunatam yanapan kay pachapi wiñaypaq kawsakuy suyaqkuna. Kay Pachapi kaq ungidokuna pisillaña kaptinkupas, sapa watam kay pachapi wiñaypaq kawsakuy suyaqkunaman waranqantin runakuna yapakamuchkanku. Ungidokunaqa manam atinkuchu enteron pachapi pachak waranqa congregacionkunata kikinkupuni sapakamata atiendeytaqa. Chaymi kay pachapi kawsakuy suyaqkunaqa congregacionkunapi yanapanku nombrasqa ancianokunawan. Paykunam yanapanku millonninpi cristianokunata ‘allin yuyayniyoq confianza sirvienteman’ Jesuspa encargasqanta atiendespanku.
6. ¿Imaynatam Biblia willarqaña kay pachapi kawsakuy suyaq cristianokuna ungidokunata yanapanankumanta?
6 Ungidokunata kay pachapi wiñaypaq kawsay suyaqkuna yanapanankumantam, Diosmanta willakuq Isaias ñawpaqmantaraq kaynata nirqa: ‘Tayta Diosmi Israel castakunata kaynata nin: Egipto nacion allpapi qespiqkunam [“mana pagasqa llamkaqkunam”, NM], Cus nacionpi imapas ganasqakunam qamkunaman apamusqaña kanqaku. Saba lawmanta hatunkaray runakunam qamkunaman hamuspa qamkunapaña kanqaku. Chaylaw runakunam qamkunata qatisunkichik’, nispa (Isaias 45:14). Kay pachapi kawsanankupaq suyakuyniyoq cristianokunaqa qatichkankumanpas hinam allin yuyayniyoq confianza sirvienteta hinaspa Cuerpo Gobernante nisqantapas kasukunku. Kay cristianokunam “mana pagasqa llamkaqkuna” kaspanku, kusikuywan kallpankuta hinaspa tukuy kapuqninkutapas servichikunku enteron pachapi predicacionta yanapanankupaq, kay llamkaytaqa kay Pachapi ungidokuna ruranankupaqmi Jesucristoqa kamachirqa (Hechos 1:8; Apocalipsis 12:17).
7. ¿Imapaqmi preparakuchkanku kay pachapi kawsakuy suyaq cristianokuna?
7 Ungidokunata yanapaspankupas, kay pachapi kawsakuy suyaqkunaqa preparakuchkankum Armagedon pasayta kay Pachapi mosoq llaqta hina qallarinankupaq. Kay mosoq llaqtaqa allin cimientasqam kanan, chaymantapas Jesucristotaqa manam kasukunallankuchu aswanmi kamachisqanta kusikuyllawanña rurananku. Llapallanchikmanmi tiempota kunan qowachkanchik, Jesucristo kamachiptin imakunapi yanapakuy atisqanchikta qawachinanchikpaq. Sichu iñiyniyoq kasun hinaspa llapan kamachiwasqanchikta kasukuspaqa, qawachisunmi mosoq pachapipas kamachiwasqanchikkunata hinalla kasukunanchikta.
Kay pachapi kawsakuy suyaqkunam iñisqankuta qawachinku
8, 9. ¿Imaynatam iñisqankuta qawachinku kay pachapi kawsakuy suyaqkuna?
8 Ungidokunata yanapaqkunaqa iñiyninkutam qawachinku imaymana rurasqankuwan. Puntatam, Diospa Munaychakusqanmanta predicaspa yanapachkanku (Mateo 24:14; 28:19, 20). Chaynataq, kusikuywanmi kasukunku Cuerpo Gobernantepa nisqankunata (Hebreos 13:17; leey Zacarias 8:23).
