Jesucristo pimanatapas allin kaq predicador

‘Ñoqam [. . .] paypa kasqanmanta hamuni. Paymi ñoqataqa kachamuwarqa.’ (JUAN 7:29.)

1, 2. ¿Ima ninantaq predicador nisqa rimayqa, hinaspa pitaq pimantapas allin kaq predicadorqa?

¿PIKUNAPIM piensanki predicador nisqa rimayta uyarispayki? Wakinkunaqa piensanku cristiano tukuq religionkunapa predicadorninkupim, paykunaqa yaqa llapankum servisqanku nacionpi chaqrukunku politica nisqapi hinaspa imaymana asuntokunapipas. Ichaqa, Jehová Diospa testigonkunaqa enteron pachaman Diosmanta allin noticiata predicanankupaq Jehová Diospa testigonkunapa sapaqchasqa cuentallikuq umalliqkunapa kachasqan wawqe-paninchikkunapim piensanchik (Mateo 24:14). Kay wawqe-paninchikkunaqa debaldellam tiemponkutawan kallpankuta servichikunku runakunata Jehová Diosman asuykunankupaq hinaspa Dioswan amistadta ruranankupaq yanapaypi (Santiago 4:8).

² Chuya qellqa sutichasqa Bibliapi predicador hinaspa predicadorkuna nisqa rimaykuna mana rikurimuptinpas, griego simipi “Jesucristomanta allin noticia willakuq” nisqanqa tikrakunmi “predicador” nisqa rimaywanpas. Pipas predicador kaqqa huk ruraypaq kachasqa kaqmi, chaymi Jehová Dios allin noticiamanta allin willakuqpuni kaptinpas manam nichwanchu pimantapas aswan allin kaq predicadormi nispaqqa, mana pipapas kachasqan kasqanrayku. Jesucristom ichaqa nirqa: ‘Ñoqam [. . .] paypa kasqanmanta hamuni. Paymi ñoqataqa kachamuwarqa’, nispa (Juan 7:29). Chaynamá, Jehová Diosqa ancha-anchata runakunata kuyaspanmi sapallan Churinta kay Allpa pachaman kachamurqa (Juan 3:16). Chaymantapas kachamurqataqmi ‘Cheqapmanta rimananpaq’ (Juan 18:37). Chaymi Jesucristom pimantapas allin kaq predicadorqa nispa nichwan. Diospa Munaychakusqanmanta allin noticia willakusqanqa alli-allinpunim karqa chaymi kunankamapas predicador hina servisqanqa hinalla yanapawanchik. ¿Imaynatataq yanapawanchik? Piensarison, predicador kaspa otaq mana kaspapas Jesuspa imayna yachachiynintaqa qatipakuchwanmi predicasqanchikpi.

3. ¿Ima tapukuykunatataq kutichichkasunchik?

³ Jesuspa imayna predicasqanmanta estudiaspanchikmi tapukunchik: ¿Ima sasachakuykunapitaq tarikurqa kay Pachapi kachkaspan? ¿Imanasqataq alli-allinpuni yachachisqanqa karqa? ¿Ima sumaq kayninkunataq yanaparqa Diosmanta willakuynin allinpuni kananpaq?

Sonqomantapuni Diosta serviy munasqanmanta

4-6. ¿Imakunapim hukniraq karqa Jesuspa hanaq pachapi kawsasqan kay Allpa pachapi kawsasqanwan?

⁴ Kunanpas predicadorkuna chaynataq Diosmanta willakunankupaq mana achka predicaqkunapa kasqan lawman astakuq wawqe-paninchikkunapas huk riqchaq kawsaymanmi costumbrakunanku. Ichaqa piensarisunyá Jesus kay Allpa  pachapi runa hina kawsananpaq Taytanwan kuska hinaspa Diosman sonqo angelkunawan hanaq pachapi kawsakuynin saqesqanmanta (Job 38:7). Pantaq runakunawan chaynataq mana allin ruraq runakunawan kawsakuyninqa manam imaniraqllatapas tuparqachu hanaq pachapi kawsasqanwanqa (Marcos 7:20-23). Aguantarqataqmi kuyasqan discipulonkunapa pantasqankunatapas (Lucas 20:46; 22:24). Chayna kaptinpas Jesusqa allin yachaywanmi kay pachapi sasachaqnin asuntokunataqa allicharqa.

