Tukuy ima rurasqanchikpi Diospa yanapayninta maskasun
Tukuy ima rurasqanchikpi Diospa yanapayninta maskasun
“Kay rimasqanchik Diosmá wiña-wiñaypaq Diosninchikqa. Kay rimasqanchik Diosmá wiña-wiñaypaq pusawaqninchikqa.” (SAL. 48:14.)
1, 2. ¿Imanasqataq Jehová Diospa yanapayninta maskananchik kikillanchikpi confiakunanchikmantaqa? ¿Ima tapukuykunamantam yachasun kay estudiopi?
¡CHAYLLAMÁ engañakuruchwan yanqapaq kaqkunata allinpaq hina hapiruspa! (Pro. 12:11.) Imatapas mana allin kasqanta yachachkaspa ruraruyta munaptinchikqa, sonqonchikqa imaynatapas tanqaruwasunmi rurarunanchikpaq (Jer. 17:5, 9). Chaymi salmos qellqaq, Jehová Diosta yachaywan kaynata mañakurqa: “Qampa achkillaykitayá apachimuway. Cheqap kaqnillaykitayá apachimuway. Chaykunayá ñoqallaytaqa pusawachun”, nispa (Sal. 43:3). Payqa Jehová Diospim confiarqa manam kikinpa yachasqallanpichu, hinaspa Jehová Diosmi karqa allin yanapaqninqa. Chaynatam ñoqanchikpas Diospa yanapayninta mañakunanchik.
2 Hinaptinqa, ¿imanasqataq imamantapas puntataqa Jehová Diospa yanapayninpi confiananchik? ¿Ima kaptinmi maskananchik? ¿Imayna kasqanchikmi yanapawasun tarinapaq? ¿Imaynatam Jehová Dios yanapawanchik? Kay estudiopim yachasunchik kay tapukuykunamanta.
¿Imanasqataq confiachwan Jehová Diospa yanapayninpi?
3-5. ¿Imanasqataq Jehová Diospa yanapakuyninpi confianchik?
3 Jehová Diosmi hanaq pachapi kaq Taytanchikqa (1 Cor. 8:6). Payqa allintam reqsiwanchik hinaspa yachanmi sonqonchikpi imakuna kasqantapas (1 Sam. 16:7; Pro. 21:2). Rey Davidmi Diosta nirqa: “Qanmi yachanki tukuy ima rurasqayta. Karumantaraqmi cuentata qokunki piensasqaykunata. Dios Taytalláy, manaraqpas rimarichkaptiyqa yachachkankiñam imam rimanaytaqa”, nispa (Sal. 139:2, 4). Diosqa allinta reqsiwaspanchikmi yachan ñoqanchikpaq imam allin kasqanta. Manam chayllachu: payqa imakunamantapas llapallantam yachan. Manam paymantaqa imapas pakasqa kanmanchu. Tukuy imamanta yachasqantaqa runapa yachasqanqa manam igualanmanchu. Imakunapa imayna tukunantapas qallariyninmantam yachan (Isa. 46:9-11; Rom. 11:33). Payllam “tukuy yachaq” Diosninchikqa (Romanos 16:27).
4 Chaymantapas, Jehová Diosqa kuyawanchikmi hinaspa allinkunatam ñoqanchikpaq munan (Juan 3:16; 1 Juan 4:8). Kuyakuq kasqanmi kallpanchan imapas qokuykuq kananpaq. Santiagom kaynata qellqarqa: “Cielopi kanchaqkuna unanchaq Diosmantam chaskinchik llapa ima allin kaqkunataqa”, nispa (Sant. 1:17). Paypa nisqankunata kasukuqkunaqa achka bendicionkunatam chaskinku.
