¿Jehová Dios hinachu hukkunata qawanchik?

‘Cuerpopi kaqkuna munasqankuta mana rurakunankupaq, aswanqa lliw partekunamanta sapakama sientinakunankupaq.’ (1 COR. 12:25.)

1. ¿Imaynam tarikurqanki Jehová Diospa llaqtanman yaykumuspayki?

¿YUYACHKANCHIKCHU imaynam tarikurqanchik mana allin ruraq runakunamanta rakikuruspa, Diospa llaqtanwanña huñunakuyta qallaykuspa? Kusikurqanchikchá wawqe-paninchikkuna kuyakuywan hinaspa ñoqanchikpi interesakuspanku chaskiykuwaptinchik. ¡Manam chaynatachu rikunchik Satanaspa controlasqan runakunataqa, paykunaqa mana kuyakuq, mana allin ruraq hinaspa cheqnikuqmi kanku! Arí, espiritualpi sumaq kawsakuymanmi yaykururqanchik, hawkalla hinaspa huk sonqolla kawsakuyman (Isa. 48:17, 18; 60:18; 65:25).

2. a) ¿Imataq hukkunata mana allinta qawachiwanchikman? b) ¿Imatam rurananchik chayna kaptinqa?

² Chayna kaptinpas, tiempopa pasasqanman hinaqa ichapas iñiqmasinchikkunata mana allintaña qawayta qallaykunchik. Yaqapaschá pantaq kasqanchikrayku pantasqankuta hatunyachinchik hinaspa allin rurasqankunataqa manapas qawanchikchu. Ichapas manaña Jehová Dios hinachu  qawachkanchik. Haykapipas chayna pasawaptinchikqa, kallpanchakusun Jehová Dios hina paykunata qawanapaq (Exo. 33:13).

¿Imaynatam Jehová Dios qawan iñiqmasinchikkunata?

3. Bibliapi, ¿imawanmi tupachin congregacionpi kaqkunata?

³ Apostol Pablom hanaq pachaman riqkunamanta rimaspan 1 Corintios 12:2-26 nisqanpi tupachin “achka parteyoq” cuerpoman. Imaynam cuerpopas achka parteyoq, chaynam congregacionpi kaqkunapas manam chaynallachu kanku imayna kayninkupi hinaspa imayna rurasqankupipas. Jehová Diosmi ichaqa llapallanchikta chaskiwanchik. Payqa congregacionpi kaqkunatam llapallanta kuyan hinaspa chaninchanpas. Chaymi apostol Pablo niwanchik ‘sapakama sientinakunapaq’. Wakinpiqa sasam kay nisqanman hina rurayqa, astawanraqmi hukkunapa imayna kasqanku ñoqanchikpawan mana tupaptinqa.

4. ¿Imanasqam iñiqmasinchikkunata imayna qawasqanchikta ichapas cambiananchik?

⁴ Yachasqanchikman hinaqa, ichapas iñiqmasinchikkunapa pantasqallanta qawaq kanchik. Kay ruraytam tupachichwan sumaqllaña wasipa perqanpi uchuychalla qachachasqa kaqkunallata qawayman. Jehová Diosqa wawqe-paninchikkunapiqa lliwtam qawan, aswanqa sumaq kayninkunatam manam pantasqallankutachu. Chaynaqa, Jehová Diosta qatipakunapaqyá kallpanchakusun, chaynatam yanapasunchik iñiqmasinchikkuna kuyanakuspa huñulla kanankupaq (Efe. 4:1-3; 5:1, 2).

5. ¿Imanasqataq mana allinchu hukkunata juzgayqa?