⁵ Wawallaraq kaspanqa Jesusqa manam milagrowanchu rimaytaqa yacharurqa aswanqa wakin wawakuna hinam pisi-pisillamanta rimaytaqa yacharqa. ¡Manayá chaynachu karqa hanaq pachapi tarikuspanqa, payqariki angelkunatam kamachikurqa! Kay Pachapi kaspanqa ‘angelkunapa idiomanmantaqa’ Jesusqa runakunapa idiomantam rimarqa (1 Corintios 13:1). Chayna kaptinpas mayqan runakunapas sumaqllaña rimasqanman hinaqa manam rimankuchu (Lucas 4:22).

⁶ Piensasuntaq Jesuspa hanaq pachapi kawsasqanwan kay Allpa pachapi kawsasqan imakunapi hukniraq kasqanmantapas. Mana huchayoq kaptinpas runam karqa, hanaq pachapi kawsanankupaq akllasqa ‘wawqenkuna’ hina (leey Hebreos 2:17, 18). Manaraq wañukusqan tutam yanapaykunanpaq ‘wara-waranqa angelkunata’ Taytanta mana mañakurqachu, hanaq pachapi angelkunata kamachiqnin Miguel kachkaspanpas (Mateo 26:53; Judas 9). Milagrokunataqa rurarqam, ichaqa kay pachapi rurasqanqa manayá igualanmanchu hanaq pachamantapuni ruramuptinqa.

7. ¿Imaynatam judiokunaqa Leypa nisqankunata yanqacharqaku?

⁷ Manaraq runa kachkaptin “Simi” sutichasqa Jesustach Diosqa valekurqa chunniqnintakama Israel runakunata pusananpaqqa (Juan 1:1; Exodo 23:20-23). Paykunamanmi ‘angelninkunawan Dios qorqa leyninta ichaqa manam kasukurqakuchu’ (Hechos 7:53; Hebreos 2:2, 3). Punta pachak wata ukupi Diosmanta yachachiq judiokunam Leypa kamachisqanta yanqacharurqaku. Ejemplopaq, samana punchawmanta kamachikuytam yanqacharurqaku (leey Marcos 3:4-6). Fariseokuna hinaspa Diospa Leynin yachachiqkunam ‘qonqarurqaku allin rurayta, kuyapayakuyta hinaspa iñiyniyoq kayta’ (Mateo 23:23). Jesusmi ichaqa runamasinkunaman Diosmanta cheqap yachachikuykunata hinalla willakurqa.

8. ¿Imanasqataq Jesusqa yanapawanchikman?

⁸ Jesucristoqa ancha kuyapayakuq runam karqa. Runamasinta kuyapayasqanmi kallpancharqa allinkunata rurananpaq chaynataq tukuy kallpanwan hinalla predicananpaqpas. Kay Pachapi Jehová Diosman sonqo kasqanraykum “kasuqnin llapallan runakunapaq wiñaypaq salvaqnin rikurirun”. 5. Chaymantapas, “payqa tentasqa kaspanmi ñakarirqa, chayraykum tentasqakunatapas atin yanapayta” (Hebreos 2:18; 5:8, 9).

Alli-allin yachachikuq

9, 10. ¿Imayna kaq yachaytam Jesus chaskirqa manaraq kay Pachaman hamuchkaspan?

