Pimantapas allin kaq predicadorta qatipakusun
Pimantapas allin kaq predicadorta qatipakusun
“Ñoqapa ejemploytayá qatiychik, ñoqapas Cristopa ejemplontam qatini.” (1 CORINTIOS 11:1.)
1. ¿Imanasqataq Jesuspa ejemplonta qatikunanchik?
APOSTOL Pablom pimantapas allin kaq predicador Jesustam qatipakurqa. Chayraykum wawqe-paninkunata nirqa: “Ñoqapa ejemploytayá qatiychik, ñoqapas Cristopa ejemplontam qatini”, nispa (1 Corintios 11:1). Jesuspas qatiqninkunatam kallpancharqa ejemplonta qatinankupaq. Discipulonkunapa chakinta mayllaspan humilde kanankupaq yachachispanmi nirqa: “Ejemplotam qamkunaman qoykichik qamkunawan rurasqayta hina qamkunapas ruranaykichikpaq”, nispa (Juan 13:12-15). Kunan tiempopi cristianokunapas qatipakunanchikpunim Jesuspa sumaq kayninkunata, imayna rimasqanchikwan chaynataq rurasqachikwanpas (1 Pedro 2:21).
2. Jehová Diospa testigonkunapa Sapaqchasqa Cuentallikuq Umalliq wawqenchikkuna predicador kanapaq manaña kachawaptinchikpas, ¿imatam rurachwan?
2 Ñawpa kaq yachachikuypim yacharqanchik predicador kaqkuna Diosmanta allin noticia predicanankupaq kachasqa kasqankumanta. Diosmanta allin noticia willakuymantam apostol Pablo yuyaymanarinapaq achka tapukuykunata rurarqa (leey Romanos 10:11-15). Huk kaq tapukuyninpim nirqa: “¿Imaynataq uyarinqaku pipas [. . .] mana willachkaptinqa?”, nispa. Chaymantam Diosmanta willakuq Isaiaspa nisqanmanta nirqa: “¡Ima sumaqmi allin noticia willakuqkunapa chayamusqanqa!”, nispa (Isaias 52:7). Predicadorkunata hina manaña karu nacionkunaman kachawaptinchikpas, paykuna hinam predicachwan Jesuspa imayna predicasqanta qatipakuspaqa. Qayna watam 6.957.852 wawqe-paninchikkuna Diosmantawan ‘Cristomanta willakurqaku’ 236 nacionkunapi (2 Timoteo 4:5).
“Tukuy imata saqeruspam qanwan purichkaniku”
3, 4. ¿Imakunatam Jesus hanaq pachapi saqerqa, hinaspa imatam rurananchik paypa qatiqnin kananchikpaqqa?
3 Jesusmi hanaq pachapi kawsasqantawan angelkunapa kamachiqnin kasqanta saqespan kay Allpa pachapi Taytanpa kamachisqanta cumplinanpaq “menoschakururqa sirviente hinaña kananpaq” (Filipenses 2:7). Jesusta qatikunapaq ima saqesqanchikpas manayá tupanmanchu Jesuspa saqesqanwanqa. Ichaqa Jesuspa ejemplontaqa qatikuchwanmi Satanaspa munaychakusqanpi tukuy ima saqesqanchikkunata mana munapayaspanchikqa (1 Juan 5:19).
4 Huk kutipim apostol Pedro Jesusta nirqa: “Ñoqaykuqa tukuy imata saqeruspam qanwan purichkaniku”, nispa (Mateo 19:27). Cheqaptapunim, Pedrota Andresta, Santiagota hinaspa Juanta qatiqninkuna kananpaq Jesus qayaptinqa mana iskayrayaspankum atarrayankuta saqespanku chaylla paywan pasarqaku. Paykunaqa challwiru kasqankuta saqeruspankum Diosmanta allin noticiataña willakurqaku. Lucas sutiyoq qellqapi nisqanman hinaqa Pedroqa nirqam: “Ñoqaykuqa imaykutapas saqeruspam qanwan purichkaniku”, nispa (Lucas 18:28). Ñoqanchikqa manayá tukuy imanchikkunatachu saqerqanchik Jesusta qatinanchikpaqqa. Ichaqa Jesuspa qatiqnin kananchikpaqqa hinaspa Jehová Diospa serviqnin kananchikpaqpas ‘kikillanchikpaq kawsakuytam’ saqerqanchik (Mateo 16:24). Chayna rurasqanchikwanmi achka bendicionkunata chaskinchik (leey Mateo 19:29). Jesuspa imayna predicasqanta qatipakuspanchikqa kusisqam tarikusunchik, aswanraqmi pitapas Jehová Diostawan kuyasqan Churinta reqsinankupaq imaniraqllatapas yanapaspanchikqa.