9 Chaynallataqmi, Diospa kamachisqanman hina kawsanku, chaynatam qawachinku ungidokuna yanapasqankuta. Chaymi kallpanchakunku vidankupi ‘kuyakuq, kusisqalla, hawkalla, pacienciakuq, sumaq sonqolla, kuyapayakuq, cumpliq [‘iñiyniyoq’, NM], llampu sonqolla hinaspa imapipas controlakuq’ kanankupaq (Galatas 5:22, 23). Arí, kunan tiemponchikpiqa kayna sumaq kayniyoq runakunaqa manañam ancha kanñachu, aswanmi ‘aychapa munasqallanpiña kawsachkanku’. Chayna kaptinpas, kay pachapi kawsakuy suyaqkunaqa manam huchapakuypiqa purinkuchu, millakuypaq kaqkunatawan penqakuypaq kaqkunataqa rurankuchu, taytacha-mamachakunataqa yupaychankuchu, paykunaqa manam layqanakuypiqa, cheqninakuypiqa, liryanakuypiqa, envidianakuypiqa hinaspa piñanakuypiqa purinkuchu, manataqmi kikillankupaqqa imatapas munankuchu, rakinakuytaqa manam hatarichinkuchu, manam sapa-sapaqqa huñunakunkuchu, manam munapayankuchu hukpa imankunatapas, tomakuyllapiqa, fiestakunallapiqa manam purinkuchu, manataqmi rurankuchu chayna rikchaq huchakunataqa (Galatas 5:19-21).
10. ¿Imatam manapuni saqekunanchu kay pachapi kawsakuy suyaqkunaqa?
10 Pantaq runa kasqanchikraykum mana facilchu chuya espirituman hina kawsayqa, aychapa munasqankunata saqeyqa hinaspa Satanaspa munaychakusqan runakunapa sasachawasqanchikta aguantaypas. Chayna kaptinpas, manam saqekusunchu pantaq kasqanchik chaynataq imatapas mana ruray atisqanchik hukmayachiwaspanchik, iñiyninchikta hinaspa Jehová Dios kuyasqanchiktapas chinkarachinantaqa. Segurom kachkanchik hatu-hatun ñakariy chayaramuptin Jehová Dios prometesqanman hina waqaychawananchikta.
11. ¿Imakunatam Satanas servichikun cristianokunapa iñiyninta chinkarachinanpaq?
11 Imayna kaptinpas cuidakunanchikmi, yachanchikmi Diablo enemigonchik kasqantaqa hinaspa sapa kutim sasachawachkanchik (leey 1 Pedro 5:8). Ejemplopaq, paymi servichikun cheqap yachay saqeqkunata hinaspa hukkunatapas allin yuyayniyoq confianza sirvientepa yachachiwasqanchikta mana allin kasqanta piensachiwananchikpaq. Kayna rurasqanqa manam allinninpaqchu karqa. Chaynataq Diabloqa servichikunmi qatikachayta, wakinpiqa kaywanmi Diospaq llamkasqanchikta sasachan, ichaqa qatikachasqa kasqankuwanqa wawqe-paninchikkunapa iñiyñinkum astawan kallpanchakun. Chaymi, Satanasqa sacrellaña kaspan huktaña servichikuchkan: imawanpas hukmanyasqanchikta. Yaqapaschá piensanman chaynata ruraspan iñiyninchik chinkarachiyta. Punta cristianokunaqa yacharqakum hukmanyayqa paykunapaq mana allin kasqanta. Chaymi kallpanchasqa karqaku Jesucristopa ejemplonpi allinta ‘yuyaymananankupaq’, paymi aguantarqa ‘tukuypi contrakuq huchasapa runakunata’. ¿Imanasqataq yuyaymanananku karqa? Chaytaqa rurananku karqa, ‘pisiparuspa sonqonkupi mana hukmanyarunankupaqmi’ (Hebreos 12:3.)
