Tukupay tiempopi casarakuymanta hinaspa wawa-churiyoq kaymanta

“Manañam tiempo kanñachu.” (1 COR. 7:29.)

1. a) ¿Imakuna kasqanraykum kunan tiempo “sasallaña” kanan karqa? b) ¿Imanasqataq preocupawanchik familiapi kawsakuy cambiarusqan?

BIBLIAQA willakurqañam ‘tukupay tiempokunapi’ guerrakuna, terremotokuna, muchuykuna hinaspa onqoykunapas kananmanta (Dan. 8:17, 19; Luc. 21:10, 11). Nirqataqmi runakunapa imayna kawsasqankupas cambiananmanta. Ejemplopaq, familiapi kawsakuymi astawan cambianan karqa, chayraykum ‘tukupay tiempokuna sasallaña’ kanan karqa (2 Tim. 3:1-4). ¿Imanasqataq chayna cambiasqanku preocupawanchik? Maypipas llumpayllaña hinaspa chaynallaña kasqanmi, casarakuymanta chaynataq wawa-churiyoq kaymanta imayna piensasqanchikta cambiarachinman. ¿Imaynam chay pasakunman?

2. ¿Imaynatam runakuna qawanku casarakuytawan divorciakuyta?

 ² Kunan tiempopi runakunaqa chayllam divorciakunku, hinaspa achka nacionkunapim chayqa astawan yapakurun. Ichaqa yuyarinanchikmi, Jehová Diosqa manam runakuna hinachu qawan casarakuytawan divorciakuytaqa. Hinaptinqa, ¿imaynatam Jehová Dios qawan?

3. ¿Imaynatam qawanku Jehová Dios hinaspa Jesuspas casado vidata?

³ Jehová Diosqa munanmi casadokuna prometenakusqanku cumplinankuta. Jehová Diosmi Adantawan Evata casarachispan kaynata nirqa: “Qariqa [. . .] hukllawakunqa warminmanña chaymi iskayninku huk runa hinallaña kanqaku”, nispa. Jesucristopas hina chayllamantam kaynata nirqa: “Chayraykum runaqa mana rakinmanchu Diospa kuskanchasqantaqa. [. . .] Huk qariwan mana pierdekuchkaptin yanqamanta warminta wischuspan hukwan casarakuqqa hukwan pierdekuy huchapim kachkan”, nispa (Gen. 2:24; Mat. 19:3-6, 9). Chaynaqa, Jehová Dios hinaspa Jesuspas runakunapa casarakusqankutaqa qawanku tukuy vidankupaq kasqanta, kayqa tukun mayqanninkupas wañukuptillanmi (1 Cor. 7:39). Hinaptinqa, casado vidaqa ancha respetanapaqmi. Chayraykum, cristianokunaqa mana piensananchikchu chaylla divorciakuypiqa. Mana huchapakuchkaptin divorciakuyta Jehová Diospa cheqnisqantam, Bibliaqa qawachin (leey Malaquias 2:13-16; 3:6). *

Casarakuyta respetowan qawanamanta

4. ¿Imanasqataq wakin cristianokuna ñakakunku llumpay warmallaraq casarakusqankumanta?

⁴ Mana allin ruraq runakunaqa warmi-qari puñuyllapiñam piensanku, chayraykum millakuypaq kaqkunallataña sapa punchaw rikunchik otaq uyarinchikpas. Cristianokunaqa manamá ninchikmanchu chay millakuypaq kaqkunaqa manam imanawanqachu nispaqa, aswanraqmi mozo-sipaskunaqa. Cheqaptamá chaykunata ruranapaq munachiwanchikman mana munachkaptinchikpas. ¿Imatam rurananku mozo-sipaskuna chayna mana allin munaykuna kaptin? Wakinkuqa llumpay warmallam casarakunku, huchapakuyman mana wichiykunankupaq piensaspanku, ichaqa pisi tiempollamantam ñakakunku casarakusqankumanta. ¿Imanasqa? Casado vidamanta imapas munasqankuta tariruspa chaynataq kawsakuyninkupi sasachakuykuna kaptinmi, chayraq cuentata qokunku imapipas mana chaynalla piensasqankuta. Chayna casarakuqkunaqa ancha sasachakuypimá tarikunku.

5. ¿Imataq casadokunata yanapanman casarakuspanku prometenakusqankuta cumplinankupaq? (Kay paginapa tukuyninpi kaqtapas qaway.)