5. ¿Imatataq ruranku wakin wawqe-paninchikkuna huk nacionkunapi Diospa palabranmanta yacharuspanku? Willamuy huk ejemplota.
5 Brasil nacionmanta Valmir sutiyoq runam qori horqoypi Surinam llaqtapi llamkarqa, payqa tomayllamanñam qokururqa hinaspapas huchapakuyllapim purirqa. Huk llaqtapi tarikuchkaptinmi Jehová Diospa testigonkuna rimapayarqaku. Chaymantam wawqenchikkunawan sapa punchaw Biblia estudiayta qallaykurqa hinaspa vidantapas tikrarqa hinaspam mana unay tiempollapi bautizakurqa. Bibliapa yachachisqanman hina kawsakunanpaq llamkaynin mana yanapaptinmi chay llamkayninta saqerurqa hinaspam llaqtanman kutirqa familianta Diosta reqsinankupaq yanapananpaq. Apu nacionkunaman risqankupi cheqap kaq yachayta reqsispankum wakinkunaqa llamkayninkutapas saqenku hinaspa nacionninkuman kutinku Diosmanta yacharusqankumanta ayllunkunamanpas huk runakunamanpas yachachinankupaq. Kayna kaq wawqe-paninchikkunam qawachinku Jesuspa imayna predicasqanta qatipakusqankuta.
6. ¿Imatataq rurachwan mana achka predicaqkunapa kasqanman astakuyta mana atispaqa?
6 Jehová Diospa wakin testigonkunam nacionninkupa mana achka predicaqkunapa kasqanman astakunku, wakinkunañataq nacionninkumanta lloqsinku huk nacionkunapi Diosmanta yachachinankupaq. Ichapas ñoqanchikqa paykuna hina rurayta mana atinchikchu, chayna kaptinpas atichwanmi Jesuspa ejemplonta qatikuspa servicionchikpi astawan kallpanchakuytaqa.
Jehová Diosmi yachachiwaqninchik
7. ¿Ima escuelakunam kachkan Diospa Munaychakusqanmanta aswan allintaraq willakunapaq?
7 Imaynam Jesuspas Taytanpa yachachisqanta servichikurqa, chaynam ñoqanchikpas kay tiempokunapi Jehová Diospa llaqtanpi yachachikuyninkunata servichikuchwan. Jesusmá nirqa: “Diosmanta willakuqkunapa qellqasqan libropim nichkan: ‘Diosmi yachachin llapallanta’”, nispa (Juan 6:45; Isaias 54:13). Diospa Munaychakusqanmanta willakunapaq yachachiq escuelakunam kunan tiempopi kachkan. Ichapas llapallanchik Diosmanta Willanapaq Yachachiq Escuela nisqa huñunakuypa yachachisqanwan anchatapuni yanapachikurqanchik. Precursor hina serviq wawqe-paninchikkunapas rinkum Escuela del Servicio de Precursor nisqaman, kusikuyninkupaqmi achka wata precursor hina serviqkunaqa chay escuelaman huktawan rirqaku. Ancianokunawan siervos ministeriales nisqa wawqenchikkunapas rinmankum Escuela del Ministerio del Reino nisqaman, yachachiyninkupi aswan allin kanankupaq hinaspa wawqe-paninkunata allintapuni yanapanankupaqpas. Soltero kaqkunaqa rinmankum Escuela de Entrenamiento Ministerial nisqaman, chaypim yachamunku wawqe-paninkunata Diosmanta willakuyninkupi yanapanankupaq. Chaymantapas achka misionerokuna hina serviq wawqe-paninchikkunam rirqaku Escuela Bíblica de Galaad de la Watchtower nisqaman.
8. ¿Imaynatam wawqe-paninchikkuna qawachinku Jehová Diospa yachachikuyninkuna aswan valorniyoq kasqanta?