5 Chaymantapas Jehová Diosqa tukuy atiyniyoqmi. Salmos qellqaqmi nirqa: “Alto-altopi kaqpa pakaykusqanmi, Tukuy Atiyniyoqpa llantuykusqanmi Tayta Diosta nini: Pakakuna wasi hinam qamqa kanki, nispa. Amparakuna wasi hinam qamqa kanki, nispa. Diosnilláy, ñoqaqa qampim confiakusaq, nispa” (Sal. 91:1, 2). Jehová Diospa yachachiwasqanchikta kasukuspanchikqa, mana pantaq Diospa amparawananchiktam maskanchik. Harkakuykuna kaptinpas, payqa yanapawasunmi. Manam haykapipas saqewasunchu (Sal. 71:4, 5; leey Proverbios 3:19-26). Qawasqanchikman hinaqa, Jehová Diosqa yachanmi hinaspa munanmi ñoqanchikpaq imam allin kasqanta, chaynataq atiyniyoqmi allinkunata qowananchikpaqpas. ¡Manamá allinchu kanman yanapayninta qepancharuyqa! Kunanñataq qawasun imakuna kaptin Diospa yanapayninta necesitasqanchikmanta.
¿Imakuna kaptintaq necesitanchik Diospa yanapawananchikta?
6, 7. ¿Imakuna ruranapaqmi necesitanchik Diospa yanapayninta?
6 Cheqaptapunim Diospa yanapaynintaqa necesitanchik: warmacha kasqanchikmanta yuyaq kananchikkama. Salmos qellqaqmi nirqa: “Kay rimasqanchik Diosmá wiña-wiñaypaq Diosninchikqa. Kay rimasqanchik Diosmá wiña-wiñaypaq pusawaqninchikqa”, nispa (Sal. 48:14). Salmos qellqaq hinam cristianokunapas yachayniyoq kanchik hinaspam mana haykapipas qonqanchikchu Jehová Diospa yanapaynin mañakuytaqa.
7 Wakin kutipim ichaqa Diospa yanapayninta astawanraq necesitanchik. Ichapas ‘sasachakuypi’ tarikunchik qatikachasqa kaspanchik, onqospanchik otaq qonqaymanta llamkayninchik mana kaptinpas (Sal. 69:16, 17). Chaynakunapi tarikuspaqa mana iskayrayaspam Jehová Diosta mañakunanchik paymi kallpata qowasun aguantanapaq hinaspa yanapawasun allinta tanteanapaqpas. ¡Mayna kusikunapaqmi kaykunamanta yachayqa! (Leey Salmo 102:17.) Chaynataq, huk kutikunapipas necesitanchikmi Diospa yanapaynintaqa. Ejemplopaq, Diospa Munaychakuyninmanta vecinonchikkunaman allinta predicananchikpaqqa, necesitanchikmi Dios yanapawananchikta. Imatapas ruranapaq tanteaspaqa —kusirikunapaq, imayna allichakunapaq, amistadninchikta akllanapaq, llamkanapaq, estudianapaq otaq ima ruranapaqpas—, Diospa nisqankunatam yuyarinanchik yachaywan ruranapaq. Hinaptinqa, haykapipas Diospa yanapaynintaqa necesitanchikmi.
Manam allinchu kanman Dioswan mana yanapachikuptinchikqa
8. ¿Imatam qawachirqa Eva mana mikunanpaq kaq ruruta mikuruspan?
8 Ama qonqasunchu, Diostaqa kasukunanchik kikinchik munaspanchikmi. Payqa manam obligawasunchu mana munaptinchikqa. Jehová Diospa kamachisqanta qallariyninpi mana kasukuq runaqa karqa Evam, paypa rurasqanmi qawachiwanchik pay hina rurayqa mana allin kasqanta. Piensarisun imam pasanman karqa mana kasukusqanrayku. Evaqa mana mikunanpaq kaq rurutam mikururqa “Dios hinaña allin kaqtapas hinaspa mana allin kaqtapas” yachayta munasqanrayku (Gen. 3:5). Dioswan yanapachikunan kachkaptinmi, kaynata ruraspan Diosllapa ruranan kaqta kikinña tanteakurqa imam allin hinaspa mana allin kaqtapas. Chaynapim qepancharurqa Jehová Dios llapallan kamachiq kasqanta. Evaqa munasqanman hina kawsakuytam munarqa, Adanpas pay hinataq rurarqa (Rom. 5:12).
9. ¿Imatam rurachkanchikman Diospa kamachikuyninkunata mana kasukuspaqa, hinaspa imanasqataq mana allinchu chay rurayqa?