12. Bibliapa nisqanman hina, ¿ima consejonkunam hukmanyaqkunata yanapanman kallpata tarinankupaq?
12 ¿Haykapipas yaqachu munarqanki Jehová Dios servisqaykita saqeruyta? ¿Wakinpiqa piensankichu Diospa contranpi huchallikurusqaykita? Chayna kaptinqa, ama saqekuychu chayna tarikusqaykita Satanas servichikuspan Jehová Dios servisqaykita harkanantaqa. Bibliata sapa kuti allinta estudiay, sonqomanta mañakuy, riy llapan huñunakuykunaman hinaspa iñiqmasikipa amistadninta maskay. Kaykunam kallpanchasunki hinaspam harkasunki ‘sonqoykipi mana hukmanyarunaykipaq’. Jehová Diosmi prometerqa serviqninkunaman kallpata qospa yanapananmanta, prometesqankunapiqa confiakuchwanmi (leey Isaias 40:30, 31). Diospa Gobiernonpaq kaqkunapi ocupakuy; tiempoyki usuchiq kusirikuykunataqa ama ruraychu; astawanqa hukkunata yanapay. Chaynatam kallpata tarinki hukmanyasqa kaspaykipas aguantanaykipaq (Galatas 6:1, 2).
Hatu-hatun ñakariymanta lloqsispam yaykunku mosoq allpaman
13. ¿Ima llamkaymi kanqa Armagedon chayaramuptin kawsaqlla pasaqkunapaq?
13 Armagedon pasaruptinmi Diosmanta mana yachachkaspa wañuqkuna achkallaña kawsarimunqaku, paykunamanmi Jehová Diosmanta yachachisunchik (Hechos 24:15). Yachachisunchikqa manam ñoqanchikrayku Jesuspa wañusqallanmantachu, yachachisuntaqmi wañukusqanpi iñinankupaqpas, chaynata ruraspallankum paywan yanapachikunqaku. Ñawpaqpi pantay yachasqankunata hinaspa imayna kawsasqankutapas saqenankum. Chaynataq, cheqap cristianokuna hinam mosoq kawsakuyniyoqña kananku (Efesios 4:22-24; Colosenses 3:9, 10). Armagedon chayaramuptin kawsaqlla pasaqkunaqa achka llamkayniyoqmi kanqaku. Mayna kusikuychá kanqa Jehová Diospaq chayna llamkayqa manaña imapas kay pachapi sasachawaptinchik hinaspa harkawaptinchikpas.
14, 15. ¿Imatam allin ruraq runakuna kawsarimuspanku ñoqanchikmanta yachanqaku, hinaspa imatam ñoqanchikpas paykunamanta yachasunchik?
14 Jesus kay pachapi Diospa munayninta manaraq rurachkaptinqa achkañam Dios serviqkunaqa ñawpa tiempopi wañukurqaku, paykunapas kawsarimuspankuqa achkatam yachanqaku. Diospa prometesqan Mesias pi kasqanmantam yachanqaku, paykunaqa manaraq reqsichkaspam wañukurqaku. Manaraq wañukuchkaspankuqa, qawachirqakuñam Jehová Diospa yachachisqan kay munasqankuta. Piensariy, Danielqa kikinpa qellqasqan profeciakunamantaqa manam entiendeyta atirqachu, ¿manachu ancha kusikunapaq kanqa chay profeciakunapa imayna cumplicusqanmanta entiendenanpaq yachachiyqa? (Daniel 12:8, 9.)
15 Cheqaptamá, kawsarimuq runakunaqa achkatam ñoqanchikmanta yachanqaku, chaynallataqmi ñoqanchikpas paykunamanta yachasunchik. Biblia pisillapi willasqanmantachá achka tapukusqanchikta kutichiwasunchik. ¡Imaynaraq tarikusun Bautizaq Juan Jesusmanta willawaptinchik! Arí, tukuy sonqonkuwan Dios serviqkunamanta imapas yachasqanchikqa Diospa Palabranmanta astawan entiendenapaqmi yanapawasun. Diosta servispanku ñawpaq tiempopi wañuqkuna, hinaspa kay pachapi kawsakuy suyaqkunamanta tukupay tiempopi wañuqkunapas ‘aswan allin vidamanmi kawsarimunqaku’. Llapallankum Dios serviyta qallaykurqaku Satanaspa controlasqan runakuna kachkaptin. ¡Mayna kusisqachá kanqaku kunan tiempomantaqa aswan sumaq mosoq pachapiña Diosta hinalla servispankuqa! (Hebreos 11:35; 1 Juan 5:19.)
