Jehová Diosqa uyarinmi mañakusqanchikta

“Tayta Diosqa cuidaykuchkanmi allin ruraq runata. Tayta Diosqa uyarintaqmi mañakusqankunata.” (SAL. 34:15.)

1, 2. a) ¿Imaynam kunan tiempopi runakuna tarikunku? b) ¿Imanasqataq mana admirakunchikchu kay tiempopi tukuy imakunapa pasasqanwan?

¿IMA llakipipas tarikuchkankichu? Chayna kaptinqa, manam qamllachu chayna tarikunki. Waranqantin runakunam sapa punchaw llumpay sasachakuykunapi tarikunku kay mana allin runakunapa kasqanpi. Wakinkunapa ñakarisqankuqa mana aguantanapaq hinam. David hinam tarikunku, paymi qellqarqa: ‘Ñoqapaqqa tukuy cuerpoymi kapullawachkan susunkasqaña. Ñoqapaqqa tukuy cuerpoymi kapullawachkan ñutupasqaña. Sonqollaypas hukmanyaptinmi hikikyachkani anchallataña. Ñoqapaqqa sonqollaypas apurawllamanñam patpatyachkan. Ñoqapaqqa kallpallaypas pasaypaqtañam chinkarichkan. Ñoqapaqqa ñawillaypas tutayasqañam kapuwachkan’, nispa (Sal. 38:8, 10).

² Cristianokunataqa manam admirachiwanchikchu kunan tiempopi llumpay sasachakuykuna kasqanqa, yachanchikmi Bibliapa willakusqanman hina, señorninchik Jesucristo kamachiyta qallaykuptin ‘ñakariykunapas qallarinanmanta’ (Mar. 13:8; Mat. 24:3). Griego rimaypi kay textopi ‘ñakariymanta’ rimaspanqa, nichkanmi warmi wachakuspan llumpay nanay pasasqanmanta. Kayna nisqanmi allintapuni qawachin llumpa-llumpay ñakariyllapiña kay “sasallaña” tiempokunapi runakuna kasqankuta (2 Tim. 3:1).

Jehová Diosqa entiendenmi ñakarisqanchikta

3. ¿Imatam allinta yachanku Jehová Diosta serviqkuna?

³ Jehová Diosta serviqkunaqa allintam yachanchik sasachakuykunapi tarikunanchikta hinaspa aswan yapakunantapas. Lliw runakuna hina ñakarisqanchikmantapas, kachkantaqmi ‘enemigonchik Diablopas’, paymi iñiyninchikta chinkarachiyta munachkan (1 Ped. 5:8). Ñoqanchikpas David hinam kaynata nichwan: “Insultawaptinkum sonqollaypas nanay-nanayña kachkan. Chaynapim cuerpollaypas mana kallpayoqña kachkan. Consuelota munallaptiypas manamya pipas llakipayawarqachu”, nispa (Sal. 69:20).

4. ¿Imataq consuelawasunchik llakikuypi tarikuptinchik?

⁴ David kayna nisqanwanqa, ¿mana ima suyakuyniyoq kasqantachu nichkarqa? Manamá. Qawasunchik imatawanmi nirqa: “Tayta Diosqa uyarinmi wakcha runakunatapas. Manam desprecianchu preso runankunatapas”, nispa (Sal. 69:33). Wakinpiqa ichapas presochasqa hina tarikuchwan llakikuyninchikkunawan. Ichapas piensanchik ñakarisqanchikta hukkuna mana entiendesqankuta. Davidta hinam consuelawasunchik llakikuyninchikkunata Jehová Dios allintapuni entiendesqanta yachasqanchik (Sal. 34:15).

5. ¿Imamantam rey Salomon seguro karqa?

⁵ Davidpa churin Salomonmi allinta qawachirqa Jehová Dios entiendewasqanchikta, Jerusalenpi templota rurayta tukuruspan mañakusqanpi (leey 2 Cronicas 6:29-31). Jehová Diostam ruegakurqa, runakuna llakikusqankumanta mañakuptinku uyariykunanpaq. ¿Uyarinmanchu karqa Jehová Dios chaykunamanta mañakuptinku? Salomonqa segurom karqa, ñakariqkunapa mañakusqankuta Dios uyarinanta hinaspa kutichinantapas. ¿Imanasqa? Jehová Dios ‘llapallan runakunapa sonqonta’ allintapuni reqsisqanrayku.