⁵ Jesusqa yacharqam pantaq kaspanchik hukkunamanta mana allin rimaq kasqanchikta. Chaymi nirqa: “Runamasikichik juzgaytaqa saqeychikyá chaynapi Dios mana juzgasunaykichikpaq”, nispa (Mat. 7:1, NM). Qawasunchik, Jesusqa manam nirqachu “ama juzgaychikchu” nispaqa, aswanmi nirqa “juzgaytaqa saqeychikyá” nispa. Payqa yacharqam uyariqninkuna hukkunamanta mana allin rimaq runakuna kasqankuta. ¿Ñoqanchikpas chaynachu kanchik? Chayna kaptinqa, kallpanchakusun cambiananchikpaq, chaynapi mana juzgasqa kanapaq. ¿Pitaq kanchik Jehová Diospa nombrasqan serviqninta juzgananchikpaqqa, otaq congregacionpiqa manam kananchu ninanchikpaqqa? Ichapas huk iñiqmasinchik imapipas pantaq kanman, chayna kaptinpas Jehová Dios hinalla chaskiptinqa, ¿imanasqataq ñoqanchikqa mana chaskichwanchu? (Juan 6:44.) ¿Manachu iñinchik Jehová Dios llaqtanta pusasqanpi, hinaspa imapas allichana kaptinqa tiempollanpi allichananta? (Leey Romanos 14:1-4.)

6. ¿Imatam Jehová Dios qawan serviqninkunapi?

⁶ Bibliapa nisqanman hina kunankama imakunapi cambiasqanchiktam Jehová Diosqa allinta yachan. Chaymantapas, qawaytam atin hamuq tiempopi otaq mosoq allpapi manaña pantaq runa kaspa imakuna ruray atisqanchikmanta. Chaymi Jehová Diosqa manam pantaq kasqallanchiktachu qawan. Salmo 103:12 nisqanpi hinam mana kasukusqanchiktaqa, ‘intipa qespimunanmanta intipa seqaykunankama’ hina karuncharun. ¡Mayna agradecesqam chayrayku kachkanchik! (Sal. 130:3.)

7. ¿Imatam yachanchik Davidta Jehová Dios imayna qawasqanmanta?

⁷ Bibliaqa sutillatam qawachiwanchik imaynam Jehová Diosqa runapa allin kayninkunallata  qawasqanta. Ejemplopaq, qawasun Davidmanta ima nisqanta: ‘Serviqniy Davidqa [. . .] kamachisqaykunatam kasukurqa, Davidqa tukuy sonqonwanmi munasqayman hina kawsarqa’, nispa (1 Rey. 14:8). Yachasqanchikman hinam Davidqa achka huchakunata rurarurqa. Jehová Diosmi ichaqa allin sonqoyoq kasqanta hinaspa sumaq kayninkunallata astawan qawarqa (1 Cro. 29:17).

Jehová Dios hina qawasunchik iñiqmasinchikkunata

8, 9. a) ¿Imapim Jehová Diosta qatipakuchwan? b) ¿Ima rikchanachiytam churachwan, hinaspa imatam yachachiwanchik?

⁸ Jehová Diosqa yachanmi runapa sonqonpi ima kasqanta, ñoqanchikmi ichaqa mana atinchikchu. Chayraykum runamasinchiktaqa mana juzgananchikchu. Manamá yachanchikchu hukkunapa imanasqa chayna rurasqankutaqa. Hinaptinqa, kallpanchakunanchikmi Jehová Diosta qatipakunapaq hinaspa runamasinchikpa pantasqankunallata mana qawanapaq, chayna kasqankuqa tiempo pasasqanman hinam chinkanqa. ¿Manachu allin kanman Jehová Dios hina qawayninchik? Chaynatam yanapasunchik iñiqmasinchikkuna hawkalla kawsanankupaq (Efe. 4:23, 24).

⁹ Huk rikchanachiyta churasun. Piensasunchik mawkaman rikchakuq wasipi: para yakuta chaskiq canaletapas wichiruchkanmanña, ventanankunapas pakisqa kachkanman hinaspa wasi ukuman yakupas sutukamunman. Yaqa lliw runakunam qawanku wasipa mana allin kasqallanta hinaspam piensanku tuñirachinallapaqña kasqanta. Ichaqa huk runa chayaramuspanmi mana chaynatachu wasimanta piensan. Payqa manam hawallantachu qawan, aswanmi cuentata qokun perqankuna sumaq rurasqa kasqanta hinaspa allicharunapaq allin kasqantapas. Rantiruspanmi anchata kallpanchakuspan lliwta sumaqta allicharun. Hinaptinmi runakunaqa wasipa punkun ñanta pasaspanku sumaqllaña kasqanmanta rimanku. ¿Atichwanchu wasita allicharunanpaq kallpanchakuq runa hina kayta? Wawqe-paninchikkunapa pantasqankunata qawanamantaqa, ¿manachu sumaq kayninkunata chaynataq espiritualpi astawan ruray atisqankutapas qawachwan? Chaynata ruraspam Jehová Dios hina astawan kuyasun sumaq kayninkunarayku (leey Hebreos 6:10).

