Wiñay kawsaypaq kaqkunam Diosmanta willakuyta kasukunku

‘Wiñay kawsaypaq lliw [. . .] kaqkunam iñirqaku.’ (HECHOS 13:48.)

1, 2. Diospa munaychakusqanmanta enteron Pachapi willakunankupaq Jesuspa kamachisqanta, ¿imaynatam punta pachak watapi cristianokuna kasukurqaku?

BIBLIAPI kaq Hechos librom sumaqllataña willakun, enteron Pachapi Diospa Munaychakusqan willakusqa kananpaq Jesuspa kamachisqanta punta kaq cristianokuna imayna kasukusqankumanta (Mateo 24:14). Ganasllawanña predicaspankum ejemplota qorqaku, hinaptinmi achkallaña qatikurqaku paykunapa rurasqanta. Jesuspa qatiqninkuna Jerusalenpi tukuy sonqonkuwan predicasqankuraykum, punta pachak watapi waranqantin runakuna hinaspa ‘achkallaña sacerdotekunapas’ Jesuspi iñirqaku (Hechos 2:41; 4:4; 6:7).

² Chay tiempopi kaq misionerokunapas, yanaparqakum achka runakunata Jesuspa qatiqnin kanankupaq. Ejemplopaq, Felipem Samaria lawman rirqa, chaypim achkallaña uyariy munaq runakunata tarirqa (Hechos 8:5-8). Apostol Pablopas Diosmanta yachachinanpaqmi predicaqmasinkunawan karu-karuta rirqa Chipre lawman, Asia Menor lawpi llaqtakunaman, Macedonia lawman, Grecia hinaspa Italia lawkunamanpas, chay llaqtakunapi predicasqanraykum achkallaña judiokunawan Grecia lawpi runakunapas Jesuspi iñirqaku (Hechos 14:1; 16:5; 17:4). Titopas Diospa llamkay qosqantam Creta lawpi cumplirqa (Tito 1:5). Apostol Pedropas Babiloniapim predicarqa, chaynataq punta kaq cartanta qellqasqan tiempopaqñataq (62-64 watakunapi), cristianokunaqa predicarusqakuña Ponto, Galacia, Capadocia, hinaspa Asia lawpi chaynataq Bitinia lawkunapipas (1 Pedro 1:1; 5:13). ¡Ancha kusikunapaqmá karqa! Punta pachak watapi cristianokunaqa ganasllawanñam predicarqaku chaymi enemigonkuna nirqaku ‘llapa llaqtakunatam chaqwarunku’, nispa (Hechos 17:6; 28:22).

3. ¿Imakunatam haypachkanku predicasqankupi Diospa Gobiernonmanta willakuq wawqe-paninchikkuna, hinaspa imaynam chayta yachaspa tarikunki?

³ Kunan tiempopipas Diospa llaqtanmanqa achka runakunam yaykumuchkanku. ¿Manachu kallpanchasunki Jehová Diospa testigonkunapa enteron pachapi llamkasqankumanta leesqayki? ¿Manachu kusichisunki 2007 watapi soqta millon masnin runakunata Bibliamanta estudio qosqanku? Chaymantapas qayna watam yaqa chunka millon runakuna mana testigo kachkaspankupas, iñiqmasinchikkunapa predicasqankumanta interesakuspa rirqaku Señorninchik Jesucristopa wañukusqan punchawta Yuyarinankupaq. Kaymi qawachiwanchik achka llamkayraq kasqanmanta.

4. ¿Pikunataq chaskichkanku Diospa Gobiernonmanta willakuyta?

⁴ Punta cristianokunapa tiemponpi hinam, kunanpas ‘wiñay kawsaypaq lliw [. . .] kaqkunaqa’ cheqap yachachikuykunata chaskichkanku (Hechos 13:48). Jehová Diosmi chayna runakunata llaqtanman pusamun (leey Ageo 2:7). Chaynaqa, ¿imaynataq kananchik runakuna huñuypi allinta yanapakunanchikpaq?

