¿Imataq Diospa Munaychakuynin?

¿IMAMANTAM Jesusqa astawan predicarqa? Diospa Munaychakuyninmantam yachachirqa (Lucas 4:43). Uyariqnin runakunaqa yacharqakuchá Diospa Munaychakuyninmanta sapa kuti rimasqantaqa. ¿Chaywanchu paykuna pantasqa tarikurqaku? ¿Tapurqakuchu Diospa Munaychakuynin ima kasqanmanta? Manam. Jesuspa vidanmanta willaq tawa librokunapiqa manam kanchu chayna tapuykunaqa. Chaynaqa, ¿yacharqakuchu Diospa Munaychakuynin ima kasqanmanta?

Judiokunapa respetasqan ñawpa Qellqakunaqa cheqaptamá willarqaña Diospa Munaychakuyninmantaqa. Sutillatam qawachirqa ima kasqanta chaynataq ima rurananmantapas. Chaynallataqmi kunanpas Diospa Munaychakusqanmantaqa astawanraqmi yachachwan: Bibliata estudiaspa. Qawasunchik kaymanta Bibliapa nisqanman hina qanchis yachachikuykunata. Punta kaq kimsa yachachikuykunaqa manam pakasqachu karqa Jesuspa tiemponpipas nitaq paymanta ñawpaqpi kawsaq judiokunapaqpas. Qatiqnin kimsa yachachikuytañataqmi Jesucristo otaq apostolninkuna yachachirqaku kawsasqanku tiempopi. Qanchis yachachikuymantañataqmi kunan tiemponchikpi allinta yachanchik.

1. Diospa Munaychakuyninqa wiñaypaq takyaq cheqap gobiernom. Bibliapi punta kaq profeciam qawachirqaña, allin sonqoyoq runakunata Dios salvananpaq libraqta kachamunanmanta. Chay libraqtam ‘miraywan’ suticharqa, hinaspam willarqa Satanas hinaspa Adanwan Eva mana kasukusqankurayku rikuriq sasachakuykunata chinkachinanpaq (Genesis 3:15). Tiempopa risqanman hinam, Diosta serviq rey Davidman kusikunapaq hina willarqa chay ‘miray’ otaq Mesias: Diospa Gobiernonpi kamachinanmanta, ichaqa manam runakunapa gobiernon hinachu kanan karqa, aswanqa wiña-wiñaypaqmi (2 Samuel 7:12-14).

2. Diospa Gobiernonmi chinkachinqa llapallan gobiernokunata. Willakuq Danielmi mosqoyninpi rikurqa achka gobiernokuna enteron pachata munaychakunanpaq qatinasllanpi rikurinankumanta, chay gobiernokunamanta hukninmi kunan tiemponchikpipas hinallaraq kachkan. Qawariy imapim tukun chay mosqoyninpi rikusqan: “Chay hamuq reykuna [tukuyninpi kamachiqkuna] gobiernachkaptinmi Hanaq Pacha Dios hatarichinqa mana tuñichiy atina gobiernota, chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq”. Chaynatam kay pachapi llapallan gobiernokuna —lliw mana allin rurayninkunawan kuska— wiñaypaq puchukachisqa kanqaku. Bibliapa nisqanman hinam, Diospa Gobiernonqa pisi tiempollamantaña enteron Allpapi kamachiyta qallaykunqa (Daniel 2:44, 45). Manam cheqap gobiernollachu, aswanqa kay gobiernollam kay pachata kamachinqa.

3. Diospa Gobiernonqa chinkachinqam guerrakunata, onqoykunata, yarqayta hinaspa wañuytapas. Bibliapim tarikun kusikunapaq achka willakuykuna Diospa Gobiernon imakunata kay pachapi rurananmanta. Kunanpas hinaspa hamuq tiempopipas runakunapa mana ruray atisqankutam kay gobiernoqa ruranqa. Piensariy: ¡mayna sumaqchá kanqa armakuna wiñaypaq chinkachisqa kaptinqa! Bibliam nin: “Guerrakunatam payqa tanirachin. Kay pachapa cantonkamam tanirachin”, nispa (Salmo 46:9). Manaña onqoykuna kaptinmi, doctorkunapas nitaq hospitalkunapas kanqañachu. Manañam pipas ninqañachu: “Onqochkanim” nispaqa. (Isaias 33:24.) Manañam pipas mikuymantaqa eqoyanqachu nitaq wañunqachu. ‘Kay pachapim achka-achka kawsaykuna qespinqa.’ (Salmo 72:16.) Manañam kanqañachu kunan hina imaymanakunata ruraspa wañuqkunata pampaypas, panteonkunapas, runakuna wañuruptin hospitalpi churana sitiokunapas, nitaq llakisqallaña kaypas. Wañuyqa chinkachisqam kanqa. Unanchawaqninchik Jehová Diosmi “wiñaypaq chinkachinqa wañuyta. Señor Diosmi pichanqa llapallan waqaqkunapa weqenta” (Isaias 25:8).