9 Chaynallataqmi, ñoqanchikpas Jehová Diospa kamachikuyninkunata mana kasukuspanchikqa Paylla kamachinanpaq derechoyoq kasqantam qepanchanchikman. Ejemplopaq piensarisun, huñunakuykunaman hamuq huk runapi, paymi sapa kuti qawanman millakuypaq kaqta otaq qalalla kaqkunata. Payqa yachanmi chaykunamanta Diospa ima nisqanta, yachantaqmi mana rimayllapas rimananchikta. Hinaptinqa, ¿imanasqataq munapayaspaqa chaykunata qawanqa? (Efe. 5:3.) Diospa kamachikuyninkunata mana kasukuspaqa, Jehová Dioslla kamachiq kasqantam qepanchachkan (1 Cor. 11:3). Chayna rurayqa manam allinchu, Jeremiaspa nisqanman hinam, ‘runaqa manam kikillanmantaqa purinmanchu’ (Jer. 10:23).
10. ¿Imanasqam libre kasqanchikta allinta servichikunanchik?
10 Wakin runakunam hukmanyanku Jeremiaspa rimasqanmanta, paykunam ninku imayna kawsanapaq akllakunanchikta Dios saqewaspanchikqa, manam allinchu kanman ima akllakusqanchikmanta juzgawayninchikqa nispa. Ichaqa manam qonqananchikchu, imapas akllakunanchikpaq libre kasqanchik sumaq regalo kaptinpas, allinta tanteaspam imatapas rurananchik. Chaynaqa, Diosmanmi cuentata qosun ima rurasqanchikmantawan rimasqanchikmantapas (Rom. 14:10). Jesusmi nirqa: “Runaqa riman sonqonpi huntallaña kaqkunamantam”, nispa. Nirqataqmi: “Sonqonmanta lloqsiptinmi runaqa huchallikun tukuy mana allinkunata piensaspa, wañuchispa, hukwan pierdekuspa, huchapakuspa, suwakuspa, runamasinta tumpaspa hinaspa kamispa” (Mat. 12:34; 15:19-20). Qawasqanchikman hinam rurasqanchikkuna hinaspa rimasqanchikkunapas qawachin sonqonchikmanta cheqaptapuni imayna kasqanchikta. Chaymi allin yuyayniyoq cristianokunaqa Diospa yanapaynintapuni maskanku. Jehová Diospaqqa chayna cristianokunaqa ‘allin runakunam’, chaymi paykunapaq ‘allinkunata ruranqa’ (Sal. 125:4).
11. ¿Imatam yachanchik israelitakunapa imayna kasqankumanta?
11 Yuyarisun israelitakuna imayna kasqankumanta. Allinta tanteaspanku hinaspa Jehová Diospa kamachikuyninkunata kasukuptinkuqa, payqa waqaycharqam (Jos. 24:15, 21, 31). Ichaqa, sapa kutim munasqankuman hina imatapas rurarqaku. Jeremiaspa tiemponpim Jehová Dios paykunamanta nirqa: ‘Aswanqa mana uyariwaspam mana atiendewarqakuchu, mana kasukuspam, rinankupas kachkaptin qepamanraq kutirqaku’, nispa (Jer. 7:24-26). ¡Llakikunapaqmá kayqa! Amayá mana kasukuy munasqanchik otaq kusirikuykunata kuyasqanchikqa sonqonchikpa munasqallanta rurachiwananchiktaqa saqekusunchu nitaq Diospa yanapayninta qepanchaytapas. Chaykunata ruraspaqa qepamanmi kutichwan ñawparinanmantaqa.
¿Imakunam yanapawasun Jehová Diospa nisqankunata kasukunapaq?
12, 13. a) ¿Imataq yanapawanchik Jehová Diospa niwasqanchikkunata kasukunapaq? b) ¿Imanasqataq iñiyniyoq kananchik?
12 Jehová Diosta kuyasqanchikmi tanqawanchik payta kasukunapaq (1 Juan 5:3). Chayna kaptinpas, manam kuyasqallanchikchu. Apostol Pablom nirqa: “Iñiyllawanmi purichkanchikqa, manam ñawinchikpa rikusqanta qatispachu”, nispa (2 Cor. 5:6, 7). ¿Imanasqataq ancha allin iñiyniyoq kayqa? Jehová Diosmi ‘allin ñanninta pusawanchik’, ichaqa manam kay ñanqa apawanchikchu qollqesapa hinaspa reqsisqa runa kanapaqqa (Sal. 23:3). Chaymi allinta iñinanchik Dios serviqkunapa espiritualpi suma-sumaq bendicionkuna chaskisqankupi (leey 2 Corintios 4:17, 18). Iñiyninchikmi yanapawasun mana ancha kapuqniyoq kaspanchikpas kusisqa kanapaq (1 Tim. 6:8).