 Mana sayapakuspa predicasun

5. ¿Imayna runakunam Diospa favorninta chaskinmanku?

⁵ Punta cristianokunaqa yacharqakum ‘Diosqa mana pimanpas sayapakusqanta, payqa chaskinmi lliw nacionkunapi payta kuyaspa manchakuywan allin ruraq runakunataqa’ (Hechos 10:34, 35). Pipas Jehová Dioswan allin amistad rurayta munaspanqa, iñinanmi runakunarayku Jesucristopa wañukusqanpi (Juan 3:16, 36). Arí, ‘Diosninchikqa munachkanmi llapallan runakuna salvakunankuta hinaspa cheqap yachachikuy reqsinankutapas’ (1 Timoteo 2:3, 4).

6. ¿Imatam mana rurananchikchu predicaqkunaqa, hinaspa imanasqa?

⁶ Diosmanta willakuqkunapaqqa manam allinchu kanman runakunata manaraq reqsichkaspa huk castamanta kasqanrayku, rikchayninmanta, religionninmanta, wakcha otaq apu kasqanmanta hinaspa hukkunamantapas juzgayninchikqa. Piensasun kaypi: ¿manachu agradecekunchik Bibliamanta willawaqninchik ñoqanchikmanta yanqakunata mana piensaspan predicawasqanchikmanta? Chaynaqa, ¿imanasqataq manaqa predicachwanchu uyariy munaq runamanqa chaynapi vidanta salvananpaq? (Leey Mateo 7:12.)

7. ¿Imanasqataq predicasqanchik runakunata mana juzgananchikchu?

⁷ Jehová Diosmi Jesusta akllarun Juez kananpaq, chaymi mana pipas derechoyoqchu pitapas juzgananpaq. Runakunaqa ñawinchikpa ‘qawasqallanman hinam’ chaynataq ‘uyarisqallanchikman hinam’ juzganchik, Jesusmi ichaqa ima piensasqanchikkunata chaynataq sonqonchikpi ima kasqankunatapas yachan (Isaias 11:1-5; 2 Timoteo 4:1).

8, 9. a) ¿Imayna runam karqa Saulo manaraq cristiano kachkaspan? b) ¿Imatam yachanchik apostol Pablomanta?

⁸ Tukuy rikchaq runakunam vidankuta cambianku Jehová Diosta servinankupaq. Ejemplopaq rimasun Tarso llaqtayoq Saulomanta, payqa tiempopa risqanman hinam apostol Pablowan sutichasqa karqa. Sauloqa fariseom karqa chaymi cristianokunata mana llakipayaspa qatikacharqa, payqa piensarqam mana cheqap yupaychaqkuna kasqankuta (Galatas 1:13). Runakunapa piensasqanman hinaqa, manachá haykapipas cristianoqa kanmanchu karqa. Ichaqa, Jesusmi qawarqa paypa sonqonpi allinkuna kasqanta chaymi akllarurqa sapaqchasqa llamkayta rurananpaq. Tiempopa risqanman hinam, Sauloqa cristianoña kaspan chay tiempo congregacionpi ganasllawanña Diosmanta willakuspan allinta llamkarqa.

⁹ ¿Imatam yachanchik apostol Pablomanta? Ichapas predicasqanchik sitiokunapi kanman willakusqanchikta cheqniqman rikchakuq runakuna. Chayraykum ichapas iskayrayanchikman paykuna cristiano kanankumanta, chayna kaptinpas kallpanchakusun paykunata piensarichinapaq. Wakinpiqa chayna runam willasqanchikta uyarin. Yuyarisun lliw runakunaman ‘mana samaykuspa’ hinalla predicanapaq kamachiwasqanchikta (leey Hechos 5:42).

‘Mana samaykuspa’ predicasqamanta bendicionkuna

10. Runakuna manchakuypaq hina kaptinkupas, ¿imanasqataq predicananchik? Congregacionpi chayna kaq experienciakunata willay.