6. ¿Imaynatam sasachakuykunata atipachwan, hinaspa imanasqa?

⁶ Chaynallataqmi ñoqanchikpas, Jehová Diosman oracionpi asuykuchwan sasachakuyninchikkunata chaynataq imapas llakinchikkunata willakunanchikpaq. Entiendewasqanchikmanta hinaspa ñoqanchikmanta nanachikusqanta yachasqanchikmi kallpanchawanchik. Apostol  Pedrom chayna kasqanta qawachirqa kayna qellqasqanpi: “Tukuy afannikichiktaqa Diosmanyá qoychik, paymi qamkunamanta nanachikuqqa”, nispa (1 Ped. 5:7). Arí, Jehová Diosqa interesakunmi imapas pasawaptinchikqa. Señorninchik Jesucristopas qawachirqam kuyakuywan Taytan cuidawasqanchikta, kaynata nispan: “¿Manachum iskay pichinchurruchakunatapas rantikunku as qoIlqeIlapaq? Chaywanpas manam mayqanpas wañunmanchu Dios Taytaykichik mana munaptinqa. Qamkunapaqa chukchaykichikpas IIapaIlanmi yupasqa kachkan. Chaynaqa amayá manchakuychikchu, qamkunaqa pichinchurruchakunamantapas aswan valeqmi kankichik”, nispa (Mat. 10:29-31).

Jehová Diosqa yanapawasunmi

7. ¿Ima yanapakuytam tarichwan sasachakuy kaptin?

⁷ Segurom kananchik ima sasachakuypiña tarikuptinchikpas, Jehová Diosqa munanmi hinaspa atiyniyoqmi yanapawananchikpaq. Diosmi amparawaqninchik, kallpanchawaqninchik hinaspa sasachakuykunapi chaylla yanapawaqninchikpas (Sal. 34:15-18; 46:1). ¿Imaynatam yanapawanchik? Qawasunchik 1 Corintios 10:13 nisqanta: “Diosmi confiakuna kasqanrayku mana munanqachu mana aguantay atinaykichikkama tentasqa kanaykichiktaqa. Tentacionkuna hamuptinqa Diosmi vencenaykichikpaq kaqta qosunkichik chaynapi aguantanaykichikpaq”, nispa. Ichapas Jehová Diosqa chay sasachakuyta chinkarachinanpaq tantearunman. Otaq kallpata qowasun aguantanapaq. Imayna kaptinpas, payqa yanapawasunmi.

8. ¿Imatam rurananchik Jehová Dios yanapawananchikpaq?

⁸ ¿Imatam rurananchik Diospa yanapakuyninta tarinapaq? Ama qonqasunchu, apostol Pedrom niwanchik ‘tukuy afanninchikta Diosman qonanchikpaq’. Paymanmi sasachakuyninchiktaqa saqeykunanchik, otaq mana llumpayta preocupakuspam Diosninchik yanapawananchikta pacienciawan suyananchik (Mat. 6:25-32). Chaymantapas Diospim confiananchik, manam kallpallanchikpichu nitaq piensasqallanchikpichu. Chaypaqqa humildem kananchik. ‘Diospa atiyniyoq makinman humillakuspam’, yachanchik paylla ancha atiyniyoq kasqanta (leey 1 Pedro 5:6). Kayqa yanapawasuntaqmi ima pasawananchikta Dios saqeptin aguantananchikpaq. Sasachakuyninchikkuna chaylla allichakurunanta munaspapas, Jehová Diospim confianchik haykapi hinaspa imayna yanapawananchikmanta (Sal. 54:7; Isa. 41:10).

9. ¿Imawan llakisqa kasqantam David willarqa Jehová Diosman?