13 Jesusmi qawachirqa cheqap yupaychanapaqqa munasqanchikta qepaman churanamanta, chaypaqqa iñiyniyoqmi kananchik (Luc. 9:23, 24). Wakin cristianokunam Diosta servisqankurayku sasachakurqaku: wakchayaypi tarikuspanku, ñakarispanku, mana allin qawasqa chaynataq qatikachasqa kaspankupas (2 Cor. 11:23-27; Apo. 3:8-10). Suni iñiyninkum yanaparqa kusikuyninkuta mana chinkachispa aguantanankupaq (Sant. 1:2, 3). Iñiyninchik chayna kaptinmi, seguro kasunchik Jehová Diosta kasukuyqa haykapipas allinninchikpaq kasqanmanta. Arí, tukuy sonqonkumanta Diosta kasukuspa aguantaqkunaqa: kunan tiempopi imakunawanpas ñakarisqankumantaqa hatun premiotam chaskinqaku (Heb. 11:6).
14. ¿Imanasqataq Agar humillakuspa kasukurqa?
14 Jehová Diospa niwasqanchikta kasukunapaqqa humillakuqtaqmi kananchik. Chaynam karqa Agar, payqa Sara sutiyoq warmitam servirqa. Sara mana wawayoq kayta atispanmi, Abrahanta nirqa Agarwan puñunanpaq. Agarmi Abrahanpa churinta wiksayakuruspan, Sarata manaña respetarqachu. Chaymi Sarañataq ‘ñakarichirqa’ [“llakichirqa”, NM], hinaptinmi Agarqa lluptikurqa. Chaymi Jehová Diospa angelnin rikuriykamuspan nirqa: “Kutiy patronaykipa ladonman hinaspa humillakuspa kasukuy”, nispa (Gen. 16:2, 6, 8, 9). Ichapas Agarqa munanman karqa huk kamachikuy qonanta, angelpa nisqanta kasukunanpaqqa imayna kasqantam cambianan karqa. Angelpa nisqantam humillakuspa kasukurqa, chayraykum wawan Ismael nacerqa Abrahanpa allin waqaychasqa campamentonpi.
15. ¿Imakuna kaptinmi humillakunanchik Jehová Diospa yanapakuyninta chaskinapaq?
15 Yaqapaschá ñoqanchikpas humillakunanchik Diospa nisqankunata kasukunapaq. Ejemplokunata qawasunchik. Ichapas huk iñiqmasinchik Jehová Diosta kasukunan paypa gustasqan kusirikuy Jehová Diospaq mana allin kaptin. Hukñataq pitapas piñarachispan pampachananpaq mañakunan, otaq pantaruspan pantasqanta reqsikunan. ¿Imatam ruranman iñiqmasinchik hatun huchata ruraruspan? Humillakunanmi hinaspa ancianokunamanpas willananmi. Chaynataq pipas congregacionmantaqa qarqorachikunmanmi. ¿Imatam ruranan congregacionman kutimunanpaq? Humillakuspanmi wanakunan hinaspa mana allin rurasqantapas saqenanmi. Kaynakuna pasaptinqa kallpanchawasunmi Proverbios 29:23 nisqanpi piensay, chaypim nin: “Orgulloso runaqa humillachisqam kanqa. Humilde runañataqmi allin reqsisqa kanqa”, nispa.
¿Imaynatam Jehová Dios yanapawanchik?
16, 17. ¿Imaynatam allintapuni yanapachikusun Bibliapa nisqankunawan?
16 Puntataqa Diosqa yanapawanchik Palabranwanmi (leey 2 Timoteo 3:16, 17). Allintapuni yanapachikunapaqqa, manam suyananchikraqchu hatun sasachakuy pasawananchikta hinaspa chayllaraq yanapakuyninta maskanapaqqa. Aswanqa sapa punchawmi Bibliataqa leenanchik (Sal. 1:1-3). Chaynapim astawan yachasunchik ima nisqankunata. Dios hinam piensasunchik hinaspa listom kasunchik qonqaymanta ima sasachakuy kaptinpas atipanapaq.