8 Jehová Diospa achka testigonkunam kayna kaq escuelakunaman rinankupaq imaymana arreglokunata rurarqaku. Ejemplopaq, Yugo sutiyoq wawqenchikmi Canadá nacionpi Escuela de Entrenamiento Ministerial nisqaman rinanpaq llamkayninta saqerqa mana permisasqankurayku. Yugom nin: “Manam pesapakunichu, permisaykuwaptinqa mana samarispachiki llamkachiwanman karqa, kunanmi ichaqa libre kachkani Jehová Dios kamachiwasqanpi servinaypaq”, nispa. Qawasqanchikman hinam achka wawqe-paninchikkuna Diosmanta yachachikuyninta chaskinankupaq tukuyta ruranku (Lucas 5:28).
9. ¿Ima ejemplom qawachiwanchik kallpanchakuqkunata Bibliapa yachachiynin yanapasqanmanta?
9 Bibliapa yachachiyninqa yanapanpunim kallpanchakuqkunataqa (2 Timoteo 3:16, 17). Piensarisun Guatemala naciomanta Saulo sutiyoq warmachapi payqa nacesqanmanta onqoqmi. Huknin kaq profesoranmi Saulopa mamanta nirqa leey yachananpaq wawanta ama hikutananpaq mana atisqanmanta anchata mana llakikunanpaq. Chaymi Sauloqa escuelanta saqerurqa manaraq leeyta yachachkaspan. Ichaqa Jehová Diospa huk kaq testigom leeyta yachachirqa Kallpanchakuy leenaykipaqwan qellqanaykipaq sutichasqa qellqata servichikuspan. Tiempo risqanman hinam Sauloqa leeyta yacharuspan Diosmanta Willakunapaq Yachachiq Escuela huñunakuypi discursotaña qorqa. Huk punchawmi maman tuparurqa Saulopa ñawpa kaq profesoranwan. Willarqam warman leey yacharusqanmanta, profesorañataqmi nirqa Saulowan qawan semanata kutinankupaq. Kutiruptinkum profesoran tapurqa: “¿Imatam yachachiwanki Saulo?”, nispa. Payñataq ¿Qué enseña realmente la Biblia? nisqa libropa huknin kaq parrafonta leeyta qallarirqa, profesora uyariruspanmi nirqa: “¡Mana creenapaq hinam, kunanqa qamña yachachiwachkanki!”, nispa. Profesoranmi kusikuymanta waqaspan abrazaykurqa.
Yachachinapaq allin yanapakuymanta
10. ¿Ima allinpuni yanapakuytaq kapuwachkanchik Bibliamanta yachachinanchikpaq?
10 Jesusqa yachachirqa Taytanpa hinaspa Bibliapa nisqanman hinam (Lucas 4:16-21; Juan 8:28). Ejemplontam qatikunchik yachachisqanman hina kawsaspa hinaspa Bibliapa nisqanman hinam yachaspanchik. Chaynata ruraspam llapallanchik hina kaqllata yachachisunchik hinaspa huk piensamientoyoqlla kasunchik chaynapim mana rakinasqachu tarikusunchik (1 Corintios 1:10). ‘Allin yuyayniyoq confianza sirvientem’ Bibliamanta imaymana qellqakunata qowanchik allpantinpi imam kaqllata yachachiypi yanapawananchikpaq, chaynapi Diosmanta willakunapaq deberninchikta cumplinanchikpaqpas. ¿Manachu chaykunamanta agradecekunchik? (Mateo 24:45; 28:19, 20.) Huknin kaq qellqam Enseña nisqa libro, 179 idiomakunapim rurasqa kachkan.
11. Enseña nisqa librota servichikuspan, ¿imaynatam yanaparqa Etiopía nacionpi huk paninchik Diosmanta mana yachay munaq warmita?
11 Enseña nisqa librowan Bibliamanta estudiayqa yanapanmanmi contranchikpi kaqkunatapas. Etiopía nacionpi Lula sutiyoq precursora hina serviq paninchik Bibliamanta estudiota qochkarqa huk warmiman, hinaptinmi estudiantepa warmi kaq ayllun piñasqallaña yaykuramuspan yanqapaqmi yachasqaykichikkunaqa nispa nirqa. Mana piñakuspallam Lulaqa rimapayarqa Enseña libropa 15 kaq yachachikuyninpi falsificasqa qollqemanta rikurimuq rikchanachiyta servichikuspan. Chay warmim hawkayaruspan saqeykurqa hinalla estudianankupaq. Lula kutimuptinmi chay warmiqa estudiopi kachkarqa hinaspam pagaytapas munaspanraq Bibliamanta estudiota mañakurqa. Kimsa kutitam semanapi Bibliata estudiarqa hinaspam iñiyninpiwan Dioswan allin kayninpi ñawparirqa.