⁹ Piensarisun Salmo 55:22 nisqanman hina Davidpa qellqasqanpi: “Tayta Diosmanyá qoykuy preocupasqa kasqaykitaqa. Payñam cuentallikunqa qanmantaqa. Allin runataqa manam wiñaypaqchu saqenqa urmasqataqa”. Davidmi kaynata qellqarqa llumpay sasachakuypi tarikuchkaspan (Sal. 55:4). Ichapas kaynata qellqarqa Absalon sutiyoq churin paypa contranpi hatariruptin hinaspa rey kananpi churakuruptin. Chaynataq Ahitofel sutiyoq consejaqninpas contranpi churakuruptin. Mana wañuchisqa kananpaqmi Davidqa Jerusalenmanta lluptirqa (2 Sam. 15:12-14). Kayna sasachakuypi kachkaspanpas Davidqa Jehová Diospim hinalla confiarqa, hinaspa confiasqanqa manam yanqapaqchu karqa.

10. ¿Imatam rurananchik sasachakuykunapi tarikuspanchik?

¹⁰ David hinam ñoqanchikpas Jehová Diosta mañakunanchik llakichiwaqninchik sasachakuymanta willananchikpaq. Apostol Pablopa niwasqanchikta qawasunchik (leey Filipenses 4:6, 7).  ¿Imatam chaskisun tukuy sonqonchikwan Jehová Diosta mañakuspanchik? ‘Diosninchikmi hawkayachiwasun runakunapa mana entiendey atinan hawkayaywan. Chaynapim imamantapas mana preocupakusunchu nitaq llakikusunchu Jesucristowan huklla kasqanchikrayku.’

11. ¿Imaynatam ‘Diosninchikpa hawkayay’ qowasqanchik yuyayninchiktawan sonqonchikta waqaychan?

¹¹ ¿Imayna tarikusqanchik cambianqachu mañakuptinchik? Cambianmanpaschá, ichaqa entiendenanchikmi wakinpiqa manam munasqanchikman hinachu Jehová Diosqa ruranqa. Chaywanpas, Diosta mañakusqanchikmi yanapawasun mana llumpay llakikuyman wichiykunanchikpaq. ‘Diosninchikpa hawkayay’ qowasqanchikmi hawkallata tarichiwasun hinaspa llakikuykuna kaptinpas yuyayninchiktawan sonqonchikta waqaychanqa, imaynam huk llaqtaman mana pipas yaykunanpaq waqaychaq soldadokuna hina. Chay hawkayaymi manchakuyninchikta, hukmanyasqanchikta hinaspa mana allin piensasqanchiktapas atipanapaq yanapawasun, chaymantapas harkawasunmi imatapas mana allinta piensaspa chaylla rurarunamanta (Sal. 145:18).

12. Huk ejemplota churaspa rimariy imayna hawkayay tarinamanta.

¹² ¿Atinchikmanchu hawkalla kayta sasachakuykuna kaptin? Qawasunchik huk ejemplota. Huk runam llamkanman llumpay qaqchakuq capataspa controlasqan. Huk kutipim kay llamkaq runaqa capatasnin mana allin runa kasqanmanta patronninwan riman, payqa llampu sonqo hinaspa allin piensaq runam. Chaymi patronqa imayna sientekusqanta entiendespan willan, pisi tiempollamantaña chay capatasta horqonanmanta. ¿Imaynam tarikunqa? Patronnin payta entiendesqanta hinaspa sasachakuynin tukunanta yachaspanmi, hinalla llamkananpaq tantearun pisi tiempollaña aguantanan kaptinpas. Ñoqanchikpas yachanchikmi imapas pasawasqanchikta Jehová Dios entiendesqanta. Niwanchiktaqmi “kay pachapi kamachikuq diablopas” qarqosqa kananmanta (Juan 12:31). ¡Mayna kallpanchasqam chayrayku tarikunchik!

