Imaynatam librasunkiman Jesuspa wañusqan

YAQA iskay waranqa wata ñawpaqtaraqmi judiokunapa Pascua fiestanpi 33 kaq watapi mana huchayoq huk runa wañurqa hukkunapa rantinpi. ¿Pimantataq rimachkanchik? Nazaret llaqtayoq Jesusmantam. ¿Pikunatataq yanapanman Jesuspa wañusqanqa? Lliw runakunatam. Librananpaq wañukusqanmantam Bibliapi huk texto as rimayllapi kaynata nin: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq” nispa (Juan 3:16).

Kaymantaqa achka runakunam yachanku ichaqa manam lliwchu entiendenku imam ninanta. Chaymi kaynata tapukunku: “¿Imanasqataq necesitanchik Cristopa wañusqanta? ¿Imaynatataq huk runapa wañusqanqa lliw runakunata libranman wiñaypaq wañuymanta?”. Yachasunchikyá kaymanta Bibliapi ima nisqanmanta.

¿Imanasqataq wañuyqa runakunamanta munaychakurunman karqa?

Hukkunaqa piensankum kay Allpa pachapiqa unanchasqam kachkanchik pisi tiempollata kawsanapaq, sasachakuypi kanapaq, atikusqanman hina kusisqa kanapaq, hinaspa wañuspa huk vidapiña kawsanata. Chaymi piensanku runakunapa wañusqanqa Diospa munaynin kasqanta. Bibliam ichaqa yachachin imaynanpi wañuyqa ñakarichiwasqanchikmanta kaynata nispa: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik” (Romanos 5:12). Chay nisqanmi yachachin lliw runakunaqa ‘huk runapa’ huchallikusqanwan wañusqanchikta. Chaynaqa, ¿Pitaq chay runaqa?

Lliw runakuna huk runallamanta mirasqankutam nin The World Book Encyclopedia nisqa sutiyoq libropi yaqa llapallan yachaysapa runakuna, chay ‘huk runamantam’ Bibliaqa nin pim kasqanta. Genesis 1:27 nin: “Diosmi runata unancharqa. Kikinman rikchakuqtam rurarqa. Qaritawan warmitam unancharqa” nispa. Chaymi, warmi-qarita unanchasqanwan tukuy atiyniyoq Diosqa hatunchasqa karqa.

Genesis libropa willasqanwanmi astawanraq yachanchik lliw runakuna kusisqa kawsanankumanta. Runata unanchasqanmanta willaspanqa manam chulla kutillatapas Diosqa rimarqachu wañuymantaqa, paykunaqa mana kasukuspallankum ichaqa wañunanku karqa (Genesis 2:16, 17). Diosqa munarqa lliw runakuna kay pachapi suma-sumaq paraisopi kusisqa allinlla hinaspa wiñaypaq kawsanankutam. Manamá munarqachu machuyaywan ñakarispa wañunankutaqa. ¿Imaynatataq wañuyqa lliw runakunamanta munaychakurqa?

Genesis libropa 3 kaq rakiyninpim willan, taytanchik Adanwan Evaqa yachachkaspanku Jehová Diosta mana kasukurqakuchu. Chaymi Diosqa wañunankupaq sentenciarqa kamachisqanta mana kasukuptinku. Paykunatam nirqa: “Allpallam kanki, allpallamantaqmi tikrakunki” nispa (Genesis 3:19). Diospa nisqanman hinam Adanwan Evaqa mana kasukusqankumanta wañurqaku.

Ichaqa manam paykunallapaqchu wañuyqa karqa. Mana kasukusqankuwanmi mirayninkuna wiñaypaq mana huchallikuspa kawsanankuta yanqacharurqaku. Lliw runakuna manaraq nacechkaptinmi Jehová  Diosqa paykunapaq munasqanta Adanman hinaspa Evaman nirqa: “Wawa-churiyoqyá kaychik, kay pachamanyá huntaychik, munaychakuychikyá lamar qocha challwakunapi, munaychakuychikyá alton pawaq animalkunapi. Munaychakuychikyá allpapa hawanpi, llapallan qasqonpa puriq animalkunapi” nispa (Genesis 1:28). Tiempopa risqanman hinam, mirayninkunaqa Allpantinpi mana haykapi wañuspa ancha kusisqa kawsananku karqa. Ichaqa ‘huk runallam’ [Abuelonku Adan] mirayninkunataqa huchapi sirviente hina kanankupaq wañuypi tukunankupaq qoykurqa. Apostol Pablopas ñoqanchik hinam paykunamanta miraq kachkaspam qellqarqa: “Ñoqam ichaqa runalla kaspay lliw runakuna hina huchapa munaychakusqan kani” nispa (Romanos 7:14).