⁹ Kunan tiempopim, Jehová Diospa testigonkunapa Sapaqchasqa Cuentallikuq Umalliq wawqenchikkuna predicador kaqkunata predicananku lawman manaraq kachachkaspanku sumaqta yachachinku. ¿Chaskirqachu yachayta Jesus Mesias kananpaq? Arí chaskirqam, ichaqa manayá educakurqachu judiokunapa escuelankunapichu nitaq yachaysapa religioso runakunawanchu (Juan 7:15; tupachiy Hechos 22:3). Chaynaqa, ¿imanasqataq alli-allin yachachikuqqa karqa?

¹⁰ Kay pachapi tayta-mamanmanta yachayta chaskisqanmantaqa, aswan valorniyoq yachaynintaqa chaskirqa hanaq pachapi Taytanmantam. Jesusqa nirqam: “Manam kikillaymantachu rimani, kachamuwaqniy Taytaymi kamachiwarqa imam rimarinaytaqa chaynataq imam yachachinaytaqa”, nispa (Juan 12:49). Musyariy imaynam Jesustaqa Taytanpuni kamachirqa imam yachachinantaqa. Cheqaptapunimá Jesusqa manaraq kay Pachaman hamuchkaptin una-unaytam Taytan paytaqa yachachirqa. ¿Kanmachu Jehová Diosmanta aswan allin kaq yachachikuqqa?

11. ¿Imaynatam Jesusqa Taytan hina runakunata mayna kuyasqanta qawachirqa?

¹¹ Unanchasqa kasqanmantapunim Jesusqa Taytanwan allintapuni reqsinakurqaku. Hanaq pachapi kaspanmi runakunata Taytan imayna kuyasqanta qawarqa. Chaymi Taytan hinapuni runakunata kuyarqa. Chayraykum Jesusqa nirqa: “Runakunaraykum ñoqaqa anchata kusikurqani”, nispa (Proverbios 8:22, 31).

12, 13. a) ¿Imatam Jesus yacharqa Israel runakunata Jehová Dios llakipayasqanmanta? b) ¿Imaynatam Jesus hanaq pachapi yachay chaskisqanta kay Pachapi kaspan rurayman churarqa?

 ¹² Jesusqa yachaytaqa chaskirqataqmi sasachakuykunata Taytan imayna allichasqanta qawaspanpas. Piensarisun mana kasukuq Israel runakunamanta. Paykunamantam Nehemias 9:28 nin: “Hawkayayta tariruspankum huktawan qampa ñawpaqnikipi mana allinta rurarqaku chaynapim qamqa enemigonkupa munaychakuyninmanña qoykurqanki hinaptinmi paykunaqa yanapaykunaykipaq huktawan mañakusurqanki, chaymi qamqa llakipayakuq kasqaykirayku hanaq pachamanta uyariykurqanki, qamqa achka kutipimá paykunataqa libraykurqanki”, nispa. Taytanwan kuska llamkasqanraykum Jesusqa runakunata Taytan hina kuyapayarqa (Juan 5:19).

¹³ Hanaq pachapi yachachikuyta chaskisqanman hinam qatiqninkunatapas kuyapayarqa. Manaraq wañukusqan tutam kuyasqan “discipulonkuna Jesusta sapallanta saqeruspa ayqekurqaku” (Mateo 26:56; Juan 13:1). ¡Apostol Pedrom kimsa kutitaraq Jesusta negarqa! Chaywanpas Jesusqa paykunataqa manapunim negarqachu. Chaymi Pedrota nirqa: “Ñoqam Diosta mañakurqani iñiyniki mana pisinanpaq. Kutirimuspaykim iñiqmasikikunata kallpanchanki takyanankupaq”, nispa (Lucas 22:32). Chaynamá ‘Apostolkunapi hinaspa Diosmanta willakuqkunapim’ cimientasqa kachkan hanaq pachaman riqkunaqa. Hinaspapas Mosoq Jerusalen llaqtapa muyuriqninpi perqakunapas kachkan chunka iskaynin cimientoyoqmi, sapa cimientopiñataqmi qellqasqa kachkan Carneropa chunka iskayniyoq apostolninkunapa sutin. Kunan tiempopipas Diospa hinaspa Jesuspa yanapakuyninwanmi hanaq pachaman akllasqa wawqe-panikunawan chaynataq ‘sapaq ovejakuna’ nisqa Diospa Munaychakusqanmanta willakuypi enteron pachapi ñawparichkanku (Efesios 2:20; Juan 10:16; Apocalipsis 21:14).