4. Diospa Gobiernonpi kamachiq Reyqa kikin Diospa akllasqanmi. Mesiasqa manam kikinchu akllakurqa rey kananpaqqa, manataqmi runakunapas akllarqachu. Aswanmi kikin Jehová Dios akllarqa. Chayna kasqantam qawachin Mesias otaq Cristo sutikuna, kayqa “Ungido” otaq Akllasqa ninanmi. Paymantam Dios nirqa: “Kayqa ñoqapa serviqniymi. Payqa garantizasqaymi. Paytam ñoqaqa akllakurqani. Payraykum kusisqa kachkani. Paymanmi huntani espirituyta. Paymi  nacionkunapi ruranqa allin arreglota”, nispa (Isaias 42:1; Mateo 12:17, 18). Unanchaqninchik hinaqa manamá pipas yachanchu imayna gobiernota necesitasqanchiktaqa.

5. Diospa Gobiernonpi Reyqa kamachinanpaq mereceq kasqantam qawachirqaña llapallan runakunaman. Nazaret llaqtayoq Jesusmi Diospa prometesqan Mesiasqa karqa. Diospa akllasqan ayllupa mirayninmantam rikurimurqa (Genesis 22:18; 1 Cronicas 17:11; Mateo 1:1). Kay Pachapi kachkaspanmi cumplirqa ñawpaq watakunamantaraq qellqasqa achka profeciakunata. Chaymantapas, Mesias kasqanmi hanaq pachamanta reqsichisqa karqa. ¿Imaynata? Kikin Diosmi hanaq pachamanta rimamurqa hinaspam nirqa Churin kasqanta, chaynataq angelkunapas willarqakuñam Mesias kananmanta. Chaymantapas Jesusqa milagrokunatam rurarqa, chaywanmi qawachirqa Dios atiyniyoq kasqanta, kaytaqa rurarqa waranqantin runakuna rikuchkaptinmi. * Jesucristoqa sapa kutim qawachirqa allin kamachiq kananmanta. Manam atiyniyoqllachu karqa runakunata yanapananpaqqa, aswanmi yanapayta munarqa (Mateo 8:1-3). Payqa qokuykuq, llakipayakuq, mana manchakuq hinaspa humildem karqa. Kay Pachapi imaymana rurasqanmantaqa pipas yachanmanmi, chaykunam Bibliapi tarikun.

6. Diospa Gobiernonpiqa 144.000 akllasqa runakunam Jesucristowan kuska kamachinqaku. Jesusmi nirqa huk runakunapas chaynataq apostolninkunapas, paywan kuska hanaq pachamanta kamachimunankupaq. Paykunatam nirqa, aslla ‘ovejakuna’ nispa (Lucas 12:32). Tiempopa risqanman hinam, apostol Juanman nirqa chay aslla ovejakunaqa 144.000 runakuna kanankumanta. Paykunam Jesucristowan kuska kusisqallaña kamachimunqaku reykuna hina, hinaspa servinqaku sacerdotekuna hina (Apocalipsis 5:9, 10; 14:1, 3).

7. Diospa Gobiernonqa kamachichkanñam hanaq pachapiqa, listoñam kachkan enteron Pachapi munaychakunanpaqpas. Kay yachachikuymi aswan admirakunapaq hina. Bibliam sutillata qawachin Jesus hanaq pachapi Rey kananpaq atiy chaskisqanmanta. Chaypim kunan kamachichkan, hinaspam pisi tiempollamantaña kay Pachatapas kamachimunqa, chaynapim yachamusqanchik profeciakunata cumplinqa.

Diospa Gobiernon kamachiptin, ¿chaypichu kanki bendicionkunata chaskinaykipaq?

Jesuspa willasqankunaqa runakunamanmi mana tupachiy atina sumaq suyakuyta qorqa. Eden huertapi Diospa contranpi churakuruptinkum, Jehová Diosqa prometerqa huk gobiernota churaspan qallariypi ima munasqanta cumplinanpaq. ¿Imam karqa chay munayninqa? Paymi munarqa sumaqllaña Allpapi runakuna wiñaypaq kawsanankuta. ¿Manachu kusichisunki ñawpaqmantaraq prometesqa gobierno hanaq pachapi kamachiy qallaykusqanmanta yachasqayki? Arí, Diospa Gobiernonqa manam yanqa yachachikuyllachu nitaq haykapiraqyá kanqa ninapaqchu, aswanqa cheqapmi.

Diospa churasqan Reyqa, enemigonkunapa chawpinpim munaychakuchkanña (Salmo 110:2). Chaymantapas, Jesusqa Taytanpa munasqanta ruraspanmi runakunata maskachkan Diosta reqsiy munaq hinaspa “cheqap espiritupi” yupaychay munaqkunata, Diosmanta karunchasqa hinaspa mana allin ruraq runakunapa kasqanpi (Juan 4:24). Llapallan nacionpi runakunam, hatunpas uchuypas, apupas wakchapas atinmanku Diospa Gobiernon ukupi wiñay kawsay suyakuytaqa (Hechos 10:34, 35). Kallpanchaykikum Diospa Gobiernonmanta utqayman yachanaykipaq. Arí, Diospa Gobiernonmanta astawan yachay, chaynapim Dios kamachiptin wiñaypaq kawsakunki (1 Juan 2:17).

[Willakuy]