Marcos libropi allin yachachikuykunamanta
Jehová Diospa Palabranqa kawsachkanmi
Marcos libropi allin yachachikuykunamanta
JESUSPA vidanmanta willakuq tawan librokunamantaqa Marcos sutiyoq librom pisi rimayllapi qellqasqa karqa. Cristo wañukuspan kawsarimusqanmanta kimsa chunka wata qepatañam Juan Marcos sutiyoq discipulo qellqarqa Jesuspa kimsa wata partin mana samaykuspa rurasqanmanta.
Marcosqa Roma llaqtapi Cristopi iñiqkunamanchá qellqarqa, ichaqa Jesuspa yachachisqanmantaqa astawan rurasqankunamantam willan chaymantapas willakuntaqmi Jesusqa Diospa churin kasqanta hinaspa milagrokunata ruraspa mana samaykuspa predicasqanmantapas. Marcos sutiyoq libropa nisqanta kasukuptinchikqa astawanraqmi Cristopi iñiyninchikta kallpanchawansunchik hinaspapas yanapawasunchiktaqmi Diospa Palabranmanta kusisqa willakunapaq (Hebreos 4:12).
ADMIRAKUYPAQ GALILEA LAWPI PREDICASQANMANTA
Chunka tawayoq textokunallapim Marcos sutiyoq libroqa willan Juan Bautistapa rurasqanmanta chaynataq Jesuspa tawa chunka punchaw chunniqpi kasqanmantapas. Chaymantañataq Galilea lawpi kusirikuypaq Jesuspa predicasqanmanta. Sapa kuti chaylla nisqanmi qawachin utqaylla ruray kasqanmanta (Marcos 1:10, 12).
Yaqa kimsa watapim Jesusqa Galilea lawpi tukuy imata ruraspa kimsa kutikama predicarqa. Marcosqa yaqa llapanta qatinasllanpi willakuspanmi manaña qellqarqachu Orqopa waqtanpi Jesuspa Yachachisqanmanta hinaspa wakin yachachisqankunamantapas.
Bibliapi wakin textokunamanta tapusqankuta contestasqanku:
1:15. ¿Imamantataq Jesusqa yachachichkarqa “Tiempom chayaramunña” nispanqa? Jesusqa yachachichkarqa predicananpaq tiempon chayamusqanmantam. Hamuq tiempopaq Jehová Diospa akllasqan Rey kaspanmi nirqa Diospa Munaychakuyninqa hichpaykamusqanmanta. Jesuspa predicasqanta llampu sonqo runakuna uyarispankuqa kallpanchakuspachá Diospa favorninta chaskinmanku.
1:44; 3:12; 7:36. ¿Imanasqataq Jesusqa milagrokuna rurasqanmanta mana munarqachu willakunankuta? Payqa manam munarqachu milagrokuna rurasqanmanta mana cheqap kaqkunata rimanankuta. Aswanqa Cristo kasqanta kikinkupuni yachanankutam munarqa hinaspa yachasqankuman hina tanteakunankuta (Isaias 42:1-4; Mateo 8:4; 9:30; 12:15-21; 16:20; Lucas 5:14). Demoniokunapa ñakarichisqan Gerasa llaqtayoq runallatam sanoyarachispan kamachirqa ayllunkunaman rispa willamunanpaq. Hinaptinmi chay lawpi runakunaqa Jesusta ruegarqaku llaqtankumanta pasakunanpaq chaymi chaypi runakunawanqa manaña rimarqachu. Achkallaña kuchikuna wañusqanmanta runakuna yanqakunata rimanankumantam allinpuni karqa demoniokunamanta Jesuspa librasqan runapuni willakusqanqa (Marcos 5:1-20; Lucas 8:26-39).
2:28. ¿Imanasqataq Jesusmantaqa nin, ‘munaychakunqa samana punchawpi’ nispa? Apostol Pablom qellqarqa “Moisespa leyninqa, hamuq allin kaqkunapa llantuynin hinallam karqa” nispa (Hebreos 10:1). Leypa kamachisqanman hinam sabadoqa sapa soqta punchaw llamkasqankumanta samanankupaq karqa, chayna kaptinpas, Jesusqa sabado punchawpim onqoqkunata sanoyachirqa. Chay rurasqanmi rikchanachin hanaq pachamanta Waranqa Wata Kamachimuptin allpantinpi runakuna hawka kawsakuyta hinaspa bendicionkunatapas chaskinankupaq, munaychakuq Satanasta chinkachiptin. Chaymi Diospa Gobiernonpiqa Cristom ‘munaychakunqa samana punchawpi’ (Mateo 12:8; Lucas 6:5).