¹⁰ Rikchaynillanta qawaspaqa pantarunchikmanmi. Ejemplopaq, Ignacio sutiyoq runam, * sudamerica law nacionpi preso kachkaspa Jehová Diospa testigonkunawan Biblia estudiayta qallaykurqa. Ignacioqa llumpay maqakuq runam karqa, chaymi lliw runakuna manchakurqaku. Carcelpi kaqkunam presomasinkuman imatapas rantikurqaku hinaptinmi deberqaku, chaymi Ignaciota niqku mañapunanpaq. Bibliata estudiasqanman hina yachasqankunata rurayman churaspanmi, pisi-pisimanta vidanta tikrarqa, hinaspam llumpay maqakuq runa kasqanmanta allin runaña karqa. Manataqmi pipas ninñachu qollqe debeqkunata mañananpaq. Ignacioqa llumpay kusisqam kachkan Bibliamanta yachasqan hinaspa Diospa espiritun vidanta tikrachisqanmanta. Chaynataq agradecesqam kachkan, mana allin ruraq kaptinpas paymanta allinta piensaspa wawqenchikkuna yachachisqankumanta.

11. ¿Imanasqataq runakunaman sapa kuti watukunchik?

¹¹ Chaymantapas runamasinchikkunatam sapa kuti watukunchik imayna kasqanku chaynataq imayna kawsasqankupas cambiasqanrayku. Ichapas qepa watukusqanchikmanta runamasinchikqa ima onqoywanpas hinaspa mana llamkayniyoqpas kachkan otaq kuyasqan ayllunpas wañukunman (leey Eclesiastes 9:11). Otaq enteron pachapi tukuy imakuna pasasqan ichapas hamuq tiempomanta  piensarachin. Chaynakuna pasasqanmi runakunata tanqanman predicasqanchikta allinta uyarinankupaq, ñawpaqpi mana uyariyta munaq otaq contranchikpi churakuq kaptinkupas. Chaynaqa Diosmanta predicaytaqa amayá saqesunchu maypi kaspapas.

12. ¿Imaynatam qawananchik predicasqanchik runakunata, hinaspa imanasqa?

¹² Runakunaqa piwanpas tupachispam runamasinta juzgan. Jehová Diosmi ichaqa sapakamapi interesakun hinaspam qawan sumaq kayninkunata (leey 1 Samuel 16:7). Paytayá qatipakusun runakunaman predicaspanchik. Achka experienciakunam qawachiwanchik runakunamanta allinta piensaspa predicasqanchik allinpi tukusqanmanta.

13, 14. a) ¿Imanasqataq precursora paninchik manaña watukurqachu Ruth sutiyoq warmita? b) ¿Imatam kaymanta yachachwan?

¹³ Sandra sutiyoq precursoram wasin-wasin Caribe law islapi predicachkarqa, hinaspam Ruthwan tuparurqa. Ruthqa sapa kutim carnaval kaptin tusuq karqa, chayraykum nacionninpi iskay kutikama carnavalpi reina kananpaq akllarurqaku. Bibliapa yachachisqanpi Ruth anchata interesakuptinmi, Sandraqa nirqa yapamanta watukuspan Bibliamanta yachachinanpaq. Paninchikmi yuyarispan nin: “Wasinman yaykuruspaymi, chaylla rikururqani perqapi hatun retratonta, chay retratopim kachkasqa carnaval pachawan chakinmanta umankama pachasqa, qawarqanitaqmi ganasqanmanta achka premiokunatapas. Chaymi nirqani kaynaña reqsisqa hinaspa carnavalman qokuq warmiqa chayllachá saqerunqa cheqap yachaypi interesakusqanta, chaynata piensaspaymi manaña watukurqaniñachu”.