13. Oracionpi mañakuspapas, ¿imatawanmi rurananchik?

¹³ ¿Kaywanqa nichkanchikchu Jehová Diosman sasachakuyninchikta willayllam allin nispachu? Manam. Orakuspaqa, mañakusqanchikman hinam imatapas rurana. Davidta wañuchinankupaq rey Saul runankunata kamachiptinmi, Davidqa kaynata mañakurqa: “Diosnilláy, ñoqapa enemigoykunamantayá libraykullaway. Diosnilláy, contraypi hatariqkunamantayá defiendeykullaway. Mana allin ruraqkunamantayá libraykullaway. Runa wañuchiqkunamantayá salvaykullaway”, nispa (Sal. 59:1, 2). Davidqa orakusqanmantapas, señoranpa nisqanta uyarispanmi lluptikurqa (1 Sam. 19:11, 12). Ñoqanchikpas yachaytam mañakuchwan sasachakuyninchikta imayna atipanapaq hinaspa allinyananpaqpas (Sant. 1:5).

¿Imaynatam kallpata tarichwan aguantanapaq?

14. ¿Imataq yanapawasun sasachakuykuna kaptin aguantanapaq?

¹⁴ Ichapas sasachakuyninchikkunaqa mana chayllachu tukurunqa, hinaspa unay tiemporaqpas kanman. Chayna kaptinqa, ¿imataq yanapawasun aguantanapaq? Punta kaq yanapakuy: yuyarinanchikmi sasachakuykuna kaptinpas Jehová Diosta servispaqa ancha kuyasqanchiktam qawachichkanchik (Hech. 14:22). Ama qonqasunchu Jehová Diospa qayllanpim Satanas acusarqa Jobta kaynata nispan: “Ari, Jobqariki adorasuchkanki manam debaldellachu. Qamqariki qenchawan hina muyuruspam waqaychachkanki paytaqa chaynataq familiankunatapas hinaspa tukuy ima kapuqninkunatapas. Llamkayninpipas bendeciykuptikim paypaqa animalninkunapas chaylawpiqa llumpa-llumpayta mirarun. Aswanqa paypa llapa kapuqninta purmarachiptikiqa uyaykipipunim ñakasunki”, nispa (Job 1:9-11).  Jobmi ichaqa Diosman hapipakuspa kasukurqa, chaynatam qawachirqa Satanaspa acusasqan yanqa kasqanta. Ñoqanchikpas sasachakuykunata aguantaspaqa, qawachisuntaqmi Satanas llullallaña kasqanta. Chaynallataqmi aguantaptinchikqa, allintam kallpanchakun Jehová Diospi confianzanchik hinaspa suyakuyninchikpas (Sant. 1:4).

15. ¿Pikunapa ejemplonmi kallpanchawanchikman?

¹⁵ Iskay kaq yanapakuy: yuyarinanchikmi ‘kay pachapi iñiqmasinchikkunapas chaynallatam ñakarichkanku’ (1 Ped. 5:9). Arí, ‘tentasqa kasqanchikqa manam maschu wakinkunapa tentasqa kasqankumantaqa’ (1 Cor. 10:13). Chaymi sasachakuyninchikpi llumpayta piensanamantaqa, wawqe-paninchikunapa ejemplonpi yuyaymanasun. Chaynatam valortawan kallpata tarisunchik (1 Tes. 1:5-7; Heb. 12:1). ¿Reqsinchikchu pitapas imakunawanpas ñakarispa Diosta kasukuspa aguantaqta? Piensarisun imakunatam ejemplonmanta yachachwan. ¿Maskarqanchikchu Bibliamanta qellqanchikkunapi ñoqanchik hina sasachakuyniyoq iñiqmasinchikkunapa vidanmanta? Chaykunata leeyninchikmi allinta kallpanchawasun.

16. ¿Imaynatam Diosninchik kallpanchawanchik ñakariykunapi tarikuptinchik?

¹⁶ Kimsa kaq yanapakuy: yuyarinanchikmi Jehová Diosqa “llakipayakuq Taytam hinaspa sinchi kallpanchaqninchik Diosmi. Paymi kallpanchawanchik tukuy sasachakuyninchikpi chaynapi ñoqanchikpas sasachakuypi kaqkunata Diospa kallpanchawasqanchikman hina kallpanchananchikpaq” (2 Cor. 1:3, 4). Arí, Jehová Diosqa ñoqanchikwanmi kachkan kallpanchawananchikpaq, manam kunan sasachakuyllanchikpichu aswanqa ‘tukuy sasachakuyninchikpipas’. Kaymi yanapawanchik ima ‘sasachakuypi kaqkunatapas’ kallpanchanapaq. Kay rimaykunata qellqaq apostol Pablom chaykunata pasasqanrayku allintapuni kaymanta yacharqa (2 Cor. 4:8, 9; 11:23-27).