⁵ Cristianowan casarakuptikipas, imayna kasqan qampa munasqaykiman hina mana kaptinqa sasallañam kanman (1 Cor. 7:28). Hinaptinqa, casado vidapi mana kusikuy kaptinqa sasachakuykunam rikurin. Cheqap cristianokunaqa yachankum casado vidanku sasa kaptinpas divorciakuy mana allin kasqanta, Bibliapa nisqanman hina mana kaspanqa. Casarakuspanku prometenakusqankuta cumplinankupaq kallpanchakuq cristianokunataqa respetanam hinaspa kuyanam, chaynataq congregacionpas yanapananmi. *

6. ¿Imatam yuyarinanku casarakuytaña piensaq mozo-sipas cristianokuna?

⁶ Mozo-sipas kaspayki casarakuypi piensaspaqa, ¿imatam yachanayki? Casarakunaykipaq iñiqmasikita reqsiyta munaspaykiqa, preparasqam kanayki piensaynikipi, espiritualpi hinaspa  yuyayniyoqñam kanaykipas, chaynatam librakunki achka ñakariykunamanta. Arí, Bibliaqa manam nisunkichu hayka wataykipi casarakunaykitaqa. * Ichaqa nisunkim warmiwan otaq qariwan ancha puñuy munasqayki tiempo pasaruptinña casarakunaykipaq (1 Cor. 7:36, NM). ¿Imanasqa? Chayna munasqaykiqa manam yanapasunkichu allinta piensanaykipaq hinaspa manam allintachu imatapas tanteawaq chaynapi llumpay sasachakuykunata tariwaq. Yuyariy, casarakuymanta Jehová Diospa consejokuna qosqanqa allinnikipaqmi hinaspa kusisqa kanaykipaqmi (leey Isaias 48:17, 18).

Wawa-churikunata allin uywanamanta

7. ¿Ima sasachakuytam tarinku mozo-sipasllaraq kachkaspa casarakuqkuna, hinaspa imaynam casado vidanku?

⁷ Wakin casarakuqkunam tayta-mama rikurirunku kikinkupas llumpay warmallaraq kachkaspanku. Manaraqpas allinta reqsinakuchkaspankum wawa-churiyoqña rikurirunku. Chayllaraq naceq wawachata tukuy punchaw maman atiendesqanraykum, qosan mozollaraq kaspan wakinpiqa envidiakunman. Chaymantapas, wawachata atiendespanku mana allin puñusqa kasqankuraykum, astawan sasachakuykunapas rikurin. Casarasqa mozo-sipasqa ichapas manaña tiempoyoq kasqankuta musyakunku. Manañam ñawpaqpi risqanku sitiokunamanpas riyta atinkuñachu otaq kuskaqa imatapas rurankuñachu. Hinaptinqa, ¿imaynatam qawananku chayna kasqankuta?

8. ¿Imaynatam qawana tayta-mama kayta, hinaspa imanasqa?

⁸ Casado vidata hinam tayta-mama kaytapas qawana, kaypas Diospa sumaq regalonmi chaymi allinta cumplina. Arí, wawa-churiyoq kaspaqa imayna kawsayninkupim cambiananku, ichaqa cristiano tayta-mamakunaqa allinta cumplinankupaqmi kallpanchakunku. Chayllaraq naceq wawa-churinkutam ‘Diospa qosqan herenciata’ hina qawanku, chayna miranankupaq Jehová Dios unanchasqanrayku (Sal. 127:3). ‘Señorman iñiq’ tayta-mamakunaqa kallpanchakunkum Diospa nisqanta kasukunankupaq (Efe. 6:1).

9. a) ¿Imakunatam rurana wawa-churikunata uywanapaqqa? b) ¿Imatataq qosaqa ruranman señoran espiritualpi mana hukmanyananpaq?

⁹ Achka watam kallpanchakuna wawa-churita uywanapaqqa. Achka tiempopaqmi hinaspa kallpanchakunataq. Cristianoqa yachananmi churin wawachallaraq kachkaptinqa, ichapas señoranqa huñunakuykunata mana allintachu uyarinqa hinaspa Bibliatapas mana anchachu estudianqa chaynataq mana yuyaymananqapaschu, chaymi Dios serviyninpi ichapas hukmanyarunman. Chaymi entiendeq taytaqa imatapas ruran wawa atiendeypi yanapananpaq. Chaymantapas, huñunakuykuna tukuytam yachasqankunamanta señoranman willan, mana uyariy atisqankunamanta  yachananpaq. Wakin kutipiqa wawatam cuidan señoran astawan predicananpaq (leey Filipenses 2:3, 4).