¹⁴ Tiempopa risqanman hinam, Ruthqa Huñunakunanchik Salonman rirqa, hinaspam huñunakuy tukuruptin Sandrata tapurqa: “¿Imanasqataq manaña watukamuwarqankiñachu?”, nispa. Chaymi Sandraqa pampachaykunanpaq nirqa hinaspam arreglota rurarqa hinalla estudianankupaq. Ruthmi Bibliamanta yachasqankunata utqayman kasukuyta qallaykurqa. Chaymi carnavalmanta retratonkunatapas wikaparuspan congregacionpa imaymana rurayninkunapi yanapakuyta qallaykurqa, chaymantañataqmi Jehová Diosman vidanta qorqa. Sandraqa reqsikurqam qallariyninpi rurasqan mana allin kasqanmanta.

15, 16. a) ¿Imapitaq tukurqa huk cristianapa ayllunman predicasqan? b) ¿Imanasqataq ayllunchikpa imayna kawsasqanrayku mana iskayrayanachu predicanapaq?

¹⁵ Chaymantapas achka wawqe-paninchikkunapa mana iñiq ayllunkuman hinaspa mana uyariy munaq rikchakuq ayllunman predicasqankupas allinpim tukurqa. Estados Unidos nacionpi Joyce sutiyoq cristianam sumaq ejemplo chayna ruraypiqa. Paypa cuñadonmi achka kutita preso kasqa mozo kasqanmantapacha. Joycem willakun: “Drogakunata rantikuptin, suwakuptin hinaspa tukuy mana allinkunata ruraptinmi runakuna nirqaku manañam imawanpas kay runaqa rurasqankunata saqeyta atinmanñachu nispanku. Chayna kaptinpas ñoqaqa hinallam Bibliamanta rimapayarqani. Kaytaqa rurarqani kimsa chunka qanchisniyoq watam”, nispa. Pacienciawan hinaspa sapakuti Joyce sutiyoq cristianapa predicasqanmi bendecisqa karqa, Jehová Diospa testigonkunawan Biblia estudiayta cuñadon qallaykuspa vidantapas cambiaptin. California lawpi apakuq distrito asambleapim chayllaraq bautizakurun 50 watanpiña. Joycem nin kaynata: “Bautizakusqanmi kusikuymanta waqarachiwarqa. ¡Mayna kusisqam kachkani vidan cambiananta pacienciawan suyaspay predicasqaymanta!”, nispa.

 ¹⁶ Wakinpiqa ichapas ayllunchikman Bibliamanta willanapaq iskayrayachwan imayna kawsasqanrayku. Joyceqa manamá chaywanqa hukmanyarqachu cuñadonman predicananpaqqa. Mana predicaspaqa, ¿imaynatamá pipas yachanman runamasinpa sonqonpi ima kasqantaqa? Ichapas tukuy sonqonwan cheqap yachachikuyta maskachkan. Chaynaqa, tarinanpaq kachkaptinqa tariykachisunyá (leey Proverbios 3:27).

Bibliamanta yachachinapaq allin yanapakuy

17, 18. a) Enteron pachamanta willakuykuna chayamuq, ¿imatam yachachiwanchik Enseña sutiyoq libro ancha valorniyoq kasqanmanta? b) ¿Ima allin experienciakunatam qampas tarirqanki kay librowan?

¹⁷ Enteron pachamanta willakuykuna chayamusqanmi qawachin, Bibliamanta yachachinapaq ¿Qué enseña realmente la Biblia? nisqa libro, allin sonqoyoq runakunata allintapuni yanapasqanmanta. Estados Unidos nacionpi Penni sutiyoq precursoram kay librowan achka estudiokunata qallaykurqa. Iskay estudiaqkunam yuyaqña karqaku, paykunaqa llumpaytam religionninkuman hapipakurqaku, chaymi paninchikqa iskayrayarqa Enseña nisqa libropi cheqap yachachikuykunata yachachiptin imayna chaskinankumanta. Ichaqa paypa qellqasqanman hinam, “kay libropa yachachisqankunaqa chaylla entiendenapaqmi hinaspa pisillapi allintapuni yachanapaqmi, chayraykum utqaylla entienderurqaku yachasqanku cheqap kasqanta mana sasachakuspa”.