17 Chaymantapas, allinpunim Biblia leesqanchikpi yuyaymanay hinaspa orakuypas. Leesqanchikkunapi yuyaymanaspam, achka yachachikuykunata tarisun hinaptinmi yanapawasun imakunapas kaptin (1 Tim. 4:15). Llumpay sasachakuy kaptinqa Jehová Diosta mañakusun yanapawananchikpaq. Diospa chuya espiritunmi yanapawasun Bibliapi otaq qellqanchikkunapi leesqanchik yachachikuykunata yuyarinanchikpaq (leey Salmo 25:4, 5).
18. ¿Imaynatam Jehová Dios yanapawanchik iñiqmasinchikkunawan?
18 Chaymantapas, Diospa yanapakuynintam chaskichwan llapallan iñiqmasinchikkunamanta. Paykunawan kuskam kachkanku “allin yuyayniyoq confianza sirviente” paykunapa rantinpiñataq willawanchik Cuerpo Gobernante. Sapa kutim allin yuyayniyoq confianza sirvienteqa espiritualpi mikuyta qowanchik qellqakunapi, huñunakuykunapi hinaspa asambleakunapipas (Mat. 24:45-47; tupachiy Hechos 15:6, 22-31). Chaymantapas congregacionpiqa kanmi allin tanteaq cristianokuna, aswanqa kanku ancianokunam, paykunaqa preparasqam kachkanku yanapayta hinaspa consejota Bibliapa nisqanman hina qonankupaq (Isa. 32:1). Allin yanapayniyoqmi kanku cristiano tayta-mamayoq mozo-sipaskunaqa: Diosmi tayta-mamankuta churan paykunata yanapanankupaq. Chaymi paykunata sapa kuti yanapakuyta mañakunanku (Efe. 6:1-3).
19. ¿Ima bendicionkunatam chaskinchik Jehová Diospa yanapakuyninta tukuy tiempopi maskaqkuna?
19 Arí, Jehová Diosqa imaymanata servichikuspanmi yanapawanchik, chaymi allintapuni yanapachikunanchik. Huk kutipi Israel nacion kasukuptinmi, rey David Jehová Diosta kaynata nirqa: ‘Ñoqaykupa abueloykum qanman hapipakurqaku. Paykunatam librarqanki qampi confiasqankurayku. Qamta qayakusqankuraykum librasqa karqaku. Qampi confiasqankuraykum penqaypiqa karqakuchu’, nispa (Sal. 22:3-5). Jehová Diospi confiaspa chaynataq yanapayninta maskaptinchikqa, manam penqaypiqa kasunchu, aswanqa suyakuyninchikpas cheqapmi kanqa. Ñoqallanchikpi mana confiaspa Jehová ‘Diosman vidanchikta entregasqanchikraykum’, kunanpas achka bendicionkunata chaskinchik (Sal. 37:5). Tukuy sonqonchikmanta Jehová Diosman hapipakuptinchikqa chay bendicionkunaqa wiñaypaqmi kanqa. Davidmi qellqarqa: “Tayta Diosqa kuyanmiki allin ruray arreglotaqa. Payqa manam saqenqachu payllamanña iñiykuqtaqa. Diosqa wiñaypaqmi waqaychaykullanqa paykunataqa [. . .]. Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Sal. 37:28, 29).
¿Explicayta atiwaqchu?
• ¿Imanasqam confiananchik Jehová Diospa yanapawasqanchikpi?
• ¿Ima ruray hinam kanman Diospa kamachisqankunata mana kasukuyqa?
• ¿Imakuna kaptinmi humillakuq kananchik?
• ¿Imaynatam Jehová Dios kunan tiempopi yanapawanchik?
[Kay yachachikuypa tapukuyninkuna]
[12 kaq paginapi dibujo]
¿Maskankichu Jehová Diospa yanapakuyninta imatapas ruranaykipaq?
[13 kaq paginapi dibujo]
Evaqa qepancharqam Jehová Diospa llapallan kamachiq kasqanta
[14 kaq paginapi dibujo]
¿Imaynam kanan karqa Agar angelpa nisqanta kasukunanpaq?