Imaynam mana allin ruraq runa runamasinpa chakranpi rutunapaq sumaqllaña trigonta kañaykunman, chaynam Adanpas huchallikusqanwan Jehová Diospa sumaqllaña unanchasqan runata yanqacharurqa. Adanpa churinkunaqa churiyoq hinaspa willkayoqtaqmi karqaku, chaynatam mirarurqaku. Sapa miraymi nacen, wiñan hinaspa miraspa wañunku. ¿Imanasqataq lliw runakunaqa wañunku? Adanpa miraynin kasqankuraykum. Bibliaqa ninmi “huk runa huchallikuruptillanmi llapallanña wañurqaku” nispa (Romanos 5:15). Chaymi Adanpa huchallikusqanwan mirayninqa onqon, machuyan, mana allinta ruran chaynataq wañunpas. Chay miraymantam ñoqanchikpas kanchik.

Roma llaqtapi cristianokunaman cartaspanmi, apostol Pabloqa qellqarqa huchallikuywan runakunapas pay hina ñakarisqanta chaynataq huchawan mana ñakarinapaq imatapas ruraspa yanqapaq kallpanchakusqankumanta. Paymi nirqa “¡Imapiñataq rikukuni! Kay wañuyman apaqniy aychaymantaqa ¿pitaq libraykuwanqa?” nispa. Piensarichiwanchikmá kayna tapukuyninqa ¿aw? ¿Pitaq libranman huchamanta chaynataq wañuymanta Pablota hinaspa librasqa kay munaqkunatapas? Kikin apostol Pablom nin: “Diosllanchikmi Señorninchik Jesucristowan libraykuwan. ¡Paymanyá gracias kachun!” nispa (Romanos 7:14-25). Chaynamá, Unanchawaqninchikmi libraykuwanchik Churin Jesucristontakama.

 Imata ruraspataq Jesusqa librawanchik

Jesuspunim willakurqa imaynatam lliw runakunata huchamanta librananpaq hamusqanwan kaynata nispa: “achka runakunapa rantinpi wañunaypaqmi” hamurqani (Mateo 20:28). ¿Imanasqataq Jesuspa vidanqa libran? ¿Imanasqataq Jesuspa wañusqanqa allinninchikpaq?

Bibliaqa ninmi Jesusqa ‘mana huchallikuq’ hinaspa ‘huchasapakunawan kachkaspapas mana huchallikuq’ runa kasqanta. Tukuy tiempo kay pachapi kawsaspanmi Diospa Leyninta kasukurqapuni (Hebreos 4:15; 7:26). Jesusqa wañurqa manamá Adan hina mana kasukuq hinaspa huchallikuq runa kasqanraykuchu (Ezequiel 18:4). Aswanqa, runakunata huchamanta chaynataq wañuymanta librananpaqmi Jesusqa wañurqa, Taytanpa munasqanta cumplispan. Yachasqanchikman hinam, kikinmantapuni hamurqa ‘achka runakunapa rantinpi wañunanpaq’. Manam pi runapa kuyakuyninpas igualanchu ‘Jesus llapallanpa rantinpi wañusqanmanqa’ (Hebreos 2:9).

Rantinchikpi Jesuspa vidan qosqanqa tuparqan Adanpa manaraq huchallikuchkaspan vidanwan. ¿Ima allinpaqtaq Jesuspa wañusqanqa karqa? Jehová Diosmi ‘llapallanchikta salvawananchikpaq’ Jesuspa wañusqanta ofrendata hina chaskirqa (1 Timoteo 2:6). Chaynapimá, Diosqa servichikurqa Jesuspa vidanwan huchamanta chaynataq wañuymanta librawananchikpaq.

Bibliaqa achka kutitam yachachin Unanchaqninchik ancha kuyakuyniyoq kasqanmanta. Ejemplopaq, iñiqmasinkunaman cartaspanmi apostol Pabloqa yuyarichirqa, “Diosmi rantiwarqanchik preciowan” nispa (1 Corintios 6:20; 7:23). Apostol Pedropas qellqarqam, Diosqa Churinpa yawarnintam servichikurqa, manam qoritachu nitaq qollqetachu wañuymanta cristianokunata librananpaqqa. (1 Pedro 1:18, 19). Cristopa wañusqanwanmi Jehová Diosqa servichikurqa runakuna wañuypaq kasqankumanta librananpaq.