¿Imaynatataq Jesus yachachirqa?

14, 15. ¿Imakunapim Jesuspa yachachisqanqa mana tupanchu punta apaq religioso runakunapa yachachisqankunawanqa?

¹⁴ Hanaq pachapi yachayta chaskisqanman hinam Jesusqa yachachirqa. Jesuspa yachachisqan aswan allin kasqantam qawanchik punta apaq religioso judiokunapa yachachisqanwan tupachispanchik. Fariseokunawan Diosmanta yachachiqkunam ‘Diospa kamachikuyninta yanqacharqaku costumbrenkunaIlata ruraspanku’. Jesusmi ichaqa mana haykappas tanteasqanman hinaqa yachachirqachu aswanqa Taytanpa nisqanman hinallam yachachirqa (Mateo 15:6; Juan 14:10). Chaynatataqmi ñoqanchikpas rurananchik.

¹⁵ Huk ruraypipas Jesusqa manam punta apaq religioso runakuna hinachu karqa. Paymi nirqa: “Chaynaqa kasukuspayá ruraychik paykunapa tukuy nisqanta. Ichaqa amam rurankichikchu paykunapa imam rurasqantaqa, paykunaqa manam yachachisqankuman hinachu ruranku”, nispa (Mateo 23:3). Jesusmi ichaqa yachachisqanman hina kawsakurqa. Qawarisun huk ejemplota.

16. ¿Imanasqam nichwan Mateo 6:19-21 nisqanman hinam Jesus kawsasqanmanta?

¹⁶ Jesusmi qatiqninkunata nirqa: “Qori-qollqetaqa huñukuychik hanaq pachapiyá”, nispa (leey Mateo 6:19-21). ¿Nisqanman hinachu pay kawsakurqa? Arí. Chaymi nirqa: “Kanmi atoqkunapa uchkun, kantaqmi alton pawaq urpikunapapas qesan, Diosmanta Hamuq Runapaqmi ichaqa mana kapuwanchu maypim puñuykunaypas”, nispa (Lucas 9:58). Payqa manam afanakurqachu kapuqniyoq kaypiqa, aswanqa Diospa Munaychakusqanmanta allin noticia willakuypim kallpanchakurqa. Ejemplonwanmi qawachirqa kay Pachapi qori-qollqe huñuq runakunamantaqa mana llumpay afanasqa nitaq llumpay  preocupasqa kawsakuyta atikusqanta. Aswanqa hanaq pachapi qori-qollqeta huñunankupaqmi kallpancharqa, ‘chaypiqa manam puyurachikunmanchu nitaq ismurunmanchu, suwapas manam yaykurunmanchu nitaq apakunmanchu’. Chaynaqa, ¿Jesuspa nisqanman hinachu ñoqanchikpas kawsakuchkanchik qori-qollqeta hanaq pachapi huñuypi?

Jesuspa sumaq kayninkunamanta

17. ¿Jesuspa ima sumaq kayninkunataq yanaparqa Diosmanta willakuynin allinpuni kananpaq?

¹⁷ ¿Jesuspa ima sumaq kayninkunataq yanaparqa Diosmanta willakuynin allinpuni kananpaq? Runakunapaq imayna kayninmi. Jesusqa Taytantam qatipakurqa chaymi kuyapayakuq, llakipayakuq hinaspa humilde runa karqa. Chaynaqa kay sumaq kayninkunarayku achka runakuna uyarisqanmantayá rimarisun.