10. ¿Imaynatam yanapawanchik Filipenses 2:3, 4, nisqan?

¹⁰ Apostol Pablom Filipos llaqtapi cristianokuna llapallanku hawkalla kawsakunankupaq consejota qorqa. Paymi nirqa: “Amayá envidiakuspaqa nitaq altotukuspaqa imatapas ruraychikchu, aswanqa humillakuspayá kikikichikmantapas aswan allinpaqraq wakinkunata hapiychik. Amayá kikillaykichikpaqchu allintaqa munaychik aswanqa wakinkunapaqwanyá”, nispa (Fili. 2:3, 4). Humilde kaymi yanapawanchik wawqe-paninchikkunata allinta qawanapaq. Sichu paykunapi interesakusun hinaspa allin rurayninkunata qawasun, hinaptinqa manam sasachu kanqa Jehová Diospa qawasqanman hina qawayninchikqa.

11. ¿Imam pasachkan achka congregacionkunapi?

¹¹ Kay tukupay tiempopi tukuy imaymanakuna pasasqanwanmi, achka runakuna huklaw nacionkunaman pasakunku. Chayraykum wakin llaqtakunapi kanku huklaw nacionniyoq runakuna. Paykunamanta wakinqa Diosmanta cheqapta yacharuspankum, ñoqanchikwan kuskaña Jehová Diosta servichkanku. Paykunaqa ‘llapallan nacionkunamanta, ayllukunamanta, castakunamanta hinaspa tukuy rikchaq rimayniyoqkunam’ kanku (Apo. 7:9). Chaynapim achka congregacionkunapi kachkanku achka nacionniyoq runakuna.

12. ¿Imaynatam qawananchik llapallan wawqe-paninchikkunata, hinaspa imataq chayna kanapaq wakinpiqa sasachawanchik?

¹² Achka llaqtakunamanta kasqankuraykum, ichapas astawan kallpanchakunanchik llapallan wawqe-paninchikkunata allinta qawananchikpaq. Ama qonqasunchu, apostol Pedrom kallpanchawanchik tukuy sonqonchikmanta hinaspa ‘cheqaptapuni wawqe-paninchikkunawan kuyanakunanchikpaq’ (1 Ped. 1:22). Ichaqa sasam kanman huk nacionniyoq kasqankurayku sonqomanta kuyakuq kasqanchikta qawachiyqa, ichapas mana chaynallachu kanchik costumbrenchikpi, imayna kasqanchikpi, estudiasqanchikpi hinaspa qollqepipas. ¿Imayna piensasqankuta hinaspa rurasqankuta entiendenanchikpaq sasachakunchikchu? Paykunapas yaqapaschá ñoqanchik hina tarikunku. Imayna kaptinpas, llapanchiktam Jehová Dios kaynata kamachiwanchik:  “Kuyaychik iñiqmasikichikkunata”, nispa (1 Ped. 2:17).

13. ¿Imanasqataq ichapas cambiananchik imayna piensasqanchikta?

¹³ Ichapas imayna piensasqanchikta cambiananchik, chaynapi ‘sonqonchikta kicharispa’ llapallan wawqe-paninchikkunata kuyanapaq (leey 2 Corintios 6:12, 13). Wakinkunam ninku: “Manam paykunataqa mana allintachu qawani, ichaqa...”, hinaspañataqmi rimayta qallaykunku kay llaqtamanta kaqkunaqa kaynam kanku nispa. ¿Haykapillapas chayna pasawarqanchikchu? Chayna kaspaqa qawachisunmi hukkunata mana allin qawasqanchik sonqonchikpi hinallaraq kasqanta. Allinmi kanman kayna tapukuyninchik: “¿Kallpanchakunichu huklawmanta kaqkunata astawan reqsinaypaq?”. Chaynata tapukuspaqa, manapaschá sasachakusunchu sapaq costumbreyoq wawqe-panikunata allinta qawanapaq hinaspa kuyanapaqpas.