3:5; 7:34; 8:12. ¿Imaynampim Marcosqa yachanman karqa Jesusqa runakunata llakipayaspan yanapasqanmanta? Marcosqa manam Jesuspa apostolninchu nitaq puriq masin amigonchu karqa. Ñawpa tiempopi willanakusqankuman hinam Marcosqa amigon, apostol Pedropa willasqanwanmi yacharurqa (1 Pedro 5:13).
6:51, 52. ‘Tantakunata mirachisqanwan Jesuspa imam yachachisqantataq’ ¿mana entienderqakuchu discipulonkunaqa? Pasaq horakunallapim Jesusqa pichqa tantakunallawan hinaspa iskay challwallawan 5.000 qarikunata mikuchirqa, chaymantapas warmikunaman hinaspa warmachakunamanpas. ‘Tantakunata mirachisqanwan Jesuspa imam yachachisqanmantaqa’ entiendenankum karqa discipulonkunaqa Jehová Diospa atiy qosqanwanmi milagrokuna rurasqanta (Marcos 6:41-44). Sichum yachanmanku karqa Jesuspa ancha atiy chaskisqanmanta hinaptinqa manachá admirakunmankuchu karqa yakupa hawantakama purisqanmanta.
8:22-26. ¿Imaynanpitaq Jesusqa iskay kutipi ñawsata yanaparqa qawarikunanpaq? Chaynataqa rurarqa chay runata llakipayasqanraykuchá. Unay tiempoña ñawsa kaspanmi mana imatapas rikurqachu chaymi allillamanta ñawinta kicharirqa intipa kanchayninman amañaspa qawarikunanpaq.
Imatam yachachiwanchik:
2:18; 7:11; 12:18; 13:3. Marcos sutiyoq libroqa willanmi mana judio kaq runakunapaq mana reqsisqanku costumbrekunamanta, rimaykunamanta, creenciakunamanta, hinaspa sitiokunamantapas. Chaymantapas willanmi fariseokuna ‘ayunaq’ kasqankumanta, Corban sutiyoq regalota ‘Diosman qosqankumanta’, saduceokuna ‘wañuqkunapa kawsarimunanmanta’ mana creesqankumanta hinaspa temploqa ‘Olivos moqopa waklaw chimpanpi kasqanmanta’. Chaymi Cristopa ñawpaq abuelonkunamanta yachaytaqa judio runakunallachá allinpaq hapirqaku, chaychiki mana chaymantaqa qellqarqapaschu. Marcosmi chayna ejemplota yachachiwanchik. Chaymi predicaspanchik otaq congregacionpi yachachispanchikqa musyarinanchikmi imayna clase runaman otaq imayna costumbreyoqkunaman yachachisqanchikta.
3:21. Jesuspa familiankunaqa manam paypiqa iñirqakuchu. Chaymi payqa entienden pipas iñisqankurayku mana iñiq familianwan imayna sasachakusqankumanta.
3:31-35. Jesusqa bautizakuruspanmi Diospa Churinña rikurirurqa hinaptinmi ‘hanaq pachapi mosoq Jerusalenñataq’ mamanña karqa (Galatas 4:26). Chaymantapacham kuyakuyninqa astawan karqa discipulonkunapaq kay pachapi familiankunamantaqa. Kaymi yachachiwanchik Diospa munasqankunataqa puntapi churananchikpaq (Mateo 12:46-50; Lucas 8:19-21).