18. ¿Imanasqataq ninchik Jesusqa humilde runam karqa nispa?

¹⁸ Kay Pachapi rurayninta cumplinanraykum Jesusqa “menoschakururqa sirviente hinaña kananpaq” (Filipenses 2:7). Chayna rurasqanwanqa humilde kasqantam qawachirqa. Chaymantapas runakunataqa manam haykapipas despreciarqachu nitaq obligarqachu hanaq pachamanta hamusqanrayku uyariykunankupaqqa. Cristo tukuq runakunamantaqa Jesusqa manam haykapipas Mesias kasqanmantaqa alabakurqachu. Wakin kutikunapiqa runakunatam kamachirqa pi kasqanmantawan ima rurasqanmantapas ama willakunankupaq (Mateo 12:15-21). Payqa munarqamá rurasqanta qawaspanku runakuna kikinkumanta qatinankupaq otaq manapas tanteakunankuta. Jesusqa manam haykapipas suyarqachu qatiqninkuna hanaq pachapi mana pantaq angelkuna hina kanankutaqa.

19, 20. ¿Ima rurananpaqtaq Jesusta kallpancharqa kuyakuyninwan llakipayakuyninpas?

¹⁹ Jesusqa hanaq pachapi Taytanpa kuyakusqanman hinataqmi kuyakurqa (1 Juan 4:8). Chay kuyakuyninmi runakunata yachachinanpaq kallpancharqa. Reparasun Jesusman asuykuq kamachikuq mozopi (leey Marcos 10:17-22). Jesusqa kamachikuq mozota ‘kuyasqanraykum’ yanapayta munarqa, paymi ichaqa mana qatikuyta munarqachu achka kapuqninkunata mana saqeyta munaspan.

²⁰ Chaymantapas llakipayakuq kaptinmi runakunaqa Jesusta kuyarqaku. Hinaspa yacharqataqmi uyariqninkuna  pantaq runa kasqankuraykum sasachakuykunapi tarikusqankuta. Chayna kasqankuta yachaspanmi paykunamanta llakipayakuq karqa hinaspa yachachirqa. Huk kutipim paywan apostolninkuna yachachisqankurayku pisipasqallaña mana mikusqa kachkarqaku. Ichaqa, ¿imatam rurarqa achkallaña runakunata qawaykuspan? ‘Llakipayarikurqam paykunamanta mana michiqniyoq ovejakuna hina kaptinku chaymi willarqa achka yachachikuykunata.’ (Marcos 6:34.) Chayna kasqankuta qawaykuspanmi Jesusqa pisipasqa kachkaspanpas runakunata hinalla yachachirqa hinaspapas milagrokunatam paykunarayku rurarqa. Jesuspa sumaq kayninkunam chaynataq sumaq yachachikuyninkunam wakin runakunata kallpancharqa qatiqninkuna kanankupaq.

21. ¿Imamantam yachachkasunchik qatiqnin yachachikuypi?

²¹ Achka yachanaraqmi kachkan Jesuspa imayna yachachisqanmantaqa, chaykunamantam yachachkasunchik qatiqnin yachachikuypi. ¿Imakunata ruraspataq qatipakuchwan pimantapas allin predicador Jesucristota?

¿Imaniwaqtaq?

• ¿Imayna kaq yachaytataq Jesusqa chaskirqa manaraq kay Pachaman hamuchkaspan?

• ¿Imanasqataq Jesuspa yachachiyninqa aswan allinpuni karqa punta apaq religioso runakunamantaqa?

• Jesucristo, ¿imayna runa kaptintaq runakunaqa kuyarqaku?

[Kay yachachikuypa tapukuyninkuna]

[22 kaq paginapi dibujo]

¿Imaynatataq Jesusqa runakunata yachachirqa?