14, 15. a) ¿Pikunam cambiarurqaku hukkunata imayna qawasqankuta? b) ¿Imaynatam paykunapa ejemplonta qatikuchwan?

¹⁴ Bibliapim tarinchik achka ejemplokunata runakuna imayna piensasqankuta cambiasqankumanta. Rimasun apostol Pedromanta. Judio kaspanmi kikillanmantaqa mana yaykunmanchu karqa huk nacionniyoq runapa wasinmanqa. Piensarisunchik, imaynatachá sientekurqa huk nacionniyoq hinaspa mana señalasqa Cornelio sutiyoq runapa wasinta watukunanpaq kamachisqa kaspanqa. Ichaqa imayna piensasqantam cambiarurqa, lliw nacionpi runakuna cristiano kanankupaq Diospa munaynin kasqanta yacharuspan (Hech. 10:9-35). Apostol Pablopas cambiarqataqmi imayna piensasqanta hinaspa hukkunata mana allin qawasqantapas. Paymi reqsikurqa manaraq cristiano kachkaspan ‘Diosman iñiqkunata imayna ñakarichisqanta’. Ichaqa Señorninchik Jesucristo pantay ñanmanta horqoruptinmi, chaylla cambiarurqa hinaspam ñawpapi ñakarichisqankunapa yachachisqantapas kasukurqa (Gal. 1:13-20).

¹⁵ Jehová Diospa espiritunpa yanapayninwanqa, atinchikmanmi imayna kasqanchikta cambiaytaqa. Hinaptinqa, hukkunamanta mana allinta piensaqraq kaspanchikqa kallpanchakusunyá chayna kasqanchikta saqenapaq, chaynapi ‘chuya espiritupa yanapakuyninwan chulla sonqolla kaspa tukuy tiempopi hawkalla kawsananchikpaq’ (Efe. 4:3-6). Bibliam kallpanchawanchik kaynata: “Kuyanakuychikyá, kuyanakuyllam tukuy imatapas sumaqtaqa allinyanachin” nispa (Col. 3:14).

Jehová Diosta qatipakusun predicasqanchikpi

16. ¿Imatam Jehová Dios munan runakunapaq?

¹⁶ Apostol Pablom kaynata qellqarqa: ‘Diosqa manam pimanpas sayapakunmanchu’ nispa (Rom. 2:11). Jehová Diosqa munanmi llapallan nacionpi runakuna yupaychanankuta (leey 1 Timoteo 2:3, 4). Chaymi “wiñaypaq kaq allin noticiata  [. . .] llapallan nacionkunaman, ayllukunaman, tukuy rikchaq rimayniyoqkunaman hinaspa llapallan runakunaman” willasqa kananpaq kamachirqa (Apo. 14:6). Chaymantapas Jesusmi nirqa: “Chakraqa kay pacham”, nispa (Mat. 13:38). Hinaptinqa, ¿imatam ruranayki qampas hinaspa aylluykipas?

17. ¿Imaynatam yanapachwan tukuy rikchaq runakunata?

¹⁷ Manam llapallanchikchu predicanapaq huklaw nacionkunamanqa riyta atichwan. Ichaqa atichwanpaschá yachasqanchik lawpi huk nacionniyoq runakunam predicaytaqa. Sapa kuti predicasqanchik runakunallaman predicanamantaqa, ¿listochu kachkanchik tukuy rikchaq runakunaman predicanapaq? ¿Imanasqataq mana kallpanchakunchikchu predicasqanchikta manaraq uyariqkunaman predicanapaq? (Rom. 15:20, 21.)

18. ¿Imaynatam Jesus qawachirqa runakunapi interesakusqanta?