¿Servichikunkichu rantinchikpi Cristopa wañusqanwan?

Rantinchikpi Cristopa wañusqan ancha yanapawananchikmantam Apostol Juanqa kaynata qellqarqa: “[Jesucristo] huchanchikrayku piñakuyninta amachananpaq wañurqa, manataqmi ñoqallanchikpaqtaqchu aswanqa kay pachapi llapallan runakunapaqwanmi” nispa (1 Juan 2:2). Kayna nisqanwanmi yachachin Cristo rantinchikpi wañusqanqa lliw runapaq kasqanta. Chaynaqa, ¿lliw runakunachu Cristopa wañusqanmantaqa mana imata ruraspa servichikunqaku? Manamá chaynachu. Rantinchikpi Jesuspa wañusqanwan servichikunankupaqqa manam suyanankuchu  Diospa bendicionnintaqa mana imata ruraspa. Chaypaqqa kallpanchakunankum.

¿Ima ruranankutam Diosqa munan? Juan 3:36 nin: “Churipi iñiqqa wiñay kawsayniyoqmi, paypi mana iñiqmi ichaqa mana wiñay kawsayniyoqchu, mana iñiqpaqqa Diospa sinchi piñakuyninmi kachkan” nispa. Chaymi Diosqa Cristo ñoqanchikrayku wañusqanpi iñinanchiktam munan. Ichaqa manam chayllachu: “Kamachikuyninkunata kasukuspam yachanchik Dios reqsisqanchiktaqa” (1 Juan 2:3). Sutillamá kaymantaqa yachanchik huchamanta hinaspa wañuymanta librasqa kananchikpaqqa Cristo ñoqanchikrayku wañusqanpim iñina hinaspa kamachikuyninkunatapas kasukuna.

Librawananchikpaq Cristopa wañusqanpi iñisqanchiktaqa qawachinchik kikinpa kamachisqanman hina wañusqanta yuyarispam. Manaraq wañuchkaspanmi cuerponta tantawan yawarnintañataq vinowan rikchanachispanmi Jesusqa apostolninkunawan cenasqanpi nirqa: “Chaynatam qamkunapas rurankichik ñoqata yuyariwaspa nispa” (Lucas 22:19). Jehová Diospa testigonkunaqa kasukunkum chay kamachikuyta Diospa churinta ancha kuyasqankurayku. Kay watapiqa Jesucristopa wañusqantaqa Yuyarisun marzo killapa 22 kaq sabado punchawninta Intipa seqaykusqan qepatam. Invitamuykikum kay sapaqchasqa huñunakuyman, chaynata ruraspam Cristopa kamachikuyninta kasukusunchik. Yachasqayki lawpi Jehová Diospa mayqan testigonpas willasunkim maypi hinaspa imay horam chay sapaqchasqa huñunakuy rurakunanmanta. Chay huñunakuypim astawan yachanki imata ruraspam Adanpa huchanmanta Cristo rantinchikpi wañusqanwan librasqa kanaykipaq.

Manam lliw runachu sumaqta entiendenku Jehová Dios hinaspa Churinpiwan wañuymanta librawananchikpaq rurasqankuta. Ichaqa rantinchikpi Cristopa wañusqanta yachaspa iñiqkunam anchata kusikunku, apostol Pedro iñiqmasinkunaman nisqanpi hina: “paypimá [Jesuspi] confiakuchkankichik [. . .] payta hatunchaspam mana willakuy atina kusikuywanraq kusikuchkankichik. Iñisqaykichikraykullam almaykichikpa salvacionnintapas chaskinkichik” (1 Pedro 1:8, 9). Sichum sonqoykipi Jesucristoman kuyakuyta hatallinki hinaspa librawananchikpaq wañusqanpi iñispaykiqa ancha kusisqam kanki chaynataq huchamanta, wañuymantapas librasqa kanaykipaq suyakuyniyoqmi kanki.

[5 kaq paginapi dibujo]

Chuya vidanta Adan huchallikuspa yanqachasqanpa rantinpim Jesusqa wañurqa.

[6 kaq paginapi dibujo]

Jesuspa wañusqanta Yuyarinapaqmi 2008 watapi rurakunqa marzo killapa sabado 22 punchawninta Intipa seqaykusqan qepata