¹⁸ Gran Bretaña nacionpi Pat sutiyoq paninchikmi, Bibliamanta yachachiyta qallaykurqa Asia lawmanta lluptimuq warmita. Nacionninmanta manaraq lluptimuchkaspanmi, manchakuypaq kaqkunata pasarqa: mana allin ruraq soldadokunam qosantawan wawankunata aparurqaku, chaymantapacham manaña haykapipas rikurqañachu; wañuchinankupaqñam kachkarqa; wasintapas, kañaykurqakum hinaspa achka runakunam abusarurqaku. Chaynakuna pasaruptinmi manaña kawsakuyta munarqachu hinaspam achka kutipi wañurachikuyta munarqa. Ichaqa Biblia estudiasqanmi sumaq consuelota qorqa. Paninchikmi nin: “Enseña nisqa librom sumaq yachachikuyninkunawan hinaspa ejemplonkunawanpas payta allintapuni yanaparqa”, nispa. Payqa Bibliamanta yachasqankunatam utqayllaman kasukuyta qallaykurqa, hinaspa manaraq bautizasqa predicaqña kaspanmi qatiqnin asambleapi bautizakuytaña munarqa. ¡Mayna kusisqam tarikunchik allin sonqoyoq runakunata Bibliapa nisqan suyakuymanta yachachispaqa!

“Amayá amirusunchu imapas allin ruraytaqa”

19. ¿Imanasqataq kunan tiemponchikpi utqayman predicananchik?

¹⁹ Runakunata predicanapaq hinaspa yachachinapaq kamachiwasqanchikqa, kunan tiempopi utqayman ruranapaqmi kachkan. Sapa watam waranqantin ‘wiñay kawsaypaq’ kaq runakuna  Diosmanta willakuyta kasukuchkanku. “Chayaykamuchkanñam Tayta Diospa castiganan hatun punchawqa” chaymi Diosmanta hinaspa yachachikuyninkunamanta mana yachaqkunaqa ‘wañuyman’ richkanku (Sofonias 1:14; Proverbios 24:11).

20. ¿Ima ruranapaqmi kallpanchakunanchik?

²⁰ Chayna runakunataqa atichwanraqmi yanapayta. Chaypaqqa punta kaq cristianokunatam qatipakunanchik, paykunam sumaq noticiamanta ‘mana samaykuspanku [. . .] willakurqaku’ (Hechos 5:42). Hinaptinqa paykunapa rurasqankutayá qatipakusun: sasachakuykuna kaptinpas hinalla predicaspa, allin yachachiq kanapaq kallpanchakuspa hinaspa tukuy rikchaq runaman predicasun mana pimanpas sayapakuspa. “Amayá amirusunchu imapas allin ruraytaqa”, chaynata ruraspam Diospa favorninta chaskisun hinaspa achka bendicionkunatapas tarisun (2 Timoteo 4:2; leey Galatas 6:9).

[Willakuy]

¿Imatam kutichiwaq?

• ¿Pikunataq Diosmanta willakusqanchikta kasukuchkanku?

• ¿Imanasqataq kallpanchakunchik predicasqanchik runakunata mana juzgananchikpaq?

• ¿Imaynatam Enseña sutiyoq libro runakunata yanapachkan?

[Kay yachachikuypa tapukuyninkuna]

[19 kaq paginapi dibujokuna]

Waranqantin allin sonqoyoq runakunam Diosmanta willasqanchikta kasukuchkanku

[21 kaq paginapi dibujokuna]

¿Imatam yachanchik apostol Pablo ñawpa vidan saqesqanmanta?

[22 kaq paginapi dibujo]

Allin noticiamanta willaqkunaqa manam juzgankuchu runakunataqa