¹⁸ Jesusqa anchatam munarqa lliw runakunaman predicaytaqa, chaymi huk llaqtallapiqa mana predicarqachu. Bibliapa nisqanman hinam ‘Jesusqa purirqa llapallan llaqtakunapi hinaspa llaqtachakunapipas’. “Runakunata qawaykuspanmi llakipayarikurqa” hinaspam qatiqninkunata nirqa paykunata yanapanankupaq (Mat. 9:35-37).

19, 20. ¿Imaynatam qawachichwan tukuy rikchaq runakunapi Jehová Dios hinaspa Jesucristo interesakusqankuta?

¹⁹ ¿Imaynatataq ñoqanchikpas Jesus hina interesakunchikman? Wakin iñiqmasinchikkunam kallpanchakunku predicananku lawpi mana ancha predicasqa sitiokunapi predicanankupaq, negociokunapa kasqanpi, parquekunapi, carrokunapa sayananpi hinaspa achka runakunapa yachanan mana yaykuy atina wasikunapa punkunpipas. Wakinñataqmi mana yachasqanku rimaykunatapas yacharunku, predicasqanku lawman huk rimayniyoq runakuna hamuruptinku otaq manaraq sapa kuti predicasqanchikta uyariqkunamanpas predicanankupaq. Chay runakunata saludanallapaqpas rimasqankuta yachaymi qawachinqa paykunapi anchata interesakusqanchikta. Arí, manam llapallanchikchu huk rimaytaqa yacharuchwan, ichaqa ¿atichwanchu kallpanchayta huk rimayta yachanankupaq kallpanchakuq wawqe-paninchikkunata? Ichaqa manam haykapipas hukmanyachinachu nitaq mana allintaqa rimanachu huklawmanta kaqkunata imanasqa predicasqankumantaqa. Jehová Diosqa chaninchanmi lliw runakunapa vidantaqa, chaynallataqmi ñoqanchikpas chaninchananchik (Col. 3:10, 11).

²⁰ Chaymantapas, runakunata Jehová Dios hina qawaspaqa, predicasunmi imayna vidayoq kaptinpas otaq imayna tarikuptinpas. Manachá predicaytaqa saqesunchu runakuna mana wasiyoq, mana allin pachasqa otaq huchapakuyllapi purisqanwan reqsisqa kaptinkupas. Pipas mana allinta rurawaptinchikqa, manachá piensasunchu nacionninpi kaqkuna llapallanku pay hina kasqankuta. Apostol Pablotapas wakin runakunaqa maqarurqakum, chaywanpas chay runakunapa llaqtamasinkunamanqa predicarqam (Hech. 14:5-7, 19-22). Payqa munarqam chay llaqtapi wakin runakuna predicasqanta kasukunankuta.

21. ¿Imaynatam yanapasunki Jehová Diospa qawasqanman hina hukkunata qawasqayki?

²¹ Hinaptinqa, Jehová Dios hinam qawananchik llapallan wawqe-paninchikkunata llaqtamasinchik otaq huklawmanta kaptinkupas. Chayna kanapaq Jehová Diosta astawan qatipakuspaqa, astawanmi yanapasun congregacion hawkalla hinaspa huñulla kananpaq. Chaynatam predicasqanchik lawpi runakunatapas qawananchik. Chaynapim astawan yanapayta atisunchik ‘mana sayapakuq’ Jehová Diosta kuyanankupaq. Payqa lliw runakunapim interesakun, ‘paypa unanchasqanmi kachkan apupas-wakchapas’ (Job 34:19).

¿Imatam kutichiwaq?

• ¿Ima mana allinkunatam iñiqmasinchikmanta piensayta qallaykuchwan?

• ¿Imaynatam Jehová Dios hina qawachwan iñiqmasinchikkunata?

• ¿Imatam yacharunki huk nacionmanta kaq wawqe-paninchikkunata imayna qawanamanta?

• ¿Imaynatam predicasqanchik lawpi runakunata qawachwan Jehová Dios hina?

[Kay yachachikuypa tapukuyninkuna]

[26 kaq paginapi dibujo]

¿Imaynatam astawan reqsichwan huk llaqtayoq runakunata?

[28 kaq paginapi dibujokuna]

¿Imatam rurachwan achka runakunaman predicanapaq?