17. ¿Imaynatam Biblia yanapawanchikman sasachakuykunata aguantanapaq?

¹⁷ Tawa kaq yanapakuy: Bibliam kapuwanchik, kayqa “allinmi yachachiwananchikpaq, faltanchikkuna qawachiwananchikpaq, pantaypi puriptinchikpas allin ñanman kutirichiwananchikpaq hinaspa imaynam allin kawsakuy yachachiwananchikpaq chaynapi Diospa runankunaqa yachayniyoq kaspa tukuy allinkunata rurananchikpaq” (2 Tim. 3:16, 17). Bibliam cristianokunataqa yanapawanchik vidanchikpi sasachakuykunata allichanapaq, manam ‘allinkunata ruranallapaqchu’, aswanqa “yachayniyoq kaspa tukuy allinkunata rurananchikpaq”. “Tukuy allinkunata rurananchikpaq” niq palabrakunaqa griego rimaypiqa: “tukuy imayoq” otaq “preparasqa hinaspa listollaña” ninanmi. Ñawpaq tiempopiqa chay palabrataqa servichikuqkum, illananpaq tukuy imayoq buquemanta rimaspa otaq ima llamkay rurananpaq listollaña tarikuq maquinamanta rimaspapas. Chaynallataqmi Jehová Diospas Palabrantakama yanapakuykunata qowanchik lliw sasachakuyninchikta atipanapaq. Chaymi ninchikman: “Sichu Dios saqen sasachakuykuna pasanayta, hinaptinqa paypa yanapayninwanqa aguantasaqmi”, nispa.

Llapallan llakinchikmanta librakuyninchik

18. ¿Imapim piensananchik sasachakuykunata aguantanapaq?

¹⁸ Pichqa yanapakuyñataqmi kay: manam haykapipas qonqananchikchu Jehová Dios chaylla runakunapa llapallan ñakariyninta chinkachinanmanta (Sal. 34:19; 37:9-11; 2 Ped. 2:9). Manam kunan tiempopi ñakarisqallanchiktachu chinkachinqa, aswanqa wiñay kawsaytam qowasunchik, ungidokunaman hanaq pachapi hinaspa ñoqanchikmanpas kay Pacha paraiso kaptin.

19. ¿Imatam rurananchik tukuy sonqonchikmanta aguantanapaq?

¹⁹ ¡Maynatamá munanchik kay pachapi lliw ñakariykuna chinkarunanpaq punchaw chayamunantaqa! (Sal. 55:6-8.) Chayamunankamaqa hinallam aguantananchik. Tukuy sonqonchikmantayá aguantasunchik, chaynapim qawachisun Satanas llulla kasqanta. Tukuy tiempoyá mañakusunchik hinaspa yuyaymanasun ñoqanchik hina sasachakuypi tarikuq wawqe-paninchikkunapi, chaynatam aguantanapaq kallpata tarisun. Bibliatayá estudiasun chaynapi yachayniyoq kaspa tukuy allinkunata rurananchikpaq. Tukuy tiempopiyá confiasun ‘sinchi kallpanchaqninchik Diospi’, payqa kuyakuywanmi waqaychawanchik. Chaynaqa yuyarisunyá: ‘Tayta Diosqa cuidachkanmi allin ruraq runataqa. Tayta Diosqa uyarintaqmi mañakusqankutapas’ (Sal. 34:15).

¿Imatam niwaq?

• ¿Imaynam David sientekurqa sasachakuykunapi tarikuspan?

• ¿Imamantam rey Salomonqa seguro karqa?

• Ima sasachakuytapas Jehová Dios saqeptin, ¿imataq yanapawasun aguantanapaq?

[Kay yachachikuypa tapukuyninkuna]

[18 kaq paginapi dibujo]

Ñakariq serviqninkunata Jehová Dios yanapananmantam Salomonqa seguro karqa