10, 11. a) ¿Ima ninantaq Jehová Diospa “yachachikuyninman hina” warmakunata uywayqa? b) ¿Imanasqataq achka tayta-mamakunata alabananchik?

¹⁰ Wawa-churikunata allinta uywayqa manam mikuyta, pachata, wasita hinaspa allin kananpaq imatapas qoyllachu. Kay tukupay tiempopiqa, warmakunam yachananku uchuycha kasqankumantapacha Diospa kamachisqanman hina kawsayta. Jehová Diospa ‘yachachikuyninman hinam’ uywasqa kananku (Efe. 6:4). Tayta-mamaqa Diospa ‘yachachikuyninman hinam’ warmantaqa uywanan, uchuycha kasqanmanta mozo-sipas kasqanpi sasachakuykuna tukunankama (2 Tim. 3:14, 15).

¹¹ “Llapallan nacionpi runakunaman rispayá willamuychik qatiqniykunaña kanankupaq” nispa Jesus qatiqninkunata kamachispanqa, nichkarqataqmi tayta-mamakuna warmankuta yachachinankumantapas (Mat. 28:19, 20). Arí, sasamá chay rurayqa, kay pachapi runakuna mozo-sipaskunata mana allinkunallata ruranankupaq tanqasqankurayku. Chaymi, cristiano kanankupaq warmankuta yanapaq tayta-mamakunataqa alabananchik. Arí, Diostam kuyanku tukuy sonqonkumanta hinaspa iñisqankurayku atipanku kay pachapi mana allinkunata (1 Juan 5:4).

Diosta servinankurayku mana casarakuqkuna otaq mana wawa-churiyoqkuna

12. ¿Imanasqataq wakin cristianokunaqa tantearunku achka watakuna soltero kanankupaq?

¹² ‘Manaña tiempo kasqanrayku’ hinaspa ‘kay pachapi qawasqanchik tukunanpaqña’ kasqanraykum, Diospa Palabranqa kallpanchawanchik soltero kaspa ima ruray atisqanchikkunapi piensanapaq (1 Cor. 7:29-31). Chaymi achka cristianokuna tantearunku achka watakuna soltero kanankupaq otaq tukuy vidankupi solterolla kanankupaqpas. Paykunaqa alabanapaqmi kanku, soltero kasqankutaqa manam kikillankupaqchu servichikunku aswanqa ‘mana hukpi afanakuspa’ Diosta servinankupaqmi (leey 1 Corintios 7:32-35). Chaymi achka cristianokuna soltero kaspanku precursor kanku otaq betelpipas llamkachkanku. Hukkunañataq Escuela de Entrenamiento Ministerial nisqaman rinku, Jehová Diospa llaqtanpi astawan yanapayta munasqankurayku. Tiempopa pasasqanman hinam wakinkuqa casarakunku, ichaqa cuentatam qokunku soltero kaspanku otaq precursor kasqankupi imakunapas yachasqanku casado vidankupi yanapasqanta.

13. ¿Imanasqataq casado cristianokunamanta wakinqa mana wawa-churiyoq kanankupaq tantearunku?

¹³ Achka nacionkunapim ayllukunapa imayna kawsasqanku cambiachkan, chaymi achka casadokuna tantearunku mana wawa-churiyoq kanankupaq. ¿Imataq kallpanchan chaynata tanteanankupaq? Wakinpiqa mana qollqenku kaptin hinaspa hukkunañataq llamkaspa achka qollqe tarinankurayku. Cristianokunañataq chaynata tantearunku, astawan  Jehová Diosta servinankupaq. Kaywanqa manamá nichkanchikchu wakin casadokunapa hina vidanku mana kasqantachu. Aswanqa Diospa Gobiernonta puntaman churayta munaspankum casado vidapi mana wawa-churiyoq kanankupaq tantearunku (1 Cor. 7:3-5). Wakinmi Jehová Diosta hinaspa iñiqmasinkuta Betelpi servichkanku, wakinñataq circuito otaq distrito superintendente kaspanku, hukkunañataq precursor otaq misionero kaspankupas. Segurom kachwan Jehová Diosqa manam qonqanqachu paypaq llamkasqankuta nitaq kuyasqankutapas (Heb. 6:10).

‘Kawsakuyninkupi sasachakuykuna’

14, 15. ¿Ima ‘sasachakuypim’ kanmanku cristiano tayta-mamakuna?