8:32-34. Cuentatam qokunanchik kuyapayakuqkuna imam niwasqanchikmanta mana allin kaptinqa manam rurananchikchu. Cristopa discipulonqa listom kanan ‘manaña kikillanpaq kawsananpaq’ otaq saqenanmi kikillanpaq munasqankunataqa. Discipuloqa ‘ñakaristinpas’ otaq iñisqanrayku humillasqa, qatikachasqa hinaspa wañunanña kaptinpas qatinanmi cristotaqa. Hinaspa ‘sapa punchawtaqmi’ qatikunan Jesuspa rurasqanman hina kawsaspa. Chaymi Cristopa discipulon kayta munaspanchikqa pay hinam ñakaristinpas kallpanchakuspa kawsananchik (Mateo 16:21-25; Lucas 9:22, 23).
9:24. Manam penqapakunachu iñisqanchikmanta willakuyta nitaq astawan iñiyniyoq kanapaq mañakuymantapas (Lucas 17:5).
WAÑUKUNAN KILLAPI RURASQANMANTA
Jesusmi chayarqa 32 wata tukuyta “Judea lawman rirqataqmi Jordan Mayupa waklawninmanpas” hinaptinmi kaqllamanta achka runakuna payman hamurqaku (Marcos 10:1). Chaypi runakunata yacharachispanmi Jerusalen llaqtaman pasakurqa.
Nisan killapa 8 kaq punchawnintam Betania llaqtapi karqa. Mesapi tiyachkaptinmi huk warmi asuykuspan miski asnaq aceiteta umanman lluntaykurqa. Jerusalen llaqtaman Rey hina yaykusqanmantapacham kawsarichimusqakamam qatinasllanpi Marcos libroqa qellqasqa kachkan.
Bibliapi wakin textokunamanta tapusqankuta contestasqanku:
10:17, 18. ¿Imanasqataq Jesusqa “Allin yachachikuq” niq runata corregirqa? Chayna sutiwan honrasqa kananmantaqa Taytan Jehová Dios hatunchasqa kananpaqmi Jesusqa chay runata corregirqa hinaspam qawachirqa Taytallanmanta tukuy imapas chaskisqanchikta. Chaymantapas Jesusqa cheqap yachachikuytam yachachirqa: Jehová Dioslla tukuy ima Unanchaq kaspanmi paylla derechoyoq allin kaqta otaq mana allin kaqta tanteananpaq (Mateo 19:16, 17; Lucas 18:18, 19).
14:25. ¿Imatataq Jesusqa nichkarqa: “Manañam uvaspa rurunmantaqa tomasaqñachu Diospa munaychakusqanpiña mosoq vinota tomanaykama” nispan? Jesusqa manam yachachichkarqachu hanaq pachapi vino tomaymantachu. Aswanqa vino kusirikuypaq rikchakuptinmi, Jesusqa kawsarimuq discipulonkunawan gobiernonpi kusirikuymantam rimachkarqa (Salmo 104:15; Mateo 26:29).
14:51, 52. ¿Pitaq karqa ‘qalalla lluptikuq’ mozoqa? Marcosllam chayna pasasqanmanta willan, chaymi nichwan payqa kikinmanta willakuchkan nispa.
15:34. ¿Jesusqa iñiynin pisiyasqantachu qawachichkarqa “Diosnilláy, Diosnilláy ¿imanasqataq sapallaytaqa saqerullawanki?” nispanqa? Manam chaynachu. Ichaqa manam yachanchikchu imaynanpim Jesusqa chayna nisqanta, aswanqa rimasqankunam qawachin Jehová Diosqa manaña amparasqanta Churin pruebapi kaspa payman sonqo kasqanta qawachinanpaq. Chaymantapas paymanta Salmo 22:1 nisqanman hina cumpliytapaschá Jesusqa munarqa (Mateo 27:46).
Imatam yachachiwanchik:
10:6-9. Diosqa munanmi casarasqa warmi-qariqa huk runa hinalla kanankuta. Chaymi chaylla divorciakunankumantaqa Bibliapi Diospa yachachisqankunata servichikuspa arreglanmanku casado vidankupi sasachakusqankutaqa (Mateo 19:4-6).
12:41-44. Wakcha viudapa rurasqanmi yachachiwanchik Diosta yupaychanapaq kapuqninchikwan yanapakunapaq.
[31 kaq paginapi dibujo]
¿Imanasqataq Jesusqa kay runata nirqa aylluykikunaman kaykunamanta willakamuy nispa?