12. ¿Ima ejemplom qawachiwanchik mozo-sipaskunapas Bibliamanta yachachiy atisqankuta?
12 Mozo-sipaskunapas runakunatam yanapanmanku Enseña nisqa librota servichikuspanku. Hawai llaqtapim Keanu sutiyoq warmacha Enseña nisqa librota leechkaptin estudiaqmasin tapuykurqa imanasqam warmamasinkunapa fiesta rurasqankuman mana rinchu nispa. Keanuñataqmi tapukuyninta kutichinanpaq Enseña libropa sapaq yachachikuyninpi “¿Debemos celebrar las festividades?” (¿Fiestakunachu huk rikchaq fiestakunata?) nisqa yachachikuyninmanta leepurqa. Libropa listanta qawachispanñataqmi tapurqa mayqenninta yachay munasqanmanta hinaspam Bibliamanta estudiota qallarirqaku. Qayna servicio watapim Jehová Diospa testigonkunaqa 6.561.426 runakunata Bibliamanta estudiota qorqaku, yaqa llapanpiqa Enseña nisqan librowanmi. ¿Servichikuchkankichu kay librota Bibliamanta estudiokunata qonaykipaq?
13. ¿Imaynatam runakunata allintapuni yanapan Biblia estudiayqa?
13 Enseña librowan Bibliata estudiayqa allintapunim yanapanman Diospa munasqanman hina kawsay munaqkunataqa. Noruega nacionpi precursor especial hina serviq casarasqa wawqe-paninchikmi Bibliamanta estudiota qallarirqa Zambia nacionmanta kimsa wawayoq casarasqa runakunawan. Kay runakunaqa manañam churi-wawayoq kaytaqa munarqakuñachu, chaymi warmin wiksallikuruptin abortananpaq tantearurqaku. Manaraq doctorman richkaspankum libropa “Vea la vida como la ve Dios” (Diospa qawasqanman hina kawsakuyta qaway) nisqa yachachikuyninta estudiarqaku. Mamanpa wiksanpi sulluchallaraq wawachapa foto qawasqankum iskayninta llakiriykachirqa chaymi warmiqa manaña abortarqachu. Iskayninkum iñiyninkupiwan Dioswan allin kayninkupi ñawparirqaku, wawachan naceruptinñataqmi wawqenchikpa sutinwan suticharurqaku.
14. ¿Imanasqataq ancha allinpuni yachachisqanchikman hina kawsakuyninchikqa? Willamuy huk ejemplota.
14 Jesusqa yachachisqanman hinam kawsakurqa. Jehová Diospa testigonkunaqa paypa ejemplonta qatikuspanchikmi allin portakuyniyoq kanchik, chayna kasqanchikta qawaspankum achka runakuna admirakunku. Qawasun huk ejemplota. Nueva Zelanda nacionmanta negocioyoq runatam suwakuna carronta kicharuspanku maletinninta qechururqaku. Runaqa policiamanmi willakurqa, policiañataq nirqa: “Maletinnikitaqa tariruwaq Jehová Diospa testigonkuna tarikuptillanmi”, nispa. Chaynapunimá pasakurqa, periodico rakiq huk paninchikmi chay maletinta tarikurqa. Tarikusqanmanta dueñon yacharuspanmi paninchikpa wasinta rirqa, paninchik qoykapuptinmi sonqon tiyaykurqa ancha valorniyoq huk documenton mana chinkarusqanmanta. Paninchikmi nirqa: “Jehová Diospa testigon kasqayraykum tarikusqaytaqa kutichipunay karqa”, nispa. Chay madrugaw policiapa nisqanta yuyarispanmi runaqa admirasqallaña qeparurqa. Sutillam kachkan Jesuspa cheqap qatiqninkuna Bibliapa nisqanman hina kawsakuspanku Yachachiqninpa ejemplonta qatikusqankuqa (Hebreos 13:18).