¹⁴ Apostol Pablom nirqa casado cristianokuna ‘sasachakuypi kanankumanta’ (1 Cor. 7:28). Chay sasachakuykunam kanman kikinku onqoruptinku, wawa-churinku otaq yuyaq tayta-mamanku onqoruptinkupas. Kanmantaqmi wawa-churinku imayna uywasqankupi sasachakuykuna hinaspa piñanakuypas. Qallariypi nisqanchikman hinam, Bibliaqa willakurqaña ‘tukupay tiempokuna sasallaña kananmanta’, chay sasallaña kaqkunapim kachkan wawa-churikunapa mana kasukuyninkupas (2 Tim. 3:1-3).

¹⁵ Kay “sasallaña” tiempomanta mana pipas librakuyta atisqanchikraykum, cristiano tayta-mamakunapaqqa wawa-churinku uywayqa sasallaña. Chaymi paykunaqa sapa kuti kallpanchakunanku, ‘kay pachapi mana allin ruraykuna’ warmankuta mana pantachinanpaq (Efe. 2:2, 3). Chayna kallpanchakuptinkupas wakinpiqa wawa-churinkum Jehová Dios serviyta saqerunku. Chaymi cristiano tayta-mamakunaqa ‘sasachakuypi’ tarikunmanku (Pro. 17:25).

“Llumpa-llumpay ñakariy punchawkunam kanqa”

16. ¿Ima “llumpa-llumpay ñakariy” kananmantam Jesus willakurqa?

¹⁶ Casado vidapi otaq wawa-churikuna uywaypi kunan tiempo ‘sasachakuykunamantaqa’, kachkanmi astawan huk ñakariypas. Hanaq pachapi kamachinan tiempomanta hinaspa mana allin ruraykuna tukunanmanta rimaspanmi, Jesus kaynata nirqa: “Chay punchawkunaqa llumpa-llumpay ñakariy punchawkunam kanqa, manam chaynaqa Dios kay pachata unanchasqanmantapunipas kunankama karqachu, manataqmi chaynaqa kanqachu qepa punchawkunapipas”, nispa (Mat. 24:3, 21). Chaymantapas, Jesusqa willarqam chay ‘llumpa-llumpay ñakariy punchawmanta’ achkallaña runakuna salvakunankuta. Manaraq chay pasachkaptinmi, Satanaspa runankuna Diospa llaqtanpa contranpi hatarinqaku. Llumpay sasachakuychá kanqa llapallanchikpaq, wawakunapaqpas hinaspa yuyayniyoq runakunapaqpas.

17. a) ¿Imanasqataq confianzawan suyanchikman hamuq tiempota? b) ¿Imataq yanapawananchik casarakuymanta hinaspa wawa-churiyoq kaymanta piensasqanchikpi?

¹⁷ Ichaqa, manam llumpayta preocupakunanchikchu hamuq tiempomantaqa. Tayta-mamakunaqa confianmankum paykunapas hinaspa warmachankunapas Diosta kuyaspankuqa waqaychasqa kanankumanta (leey Isaias 26:20, 21; Sof. 2:2, 3; 1 Cor. 7:14). Chaykamaqa, amayá qonqasunchu sasallaña tiempopi kawsasqanchikta, kaymanta yachasqanchikmi yanapawananchik kay tukupay tiempopi casarakuymanta chaynataq wawa-churiyoq kaymanta imayna piensasqanchikpi (2 Ped. 3:10-13). Chaynata ruraspaqa llapallanchikmi —soltero otaq casado kaspapas, chaynataq wawa-churiyoq otaq mana wawa-churiyoq kaspapas— Jehová Diosta hinaspa congregaciontapas hatunchasunchik imayna kawsasqanchikwan.

[Willakuykuna]

Yuyarinapaq

• ¿Imanasqam mana allinchu llumpay warmallaraq kachkaspanku cristianokunapa casarakuyninku?

• ¿Imakunam necesitakun wawa-churikunata uywanapaq?

• ¿Imanasqataq achka cristianokuna solterolla kanku otaq casado kaspankupas mana wawa-churiyoq kanku?

• ¿Ima ‘sasachakuytam’ pasanmanku wawa-churiyoq cristianokuna?

[Kay yachachikuypa tapukuyninkuna]

[21 kaq paginapi dibujo]

¿Imanasqataq mana allinchu kanman llumpay warmallaraq casarakuy?

[22 kaq paginapi dibujo]

Qosaqa señorantam yanapanman Diosta astawan servinanpaq

[23 kaq paginapi dibujo]

¿Imanasqataq mana churiyoq kanankupaq tantearunku wakin casado cristianokuna?