16. Bibliapa willakusqanman hina, ¿imataq pasanqa Juicio Punchawpi?
16 Chay Juicio Punchawpiqa Diospa tanteasqan tiempopim mosoq librokuna kichakunqa, hinaptinmi Allpapi llapallan kawsaqkuna juzgasqa kanqaku Bibliapa hinaspa chay librokunapa nisqanman hina. Chaynatam yachakunqa pipas wiñay kawsay chaskinanta otaq mana chaskinantapas (leey Apocalipsis 20:12, 13). Juicio Punchawpiqa, Allpapi llapallan runakunapaqmi tiempo kanqa llapallan kamachiq Jehová Diosta serviy munasqankuta otaq mana serviy munasqankutapas qawachinankupaq. Sapakamam tanteakunqaku Diospa Gobiernonta yanapanankumanta hinaspa ‘kawsachikuq yakukunaman’ Jesucristo pusananmantapas otaq Diospa Gobiernonpa contranpi kanankupaq hinaspa payta mana kasukunankupaqpas (Apocalipsis 7:17; Isaias 65:20). Juicio punchawpa tukuyninpaqqa, llapallan runakunachá manaña huchayoq kaspanku chaynataq mana allin runakunapas manaña kaptin imayna kanankupaqpas tanteakurunqakuña. Manam pipas ninqachu Jehová Diospa juzgasqanqa manam allinchu karqa nispaqa. Mana allin ruraq runakunallam wiñaypaq chinkachisqa kanqaku (Apocalipsis 20:14, 15).
17, 18. ¿Imanasqataq Juicio Punchawta kusikuywan suyachkanku ungidokuna hinaspa kay Allpapi wiñaypaq kawsakuy suyaqkunapas?
17 Kunan tiemponchikpi kaq ungidokunam Diospa gobiernonpi kamachinankupaq chaskisqaña kachkanku, chaymi kusikuyllawanña suyachkanku Juicio Punchawpi kay Pachata kamachinankupaq. ¡Mayna sumaqchá paykunapaqqa kanqa! Kay suyakuyninkum paykunatapas kallpanchan punta kaq ungidokunaman Pedropa kayna nisqanta kasukunankupaq: “Diospuni qayasuchkaptikichikqa hinaspa akllasuptikichikqa qaqa hina sayanaykichikpaqyá kallpanchakuychik. Chaynata ruraspaykichikqa manam haykapipas urmankichikchu. Chaynapim salvakuq Señorninchik Jesucristopa wiña-wiñaypaq munaychakusqanman kusikuyllawanña yaykunkichik” (2 Pedro 1:10, 11).
18 Kay pachapi wiñaypaq kawsakuy suyaqkunam anchata kusikunku ungidokuna hanaq pachaman rinankumanta chaynataq munachkankum imapipas yanapayta. Diospa amistadnin kaspankum Pay servisqankupi astawan llamkanankupaq kunan kallpanchakunku. Chaynataq Juicio Punchawpipas kawsachikuq yakukunaman Jesucristo pusaptin, kusikuyllawanña tukuy sonqonkumanta Jehová Diospa kamachikuyninkunata kasukunqaku. ¡Mayna kusisqachá kanqaku kay Allpapi kawsakuspa Jehová Diosta wiña-wiñaypaq servinankupaq chaskisqa kaspankuqa! (Romanos 8:20, 21; Apocalipsis 21:1-7.)
¿Yuyachkankichu?
• ¿Imakunapiwantaq Jesucristopa kapuqninkunaqa?
• ¿Imaynatam yanapanku ungidokunata kay pachapi wiñaypaq kawsakuy suyaqkuna?
• ¿Imaraykum ancha kusisqa tarikunmanku achkallaña runakuna, hinaspa ima suyakuyniyoqmi kanku?
• ¿Imaynam sientekunki Juicio Punchawpi piensaspayki?
[Kay yachachikuypa tapukuyninkuna]
[28 kaq paginapi dibujo]
Achkallaña runakunaqa pachankuta taqsaspam Jesucristopa yawarninwan yuraqyachinku
[31 kaq paginapi dibujo]
¿Imakunamantam tapuyta munawaq Diosta servispanku wañuqkuna kawsarimuptinku?