Runakunapaq Jesuspa imayna kasqanta qatipakusun
15, 16. ¿Imayna kayninchikta qawaspankum runakuna Diosmanta yachayta munanmanku?
15 Jesuspa imayna kasqanmi runakunata yanaparqa willakusqanta uyariyta munanankupaq. Ejemplopaq, kuyakuyninwan humilde kayninmi runakunata yanaparqa payta maskanankupaq. Runakunatam payqa llakipayarqa consuelarqataqmi llampu simiwan, wakinkunatapas hampiykurqam (leey Marcos 2:1-5). Manaña milagrokunata ruraspanchikpas atichwanmi kuyapayakuq, llakipayakuq hinaspa humilde kaytaqa, chayna kayninchikmi runakunata yanapanman Diosmanta yachanankupaq.
16 Oceano Pacífico sutiyoq lamar qochapa sur lawninpi Kiribati nacionpa huk kaq islanpi precursora especial hina serviq paninchiktam llakipayakuq kaynin yanaparqa runamasinta kuyapayananpaq. Paninchikmi Beere sutiyoq yuyaqpa wasinman chayarurqa, payñataq uyariyta mana munarqachu. Yuyaqpa parten cuerpon mana kuyusqanta qawaykuspanmi llakipayaykurqa. Paninchikmi tapurqa, “¿haykallapipas uyarirqankichu imatam Dios ruranqa onqoqkunapaqwan yuyaqkunapaq?”, nispa. Chaymantam Isaias libropa huk kaqnin capitulonpa nisqanta leepurqa (leey Isaias 35:5, 6). Admirakuspanmi yuyaq nirqa: “Achka watañam Bibliataqa leeni religionniymantapas huk kaq predicadormi watukamuwan, ichaqa manam haykapipas kaytaqa leerqanichu”, nispa. Yuyaqmi iñiyninpiwan Dioswan allin kayninpi ñawparirqa hinaspam bautizakurqa. Huk tiempopi onqochkaspanpas, kunanqa atiendechkanmi karu llaqtapi kaq wawqe-paninchikkunata hinaspapas chakiwanmi predicastin rin islapa cantonmanta cantonkama.
Jesucristota hinalla qatipakusun
17, 18. a) ¿Imatataq Diosmanta allin yachachiq kananchikpaqqa rurarananchik? b) ¿Ima suyakuytaq kachkan Diosmanta willakuyninkupi Jesusta qatipakuqkunapaq?
17 Kay experienciakuna qawasqanchikman hinaqa Jesuspa sumaq kayninkunata qatipakuspanchikqa Diosmanta allin yachachiqpunim kasunchik. Chaynaqa Yachachiwaqninchikta qatipakusun hinaspapas tukuy kallpanchikwan Diosmanta willakusunchik.
18 Punta pachak wata ukupi Jesusta qatiptinkum apostol Pedro tapurqa: “¿Imataq ñoqaykupaqqa kanqa?” nispa. Jesusñataqmi nirqa: “Pipas wasinkunata, wawqe-paninkunata otaq turi-ñañankunata, tayta-mamankunata, churi-wawankunata, chakrankunata ñoqarayku saqeqqa pachak kuti mastam chaskinqa, chaskinqataqmi wiñaypaq kawsaytapas”, nispa (Mateo. 19:27-29). Arí, wiñay kawsaytam chaskisun pimantapas allin kaq predicador Jesuscristota hinalla qatipakuspanchikqa.
¿Ima niwaqtaq?
• ¿Imaynatam Jehová Dios yachachiwanchik allin predicaq kananchikpaq?
• ¿Imanasqataq Enseña sutiyoq libroqa ancha allin kanman servicionchikpi yachachinanchikpaq?
• ¿Imaynatam ñoqanchikpas runakunapaq Jesuspa imayna kasqanta qatipakuchwan?
[Kay yachachikuypa tapukuyninkuna]
[24 kaq paginapi dibujo]
Pedrota, Andresta, Santiagota hinaspa Juanta qatiqninkuna kananpaq Jesus qayaptinqa mana iskayrayaspankum chaylla paywan pasarqaku
[26 kaq paginapi dibujo]
Enseña nisqa librom yanapawanchik allpantinpi imam kaqllata yachachinanchikpaq